A thupui atang ngawt chuan hriatthiam a har deuh mai thei a, mahse sawi kawp ka duh si avangin ti hian kan phuah ve ngawt mai a ni, a pawi lovang chu maw. Tunlai kan Issue lian tak pakhat a ni tih kan hre bawk a, heng ang thil tih an ngai ta hial mai hi engvang nge niang tih ka theihtawkin ka chhui ve a, thiam intihna vang leh tling bik intihna vang pawh ni lovin, kan ramin, kan chhungkua ngêiin kan mamawh a, midangte pawhin an mamawh ve ngêi leh an sâwtpui ve ngêi theih nan tiin kan pho lang ve tawp a ni.
Kan hriat angin mizote hi inzir nasa, inzirtir nasa, kan pian tirh atanga kan seilen chhoh, kan puitlin thlenga thil tha inhrilh kan ni tlângpui a. Hei aia thil inhrilh, inzirtir nasa chhungkaw/hnam dang hi an awm chuang lovang tih hial tur a ni, kristianna kan rama a lo luh vangte pawh a ni mah na.
Kan tet tê atangin kan nu leh pa, chhungte’n Biak Inah naupang pawlah min dah a, Sunday school-ah kan kal chhova, kohhranah kan tel chhova, thalai pawlah, chu mai bakah YMA, NGOs hrang hrangah, chutiangin zirna lamah pawh a kaihhnawih tel Evangelical Cell/Group etc. chutiang rêng rênga hun hmang chho, mahni in lamah nise, nu leh pa, chhungte’n thu tha min hrilh ni tin a.
Radio, TV leh media te, Sunday zinga kan chanchinthar phek chhiar thlengin sermon, Pathian thuchah, Pathian hla leh thu tha inzirtirna a ni chho vek mai. A engti zawng pawhin han chhût ila, hetiang anga inzirtir nasatna hnam hi chu khawvel dangah pawh an tam lo viau ang tih tur a ni.
Mahse, kan ti teh ang, ngatinge ‘Tiranga’ mai mai te do a ngaih tâk hial le, ka zawt mak i ti mai thei. Tiranga do hi a tha love ka tihna a ni lo, taksa tana ei a pawi love ka tihna a ni hek lo, a dotu leh hma latute pawhin an ti dik love ka tihna a ni hauh lo. Ka sawi tum zâwk tak chu, a chunga ka sawi ang khian, a langa thil tha inzirtir nasa ber hnam, kristian inti vek ni bawk site tan hian hetiang thil mai mai, ho tak bawk si khap/do an ngai ta hial hi a bul lamah tihsual kan nei a ni lo maw, a siamtute phei chuan hria se an nuih a za hial ang tih tur thutak khukpui a ngâi ta hial hi a lehlamah chuan a ho tawh love, kan bul tan dik loh erawh hrechhuaka siamthat tum si lovin a lêr lamah hian kan bei leh vak ang tih erawh a hlauhawm ka ti takzet a ni, tih tur dik tak hrechhuak lova a sâwt lo lam zawngin hma kan la anga, kan buapui ber buaina lo intanna kan mangnghilh si ang tih ka hlau takzet a ni.
Thupuia kan tarlan ang khian, hetiang thil do/khap an ngai hial ta hi a bul berah chuan ‘Chhungkaw kal pêla rawngbawl kan tam lutuk vang a ni’. A langa mawiah rawng kan bâwl a, mahni chhungkuaa kan mawhphurhna te hlen si lovin midangte mithmuhah mawina kan zawng a, kristianna inchei nan kawrah kan hmang a, mi fak leh hriat nih kan duh a, kan chhungril nun hlamchhhiah siin, chuvang chuan a ni kan tun dinhmun hetiang a lo nih tâk. Nu pakhat chuan heti hian fate a enkawl dân chungchang min hrilh a, ka rilru a khawih hle mai.
“Kan fate an la têt lai deuh khan ka thiannu, kohhran rawngbawlna lama mi tangkai tak, thlarau mi tak (hlimsang ve thin) chuan heti hian min ti a, ‘I fate i buaipui lutuk a, kohhran lamah pawh hun i pe ve lo tukuk hi a dik lo a ni, kan fate chu Pathian engkim ti thei kutah hlân mai rawh, Anin a lo enkawl mai dawn a ni’ min ti a. Mahsela ka ngaihdan a pêl angreng khawp mai a. Ti hian ka chhang ve ta hial a, ‘A dik khawp mai, kan fate Pathian kutah kan dah ngêi tur a ni, engkim ti theitu pawh kan ring ngam bawk tur a ni. Chutih rualin nu leh pa kan nihna anga kan mawhphurna kan fate enkawl leh nunkawng dika hruai hi kan tih ngêi ngêi tur a ni a. A kêl ê awl ang hrima Pathian kuta hlana mahni indahthat daih hi ka ngaihtuah zâwng a ni ve lo, tun dinhmunah hi chuan a kûl a taia Kohhrana inhmang thei ka ni rih lo ve, min sawmnaah pawh ka lo tel rih lo mai ange’ tiin ka chhâng a.
A ngaihdân a nih loh hmêl hlê lehnghal a, mahse hei kum tam pawh a la vei hmain a fapa chuan Drugs ngawl a vei dêr a, an chhungkaw buaipui a tling dêr mai,” tih min hrilh a, chu nu chuan tun thlenga a faten a thu an awihzia leh sual kawng dai lova an la awm zel theihna chu Pathianin ngaihpawimawh zâwk tur leh tih hmasak tur a hriattir niâ a ngaih thu leh, a awm dâna a inchhir loh thu min hrilh tel a ni.
Tun hnai lawka Vanglaini Chanchinbua chhuak(editorial/article)ah tihian a inziak a. Kohhran pakhatah an Pastor chuan zânah thu a sawi a, nuho pawl chuan hlâ mawi takin an rawn rem ta a. An zai zawh chuan Pastor chuan tihian a tuihnih (comment) a, “In zai a mawi hlê mai, mahsela in fate erawh an ngaihtuahawm deuh dâwn a nih hi”. Mawi taka zai tur chuan vawi tam tak hla zira in lam chhuahsan a ngai ngêi ang tih chu a hriat theih a. Vawi tam tak In an chhuahsan chuan an inchhungkura an mawhphurhna tam tak pawh an hlen lo ngêi ang tih chu a hriatthiampui theih a ni. Hetianga rawng kan lo bâwl thin avangte hian alawm kan chhungkua a buai zawh tak le.
Zoram Nu leh Pa te hian inchhungkhura kan mawhphurna theuh te hlen ila, nu-in a fate laka mawhphurna te hlen bawk sela, nuho vêk hian Tiranga do an ngaih ka ring lo, kan ti tawl tawl mai teh ang. A ruh lang râwt râwtin ka sawi mai dawn, a ruhno no kan chhuak mai a niang chu. Kohhran, YMA, NGOs a kan inhman, kan inrawlh dân pawh kan siamrem ngam a ngai ta, kohhran hruaitu leh Pastor te pawh hian kan Zoram chhe mêk hi thinlung takin vei ve hrâm teh u, program hrang hrang kan siam tam lutuk avang te, kan beramte kan chhuahtir tam lutuk avangte hian nu leh pa tam takin an inchhunga an mawhphurhna an lo hlen thei lo thin a ni tih i hriatpui ngam ang u.
Kohhranah a kul a taiin kan thawk a, NGO hrang hrangah kan inthiat fer fur a, nihna langsar hrang hrang kan nei a, resolution, project lian pui pui kan passed a, kan hlen bawk a. Biak In mawi leh nalh tak takin kan insaksiak a, missionary kan intirh siak a, ualau taka lang si lovin a rûkin Kohhran kan intlansiak a, kan inropuisiak a. Nimahsela kan inchhungkhur erawh chu entawntlâk loh mai ni lo, midangte hriat chian kan hlau êm êm a ni lawm ni, i harh ang u. Inchhungkhura i mawhphurhna i hlen si lova, midang mithmuha fel, tlawmngai, pa tha, nu tha nih i tum chhûng chuan Pathian laka i mawhphurhna pawh i hlawhchham a ni tih chiang takin ka hrilh duh che a ni, harh a hun tawh.
A bik takin mizote hi chhungkaw inkhawmngeih lem lo hnam kan ni, tunah chuan a danglam deuh tawh a ni mah na. Hmanlai phei chuan chawei laite hi chhungkaw inzilh hun atan an hmang thin, a chhan nia lang chu an inhmuhkhawm theih hun tha ber a nih vang a ni. Hetiang hun remchang hi hmang tangkai lo se chuan an tan hun dang a awm tlat lo a ni, an demawm êm êm lo. A nihna tur takah chuan chaw kan eikhâwm laite hi hlimtlâng taka kan awmho hun tur a ni zâwk a.
Tun hunah chuan chhungkuaa inzilh emaw, inkawmho, titiho hun angte kan neih a, hun pawh kan insiam thin a tul ta a ni, kan nei ngai lo a nih pawhin i ching tan ang u. I fate’n an harsatna pawh i hnena an thlen ngam lohva, an thurâk pawh an hrilh ngam loh che chuan nu i ni emaw pa i ni emaw i awmdanin a zir loh vang emaw, rintlak i nih loh zia tilangtu chiang tak a ni tih pawm hmiah rawh. Pa nih vanga intih khûnkhân, intihpuithu, intihzahawm a ngai chuang lo, in fate tana thian tha ber nih in tling thei lo a nih chuan in fate tan chuan nu ni tlâk i ni lo, pa ni tlâk i ni lo, insiamthat i mamawh tihna a ni. I awmdan, i tawngkam, i fate leh i nupui/pasal laka i chetzia kha an thlir reng thin che a, i lakah beisei an nei a, an rin tawh loh hunah erawh che chuan i tlai mah mah tawh tihna a ni ang.
Hei hi ka sawi tel duh tlat, kan inkhawmna thin Biak In chungchang hi. Kan thupui nen pawh a inhmeh bawk a. Biak In kan ngaihdan a dik ta lo, Pathian kan biakhona a ni a, kan zah tur a ni a, kan tibawrhbang tur a ni lo, kan tlawh fo tur pawh a ni. Chutih rualin Biak In dik tak chu keimahni, kan taksa hi a ni, Pathian chenna tlâkin i siam em? Mirhing siam chawp Biak In hi Pathianin a ngai thutak êm êm hran lo, nangmahah khan chèn a, nangmaha Lal nih kha a duh zawk, a duhzawng tha taka i tih kha Pathian duh dân zâwk a ni.
Chuti ni lova Chawlhnia fel ber leh ringtha ber anga Biak Ina va kal a, va tawngtai a, chhungrilah takna nei si lo, Pathian chenna tlak loh ni si hi a dera khunkhanna mai a ni. Chumi piah lamah ni tina i hnathawhnaah, i zirna kawngah, inchhungkhurah te i tih tur i tih si lova, i tih loh tur i tih fo zawk si chuan i Pathian biak dan chu milem bia ai pawhin a tenawm zawk tihna a ni. Thil tha hre reng si a tih duh loh te, tha lo hre reng si a haw(huat) duh lo tlatte, eiru tih hriat chian reng an thawhlawm duh avanga haider luih tlat berampu tha inti ve si te, midangte tih dân ve tho alawm ti a Pathian tan pawha mahnia tang ngam chuang si lo rawngbawltu inti te, mahni mawhphurna dik tak hlen si lova ber ang maia rawngbawl thinte avang hian a alawm kan Zoram hi a lo chhiat zawh tak le.
A tawp berah chuan heti hian kan tlip mai teh ang, a sei lutuk dawn, nu i nih chuan i fate laka i mawhphurhna kha hlen tum phawt la, pâwla i rawngbawlna kha a tul a nih chuan paih thla ngam rih mai rawh, i rawngbawlna pawimawh zawk i hlen loh ai chuan. Pa i nih pawhin i nupui leh fate lakah mawhphurna i hlen em, an ring ngam ang che angem, inchhunga i mawhphurna i hlen lo a nih chuan pâwla i rawngblawna kha dah tha ngam mai rih rawh, a zahthlak loh, kan fate awmdân atang hian kan tuh rah a lang dawn tho asin, midang nuihzatburah insiam lo hrâm rawh.
I fate puitling tak leh nunkawng dik taka i hruai a, anmahni duh thu ngêia thil tha lam kawng an zawh theih hmâ chuan i rawngbawlna a la famkim lo tih hre reng la. Chutianga an puitlin hunah erawh chuan lang lo lama YMA hruaitu tha i lo nih thinzia te, Pathian rawngbawltu tha tak i lo nih thinzia te, Evangelist tha i lo nih thinzia te, NGOs hruaitu tha i lo nih thinzia te i hrechhuak ang.
Chutiang zelin zirlai i nih chuan i zirlaiah rinawm takin, i theihtawpin zir mai rawh, thalai i nih pawhin inchhungkhura i mawhphurhna midang kuta dah a, mahni tih tur ti thei si lova a langsâra fel ber leh tha ber, tlawmngai ber i nih thinna kha dah bo ngam la, i chhungte’n i tih ai an loh tih thinte, i awm loh avanga an buaina thin kha kal pel tawh suh la, chhungkuaa i mawhphurhna ngêi i hlen hnuah hun i la nei a nih chuan thildang chu i ti ve chauh dawn nia.
I hman ve ta lo a nih pawhin a pawi love, inchhungkaw rêl fel hmasak hi khawtlâng tâna hnathawk tha, ram tana mi tangkai, khua leh tui tha dik tak nihna chu a ni zâwk e, chhungkaw kal pêla rawngbawl hi i sim tawh ang u. Hetiang a nih chuan eng anga tha lo sângsawm thildang pawh rawn chhuakin rawn siam chhuak dur dur thin mah se, do a ngâi tawh lovanga, khap a ngai tawh hek lovang, NGO tam tak pawhin tih tur an nei ta lo a nih pawhin a pawi love, a lawmawm lamah kan ngai tawh zawk a niang chu. I muthlu der tawh lovang u, Zoram nu leh pate an fate tan damna lo ni mawlh rawh se.
Similar Posts:
- Chawkidar rinawm lo (Sunday pualin)
- Chhungkaw tan thusawm pek.
- Eiruk – Nangmah vang em ni le?
- Chanvo rawngbawlna nge Pathian rawngbawlna?
- Khawnge i fa? Part-1
(Y) 
August 4th, 2010 at 1:31 pm
ka la chhiar hman lo, mahse a thupui khi ka ngaina tlat
Report this comment
August 4th, 2010 at 1:35 pm
ui ha avan sei tei hlom em2
Report this comment
August 4th, 2010 at 1:41 pm
Sei lutuk mai. Kan e phawt anga, chumi zawhlamah thingpui in leh phawt ila, chumi zawh leh ah kawmen chauh teh ang
Report this comment
August 4th, 2010 at 1:45 pm
uiha! vawhin post ho chu va sei thei zer2 ve ma le!
Comment hnu in chiar le mei ang 
Report this comment
August 4th, 2010 at 1:51 pm
Lalrammawia ngente novel Rintei zunleng ah khan a tarlang chiang khp mai inchhung pel thui ltk a nu ber rawngbawl pawi dan chu.
A thui khawp mai.
Report this comment
August 4th, 2010 at 1:53 pm
Tiranga ei thin te hian envanga ei nge an nih hlawm tak le. Nu leh Pa zilh loh leh hauh loh an nih avanga ei an nih chu ka ring chiah lo. Chutiangin thildang pawh.
Report this comment
August 4th, 2010 at 1:53 pm
ui 1st para chia ka la ciar
Report this comment
August 4th, 2010 at 2:00 pm
A va sei ve! A tha hle mai (ka ring) !
Report this comment
August 4th, 2010 at 2:02 pm
va ziak sei teh thruai ve a!post tha tak ani,mahse chhungkaw inkawm ho hnem vang khan fate’n tiranga an ei loh phah ka ring chiah lo,pawn chhuak lo a inah i khung reng te nih ngawt loh chuan!
Report this comment
August 4th, 2010 at 2:02 pm
A tha sei thruai thruai hle mai. Kan khawtlang leh chhungkaw in enkawl danah hian engemaw dik zan lo chu a awm a ni phawt mai.
Post tha tak a ni e.
Report this comment
August 4th, 2010 at 2:04 pm
a chhiar zo tawh in awm em? eng lampang nge..
Report this comment
August 4th, 2010 at 2:09 pm
Ka chhiar thla zela ka mouse ka scroll thla zela, a tawp tawh dawn emaw ka tia, paragraph thar alo awm leh zel sia, chhiar zo ta lo chuan ka rawn komen ve ta ngot! :lol:
Report this comment
August 4th, 2010 at 2:24 pm
a va tha leh pek em
Report this comment
August 4th, 2010 at 2:37 pm
amen..ka vei na a rei toh ltk…
Report this comment
August 4th, 2010 at 3:01 pm
Chawng khûm dan tlang huat loh:
Congress sawrkar a ni a : Starring te
Chief Minister Lalthanhawla leh a nupui Pi Riliani ( President, India tobaco on helth – Mizoram Chapter) .
Cabinet Minister Pu P.C. Zoramsangliana leh a nupui Pi Lalthalmuani ( President, MHIP).
Pu Lalthanhawla uite lem lem PC Zoramsangliana.
Zankhat chu: Phone a ri ral ral a
Pi rii : muani lo leng teh..
Pi Muani : enge nita a va han pawimawh awm ve ?
Pi rii : I titi dun teh ang? in pa pawh lo kal ve se…
Pi Muani : a va mak awm lehzel ve…
Pi rii : A.. Lo chho thuai ula nimai…(nui hak hak pahin)
CM Bungalow (Pindan chhungril) :
Pi rii : awi in va rawn thleng har em em, ih maw.. muan,
Matepa bul ah chuan ka lo sawi tawh thova, hei,
tunlai chu Tiranga hi a lar riau mai, a thalo sia
MHIP hian min do sak teh u a. ka hming that ve
nan tepawh ni pah fawm in :hlim sâng:
Pi Muani : Aw… ni dawn tak e, U Rii nge nge hi chu inpa
hian a khan lo teh che a nih hi, sawi zui vak pawh
ngailo. Kan han ti anga mipui te chu an hmin sa
sak… kan hnuai a mi te tiam in. Emergency
Committee koh tir nghal mai dawns.. :?:
CM of the world : Nu i, thil an ti ruak ruak ngailo, in
hnuai a mi te leh OB ho bâwl hmasa rû, in
lansarhna dal lo tawk si, a kaikuang nilo tawk
chiah si khan thiam ve ta che u… Plotics in man
lo lutuk… :muangchang leh hmaipho âl puam talh in:
Pi rii : Matepa thin hi chu min finchhuah tu hi i ni ve
chiang ngawt mai, Pi Vani lakah khan ilo tlawm hman
ang tih ka va han hlau hnuhnawh tak em… my dear
keimah ngei in thing pui kan siam ang che
aw … :chawk ri rak rak:
Pi muani : Awi, nangni nupa hi chu a, in zei dun hawr hawr
ngawt mai : Pi Rii nak kawm jauh:
CM of the world : Titeh… Sanga, nu ho thil tih vê hi a…
sawipui tlak an nih loh hi NLUP i tih san daih
trengs..
PU Sanga : Bauh bauh bauh… :chik nghar nghar pah in: Aw…
Lalber i tih ang zel in le.
Zoram khawvel : Vanglaini :arrow: Vawin Dated
18th. June. 2010 khan MHIP Head quarter chuan
Archive Hall, Aizawl ah ‘Tiranga’ doh beihpui thlak
hawn na hun an hmang.
Report this comment
August 4th, 2010 at 3:02 pm
Ka chhiar chuak vek, adik ka ti ngawt mai.
Report this comment
August 4th, 2010 at 3:06 pm
Lersia kawmen tehreng pawh chu a post chen zet alawm mawle.. :lol:
Report this comment
August 4th, 2010 at 3:34 pm
@CyberThug sorry #17 , ka lo tui deuh a ni. . .
Report this comment
August 4th, 2010 at 3:46 pm
“A tawp berah chuan..” tih zawh ah pawh Para 3 ngawt ala ziak mai nia pa tawng duh tak leh sawi tur ngah tak anih dawn hi
Report this comment
August 4th, 2010 at 4:07 pm
Sermon/Article te hi tawi fel, fun kim tak ni thei se…
Report this comment
August 4th, 2010 at 4:38 pm
Nu te hian an fate theuh hi han vei tlang ta zawk se chuan aww…. A nihloh leh an tuibur, sahdah, etc… te hi khap sak ni ve ta hlawm se zawng..?????!!!!
Report this comment
August 4th, 2010 at 4:43 pm
# 6 Pc-a, ka sawi tum i man theih nan uluk takin i chhiar chhuak lo a nih ka ring, Tiranga khi chu ‘Tawktarh’ ang chauhvin ka hmang. I hrethiam ngêi ang, chhiar nawn leh la.
chutiangin….
# 9 mr public … pawh, tiranga ei leh ei loh lam a ni lo, chhungkua ah tih tur ti si lova thildanga phe buai em em, a langa pa tha tak, nu tha tak, khawtlang pawhin an chhuan em em chhungkaw zingah pawh sual tak tak leh, tha duh hauh lo tam tak an awm ta, kei chuan nu leh pa chi tuh rah dik tak an ni ka ti.
#15 Lersia Thu thiam tak i ni chiang, i thil rawn zeh vel dan chu, a tha e…..
#20 ninja a pawimawh dân a zir leh a fun tel pawimawh dan azirin a châng chuan article te hi han pawh chah mai a chi loh ve tho, tichiang tura thudik han tarlan tel te hi rin thu mai a ni lo tih tihlanna leh mi rilrua nemnghena pawimawh tak a ni thei bawk.
#19 funny Article type-in kan ziak a lawm maw le…. Excuse me, mahse lo chhiar chhuak ve hram ula…
Lo chhiar chhuak ve hrâm teh u, ka misualpui te u
Report this comment
August 4th, 2010 at 4:51 pm
@lersia post hi bo nge o
A post hi thra sei ropui si – bo atan chuan a uihom nia 
Report this comment
August 4th, 2010 at 4:52 pm
Ka chhiar lemlo na in, MHIP in tiranga an do hi chu an ti tha ka ti thlawt, NGO dang ho hi an che tlai ka lo ti zawk khawp mai a.
Report this comment
August 4th, 2010 at 4:52 pm
Zu pawh man tur a awm reng tho va; tiranga pawh man tur a awm chhunzawm reng tho vang. Zu-hunting for YMA, tiranga hunting for MHIP. Kan indaih, hei hi Women Empowerment chi khat a ni mai awm e!
Tiranga hi a dik tak chuan THREE COLORS tihna a ni a; Indian National Flag sawina a ni thin. India Flag kan hal em chu ni lo se, hetiang buaina hian min chiahpiah ka hlau ve deuh va, anticipatory bail ka la lawk ve dawn!
Report this comment
August 4th, 2010 at 4:59 pm
A theih theih do vek tur…ruah pawh kan do va a rem lem hlei lo va.
Report this comment
August 4th, 2010 at 5:03 pm
Hetiang article hi chhiar tur om reng se ka ti, tha ka ti full.. nuho tan poh chona ni teh se
Report this comment
August 4th, 2010 at 5:06 pm
A sei em mai ka mit in a tlin lo chhiar chhuak tur chuan… tiranga ei thrin hi ka zilh ngam chu na takin ka zilh thrin.
Report this comment
August 4th, 2010 at 5:26 pm
Khap tam lutuk hi khap a tha angem aw…? tih ngaihtuahna ka nei.. Tiranga ei a tha ka ti lo. Mahse tha lo zawng2 khap zel dawn ila…? Zial, sahdah, tuibur, kuhva, etc…? Ei a that lohzia sawi uar a, in zirtir erawh a tha khawp ang!
Report this comment
August 4th, 2010 at 6:18 pm
Kual tak, harsatna tam tak paltlangin ka rawn lut ve e. Khual tha nih ngei tum chungin…
Report this comment
August 4th, 2010 at 6:20 pm
seynmizo welcome welcome
Report this comment
August 4th, 2010 at 6:21 pm
SeynMizo… welcome em2… lo lut thin rawh
Report this comment
August 4th, 2010 at 7:18 pm
Ka kiang bikah hian lo kual zuai teh, SeynMizo
Report this comment
August 4th, 2010 at 7:24 pm
Do do lo se ni mai an do pung leh thur thur ang a sin…
Report this comment
August 4th, 2010 at 8:00 pm
Dawrkai ho in an do hi an lawm an ti.An lakna man a ngai reng tho si a.Hralhna man a tam ting mai sia.Hlawk hlir ani mai.
Do hian a tui zual deuh zel in ka hria.
anticipatory bail te hi do pawl awm se ka ti a tha zawk ang hahahahahahah.
Report this comment
August 4th, 2010 at 8:03 pm
Tiranga do…an buaipui awm tawk a ni e, sahdah te, khaini te pawh do ve law law se.
Report this comment
August 4th, 2010 at 8:13 pm
Thil tha tak tak ti peih silo hian lansarh kan khel a.
Thil hlu kan in hriat siak a, mahse hlu tur chuan tha thawh tu nih kan tum silo.
Mifing leh hreber nih kan chak a, finna vâr pawh tur leh thilhria, belh chian tlak ni tur in taimak na kan tlachham si.
Report this comment
August 4th, 2010 at 8:45 pm
@mi_sual, sorryyyy, i post ivil thaa a lawmawm e, damreng ang che.
Report this comment
August 4th, 2010 at 9:08 pm
Post tha tak a va ni tehlul em..full support ka pe e..
Report this comment
August 5th, 2010 at 1:45 am
A tha hle mai.
Report this comment
August 5th, 2010 at 10:47 am
@mi_sual I post tha lutuk. Ka chhiar chhuak dap.
Report this comment
August 5th, 2010 at 2:37 pm
Ka lawm, Thank You
#13 tlau, #14 speeds, #16 hltm, #27 Kitty, #39 Chhaktiang, #40 chhana, 41 I.Hnamte Min chhiar chhuah sak tute chungah ka lawm vek e, he thil hi rilruah kan hre reng dawn nia…. kei pawhin ka zir a, ka hril zel bawk ang. Zofate tan…….
Report this comment
August 5th, 2010 at 4:24 pm
Ka chhiar chhuak parh a, tha ka va ti thuai thuai em! Kan ram thalaite kawng dik lo zawh chhan bul ber chu NU LEH PATEN an mawhphurhna AN HRE LO!
Fate hi Lalpa laka kan ro chan an ni a, “Lalpa thununnaah leh zilhnaah chuan enkawl tur” kan ni (Ephesi 6:4). Lalpa hmaa kan din hunah “Tiranga kha i do tha em?” tih lam min zawt dawn leu! “I fate khawiahnge?” tih kha a nih zawk hmel! Biakin chhunga HALLELUI vak vak ringawt a ni lo! Mahni inchhungah khan “Hallelui” rawh! Fate Drugs ngawl an vei hnua tap chunga tawngtai hluam hluam ai chuan a ngawl an vei hmaa an tana tap chunga tawngtai a pawimawh zawk! Ka tawng na ve ta phian mai a!!
Report this comment