mi(sual).com

ZALEN chanchinbu in State Transport Authority hnena RTI dan hmanga a zawhna chu SPIO pakhatin dawng duh lovin a ngaia hawn leh a ni a, he thil hi dan bawhchhiatna lian tak niin SCIC pension tawh chuan a sawi bawk.

Kum 2 vel kalta atang khan khualzin phur bus, a bikin private-ah khumfa a tam thin thu leh Guwahati leh Shillong service an nih thu ZALEN chuan a dawng fo tawh a. Hemi chungchang hi May ni 23 khan chanchinbuah chhuah a ni tawh a, a thawktu lam chuan an endik ngai loh thu an sawi bawk a ni.

Sorkar lam atangin hmalakna a awm mai loh vangin RTI dan hmangin June ni 17, 2010 khan ZALEN Editor hmingin thehluh tum a ni a. State Transport Authority chuan ZALEN palai chu Transport Directorate SPIO lo kawhhmuhin, ani chuan a chan a nih loh vanga an dawn theih loh thuin a lo chhang a, officer dang hnenah tir kualin ani pawhin tihngaihna an hriat loh thuin kan palai chu a chhang bawk a ni.

“RTI danah chuan SPIO tupawhin RTI hmanga information a dilin a chan pawh ni lo mahse a dawng tur a ni a. SPIO changtu hnenah ni 5 chhungin a thawn ang a, information diltu pawh a hrilh hre tur a ni,” tih a ni tiin, State Chief Information Commissioner kalchhuakta Robert Hrangdawla (IAS Retd) chuan a sawi.

“RTI hmanga thil hriat duhte chu a diltu ziak leh chhiar thiam lo an nih pawhin an ziahsak anga, theihtawpin an pui tur a ni a. Kei pawhin RTI dil chhuah kawngah hian SPIO thawhthat loh vang hian harsatna ka tawk fo mai,” tiin DDK palai pakhat chuan a sawi bawk a ni.

ZALEN chuan dan angin State Information Commission hnenah June ni 18 khan complaint a thelut leh tawh bawk a, he thu chhut thleng hian thuthar a awm belh lo.

SCIC kan nei em?

State Chief Information Commissioner leh State Information Commissioner hi Section 15 (3) sawi angin 1) Chief Minister Chairperson 2) Assembly-a Leader of Opposition leh 3) CM ruat State Cabinet Minister pakhat, an vaiin mi 3 te hian SCIC hi an ruat tur a ni a, an ruatna chu Governor hnenah thlenin Governor hi a laluttu a ni bawk.

SCIC pension hnu, February ni 1 atang khan Mizoram chuan dan ang thlapa ruat SCIC a la nei lova, thla 4 chuang a liam hnuah pawh a thlangtu tur committee hi vawi khatmah an la thukhawm leh lo niin kan thudawnna pakhat chuan a sawi bawk.

RTI dan chungchanga Appointing Authority chu Governor a nih vangin RTI chungchanga complaint thehluhna tur chu SCIC neih hma chuan Governor a ni tih thudawnna pakhat chuan a sawi bawk.

Tuna a lan danah chuan a thlangtu tur committee hian thutkhawm an rel velah dan ang thlapin SCIC thar a neih theih chauh dawn a ni. SCIC awm loh avang hian pawl thenkhat chuan SPIO te an inthlahdah hle niin an sawi a. Corruption dotu pawl pakhat phei chuan sorkarin CIC a ruat har lutuk chu mak an tih thu sawiin, a rang lama ruat fel vat tura sorkar an lo ngen tawh a ni.

Khumfa atanga lo irh chhuak RTI hmanga zawh dawn duh loh te chu:

1) Passenger Bus khualzin (Private Service Deluxe hian an khualzin te lakah engemaw an mawhphurna?

2) Boruak thianghlim, tui thianghlim, thutna nuam leh tha an pe tur tih hi danah a awm em?

3) A awm a nih chuan (Ref to 2) STA / Transport Direc-torate hian a enfiah ngai em ? Kum 2005 -2010 chhunga private bus khualzin phur vawi engzah nge enfiah an nih?

4) Transport danah private bus khualzin te hi enfiah thin tur an ni em? Vawi engzah nge enfiah thin tur an nih?

5) Private Khualzin Bus driver ni tur hian Criteria engnge awm? A awm a nih chuan Practice a nih leh nihloh STA / Transport Directorate hian an enfiah ngai em.?

6) Q 1,2,3,4, 5 te hi kenkawh a ni ngai em ? Eng enga zingin nge enfiah a nih thin?

Similar Posts:

• Pastor thihna chhui dan RTI hmangin
• Minister leh Parliamentary Secretary-te motor enkawlna senso nuai 19 chuang
• Hnahlan Grapes chungchang FIR
• Tuirial HEP-ah document lem a tam, H Lianzela’n anticipatory bail a dil
• Ngati nge RTI hmanga dilna hnawl anih?

Recent Posts:

• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:

This entry was posted on Sunday, June 20th, 2010 at 1:57 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.