A hmel en chuan kum 50 ai maha upa niawm niin a hmai a thlantui rawn luang chu a han hru phak a, chiang deuha en tan chuan a hmai te chu duk nasa viauin rim taka hna thawk thin ani tih hriat mahse a hmaifang erawh a chhe hauh lo tih an hmu ngei ang. Em khat tlata nepnawi hrang hrang phur khat tan chungin a kutin vei lamin vur bawm sen hlui tawh tak a khai a, a kut dinglam chuan a fanu ni ngei tur naupang kum 8 mi awm vel hi kaiin chu hmeichhe naupang, hmel felfai tak mai leh ngo ving veng tak chuan a nu ina a kaih lohna lam ah chuan kuhva hring hi a khai bawk. Hmanhmawh takin lammual sir ah chuan an kal hlawk hlawk a, an bul lawk khelmuala inkhel hmuhnawm tak mai mitam takina en tura an rawn kal khawm chhan chu ngaihsak awm pawhin an lang hek lo.
Nia, anni nufa tan zawng inkhel lam a pawimawh lova, chu ai chuan chawlhlawk laia mipui zunram thiar velina an dawr awlsam theihna tur khelmual sira hmun awl leh mipui tamna lam chu an pan a ngaiin chuvanga an thil zawrhna hmun kopang chhak lama thutna atanga kalsawna chulam pan chu aNni. Mipui tamtak zingah chuan an hmelhriat an awm lova, an mahni hria an awm heklo. Nilengin hah takin mipui sang tamtak karah chuan badam,kuhva, meizial leh vur te chu an zuar kualin ni a sat avang em avang chuan an thlantui te pawh a luang nasain an hmel en thuak pawhin chu mite nufa chu an hah tih chu a hriat a, chiang lehzuala entu tan phei chuan a fanu bula ding chunga amah dawrtu te hnena pawisa kir mektu nutling chuan rilru hah avangin nizan lamah mutmu a tuah tawhlo tih a hmel atang chuan an hre ngei ang le.
Chu Nu kan tih mai chu a hming tak erawh a pa ina lungsi taka Zomuankimi tiha a phuah niin a fanu kum 8 mi nena Aizawl veng tlabirh zinga pakhata mi in luaha khawsa mek ani. Lehkha thiam a nihloh avang chuan atan zawng kuthnathawh bak hrawk chawmna kawng a awm lovin a rem rem nepnawi te a zuar kual thin a. Kawla ni chhuak chhiarin nitin a thil zawrh lai nen a chhuak a,thil chi hrang hrang a bikin Burma lam chhuak DVD atanga radio leh mobile charger thlengin a zuar kual a, a thawhchhuah beitham te atang chuan amah leh a fanu mahmawh ang te, a bik takin a fanu zirna lam mahmawh te phuhruk a tum hram hram thin.
Nitin a chhuak a, a rem lai laiah a thil zawrh te thutpuiin mi hauh hlau reng rengin a awm nileng a, hauh lah a tawk narawh. A thenin “Ka dawr kawtah inpho kan phallo” “ A thenin, kan veng chhungah inzawrh kan phallo” antih loh leh a thenin chhuanlam hrang hrang siamin an hau bang lova, an hnawt fo va, mahse a vui ngailo. A vuilo mai lovin a chan tawkah a lungawi a, hah takin a hrawk chawmnan a thawk a, Aizawl khawchhung a bik takin kawngpui tlangdung a suartluan thin. Vawinni ang, thil tihpuini emaw inkhelpui ni ang te hi Pi Muani tan chuan malsawmna a tling thin. Hetiang ni ang hi chuan nepnawi leh kuhva hring bakah vur te hi mita lachhawngin mipui hnenah a zuar kual a, hah thin mahse hralh a tam thin avangin hlep pawh nidang ngaihtuah chuan a tam a,theihtawp a chhuah thin.
Vawin pawh hi Inter-VC football final anih avangin mi an tam a,chawlh alo ni nen Pi Muani pawhin a fanu hruaiin zawrh tur a hma atangin Bujia, Badam te leiin a pack chhawng a, Pi Siami hnen atangin kuhva hring ala teuh bawk nen hma taka an chhuak nufa a. Mipui an tam bawk nen an hralh thain an vur zawrh phei chu a zo hma hle a, hlep pawh nidanga a hlawh thin let aia tam mah ani dawnin nidang chu nise hlim takin an nufa in an inzui haw anga, phur takin rawng an bawl nufa ngei ang. Mahse, Pi.Muani chuan chulam chu a ngaihtuahlo, a rilru ah nizana an inleng te leh an thu rawn sawi te kha a chamin a hmalam hun, chu ai mah chuan a fanu hmalam hun a dawnin thimin a hria a, kal dan a thiam lova, kal ngaihna a hre lo ani.
Pi.Muani, a hming tak Zomuankimi tiha a pa ina ram hmangahna thinlung nena ramhnuai atanga a rawn phuah hi tuna Burma ram chhung nita a Mizo khaw pakhata piang niin a pian hian a Pa hi ramhnuaia MNF a zawm avangin a awm lova, a awmlo mai nimai lovin Pi.Muani kum 1 a tlin hnu lawka a pa hian a hmu ve chauh va, a hming erawh a hunlai a Mizoram dinhmun nen ram hmangaihna thinlung atangin “fapa ka nei anih chuan Zomuankima, fanu anih chuan Zomuankimi tih ka phuah ang” alo tih lawk avangin alo pian pawh khan phuah ani reng ani. Mahse, khatia India sipai ten hma an lak a an beihlet avang khan MNF dinhmun kha a chhe sawtin hnam sipai te tan pawh chhungte tlawh a ngamawm lova, Burma rama awm mizo te behchhana “a ralmuang deuh e” ti a MNF an bihruk thin te pawh Burma sipai te an thaha an camp an beih sak hnu kha chuan a theih ta lovin MNF sipai te tan pawh Burma ram chu a ralmuang ta lova, an chhungte tan pawh thinthi a mut a theih ta loh.
Khatia Burma sipai ten beihpui an thlaka MNF an vai vak a an ram chhunga an camp te an beih khan hnam sipai tam tak an that a, chung zingah pawh Pi Muani pa chu a boral ve a. An chhungkua an bul sa nen a pa ber a boral hnu phei chuan an harsat a zualin an chhungkaw tan chuan an khawvel a thim hle. Tichuan harsa taka khawvel an hman chhoh hnu chuan Pi Muani pawh pasal nei rual alo ni ve tain tuna a fanu Pa hi pasalah neiin anilah chu accident avangin a boral lehnghal a. A Nu a boral tawh a, a thisen zawmpui a nau mipa leh zungawlvei niin a inngahna tlak silo. Chutah Burma sipai rorelna a chhiain ram a rethei a eizawnna a harsa nen an thenawmpa te chhungkaw pem tur zuiin Mizo te tana Jerusalem Aizawl chu la hmulo mahse Pi Muani, Mizo nu chuan “mahni ram ani alawm, helam ai chuan a zia ang” tiin a bel ta a.
Tichuan an nufa chuan mi inhnuai luahin thlamuang takin mahni ram ngeiah “kan 2 hrawk chawmna zawng ka huphurh love” tiin an han inbengbel ve ta a. Mahse a rin ang anilo, tawng lamah lah tlemin awphawi alo dang nen. Kan Mizopui atih a, an hriat lova alo inhnem pui ve te chuan “Burma Nu” anti fova, a thil zawrhna ah lah auh nawmnah, hmuhsit te a tawk fo thin. Khawtlang hruaitu te lahin a engemaw hlekah an in chu an chek fo va, zu rim nam thur thurin “Burma ho hi ruihhlo zawrh in ching, nang pawh hi i kawllo maw” tih paha zahpah neih lova an inchhung an hai darh chang a tam fo thin. An theih ang angin a fanu chu Biakin lam te pawh a panpui fova, mahse midang inchei nalh tak tak kara inthlahrung taka va awm chu a nawmloh bakah anlo uksak vaklo nen a rin angin Pathian Biakna ina kal chu nuam anti lova, bakah tum khat an Kohhran Upa in “Burma ho lah hi Kohhran hi inven nan in hmang a” alo ti bawk nen, a fanu nen chuan an tan chuan an inluah chep taka Pathian biak chu an tan a hahdamthlak zawk a, an biaka an hnaih zawkin anin hre bawk.
Nizan khan an khawtlang hruaitu te an rawn leng a, kar hmasa lama Burma mi(Kawl) ina mizo taxi driver a that avanga buaina kalzel avangin Burma mi dan lova awmte chu hnawhchhuah tur tiin anlo rel ani awm e. Chumi thu chu an rawn hrilhin Pi Muani te nufa chu an veng atanga kar khat chhunga chhuak turin an rawn ti a, thiamthu leh ngenna a sawite pawh an bengkhawn sak heklo. Chung thilte avang chuan ani Pi Muani rilru chu a hreawma a hah ni. A bula kuhva hring khai chunga ding a fanu chu a en a, ani lahin thil a hrethiam lova, a hrethiam zawk a nu lahin engtin nge an awm dawn a hre heklo.
Mipui tamtak karah chuan a rilru a kawm a, a hrethiamlo ani. Ani taka, a sakhmingah pawh Zomuankimi tiha a pa, Mizoram tana a nun hlantu fanu chu Burma mi tiin ramdang hreawm atanga a pan leh a thlamuanpui Mizoram chuan a hnawl a, ka hrelo che ati a. Chutihlai erawh ram dang atanga British hunlaia rawn tawlh chho leh rambuai lai pawha India sipaite hnena heka ram tana inpe hnam sipai tana thawk chhuak duhlo hnam pakhat, sakhaw dang zuitu lani zui te chu an mahni pualin Mizoram chuan chenna a siam a, an hnam inchei te pawh Mizo hnam Incheina mawi berah tute emaw chuan an la thlansak zui si.. MIZO inti ngamte Mizo a kan chhiar a, kan unau min beltu te kan ngaihsak a hunin chutihrual erawh chuan hmaihnih nei Mizo leh Thinlung taka mizo te erawh kan thliar tham a ngai si.. Awmdan thiam a har, mahse
Zoram, i puanven sawichhing a hun e.
Thola ding ta che, Chuti lo zawng chimralin i awm thuai dawn si.
(Ka post 50 na chiah, hriat loh karin post 40 chuang kha chu ka tlin vat.Mahse ka half century vat dawn emaw tih laiin chhang a khat ta raih tlat a, a tawpah chuan ka tlin ta hram anih hi. Msual.com hnenah ka lawm mawlh mawlh e, zirlai tamtak min zirtir avangin)
November 1st, 2012 at 9:32 pm
Chhiar dawn ang hmiang.
Report this comment
November 1st, 2012 at 9:52 pm
Lame, naktukah ka chhiar ang, a ngaihnawm leh ngei ang tih ka hria. Muttui vek u le
Report this comment
November 1st, 2012 at 9:58 pm
mu hma dawn ve
Report this comment
November 1st, 2012 at 10:40 pm
A va tha ve…a dik bawk sia..newspaper vela chhuah chhawn chi anih hi mawle.
..
Report this comment
November 1st, 2012 at 11:14 pm
Congrats on half century!!!!!!!!!
Report this comment
November 2nd, 2012 at 8:02 am
A ngaihnawm reuh
.. Ni thar hman nuam vek u
Report this comment
November 2nd, 2012 at 8:59 am
Va tha ve aw!
Report this comment
November 2nd, 2012 at 10:44 am
Congrats. A ngaihnawm khawp mai.
Report this comment
November 2nd, 2012 at 12:14 pm
Post a tha-in post 50-na ka lawmpui a che
Report this comment
November 2nd, 2012 at 12:28 pm
ka hnuk a ulh deuh dawn chu maw le
Report this comment
November 2nd, 2012 at 12:43 pm
Mirror of the day ah ka puag e, ‘Mizo Society hian lal a hrawt em?’ tih nen. Ka chhiar thuak a, a thra hle mai.
Lo lungngai su ka unau te u, a rei tawh lawng
Report this comment
November 2nd, 2012 at 12:45 pm
Last para khi ka duh lutuk
Report this comment
November 2nd, 2012 at 1:11 pm
Tawngtial thupui a nih avangin ka chhiar lawk lo va (Kei paw’n Hachiko ka post nangin). Mahse, chhiar man a awm e. Hringnun i thlirthiamin, thuziakin mi rilru i hneh thiam ngawt mai..
Report this comment
November 2nd, 2012 at 8:43 pm
Dawn ti sei post a ni ngawt a lawm le. Thu ziak tha tak a ni.
Report this comment
November 3rd, 2012 at 3:33 pm
Report this comment