Tlangval, luck i duh chuan maw..!!!

November 8th, 2012 9:41 am by Chemtatrawta

Kan ti nek nek a, kum tawp lam, a hmawr bawkna lam kan thleng chho leh tan ta. Facebook lama status update te lah chuan Krismas hmanpui tur tih lam an awn chho hrut hrut hlawm a, chutih laia “Hei hi ka nula, keima chanpual” tia kuah lum tur nei lo zaleng naufa, Sandman, Zualbonez, Dr Mahminga Sailo, Tuaisiala, Ignatia, adt ho tan tal pawh, midangin an hlawkpui loh pawhin, thu hlu tlem azawng a lo chan theih tak mialin ka rawn pet chhuak ve tawp anga, an pet goal tak leh tak loh chu an umzui danah lo innghat ta mai se.

Tlangvalte tana hriattur tam tak hi a awm ve a. Ti deuh hluai ila, a pa Maiseka te hunlaia awm leh mawi tam tak kha tunlaiah chuan tih miah loh tur tam tak a awm a, chutih laiin khang hunlaia tih mawi lem lo tam tak kha tih ngei ngai ta te pawh hi a awm ve a. Hun thar a lo in herchhuak a, thil thar, mihring thar an lo herchhuak a, tihdan phung tam tak pawh a danglam chho zel a. Chuvangin, tunlaia nula tam takin mipa laka an beisei tlem azawng i lo thlir ho teh ang.

1. Rinawmna:- Hei hi nulate hian an ngai pawimawh vet vet khawp mai. Hmanlai anga nula thei tam apiang luck anga kan ngaih hun kha a pel tawh a, hmeichhe pakhat tana in dahtha(commit) ngam mipa hi hmeichhiate hian an ngaisang tlat tawh. Ngaihzawng kawp teuh teuhte hi zahthlak lamah a kal tawh a, miin an ching tawh lo. I lo ching thin anih pawhin len tar i tum a, mualpho i hreh lova, i len tar hnua “Tar Hur” nih i hreh loh chuan lo chhunzawm zel tho la, i kutah a innghat e.

2. Zuk leh hmuam :- Hmanlai kha chuan meizial zu te hi chu an ‘pa’ deuh sawt hian kan ngai thin a, mahse tunah erawh chuan hun a danglam tawh. Tlangval ha fai ser sawr leh thianghlim tak hi nulate pawhin ha bal deuh, ka chhung dum huam ai chuan han “Lei insualpui” atan pawh an it zawk tawh tih hi hriat kar a ngai ta riau mai.

3. Ruihhlo :- HVa te tlangval lai kha chuan kut puam deuh ul kha nula lam khan ‘pa’ an tia, an star thei em em a, tlangval zu rim nam chek chek te kha “Perfume Zawlaidi” atan an hmang thin a. Ngaiteh, nula ho an fing a, khatiang tlangval kha chu kum 4/5 lekah laktlak lohin an awm zel tih an hrechhuak a. Tunlaiah chuan, zu leh ruihhlo pawh ngaihsak lem lo, party leh inhmuhkhawm, picnic vela rui taka hlim thin tlangval ai chuan, harhfim kara hlim thiam tlangval an ngai hlu a; chhungkaw buaina leh harsatna thlen huna harhfim pawha hmachhawn ngam lo tur mipa ai chuan, huaisen taka harhfim taka hmachhawn ngam tur mipa hi an melh zawk ta zel mai.

4. Mittui :- Rose parvuli, charice te ho vel chuan sawi se, hei hi a pawimawh ‘bon top’ an ti deuh kherin ka ring. Mipa tam tak hian hmeichhe rilru hmin nan leh an duh neih nan, hmeichhe tihchet nan ‘mittui power’ hi an hmang nasa hle a. Hmeichhe awm nem, rilru tawi tak chuan khawngaihna avangin mipa tan chuan a duh a pe mai thin. Amaherawhchu, hei hi hriatreng tur, mipa tap fup fup hi hmeichhiate hian Nupa nun dinpuia, fanau maltluan chawipuia, a nuamah pawh a HREHAWMAH pawh, kumtluanga run lumpui atan chuan an thlang ngai hauh lo. Harsatna tawh nikhua a, pa ber tap pur mai tur hi hmeichhe rilru dawn tawi tak pawh hian an hmu thiam fu ania.

5. Midang ngai pawimawh thiam tlangval:- Hetiang tlangval hi tunlaia hralh kal ber berte an ni. Mahni infak zut zut leh, nu leh pa thawhchhuahsa lo inhrosak puia, nula hmaa tuikeplung thehchhuah ching tlangval hi nula lam hian an hnawl tlat tawh. Hmeichhia chuan ngaihpawimawh ber a duh a, chumi a thlirna lamah chuan mipa, mahni nawmsak pawh pawisa lova midang tana penchhuak fo thinte hian an ngaihsakin, an ngai pawimawh berin an ngai nghet tlat a ni.

6. Tlangval taima, zing tho hma :- Mak deuh mai chu, tlangval zing dar 6/7 emaw, aia hmaa tho emaw han sawi chuan, hmeichhia hian “WOW” an ti tlangpui. Thil hoteah i lo ngai ngawt ange, chhungkaw pa ber, nupui fanau innghahna atan chuan zingkar nei lo tlangval hi nula lam hian an awt vak lo tih hriat a tha. Tin, tlangval eirawngbawl thiam te, engemaw tihkhawm nikhuaa a kal hma bik leh a haw tlai bik ni fova, mihriat loh kara a buai bik tlangval hi nula lam hian an hre thei em em bawk thin.

7. Incheina:- Hmeichhe zia zawng zawng hian he an thutlukna siam fo thin hi, a inhmeh tih loh rual a ni lo. I incheina atang khan nula lam hian i mizia leh i khawsak phungte, kawppui atana laktlak tak i ni dawn em tih an lo mitmei reng che ania. Tlangval thawhchhuah nei lo, zirlai chawmhlawm i nih a, Adidas, Nike, Puma, Reebok,adt ha thin ai chuan, mahni theihtawka inhlawhfa chawp pawha Adibas, Niek, Reehok ha ngam tlangval hi nulate hian an ngaisang tawh zawk.

Belh tur chu a la tam ang. Duh aiin a sei dawn tlat, comment lamah kan chhunzawm leh zawk mai dawn nia. Mizo tlangvalte u, i luck sawt teh ang u.