mi(sual).com

Kawl kila Ni lo chhuak sawn ka tan lungngaihna darkar tam min rawn hawn a, zâna ‘Zânlalnu’ pawn chu bawk chu! Aw… mi vanduai ka van i chungchuang tak em!

Sana bân pathumte an tangrual a, ka tan hun duhawm reng an vai chhuak duh si lo. Vanduaina chu ka farnu ang maiin kan inhnaih a, hun a liama, ni te pawh mahse vanduaina bawk chuan ka thlahlim ang maiin min zui a, nihliap pakhat hnuaia hlim dawng za ang maiin kan in then thei lo a ni ta si.

Ka hmangaih Kim Kimi’n “Van hmun ropui, chatuan ram” min pansan tak hnu kha chuan THIHNA hian ka lainâ leh lainatte reng reng chu hnaih tawh lose ka ti em em thin a. Mahse keimah hi min zuam bik a, min rawn pan a, ka kianga awm ve tawh apiang chu min lak kian sak ta zel anih hi! Kei ngei pawh hi min la la awm si a…
more

Kum 2008 daih tawh khan kan thianpa chu KTP Blanket su a hnatlangnaah tuiah tla in a lo boral tawh a. Khatiang teh tawpa beisei loh lutuka thihna thleng kha a nu leh pa unaute tan a nat tur zia kha ka lo hriatthiam pui miah lo. Mahse thil reng reng chu a taka tuar leh tawng ten an lo hrefiah nge nge thin. Ka va hrefiah ta em!

Engkim ka hrilh, khawi lo vahchhuah ni a pawh ka thlim ngai miah loh, khum khat a mu dun a, thuruk engkim ka hrilhin beisei loh leh ka inrin hma hauha min boralsan (Tuia tla hlum) kha a na em a, nupa tang then sawi nana “Dar leh lam sahthlak” an tihte hi chu a natzia sawifiahna dang awm tawh loh vang zawkah ka ngai thei tawk a. Mihring tawng leh Vantirhkoh tawngte hial pawn a natzia hi sawi dawn I la, ka sawi thiam chuang lo ang.

Kei ngei pawh hian ka lo ziak ve tawh a, thiam lo tak chungin, kan inzui nasat zia te, ani tel lo chuan Mupui thla lehlam nei lo ang chauh ka nih zia te, mahse tunah chuan a tel lo a hringnun hman hi ka A AW B zir thar leh rih a ngai dawn ta a ni. Eng chen tak zir ngai ang maw?

THIHNA CHU!
Chu pindan thim raihah chuan a thiam bikten khawl chikim nen ka hmangaih chu an enkawl mek a, a dik tak chuan NUNNA pek leh theih hram an tum a ni mah zawk. Mahse khawvel thiamnate chuan kin ni a nei a, tawngtainate pawh chhan loh tum a awm ve thin. Chu chu a lo inrual palh a nih chuan ka hmangaih chuan tho leh tawh lo turin thlan thim min pansan dawn a ni.

Sum leh pai lamah thingtlang khaw pakhata dai kil lama pahmei chhungkua ang chauha pachhia ni mah ila, hmangaihte nun chhanhim nan chuan puk chawp leh tanpui pawh kan zak lo ngam tawh mai aniang chu tih hmachhuanin Khawvel thiamna hman tangkai ka tum a, mahse NUNNA chu nunna a ni a, a THIH tawh miau chuan chhan ngaihna a awm tawh si lo.

Ni e, khawvel hmanraw changkang ber ber-in he rama a thiam ber berten chhanchhuah leh ngei an tum chung pawn, chhan tur a awm tawh si lo! Mual min liam san ta lo thei lo a ni.

THUHNU KA DAWN A!

Sawisel leh phunnawi pawh nei ngai lo a nih vang ngawt khan a zawh bak nghawngkawl ka lo bah tir a, a hnungah ka zui hman reng si lo a, khupruh sawh dawp dawp a tluk chang kha a nei ve lo thei lo a ni.

Kum khaw daih reng kan lo awm si lo a, engvangin nge Khuanu rorel chu tuar bik hliah hliaha kan inngaih ang a, VUINA hial kan thlen ang le. TAWPNA chu BUL kan tan hian kan siam tel ve reng a lo ni si. AWMLO ata kan lo awm a, AWM ata AWMLO kan nih hun pawh a thleng lo ang em ni?

Dik tak chuan khami ni khan Êk-Inah leh zel ka Biakhlatna kha keng lut lo ni ila, tuiah ti tla in a siam thiamte ka pan kher a ngai lo ang a. He thu fahrah lutukte hi kan ziak lo tur a! ( A hun leh hmun hriat hi mifing nihna kawng khat chu a lo ni ngei e!)
……………………………………………………….
(100520120200)
(Thianpa Biaka nena kan chanchin hi zep tel ang aw….)
Inthianthatna hi a lo mak anih hi. Biscuit chhang dawng rual lek kan nih lai leh, tuk chawp motor lem kan khalh ve laite khan thian kawm ngeih tak tak chu ka lo nei ve tawh a, tuna ka thian ang tluka thian tha erawh ka la neilo, ka neih leh tawh pawh ka ring lo.

Zep nak emaw amah chu “Biaka” tiin kei chuan ka ko tlat thin a, sap hmingte pawh Biaka anih hma daih hian a lo nei ve tawh a, mahse keichuan “Biaka” tih mai hi kan ram thawhchhuah nen a inmil ka tive tlat! Bible lama hming chhuanawm tak tak ngaizawng a, an pi leh puten an tu leh fate hming an lo phuahsak, RV vela Bike tlawh vu vung vung thin tamna ramah hian Sap hming hi kei chuan nalh ka ti ve lem lo e. (RV a kal ve lemlo, Ruthy-i tih KTP tawngtai inkhawmna lama tanna chang leh si angte erawh hi chuan kei ve tehlul hi min ngaizawng se, ka awlsam dawn mang e!)

Keimah tak nen hi chuan kum 2008 kum laihawl vela tang khan kan intawng tan a, ka zirna lamah luhthuk ka tum ve lai tak tak khan thla hnih/thum vel chu kan inthlah leh zuai a, mahse chu bak chu kan inzui nitin chu a nih tak hi.

Ka khawlai leng velte hi ka ler reuh phian a, hmelduhte hi kei pui hian ka nei ang zung zung a. Chutiang hunah chuan Biaka lo chu hmatheh tur ka neilo a, ani lah chuan min phatsan a hnekin a phur phurah a lo tang a, a tawp a tawpah a zakzum zawk kei hian hmaisen ka hmu leh nge nge thin!

Manchester khawpuia piang tur ka nih vei nen, ka nu leh pate Khuanglengah an lo awm ta tlat si a, loh theih lohin Khuanglengah ka pian a lo tul ta si a, keiin ka lo piang duhlo e ka tingawt thei tawh si lo. Ka luhlul luatah ka thianpa, Ryan Giggs leh Paul Scholes-te an pian hnu fe ah ka lo piang ve ta chauh a, London emaw Paris-ah tal emaw ka ti tang tang chungin Khuangleng-ah tho chuan ka rawn piang a.

Zirna lah chu kan Sawrkar chak vaklo tak, insawi chak em em si hian thingtlang lamah a tha tha dah talo chuan Khawpui lamah a hung lian ang teh hnur a. Loh theih lohin nu leh pa leh unaute chhuahsanin Zirna sang zawk beiseiin Khawpui lamte chu kan han pan ve leh ta a, chutah chuan khawharna leh lunglennate chu a thlawn hian kan dawng leh zung zung lawi si a, Biaka bawk lo chu belh tur kan nei lo leh thin.

Sawitur a tam mang e, khawi hmunah pawh Biaka chuan min zui a peih reng a, khawlum leh dai, ruah sur leh Vur sur karah thlengin. Sawisel leh hmel hmuh nuam lo reng reng a nei ngai lo.

Thinrimna te hi kan lo pianpui ta si a, dah that mai mai em atan chuan tiin kan hmang ve leh zauh zauh thin a, chutiang hun ka tawn chang chuan Biaka laka tihlan chang ka ngah khawp mai. Ka hlim hmel mah a chhiat tehreng nen hian ka lungngai hmel ka hmuh fo a, a hmaa ka tah takte pawh a awm fo asin. He tiang hun harsa leh puitu ka ngaih em em lai hian Thianpa Biaka hian min hnem a, min kalsan ngailo.

Ka hlimna min tawmpui a, ka lungngaihna min tawrhpui thintu thianpa Biaka hi, zep nak emaw, a hming pum chu “VanlalBIAKhlatna-a”, a sap hming pawh i hriat kha…. “a” ngei kha a lo ni e…

…………………………………………………

Similar Posts:

• A, AW, B hla
• Mi chesual ve te..
• Zawngte leh Satel
• Tuitla!
• Ka ring reng a ni

Recent Posts:

• Comedian Search 2012 Fiamthu-2 (Link dik leh thei thei tawh lo veeeee!)
• Ka Mit Laa, Ka Rilru Khawihtute
• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}

This entry was posted on Monday, August 6th, 2012 at 9:30 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.