Vawi hnih zet chu ka rawn ziak ta a, thiam vâng ni lovin vei avâng liau liauvin kan han chhunzawm leh ta poh a ni.
1. Awmna hmun azira tawng hman
Hemi chungchâng hian khel a hlawh hrep a. Hmânni-ah pawh Pu MZ-a post, Vanapa hrechiang kan awm em? -ah a topic mil lo lutukin kan inhnial chiam a, a zahawmin ngaihdam kan indîl leh hnuhnawh ni se. Awmna hmun azira tawng hman a dan theih zia chu kan hria a, kan zîngah ngei pawh chuti anga hmang kan awm âwm e. Chu’ng thumal erawh kei pek, ka hre tlêm hle a, ziah-lan pawh ka tum hran lo. Ka tum ber zâwka chu, Mizotawng dik tak hi a awm a ni tih hi.
Khawi hmunah pawh awm ila, eng ang pawh lo hmang ila, Mizotawng dik pângngai a awm a, chu chu zawm hrâm hrâm a tha. ‘Au ka ti thau thau’ tia thih thaa tan tùng loh tur! (Keini pawh kan awmna lamah chuan Mizo hawrawpa mi, ‘G’ hi ‘gi’ kan ti lo, ‘ek’ kan ti daih! ‘Ek’ hi a ri sángin).
2. Tawng hman dik loh
Heti ang chi hi kan ngah hle. Chu’ng zînga tlêm chu entîrna nen lo ziak lang ila. ‘Chhawrbâwk’ tih hi. (Entîrna: I thil siam chu tu’n va chhawrbâwk suh). ‘Chhawrbâwk’ hi thil ni lo lam sawina a nih avângin ‘lo’ tih emaw, ‘suh’ tih emawin a zawm ngei ngei tur a ni. Entîr nan, I thil siam ka chhawrbâwk hle mai tih a dik lo.
Tin, sammêt/lumêt hi kan va hmanpawlh nasa tehlul êm! Sam kan mêt ngai lul lo. Lu kan mêt a, sam kan tan a ni. I sam zai khat kha han pawt tîl la, sam a la ni reng; mahse, meh chu har tak tur a ni. Hei hi chu kan buaina tur ni tawh lovin ka hria.
Naute/note pawh. Tûn laia ‘naute’ tih tura ‘note’ rawn tih chîng hi an awm ta zauh zauh a. Mihringte ‘note’ kan neihtîr ta mai mai! Tin, ‘pângngai’ tih tura ‘pangai’ tih tlat te. Sentence tâwpa awm thîn ‘lawng’ tih pawh hi kan hmang dik lo thîn; ‘lawng’ tih tur a ni lo va, lo’ng tih tur a ni; ‘lo vang’ tihna a ni.
3. ‘Ziak’ leh ‘ziah’
Hemi chungchâng hi hmânni-ah Pu Muantea post Debate : muantea vs Cyberthug ah a chiang viau tawhin ka hria. Ka’n tuihnih lawk ang a. Mizo thumalah hian modified form intâwm a awm nual a, hei hi a chhan chu a hnuaia ka ziah tho, Mizotawng hausak loh vangah ka puh a ni. Ziak tam lovin entîrna pakhat ka’n pe keuh ang e. Entîrna: Thawnthu tawi inziahsiak-ah ka ziak sei.
Mizotawng hi a hausa em?
Hausa lul lo ve! Hmânni-ah Pu KK Lova KK-a’n a hausa ti zâwngin Zo tawng hi a lo mawi ber mai -ah rawn ziak a, han chhiar chuan a nihna chen pawh a awm; mahse, a entîrna rawn pêk ho kha ‘double adverb’ deuh vek a ni. Double adverb-ah na na na chuan Mizotawng hi a hausa. Mahse, a pawimawh ber noun, verb leh adjective-ah hian a hausa thlâwt lo a ni. Entîr nan, ‘Lei’ tih ringawt hi a awmzia a tam lutuk! i) Thil ka lei. ii) Lei ka zawh. iii) Ka lei zawh a lei (hê)! iv) Ka lei a nâ. v) Lei (vaivut) khawih suh. Chuti ang bawkin ‘tui’ tih leh a dang pawh.
Thumal intâwm a tam lutuk hi Mizotawng hausak loh zia tichiangtu a ni. Chuvângin tihhausak pawh kan tum tur a ni.
Tûn hnaiah Mizotawng chungchâng post a rawn tam chho hle a, a lâwmawm tak zet a ni. Heta tang hian chhiartuten Mizotawng kan hriat chian phah sauh turah ka ngai a, thuziak leh comment-ah pawh a lang chhuak thei hialin ka hria a, hmasà wnna ropui tak a ni. Heti ang lampang post hi i inthlahrung lo vang u!
Similar Posts:
- Mizotawng chungchâng bawk!!
- Mizotawng chungchâng bawk!
- Mizotawng ziak dan
- Misual.com kaihhnawih ka vei leh rawtna
- Mizo Tawng
hairehai
September 21st, 2010 at 7:32 am
Uluk taka chhiar phawt a, uluk taka la comment tur anih hi..
Mizo tawng i ti hausa tlang zel ang u!
[Report abuse]
September 21st, 2010 at 7:39 am
Uai, mizo tawng hi kan vei tlang aniang e. Hetiang post hi atam tawh riauva ka hriat chule.. Adik em aw:?:
[Report abuse]
September 21st, 2010 at 7:44 am
Ziak zawm leh zawm loh mawlh hi a harsa ka ti ber!
[Report abuse]
September 21st, 2010 at 8:07 am
hetiang vei pawl kan awm chhung hian chuan,lo dai sual deuh pawh ni ila, athlamuan thlak hle mai.
[Report abuse]
September 21st, 2010 at 8:36 am
A dik chiah, Tawng pui pakhat kan nei thei. MAL lam pawh ang tang viau a, Lehkhabu thelep te chu an chhuah tawh. Mahse, hetah hian Aizawl leh a chheh vela mite an ni hlawm a, Zoram khaw hrang hrang aiawh awm thei se duhthusam a ni.
Tawng tih hausak tak hi a lawm ka buaina kei. Kan han chher a kan insawisel sak a, a thenin kan neih that sa reng tihdanglam phet an lo tum…i sawi chiam teh ang u.
[Report abuse]
September 21st, 2010 at 9:12 am
A va tha muah muah ve le!!!
Sawi belh ve tawh lo mai ang.
[Report abuse]
September 21st, 2010 at 9:25 am
Kan tawng hi uluk a ngai a humhalh a ngai tak zet reng a ni
[Report abuse]
September 21st, 2010 at 9:34 am
Kan mizo tawng hi a hmun a zira hman duhdah leh ziak duhdah hi kan tam ta hle mai.
Tha fu mai.
[Report abuse]
September 21st, 2010 at 9:43 am
Lo vang tih aia Lo’ng tih a ziah te zawng tun hnu a Lengmaser tih aia Lengser tih ang vel ani e.
[Report abuse]
September 21st, 2010 at 10:00 am
‘Note’ leh ‘naute’ tih hi ka lo sawipawlh thin. Tunchinah chuan ka lo hre tawh ange.
I thu ZIAHte hi a tha hlawm khawp mai. Note buah ZIAK kai nghal zel thei ila a duhawm hle ang.
[Report abuse]
September 21st, 2010 at 10:36 am
A tha viau e. Mizotawng kan tih hian, hmar lam emaw chhimlam emaw chhak leh thlang lam a kan hman thin theuh chauh hi a ni mizotawng dik chu tiburlo khawpin rilru zau pu ila, kan tawng tihhauhsak a awl ka ring.
Tin, ka lo vei ve mai mai chu, a leh o hman pawlh te, t aia tri hman te officiala thlak a la nih loh avang hian, thlak a nih hma chu kan neihsa dan anga hman theih nise( buaithlak erawh a buaithlak viau.kei pawhin t/tri a type dan ka thiam loh khi)
Tin, tawng hi a thang ve zel a, kum 20 hmalama kan tawngkam hman thin tuna kan la hman zel leh hman tawh mang loh te pawh a awm ve zel bawk a. Tawngkam bungrua a piangthar ve zel bawk a ni tih te pawh pawm thiam deuh deuh a tul ve a ni.
[Report abuse]
September 21st, 2010 at 10:51 am
Nie.Kei chu he post hi ka chhawrbawk lo’ng ka tilo thau thau………….
[Report abuse]
September 21st, 2010 at 11:48 am
ZIAK leh ZIAH:
Ziak leh ziah chungchangah debate in lo nei chiam mai a. Tumah ka hmin chu ring chuang lo mah ila,June ni 8-a ka comment ka rawn post leh mai mai e.
Pu R. Vanlawma kha ‘Ziak†chauh duh a ni.
M.A.L. hian ziak modified form atan ziah hi an pawm tawh.
“Funny milem ziak lai hmel chu chhe ve tak a ni†kan tih chuan Funny hmel kha milem a ziah laiin a chhe ve hle.
“Funny milem ziah lai hmel chu chhe ve tak a ni†kan tih chuan hnial rual lohin Funny aiin a milem ziah kha hmelchhia chu a ni zawk tih kan hre thei.
Chuvangin ziak tih hi modify lohin hman theih viau mah se, modify-a a fiah leh chian zawk hun a awm fo.
Muante-a khan MAL a rawn refer viau a. MAL hruaitute zinga mi, Pu Rozama Chawngthu hnen atanga ka hriat dan chuan MAL chuan Ziah hi Ziak modified form-ah an pawm a ni.
[Report abuse]
September 21st, 2010 at 1:42 pm
Mizo tawng hi … a hun lai zel sawi fiahna khawp hi chu kan nei. Mahse, finna sang zel leh culture hrang hrangte hian min chim hneh ve tak avangin, tun hmaa kan vocabulary mai kha chuan a sawi fiah seng tawh bik lo!
MAL pawh hian tawng upa lam chu a preserve hneh viau chuan a lang a; a thar chher belh lamah erawh chuan hma thar a la lo hi chu —an tih tur an ti lo a ang hle. An tih loh tur an ti tihna pawh ni chuang lovin!
[Report abuse]
September 21st, 2010 at 2:16 pm
Ka lawm em em e.
[Report abuse]
September 21st, 2010 at 4:36 pm
@Mr TSA, rawn thawh tha e. I thurawn thawh khi a dik viauin ka hria. A tha.
@chawnghilh: ‘a thar chher belh’ ka vei zawng tak a ni.
Kan literature lama kan hma chhuante’n neology (tawng chher thar lamah hian hma an la lo deuh emaw ni chu aw? a tih theih. ‘Tiphingphisiau’ tih hi Electric Veng Branch YMA Essay Competition(1997 vel ni tain ka hria)-ah khan ‘Mizote rilru-a hnam hmangaihna’ tih thupui hmanga inziah-siak-ah khan ka zep tel a, midangin an hman ka la hre lo va. Mahse a thu kal phung nen khan a inhmehin a tifiah phian a. Tichuan ‘thumal thar’ chu a ni ve der mai a.
Tin, Saitual Town Economic survey kan neih tumin Report-ah ‘The land is physically mesopotamised by River Tuirini and River Tuivawl.’ tiin report-ah ka ziak a, Dr GK-a a bu ngauh ngauh. ‘mesopotamised’ tih awmzia a hre nghal mai. Mesopotamia chu verb-ah hmangin English thumal-ah a lo piang tihna ang a ni. Mahse thumal tharte chu vawrh darh a nih a, hmang chhunzawmtu an tam a, dictionary-ahte seng luh a nih bawk chuan thumal thar tak tak a lo ni chauh dawn a ni. A nih loh chuan a hlamzuih leh mai thin.
Chuvang chuan tawngkam thar chher chhuahah hian kan mithiam leh tui hian hma han la se’ tiin thu kan pass mai dawn em ni?
[Report abuse]
September 21st, 2010 at 4:49 pm
Ziah hi ka sawi ve reng reng dawn. Ziah hi ziak modified form a ni. Tin, a dikna kan tarlang ve hrim hrim ang e, a ni tizawngin.
Sial lo vulh ta la, tlai lama a lo haw chu i fapa hnenah, “Mama chi va liah teh Nuseni kha,” emaw i tih hian tawng dik i hmang a ni. “Mama chi va liak teh,” ti la chuan amah, i fapa khan chi a liak daih ang. Kan hrethiam ang chu maw.
Office-ah thingtlangpa a lo kal a, dilna eng emaw ziah a lo ngai a, a lo ziak thiam chiah lo va, chutah chuan pu ber chuan LDC Liana hnenah chuan, “Liana, dilna hi lo ziah mai teh a,” a tih hian, he ‘ziah’ hian tihsak a keng tel a ni. ‘Ziak’ chu hmang se kha thingtlang pa kha a tel lo thei tawh a, ziah a nih hi chuan kha thingtlang pa kha a tel ngei ngei thung a ni.
Kei chuan zotawng hi mawi ka ti ber. Manilomaha tih te hi saptawngin translate han tum chhin teh u har deuh a sin. A hausakna lai tak tura a chhiatna kan tih zel chuan tawng hausa hi a vang ngawt ang.
Tonal language a ni hi kan tawng hausakna a ni ka ti lo thei lo a ni.
[Report abuse]
September 21st, 2010 at 4:59 pm
Zin bo hlanin Mizotawng kan lo zir leh hrep mai a ni maw? Hman deuh a inzirnan ti leh mai ang.
[Report abuse]
September 21st, 2010 at 9:22 pm
Mr.TSA thawh á¹ha thei khawp mai. A bengvar thlakin hmasawnna tam tak a awm.
@14, chawnghilh: MAL pawh hian tawng upa lam chu a preserve hneh viau chuan a lang a; a thar chher belh lamah erawh chuan hma thar a la lo hi chu —an tih tur an ti lo a ang hle. An tih loh tur an ti tihna pawh ni chuang lovin! A dik khawp mai.
Ṭawng hlui/upa á¹henkhat, kan hun tawn azira loh theihlova thi hi a awm á¹hin. Chuvangin kan preserve rual rualin á¹awng thar chher belh zel – á¹awng dang seng luh (thiam) – hi a pawimawh khawp mai.
[Report abuse]
September 22nd, 2010 at 3:35 pm
Entirna’n: ‘Mizotawng’-Englishlanguage; ‘Mizo tawng’-English language. A eng hi nge dik zawk ang? a hriat thei mai e.
[Report abuse]
September 22nd, 2010 at 3:37 pm
“Funny milem ziak lai hmel chu chhe ve tak a ni†kan tih chuan Funny hmel kha milem a ziah laiin a chhe ve hle.
“Funny milem ziah lai hmel chu chhe ve tak a ni†kan tih chuan hnial rual lohin Funny aiin a milem ziah kha hmelchhia chu a ni zawk tih kan hre thei. @Rcafanai, entirna a tha in a chiang ltk,lom om
[Report abuse]
September 22nd, 2010 at 3:50 pm
Zohnathlak-te kan common language lo ni chho zel Lusei/Duhlian Mizo trawng hi nalh ka ti a, tulna, pawimawhna leh rawngbawlna te avangin pai deuh chung pawh’in ka hmang ka hmang zel. Mahse ka Lusei/Duhlian-Mizo thriante chuan mi nuih chuang lo. An puitlin hlawm ka ti khawp mai.
[Report abuse]
October 7th, 2010 at 8:44 pm
ZIAK tih hi ZIAH tia hmanna hun a awm tih hi ka tanna thin a ni (keipawh)……mahse tun thleng hian kan thian kawm ngeih ber zinga mi nen kan ngaihdan a inang thei lo, kan ngaihdan kan sawhsawn duh lo ve ve…..Naupan laia “ziakchhan” keng loa “ziahchhan” keng thin kha ka ni ve tlat a..Hman deuha “MIZO TAWNG ZIAK DAN DIK” tih lehkhabu an chhuah te kha a bu hming atangin chhiar a chakawm loh zo vekin ka hria…..
HLAUH/HLOH…………Mizo Tawng thiam Darrokima lehkhabu pakhatah (a hming kan hre leh tlat pek lo a(h)!)…”an perhpawng kaw laih an hlauh thu” a awm a….a sawi tum nia ka rin chu an Perhpawng kaw laih an HLOH thu a nih ka ring…..kha perhpawng kua kha an hlau tlat anih erawh chuan a ziak dik tihna a ni mai a. Chuti a nih si loh chuan, an HLOH a ni dawn lo’m (lo em) ni????
[Report abuse]