mi(sual).com

Thehmeh awmzia hi sawi kher lo pawha kan hriat vek a nih ka ring tho nachungin, kan sawi fiah ve rêng rêng teh ang. Thereng hrâm lai kan hmeh hlum chuan a reh hmak mai ṭhin a, chumi aṭanga a awmzia chu lâk niin ‘reh hmak,’ ‘reh duak,’ ‘reh vang vang’ sawinâ’n an hmang ṭhin. “Thereng vuak thlâk ang mai” tih leh “Pual lêng thlang tla” tihte nên pawh hian thuhmuna ngaih theih ni.

Kan lût a, kan luangliam a, kan lâm a, kan titi a, kan nui a, a tûl chuan kan ṭap zâ ṭhin. Puih ngai an awm leh inlungrual takin kan pui a, hnem ngai an awm leh thlamuanna bân kan phar lo ngai lo. Mi chi hrang hrang kan ni tih chu phat rual a ni lo, chuti ang chiah chuan kan thu phuh chhuah pawh a dang ngei e. Chu tak mai chu kan inpawhna a ni ang lawi bawk si. Magnet pawh + leh + chu a inpaih a, + leh — a inhîp zâwk ṭhin. Chuvangin mize inmil lo tak tak ni si hi kan nui ho leh dar dar chu a nih si hi!

Nimahsela, hun a lo kal a, kum te a liam a, tûnah zawng kum a uai thla tawh nge, vun a chuar tawh nge, lu a ṭuak tawh nge, tiang hawlin phei lai kan khâi tawh zâwk. He huang hi a nuam ka lo tih ve ṭhin tehlul nên, tûnah chuan a reh titih dêr mai. A ram mai ang chu ka ti phal teuh lo, mahse a nawmna erawh a hloh ṭhen ngei alawm. Site dang ka lût ve zeuh zeuh ṭhin a, post leh comment erawh ka pe ngai lêm lo. He huang hi ka tân chuan a nuam a, a nuam mai pawh ni lovin a mawi a ni. Nimahsela, heti ang reng kan nih chuan pêm rilru pu an awm mai ang tih te pawh ka hlau hlel lo ve.

Hawh teh u, i dinthar leh teh ang u. Midang el leh sên bânsan a, ṭâng dang bêl mai lovin kan vul lai i chên leh teh ang u khai. Site ṭhenkhat chu a ram titih tawh asin. Nimahsela, keini zawng i vawng nung zêl ang u. A hlutna chu member-te kutah a innghat a, a nawmna chu post leh comment pêkah a innghat bawk.

Sawi tûr a va tam tak êm! He site hi nula chu ni ngat se, kei zawng ka ngaizâwng (âtchilh) hial tawh ang chu! Chu chu HMANGAIHNA an ti! Sawi ve r’û…