mi(sual).com

Kum tam a liam ta. He khawvela bu ka khuar vena champha-a Rose par ngei min hlantu nula samsei avang khan, he angpar hi pangpar lunglem neilo ani tih ka hrechhuak a ni lek fang.Pangpar ngainat hlawh leh mite ngaihzawn rawn ni reng chung si a, nun phakar, dawihzep leh hmasial tak ni bawk si chu Rose ngei hi a lo ni.

Ka ngaihzawn Dingdi par ang lo takin, rawng chi hrang pathum- a var, sen leh eng pu mi a nih avang ngei pawh hian; pangpar rilru nghet pu mi a ni lo tih a chiang. A mizia thup tumin, rawng chi hrang hrang a lo pu kual vel mai mai hi a lo ni.

Keini Kristiante hian,”Five petals of Rose symbolise, five wounds of Christ”kan ti thin a ni lawm ni kha? Chumai a la ni lo, Rose sen ngei mai hian, Kristian Martar-te thisen a la entir cheu a sin. Engvangin nge ka Lalpa tawrhna leh Martar-te thisen chena, Rose lungmawl hi a lo inrawlh mai le?

Heti chunga”Love and beauty”entir nana kan la hmang fo hi chu, a phu thlawt lo. Dipdal leh tlawhpawh hlau, pangpar hmasial tak a ni asin maw le. A parmawina thai chhe vekin, hriamhrei hriam tak tak in a inchei a. Thlai dang mize entawn reng rengin, hnah hring a pu leh lawi si a ni.

Mite khawih leh nel hlau reng rengin, chep takin a nung a. A khandaih pai a thulh chuang si lo, fel lo leh nikhua lo nih hlau em em siin, a par mawi thei ang ber turin a tlangzarh leh hlauh thung. Nun verther leh chinawm paitu chu Rose ngei hi a lo ni e.

Rome-ah chuan, thuruk ril ber an sawina pindan chungnung bulah Rose an dah thin. Hei hian thildang a entir lo, nun inthukru paitu a ni tih a ti lang.

Chuvangin, kha nula samsei ngei mai kha Rose ngei a lo ni. Rimtuiin mawi hle mah se, khandaih hriam tak a lo pai reng si a. A kianga awm duhin, chak hle mah ila; mi kiansan leh thin. Ka tan a tawngkam tha, kam khat pawh min hlan se; ka thinlung hliamte a tuam dam ang tih thu hi hrilh lo ka ni bik lo asin. Mahse, a ka a áng si lo.

A hmangaihnaa bual at in ka awm em ni? Beisenain ka nghak a, a liam a. Rinnain ka sawm a, a verther a. Chaknaa ka kaih pawhin, a tlu sawp a. Hmangaihnain kâwlêng ka thlir a, a dur leh fo si thin. Patling thinlung mittui hi a khandaih hriam ngei chuan tai thlerin, mittui ten an ramri kham an pel leh thin.

A mawina leh thatna te tem tawh lo tura thutiam zai sa-in, ka kianga zâl lo a sakruang chu diriam takin ka chûl vel a. Deusawh leh hmusit takin hla do ka chham a, ka huat duhna thinlung meipui chuan ka hual vel a. Mahse, he Rose huat tum leh theihnghilh tum chu, chhum chhah taka hleuh tum ang vel mai a ni-a theih loh.

Mi sawm i thah chuan, mi buru leh rapthlak bera chhiar i ni ang a; thi tlak i ni. Mi za i thah chuan, ralrama pasaltha hratkhawkheng i ni ang  a; chawimawi tlak i ni thung ang. Hmangaihnaa pasaltha fekfâwn ber ni tur erawh chuan, Rose lungmawl tam tak i sah thlak a ngai dawn a ni.

Hmangaihna pasaltha ni turin, tu nge mi tanpui ta ang le?

This entry was posted on Thursday, July 26th, 2012 at 11:37 am and is filed under Luangliam, More than words. Both comments and pings are currently closed.