mi(sual).com

‘Chawlhna Tuikam’-ah hahchawlhna prog. buatsaih dawn:

Chhimtlang Vision (CTV) chuan Programme thar “Chawlhna Tuikam” tih a buatsaih turah nimin khan a neitupa Pu HVL Lawma chuan sawihona hun a buatsaih a. Pu Lawmtea chuan he prog. thar hi zawhna leh chhanna ang hawi zawngin thalai te nun mil tura buatsaih anih dawn thu a sawi a. “Kan tih theih tawk ti turin theihtawp chhuah kan tum a ni,” a ti. He prog. a zawhna chhangtu tur Tv KL Biakchungnunga chuan Sam 23:1,2 changchawiin, he prog. hi “Chawlhna Tuikam” tih a nih thu a sawi a. Mihring nun a harsatna ruk nei, midang hnena sawichhuak ngam lo tan an zawhna te chhan sak an nih dan thu te tarlangin, nitin nuna kan buaipui zawng zawng hi buaipui chhan pakhat chiah kan nei “Chawlhna kan zawn vang a ni” tiin, he TV Prog. ah hian zawh duh nei apiang zawt turin a sawm a ni. He prog. hnuaiah hian topic hrang hrang, piantharna leh Kristian nun, ngaihzawng/hma-ngaihna (love life) chungchang, mipat hmeichhiat (Sex), Nupa nun, Fa enkawl dan, zirna lam, ruihtheih thil, chhungkaw lam, Pathian thu hrim hrim, mimal, chhungkua, hnathawhna chungchangah te harsatna nei tan a zawh theih dawn a.Heng bakah hian Mihring nunphung hrim hrim a harsatna nei te chuan, an harsatna an thlen thei dawn a ni. Question Box siam a ni ang a, Serkawn-ah chuan Tetei Store-ah Box dahin, Lunglei veng hrang hrang, a remchang laiah dah a ni bawk ang. A zawttu hming tarlan a ngai lova, Ph. No.2324482 (CTV), 2342407 (KL-a) ah te zawhna thlen theih a ni a. Mobile 9436147691 / 9436147261-ah SMS in a thawn theih a, chawlhnatuikam@rediffmail.com-ah zawh theih a ni bawk.

Mizo Thawnthu Insawisiakna Leh Thu Inziahsiakna Buatsaih Dawn

Lily Veng Cultural & Brama Club, Chaltlang chuan ‘Hmanlai Mizo Thawnthu Insawisiakna leh Khawtlang hriselna atana tui thianghlim leh sanitation pawimawhna’ tih thupui hmanga thu inziahsiakna an buatsaih dawn a, a duh apiang tel theih a ni. Hmanlai thawnthu insawisiak hi Sept.ni 27-29-ah Vana Pa Hall-ah ani ang a, lawmman Rs.10,000, Rs.7,000 leh Rs.5,000 leh certificate leh mi 7 tan consolation prize Rs.1,000 theuh leh certificate a awm ang. Thu inziahsiak hi Sept. ni 20 tlai dar 4:00 thlenga thehluh theih a ni a, lawmman Rs.5,000, Rs. 3,000, Rs.2,000 leh certificate, mi 10 tan consolation prize Rs.500 theuh leh certificate a awm ang.

Thawnthu insawisiak tur hian Sept. ni 22 tlai dar 4:00 thlengin Art & Culture Deptt. office, Aizawl leh a hnuaia phone number tarlanahte hming pek theih ani a, a tel turte chuan first round-ah heng thawnthu 10 zing atanga pawhin anpawh chu minute 15 aia rei lo sawi tur a ni. Kungawrhi, Ngaitei, Rimenhawihi, Sichangnehi, Tumchhingi leh Raldawna, Tlingi leh Ngama, Chawngvungi leh Sawngkhara, Chhura leh Naa li inventhleng, Nuchhimi leh Hmuichukchuruduni ni,Tuanpuii leh Chhawrtuineihlala.

Thu inziahsiakah hian thumal 4,500-5,000-a ziakin khawl chhut copy 4-in Art & Culture department office-ah thehluh tur a ni a, hming leh address kimchang leh phone number lehkha phek hranah chiang taka ziakin chilh tel tur a ni a, thu ziakah ziahlan phal a ni lo.

Hrechiang duh chuan heng phone number 9436159908, 94363 60426, 9436140681, 94363 74565, 94361 94580, 98623633280-ahte zawhchian theih a ni.

Electric Eng That Zawk Beisei

Zirtawpni tlaia Aizawl Chawnpui Venga 33KV Sub Station leh 33 KV Double Circuit a hawnnaah Chief Minister Pu Zoramthanga chuan Hydel Project pasarih siamna tur chak taka kalpui mek a ni a ti a, Serlui B Hydel Project siam hna pawh ngawrh taka beih chhunzawm zel a ni a ti. Chutih laiin Mizoram hmun hrang hrangah electric pekchhawnna Sub Station siam tum mek a ni a ti. Chawnpuia Sub Station hawn chu Aizawl khawpui tlak lam veng hrang hrangten tha zawka kawlphetha an hmuh theih nan a tangkai a beisei thu a sawi bawk. Chief Minister chuan kawlphetha siam chhuahna man a to avangin mitin renchem turin a chah. He kawlphetha pekchhawnna hawnnaah hian bialtu MLA Pu Lalrinchhana, Minister pawhin thu sawiin he sub station thar avang hian electric eng la hmu phak lo leh hmu tha thei lo vengten electric current an hmuh that theih phah a beisei thu a sawi. 33 KV Sub Station hawn hi cheng nuai 342.1 senga siam a ni a, kum 2003 March thla atanga thawh tan a ni. Hawnna inkhawmah hian Minister Pu K.Sangthuama, State Planning Board Vice Chairman Pu F.Lalthanzuala, MLA-te, Adviser to CM-te, Official thahnem tak an tel.

Gas thu DC-ah thlen:

Lunglei Dist. Consumers’ Assn. (LDCA) chuan Lunglei DC hnenah LPG Cylinder sem dan leh black a hralh a tam thu ziakin an thlen a. Gas a harsat leh mumal loh avanga mi tam takin Black in Rs 2350/- te, Rs 400/- te a hralh ching an amw thu leh, man fak harsa tak, thudik ni si a nih thu an tarlang a. Hei hi a sem dan (system) dik loh vang ani, an ti. LPG chu essential commodity anih angin, mipui in rualtlang zawka kan chan theih nan Black Marketing check neih ni se, Gas Agent 2 ten an zawm theih nan hmalak nise tih an tarlang a. DC chu hma la tur leh a thuneihna hmang turin an ngen.Hetah `ian DC order hlui (194 of 17 Feb. 2006) Copy thil telin, he orderah hian 50% show room atanga rate fix tawh anga sem tur tih a chuang a. Ration Card hmanga semtur anih thu te, mipakhat hnenah cylinder tam tak an pekchhuah thin thu te, Special permit en chian a, an hnena la ngei chauh agent in a pe tur a ni tih a chuang a. Gas thlen apiangin DCSO Lunglei-ah report pek ngei ngei tur, Inspector ten 50% showroom-ah unload a ni tih an enchian hnuah chauh sem tawh tur a ni tih order awm tawh sa te tarlan a ni bawk.

CM-in UBI Branch Hawng Dawn

Vawiin dar 10:30 a.m.-ah United Bank of India (UBI) Aizawl Branch chu I&PR Auditorium-ah Chief Minister Pu Zoramthanga’n a hawng dawn a, Aizawl UBI Branch hi branch 1,319-na a ni. Chhun dar 1:00-ah UBI hotuten press conference an nei nghal ang a, tlai dar 7:30-ah sawmbikte ten Tourist Lodge Chaltlangah cultural programme leh zanriah kilho a ni ang.

ZNP Thalaiten Tui Bill Dik Lo An Ti

ZNP Thalaite chuan PHE department chu July thlaa tui billah June thlaa pek tawh bill bawnah an puh a, mipui an zah lo a ni an ti. ZNP Thalaite chuan thu chhuahin Aizawl khawpuia tui connection nei chhungkua 22,097 hnenah Rs.250 theuha bill chuang anga chhutin dik lo taka sawrkarin mipui sum a laksak chu Rs.55,16,750 vel a ni an ti a. Sawrkar chu he bill dik lo nia an (ZNP Thalaite) sawi hi siamtha leh nghal turin an phut a, siamthat a nih loh chuan a tul anga mipui chhan nan hma lak an tum thu an sawi.

Hnahthial In Kang

Nimin chawhma dar 11:00 vel khan Hnahthial Electric Venga Pu Lalhnema in Assam type chu a kang ral vek a, thi leh hliam an awm lo. He in kang hi electric kal sual vang nia rin a ni. Kangmei chhuah lai hi inkhawm ban lai tak a ni a, inkhawm bangte chuan theihtawp chhuahin an thelh a, in dang a kangkai lo.

Mamit Jail Sak Tha Lo

MJA Mamit District memberten inrinni khan Mamit bul North Sabual khaw bula District Jail sak mek an tlawh a, building sak meke chu hna a tha lo hle niin an hmu. Jail chhung building leh a hungna chu a inhnaih lutuk te, hung chhung pawh zim lutuk te, building in chungte chu far nghal mai thei nia an hriat thu te, a panna kawng that lohzia te, hnathawh hrim hrim pawh muang lutuk nia an hriat thute, jail builing 6 sak tur zinga hma bak la tamte chu Prison department hotute hnenah thlen ni se an ti.

Museum tlawhtu tam:

Saikuti Hall Ist floor-a District Museum hawn tak chu tlawhtu an tam thin hle a. Aug 4-11, ’06 chhung khan mi 897 in an tlawh hman a, chawhrualin nitin mi 149 velin an tlawh a ni. Museum en man hi puitling tan Rs 5/-, naupang Rs 2/- niin kum 60 chin chunglam tan a thlawna en theih a ni a. Sikul naupang, a huhova en tan 50% concession an siam sak thei bawk a ni.

Editor Mumbai Lamah

Pu H.Zosangliana, Editor, Tawrh Bawm Nitin Chanchinbu chu a tonsil-ah cancer hmuh a ni a, Mumbai lama kal turin an inbuatsaih mek a, a hma thei ang berah an kal ang.

MHIP-in Pawngsual Dem

MHIP Gen.Hqrs. chuan August ni 14-a Tuikual South-a hmeichhe naupang kum 8 mi, Suisela (Putartea tia koh) chuan a pawngsual pawi an tih leh dem thu an sawi a, hetiang thil rapthlak titu hi court-in hremna tur a lekkawh theih hremna rip ber pek an phut.

Sesawngah Congress-a Lawmluhna

Aizawl khawpui chhunga Congress-in Mobile Campaign an neih kal meka vawiina Skulpuikawna neih tur chu Sesawngah programme pawimawh a awm avangin thulh rih a ni a. Vawiin hian Sesawngah MNF chhungkua 40 vel, voter 100 chuang chu Congress-ah Pu Lal Thanhawla’n ruai nen a lawmlut dawn a ni.

Hmeichhe Volleyball Selection

Naktuk dar 11:00 a.m.-ah Ramhlun Sportting Club Volleyball Court, Ramhlun North-ah 32nd.National Sports Festival for Women, Srinagar-a September ni 22-25 chhunga neih tura hmeichhe volleyball-a Mizoram aiawh turte thlanna neih a ni dawn a, player tam thei ang ber kal turin ngen an ni.

YWCA-in Lalrempuii Chhungte Tuarpui

Young Women Christian Association Aizawl chuan August ni 14 zana Nl.Lalrempuii, 15, Kawrtethawveng rawng taka thah leh pawng sual an dem takzet thu sawiin he pawikhawihtu/te hi hman chhuah ngei an phut a, Nl.Lalrempuii nu leh pa leh unaute thinlung taka an tuarpui thu sawiin an tan an tawngtaisak . Hetiang thil rapthlak hi Kristian ramah thleng tawh lo se an duh thu an sawi.

Similar Posts:

• Ka vei zawng tlem
• Youth Icon Live Concert
• ICE
• Zo Quiz
• Android application development workshop neih a ni dawn

Recent Posts:

• A HMEL MAWI MIN HMUH TIRTU
• Vawkte leh a kaihhnawih !
• Mi pal khuk hnuah hian kan lo khuh pha ve tawk tawk a..!!!
• IRONY OF THE FACT
• Mizo Society hian lal a hrawt em?

This entry was posted on Monday, August 21st, 2006 at 1:09 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.