mi(sual).com

Biak In a thleng tep tawh. A cell phone chu a rawn nghawr dat dat a. A en a, a chhiar a, a chhiar zo chu a vir vut a. Bawng mei èlh sak ang maia chakin, In lam panin a lîm ta pùat a!

‘Ka nu…’
Kawngkhar a nam hawng thuai a.

‘Ka nu…’
A nu hritlang nuamsamlo, thuthlengseia lo mu zâl chu a pawt tho lâwp a. A sawi nawk nawk a.

‘En teh. Ka nu, ka tling… Ka tling!!’
A âu a, a kû a, a zuâng a. Khanchhuk a han tauh ang tih hlauawm khawpin, a inkhawh-chho zawk zawk a. A sapatal a ni ber!

‘Ngawi teh. Lawmte, tha deuhin han sawi teh, min ti chì-aì lutuk. Eng chu maw i rawn aupui tak chiam a…?’

‘Aw…, ‘hna’ kha mawle. Ka hna dil ve kha…’

‘Hmanni, Aizawl-a i interview vena kha maw?’

‘Aw ni e. Hei, ka putea’n SMS min rawn thawn. Biak In pawh thleng ta loin, ka rawn tlan haw anih hi! Ka nu, ka tet tè atanga i sawi, i duhthusam leh i awh ngawih ngawih– Sorkar hnathawk ‘Fapa’ chu i nei ta!’

‘Tak tak maw!? Lawmte, ka va lawm tehlul em! Aw Lalpa, kan chunga i thatna zozai hi… ka lawm e. Lalpa, ka lawm e.’

‘Ka nu, ti hian ka lo ruahman chhin a. Ka hna thar tur hi thlaleh- Ni 10 hmaa in report ngei ngei tur a ni a, tun thla tawp-ah chuan Aizawl ka pan mai a ngaih hmel. Ka Putea te va fin phawt ila, In luah tur a awm ve leh invawm lut ta rãwi ila. Chuan, rilru nei tak leh inren takin ka khawsa ang a, thla tin pawisa ka rawn thawn ang che. Hah taka hna i thawh rèng a ngai tawh lo ang. Ka inkhawl fàn fân ang a, kan In pawh hi kum-5 chhunga sak that ngei tumin tan ka la ang.’

Chù zan rehah chuan, chù mihlim nufa chu- lawmna mituiin a bual a; hlimna chuan an pûm a fan a. Suangtuahna khawvel atanga hmalam hun te thlirin, chù ram chu an sêp dùn a.

Kum – 10 hnu…

Lawmtea pawh a lo kaisang ve tawh a. Aizawl veng laili-ah In tha tawk luahin, a phuisui tawh hle. Hetia’ng hian a dinhmun lo changkang chho mah se, a hmangaih- a nu chu a hre reng thin a, a thlahthlam ngai lo. A lo sawi tawh angin kum 5 kal taah khan, a khaw mite thlir rawn hlawh khawpa mawiin, an In pawh a lo sa tha diam tawh a.

Tuk khat chu, driver pakhat hian Pi Zamani (lawmtea nu) chu cell phone a rawn pe nawlh mai a. “Ka pi, he phone hi i fapa-in a lei sak che a nih hi. Zanin-ah a rawn be dawn che a, i bulah dah tlat la, a rawn rik ve leh a hmehna hring hi i lo hmet dawn nia.” tiin, a chhuak leh ta mai a. Zan a lo thleng a, phone chu a rawn ri ta ngei a. A fapa ‘aw’ ngei chu–

Ka nu,
Zanin-ah hian sawi tur ka ngah hle mai. Ka han sawi mawlh mawlh ang a, i beng i lo dawh hram hram dawn nia. Pathian zarah hei, kum- 2050 kan lo chuangkai ta reng mai. Kei pawh ‘val senior’ ti a fiam hlawh khawpin, kum 35 lai ka lo ni ve ta! Ka sawi duh chu– hmangaih ka tawng ve tawh a sin! Ani chu engkima ka engkim a ni a. Ka hlimna leh lawmna mai ni lo, ka nunna a ni. Ka damchhung hian then thei ka ni tawh lo! Ka nu, mo fel tak neih a, tù mawng ben te pawh i chàk ve tawh tih ka hria.

Mahse, min ngaidam teh. Min ngaidam hram teh. Hmangaihna hi a lo va mak thei ngai em! Hmangaihna hian rethei leh hausa, kum upat leh naupan te a thliar lo ang bawkin, hmeichhia leh mipa pawh a lo thliar nèm le! Ka nupui tur hi e… Ka nu, i ‘mo’ tur hi e… Ka ànpui- mipa dik tak a nia sin! I rawn zin tuma ka lo chènpui- ‘Kan thawhpui, ka thianpa’ ka tih tak kha. Khà mi ngei kha i ‘mo’ tur a lo ni si. Ka nu, mak i ti hle tiraw? Mak ti lutuk suh. Hmangaihna a ni… Hmangaihna!

He hmangaihna thuk zia, san zia, zau zia, ril zia leh thianghlim si zia hi a mak a sin. He thil avang hian min tuithlar lûl suh ang che aw? Eng niah emaw chuan min la hriatthiampui ngeiin ka ring tlat a ni. Tunlai khawvel hi en teh, hmangngaihna chu- mipa leh hmeichhia te inkarah chauh ni lo, mi pahnih- (mipa leh mipa, hmeichhia leh hmeichhia) te tan pawh…tihna khawvel a nih tawh hi. Keimahni ang bawka neih inang- inhmangaih tak tak te nen, tun thla tawp hian Court hmaah a hu-ho a inkutsuih kan tum. Kan inhmangaihna min hriatthiampuitu, mi tlemtè te nen… Sawmna Card pawh ka siam ve a, naktukah ka rawn thawn ang che…”

“Ka rei! Aw Lalpa, ka fapa kâ atanga ka thu hriat zet hi, ava rapthlak tehlul em! Hetia’ng hre tur hian, engvanga hei chen min lo la dam tir nge i nih aw… Engvang nge min lo tihhlum daih mai loh aw…”
A tukah chuan, ‘Sawmna Card’ chu a rawn thleng ta ngei a…

INNEIH SAWMNA

Kei, LALLAWMSANGA (lawmtea) S/o Neihkunga

leh

Kei, RINPUIA (puipuia) S/o Upa Hrangkunga-

Kan chhia leh tha hriatna fim tak leh, kan mimal zalenna/ duhthlanna ngei hmang a, nupa-a insiam tura kan inkutsuihnaah, a hmun ngeia min rawn hriatpui turin kan sawm a che.

A Hmun : Aizawl DC 0ffice.
A Hun : 30 jan 2050 (11 : 00 am)

Similar Posts:

• Mipa Vs Hmeichhia
• Mizo Mipa Vs Hmeichhia
• Mipa leh Hmeichhia
• Ti ve chhin
• Pathian hi mipa nge hmeichhia?

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Thursday, September 23rd, 2010 at 8:34 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.