Mihring dam chhung hun hi thil tih leh tih chhan azirin ‘Hun’ leh ‘Hun-awl’ tiin a then theih awm e. Kan dam chhung khawsak inrelbawl nana kan hman hi ‘Hun’ lo vuah ta ila; chu ‘Hun’ ni lo, nitin darkar sawmhnih leh pali 24 chhunga a chuangbang la awm chu ‘Hun-awl’ a lo ni ang. ‘Hun’ leh ‘Hun-awl’ hi thil pawimawh em em, kaihpawlh hauh loh chi a ni. Japan din chhuah theih chhan leh Rome tluk chhan te kha he thil pahnihah hian a innghat a nih kha!
Kan pi leh pute khan ‘Hun’ hi an hmang tha hle thin a. Thawk-awm chhungkua na na na chu an intodelh hle thin. Mahse ‘Hun-awl’ erawh chu an hlut nepin tangkai taka hmang an awm lo hle. Chuvang chu a ni mahna YMA lo ding tir pawhin ‘Hun’ ni lovin ‘Hun-awl’ zawk ngaipawimawha an thil tumte zinga ‘Hun-awl hman that’ tih an lo telh ni. Hruaitu hmasate kha an fingin thil an lo dawn thui ngei mai !
Hun her zelin eizawn dan leh nunphung a her danglam avangin thangtharte hian ‘Hun’ leh ‘Hun-awl’ kan thlei hran thiam a ngai hle mai. ‘Hun’ hlu tak ‘Hun-awl’ anga hmanga kan hna chanpual kalsana thildang kan va ti a nih chuan tih tur ti lo, tih loh zawk tur ti kan ni mai lo maw? Mahni hnaa rinawmte chauh hi khua-leh-tui tha, khawtlang, ram leh hnam tana mi tangkai an ni si a.
