mi(sual).com

Khatia ka thianpa nen a scooty servicing ti tura Chanmari lama kan tlan chhuak ta kha a khalhtu nilo zawk tan chuan hawi chhuahna remchangah la in lamlian leh a kam lam hmuh theih ang ang chu ka thlir kual nghal a. ‘Mas leh kumthar inpuahchahna cheimawi chi hrang hrang hmuh tur a awm zut mai.

Boruak a vawt a thawmhnaw pawh inbel tam/lum a ngai tawh hle. Khawlaia mi chelvak han hmuh chuan an buai hmel hlawm rual rual in an hmelah chuan hlim hmel leh phur hmel hi an pu vek hlawm hian a hriat a. A chhan chu kan hma lawk,hun reiloteah hian ‘mas leh kumthar kan chuan kai dawn vang ni te pawhin a hriat.

Servicing lam tihtirna tur hmun lam kan thlen phei hmain ka computer hman thiam leh chhawr tangkai em em, ka tihchhiat tak (a chhan leh vang pawh ka hriat loh) siamtir tur chuan sunflower electronics dawr ah chuan kan han tum lut phawt a. A chhiatdan ka hriatthiam dan berin ‘a muang lutuka’ tiin siamtir tur chuan ka han dah ve ren rawn a. Chumi hnu chuan kan kal tumna lam pan chuan kan in khalh chhuak leh ta a ni.

Chanmari kawn kan thleng phei a; tahchuan mawi mangkheng hian kawng kam leh kawngpui lai vel chu an lo chei a. An cheina hmanrua leh an cheidan ziarang vel chu a hautak awm mang e aw’ka ti a. Chutihrual chuan hetia a lem hmanga a tak hlimthla han tihlan hi a lawmawm ngawt in ka hria. Hnamdang leh Kristian ni ve lote tan pawh sawi kher ngai lovin a lem tak hmangin mi thinlungah thui takin thu a sawi thei tlat a ni.

Tichuan kan tlan zel hnu chuan kan tum hmun chu kan thleng ta a.A chhung leh a bul velah chuan mi an lo tam khawp mai. Rei ngial kan nghak a. Siamtir tur leh siam tur a lo tam em avang chuan kan hun a thleng ve thei ta lawk lo a. A chhungah chuan engtik nge kan hun a thlen ve ang tiin kan hawi ho reng mai a ni. A tahtawl te te in min ko a, pakhat siam chhung ngawt pawh darkar dawn dawn te anih avangin kan nghak rei hle mai. Kan hmaa mite thil an siam lai chu hmuhnawm tih hmel takin kan lo en ve ringawt mai.

Chutihlai chuan kan sir piah deuh lamah chuan tlangval pakhat, sam zuah sei ve deuh, lukhum lum dum khum hian Rodeo hi a lo siam malh malh a. A sir maiah chuan nula ngo lam leh hmel fiah fai tha zet mai hi a lo thu reng bawk chu ni in. Ka phu deuh zawk a. Ka lam chu a lo hawi lo nangin a hmel chu chiang takin ka hmu thei a. Kekawr dum, a mal mum khuh lang tawk vel tur leh kawrlum dum a ha bawk a. A sam chu chei vak hran lovin a tukhum lamah chuan sam tawnna hian hmun khatah a tawn mai a. A dum lam hlira a inthuam a vang chuan a taksa ngo sen siah mai te chuan ka ngaihtuahna hi a chawi nung chiang kher asin.

A pianphung leh ruangam chu thenkhat tan chuan ‘a thau lam’ han tih tur chi hi ani a, mahse chu hlei hlei chu ka duhthusam leh ka mit latu a la ni thung. Chutia ka lo ngaihtuah mek lai chuan ka lam chu a rawn hawi phei ta thut mai. Amah ka lo en lai tak chu a ni bawk nen..tihngaihna ka hrelo lutuk chu ka thianpa tukhum sam chu ka han pawh sak zauh ringawt mai a. Ani pawh chuan a scooty siamtir lai chu a en ve leh mai a.

Vawilehkhatah khatiang khan a lo chet laih thut theih ang tihngaihna reng reng ka lo ngaihtuah ngai lo. A scooty siamtir bulah chuan a tap deuh chawt a,a changing a mobile phone a khawih niap niap a. A lam ka hawi phei a, ka hawi let leh thuai thin. Rawn hawi se ka ti a,a rawn hawi phei lah chuan ka hawi phei leh ngam thung si lo. A lo van dawihzep theih ngai tehreng em ka ti rilru vawng vawng mai.

Thenkhat ta an siam zawh chuan kan hmaa mite chu an ko zel a. Kan hun pawh a thleng ve tep tawh a. Ni pawhin pial lam a pan tawh a, a vawt deuh vur mai bawk. Mahse nuam ka ti ru riau mai chuatiang a han nghah chu. Khawvawt leh hun rei chuan ka rilru a luah lo. Kan piah kil sir lama nula bawih hnap chuan ka rilru a la a, ka ngaithuahna a hruai zawk a ni.

A scooty ka nih loh vek pawhin a siamtirtupa tal saw han ni zawk ila aw..Ka va be pawh ngam si lo, biak pawh ka duh ru si. Kawppui (ngaihzawng) a nei tawh ang em? A nei tawh lo zawk ang em? Nula nge anih ang a, nu, la leh zawk? Engang mi pawh ni se a hmelthatna chuan min kuah hneh hrim mai. Mahse amahah chuan ka zuang lut ngam lo.

Chutia keimah leh keimah ka insual mek lai chuan ka rilru hria ni awm tak hian ka lam a lo hawi phei a. Amah ka lo en mek lai anih avangin a mit leh ka mit chu a intawng ta siah mai..ka tek chhuai ni hian ka hria. Ani pawh chu a lai ve deuh ni in ka hria,a nui seih a,a mit a la leh thuai a.

Ka thianpa chuan kan hun a thleng ve chiah, lo kal rawh le a ti a. Scooty chu inchhung lamah chuan kan nawr lut ve ta a. A siamtu tur chuan a han check kual vel a, Battery charge a ngai a,engine oil hi thlak a ngai bawk a nih hi a ti a.

Kan ta a khawih tan ve dawn chiah tihah chuan kan piaha nula hmeltha-i scooty chu a lo siamsak zo fel chiah chu ni in. Ka hawi phei a, an lo in nawr chhuak mek tawh a. A hnung lam atang chuan ka en zui vawng vawng a. A lo hawi phei leh tawh lo. Tihngaihna dang ka hre tawh lo a scooty registration number chhinchhiah mai loh chu (Mz-01-825*)! Tun thleng hian vawiina hmu ang hrimin ka rilruah a la cham reng mai..

Similar Posts:

• Mizo duh lo nge Sap duh lo
• Intawhlai Part II
• Scooty Tangkaina Pathum
• Inphatsanna (Good Friday Pual)
• 2012 May Fiamthu

Recent Posts:

• US Sipai tang duh te tana hriat tur pawimawhte
• Izzy.pinetrees
• MIZO SAKHAW BIAK DÂN LEH A TOBUL ~ 1
• Ka lunglai kuaitu – Linear equation in two variables (Zirtirna diklo chu…)
• Duhna Sal

This entry was posted on Thursday, January 6th, 2011 at 12:30 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.