mi(sual).com

“He nula hi i nupui atan i nei thei lo ang. I nei dawn anih chuan he in hi i chhuahsan a ngai ang” tih chu Johny-a pa thu chhuak chu a ni ta mai. Hemi zanah zet hi chuan Johny-a chu a mu lo a ni ber mai. A hmangaih Lucy hmel chu a mitthlaah a lo lang a, chutih lai vek chuan a pa thu a awih a, a ro sum leh hausakna tam tak a neih tur chu a lo lang zut zut bawk a….

Johny-a hi sumdawng hausa tawn taw fapa mal neih chhun a ni a, a tet lai atanga enkawlna dawng tha tih takah lehkha a thiamin a pa pawhin a sumdawnna enkawl chho zel tura a lo suangtuah leh chutiang tura a enkawl chu a ni. Amah a puitlingin a hleitling a, a hmel a tha bawk a, nula mai bakah Mi nu te lamin an ngaihzawng a nih loh pawhin an fanu tan an be tha em em vek mai a ni.

zan khat an thian hoa Bazara an kal chu a nun tidanglamtu a tawng ta tlat mai le. A thiante pawhin an hau a, nawmchenna mai a hmang turin an fuih thin…… chu nula chu Bar Dancer… Bar-a mipa lo kalte hmuh tura lam chunga in phelh ruak thin a ni tlat mai le.Mahse Johny tan chuan Rose par thianghlim ber, mawina leh duhawmnain a thuam LASI nula a ni miau si..(atawi zawngin sawi ta mai ila.. an in hmu a, an inkawm nel a, an leng duna, an infawp a, an in ning thei ngang si lo). Chutih lai chuan Johny-a pa lah chu pa rorum tak, a thu chhak chhuak tawh thulh duh mai mailo mi a lo ni si. Lucy hnenah chuan a pa rilru zawng zawng a hrilh ngam vek si lo..Duhthlanna chu a ma siam a ngai ta si a…

“Lucy, i tan chuan eng pawh tih ka huam asin. Mahse kan in neih chuan retheihnain min hmuak nghal dawn a ni. Mahse, rethei reng chuan ka siam lo ang che. Ka thawk anga ka thawk chhuak em em ang. Mahse tun ang hi chuan kan awm reng thei lo a ni. Min kiansan mai rawh” …”Johny, ka hmangaih che a, i mi hmangaihna hi ka tan a hlu, min nei duh anih chuan eng pawh tuar ka huam e. I bula ka awm hi ka tan chuan a hlu ber fo ang” tih chu Lucy chhanna a ni…….

Engkim huam a, hmangaihna vanga in nei an ni bawk a, an hlim ve hle mai. In duh taka an nupa nun an hman lai chuan thla ruk chu a lo liam ve ta reng mai. Hmangaihte bulah chuan thla hi a lo va rei lo em! Mahse khuanu hian mihringte kawngah hian hlimna ngawt hi a lo dah bik miah lo mai. Tlai khat chu Johny-a hnathawk haw lam chu a chuanna thin Bus-ah chuan Lucy hmuh hlan ngah hlel takin a chuang a, a mahin a nui leh sak thin. A lo muthlu a ni ang. Au vak vak thawmah chuan a harh hlawl a, a hmuh hmasak ber chu an chuanna Bus kawngthlanga a tlan liam tur chu a ni.. a ri bur a.. engmah a hre zui ta lo.

A han harh chhuah leh chuan a taksa chu a hik vek a, na erawh a hre lo. An chetsual atanga ni 7 naah Hospital-ah a harhchhuak chauh a ni. Theihtawpin doctorten bei mahse a nunna an chhan a, mahse KE chuan a kal ngai tawh dawn lo a ni. Chumi an han hria chu Lucy nen chuan an inkuah a, an tap dun tlawk tlawk mai a ni. A hmangaih Lucy chu engtinnge a awm tak ang? Piangsual nupui atan chuan a va lainatawm em!

Kum a lo vei a, Johny-a in nghahna, a kut a ke chu Lucy a ni. Atan chuan a Lucy chu a va hlu em! Mahni pawh a che sawn thei lo, beidawnna in a hual vel kha Lucy vangin nun beiseina a nei thei a ni si a. Hun a kal zel a, a nupui hnathawk chu a lo haw tlai thei riau mai a, zanah rei tak thleng chaw ei lo a a lo nghah ngawt ngawt chang a awm zeuh zeuh. An thian tha lo leng lut ten Lucy an rinhlelh thu an sawite chu ngaihthlak hrehawm tak vek a ni. Mahse, ani lo chu khawvelah beiseina a nei si lo…..

Tuk khat chu a harh tlai deuh a, zing dar 6 vela a harh chuan an Room-ah chuan thuamhnaw in pack sa thlap a lo let phung mai…Lucy chu amitin a han zawnga a hmu mai lo. A!.a ei tur siamin chokaah a awm a ni ang. Breakfast chawiin room-ah a lo dak lut tep tawh ang…a tha zawngin a ngaihtuah lui a, mahse a phenah chuan hlauhthawnna chu a lian em em si. Thei leh thei loin a Wheelchair-ah chuan a thu kai a, chutihlai tak chuan an corridoor-ah chuan an room lam pana dimte, inthlahrung taka pen thawm a lo ri phei chu a hre thei..chu pen thawm chu a pen a ban em em a, a thawm a zawi bawk..mahse, a hmangih Lucy pen ri chu a ni. Kawrkhar chu zawitein a loin hawng riai riai a, Lucy lu a lo langa, mahse..engatinge? Lucy chu a kun tlat a, zawite in, “Duhtak, min hrethiam rawh…. ka chhuahsan dawn chea ni….” A ngaithlazo lo nge a thusawi dang chu a hre thei tawh lo….. Chu second rei lote chhung chu chu hmangaihna pindan ni thin chu a reh vek a..thawm dang reng reng a awm lo. Lucy chuan dimtein kawngkhar chu a khar a, pawnlam panin muang changin a pen phei thlap thlap a…

Johny-a rilru chu a vak thui hman kher mai. An inngaihzawn laite, an inneih hnute, an nun hlui hlim taka an hman dun thin zawng zwng te chu a thinlung phekah chuan a in keu let tup tup a.. An va hlim dun thin tak em! He khawvel hi hmangaihna avangin an lo sual dun tawh a, din hmun harsa ber a an din lai pawhin hmangaihna avangin an tuar dun a, an tuar chhuak thin a nih kha. Mahse, hmangaihna, a lo chhuan ve em em thin kha Lucy kawngkhar khar ri chuan a ti chat a, a tichhe zo ta. Pen ri a la reh lo..muangchangin a ri phei zel a. Johny-a, mahni ke pawha ding thei lo, puih ngai, mahni a in thiar thei lo, puih ngai chu a khawvel, a hmangaih, a engkim chuan kumkhua atan mang tha tiin a kalsan mek a ni si a.  Rawh..Tunge enkawl ta ang le? Khawvel hausakna zawng zawng aia a thlan Lucy tel lo chuan a nung zo dawn em ni? Khawngaih dilin Lucy chu a ko let dawn em? A in ngaihtuah nasa.Ko kir rawh..ko kir rawh.. A mittui a hnam kar atang chuan a lo dak chhuak a, a ka a ang zuau a…mahse engmah sawi chhuak loin mittui karah chuan a nui sak a…….

Similar Posts:

• Hmangaihna Ka Ngen ani
• Ka ar thai
• Tu hmangaihna nge thuk ber ang?
• What is Love? What does it mean to me?
• Love Theory!

Recent Posts:

• Ka Korean Movie hnuhnawm tih te:
• Chutin-khatin min lo sel elo?!
• Mizoram leh Education ?
• Naute hrisel I duh em? Ui vulh rawh!
• Mumbai pawh a nung ve leh tan ta…

This entry was posted on Wednesday, October 17th, 2012 at 1:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.