Mizo hla hlui tha tak tak heng- Lalrintluanga Varte-Ka nghei dawn chuang lo, Lalbiakzauva-Zuapa a rui e, Lalkima Zote-Ka lo ruih em vang a lo ni, leh a dangte hi up bo mai atan chuan a pamhmai ka ti deuh.
Ngaihtuahna tam tak min neih tir a, a hla thu thlir pahin; ka rilrua thil awmte han pawt khawm dawn teh ang. Lei em ka chawi em lovang chu maw.
Ka nghei dawn chuang lo-
Zet-u-zu sawi apianga chil put tlat thin hian a do chu sawi loh, a tihrem dan kawng dapa MLTP Act thlenga nghawngkawl an han bat rup kha chu; saruh helh takin ka helh hial a.
“A duh chuan in se, a duh lo chuan in lo mai rawh se; in sawi a ngai lo” tia, Ui â ang maia bauh bauh thin ka la ni ta dah. Zalen takin zuar se kan changkang tawh lutuk, kan in thiam em em ang tiin; inthlan campaign taka campaign ching kha ka la ni zui.
A chhan i hre duh em?
Ka tuihalin zu ka in a, ka riltamin zu bawk ka in a, ka tuihalin zu tho ka in thin. Chuti chung chuan, in thiam ka inti êm êm a, pawr tak ka la ni. Zu ngawl veiah ka inngai ngai lova, zu in min vei zawk a ni ka ti thin. No ka keng khur dar dar a, ” Ka la rui lo reng reng” Hei hi ka mizia a ni.
Zu in thiam inti êm êm kha, ka pindan dawhkana mi khan daihloh chin ka nei ta zauh zauh. Veng mawng ka thleng thla ta fo. No khatin, no ruk a hring tan a. Ka rui ngai reng reng lo thung, ka kal thei lova; ka lu a hai mai mai alawm. Kei aia zu in thiam an awm chuang lo hrim hrim. “…a pa lo em mai, tihtauh nân hmang mah la..” Nu berin chhip samah min kek thawk a, zawi sapin “ka nghei dawn chuang lo” a ni tho tho.
Eheu..Eheu-
Kei Zu-in-thiama hian artui theuh theuh pawh, kan tur chhum a; chhum tur rawt thak ah nu ber ka puh ta fo. Ka rui lo, ka lu a hai tlat a. Mahse, ka khum bula no khat khan; veng mawnga no ruk zu ko tlat pek a.
Ka kal pai chhat chhat a. Mi kawngkal mai mai pawh, min cho riauva hriat chin a thleng a. An mit mengah, min melh rum riau tlat thin. Sawi tur ka hre êm êm a, ka sawi peih tawh loh chinah “Tu nge min cho?” in a zui châwk.
Engmah ni chuang si lovin ka chapo ár a. Het shala…tiin min pen keuh se, ka thu sawp niai ang tih reng ka dâwn ngai lo. Min chhang ngamtu awm se, ka pawr sauh ang a. Min chhanloh poh leh, ka pawr zual sauh ang. Zu ka in thiam em alawm, chhungte chu…bleh.
Zu avangin damdawi in ka hmu ta zeuh zeuh. Ka thi lek lek fo ta. A chang phei chuan, chhungten min lo tah laih laih a. Dam takin ka chhuak ang a, ZU tih nan ka hmui a zum zo leh ang.
Ka pi khawi maw um khat chu-
Pa ber a rukru berah ka tang chho tan a. Gas cylinder hi chuan, kar khat chu min daih ang maw le tih leh pawh chhuah ka’n rual a. Nu berin min lo hmu kiau si, “Tang rawh, tang rawh” a lo tih chuan; ka hul tihna. A kaw tawpa tan meuh chuan, fate period hun ka hre ta êm êm a. Stay free lei sak ka chak thar thut a, cheng 50 dil a ni mai. Va lei tak tak chuang suh i.
Fiamthua “Ka zu in chauh in sawi a, ka bawnghnute in; in sawi duh si lo” tih chu ka tawngkam hman duh pawl a ni tawh a. Kum khatah vawikhat bak a in bual lovang a ti khawpin, ka pawr tawh a. A tel lo chuan ka khur tan a, ka sen tul tul a. Zu ka duh ve tawh hle ah ka inngai ve ta chauh.
“Ka pi khawimaw um khat chu, La, la, la, la….la” hei hi ka la sa mai mai. He hla hi ka phuah nise, a hunlai kha chuan; “Whiskey Lullaby” nen inthlengah min dil se, ka phal ka ring lo.
Ka puam tulh a, zu vangin i Thin a chhe tep tawh a. I la in a nih chuan, i thih phah ang min ti ta heu mai. A ngawl veiah ka inngai ta a, ZU in thiam inti êm êm thin kha; in thiam loh chin a lo thleng ta a ni ang e.
“Rui saa ka lo piang lo chu a pawi mang e” ka tih thin laite kha, a lo Satel lu ta deuh a ni.
Zuapa a rui e-
Nupui fanau dáwn lo lekin suihlung a mawl zo ta. Zu in tura ka chhuah dawn apiangin, naupang hovin “A pa zu in suh aw” an tih tawk tawk thin laite kha; min hmangaihzia ka hre thar chauh va. Ka zahawmna leh ka chhungkua ka in chhe zo vek (a tlai zo ta).
Zu no dawm chungin, ka fa ten “A pa zu in suh aw” min ti asin ti chungin, mittui a tla pur a. Min hmangaih zia ka hria, Zu-in-thiama hian a nghei ta meuh lo chu a ni si a.
Rui takin ka haw ang a, kan chiar leh hluai ang. Nu ber rilruhah takin a lo thu ngui bur ang. Min lo biak that loh deuh chuan, ka che leh ang a. Inchhungah thlengthlawk thei leh bel thlawkthei chenin, ka siam leh ang. Naupang an tap niai niai ang a, nu ber in mittui a hru fap fap bawk ang.
Ka lo ruih em vang a lo ni-
Thih chhan “Tluk leh ding áwn” ka thih ni ah an la ti ang a. Mitthi chanchin an sawi ve ngei ang a, a dam that phawt hi chuan; “Tluk leh ding awn hi a ni ve a” tih bak sawi tur an hre kher lovang. Pastor in min vui ve ngei dawn a, “Biak in a kal pel ve thin” tih bak sawi tur a neih ring suh.
Zu avangin inthen chang a awm nawk a. ” Ka nun ka sim tawh ang” tiin, a ngaite bawk ka ni a. Zu a thlum belh sawt emaw a ni ang. Ui â pawhin hawn nachang a hria a, patling meuh hawn nachang ka hriatloh chang lah a tam. Ka tlai leng ka hawn meuh chuan, “Ti ti ik ik” a ni fo.
Inthenna leh fahrah siamtu, nuihza bur leh zahawmna thai bo tu mihring thilsiam tenawm chu a va ni êm!! Thleng thlawkthei leh bel thlawkthei ka siam laite,mi nun khei rana ka rák vel te, mawi lo tak taka ka tawng te, ka chapo ár lai leh; “Rolenga a tap e, Chhingmiti a tap e” te an tih lai khan-KA LO RUIH EM VANG A LO NI.
Lalkima Zote sak-
Hringmi doral lian ningzu,
Engan ka lo tawn che,
Ka thai duhlai min then tir tu,
Chun nu, zua leh chinlai unau,
Sam ang min then tir tu,
Lanu, val rual nun her sual tir tu,
LU-TI-HAI mai a lo ni e…
tiin a tlang ka’n tlip hram teh ang. Haleluiah pek thuai thuai a va chakawm ve.
Similar Posts:
- Mizote hi hnam dawih kan ni (?)
- Hmangaihtu ngawi chawi
- Mi(sual) zar ka zo…
- Meizial chungchang bawk.
- Kan Mizia leh nun duh dan
Ni e, Mahming, Pathian...
November 7th, 2011 at 8:47 am
Lr, i chawei te kha a tuilo ang e. Keipawh vawksa ka ei ve ringawt a, ka zawi phah.
Zu hi zu anih chhung chuan a bo dawn hlek lo. Do vak pawh a sawt lo. Control a pawimawh ber. Kan Sorkar pawn a khap bur mai a, mahse in tur lah chu an hmu reng tho sia. Khapna hnuaia in an nih avangin in chintawk an hrelo. Chuvangin legalise se, dan hnuaiah a duh chuan in rawh se. Kum 5 a ral hmain zu indan an thiam tlangpui ang. Zu khapna hlih anih vanga khawlaia rui buai nuaih nuaih a insual buai tura kan ngai tlat hi a diklo.
Khawvel ram changkang ber berah pawh zu rui buai hi chu an awm ve tho ania.
Report this comment
November 7th, 2011 at 8:52 am
A hahthlak em mai, ka kut ka sil e. Pilata sil aia sil chiangin.
Report this comment
November 7th, 2011 at 9:03 am
Zu awm mai mai hi sual a ni lo tih sim tir tur che u a ziak ka ni lo, nunna hial lo chan tawhte thlarau ka zah avanga; kei lungte meuh pawh au chhuak ka ni e.
Pastor sitting room ah Zu dah reng ila, a sual hlei nem ti ru? Kan helh ngawt ang le.
Report this comment
November 7th, 2011 at 9:38 am
Comment a ngaihnawm e. In loh tluk a awm lo tih erawh kan hriat vek kha.
Report this comment
November 7th, 2011 at 9:53 am
Silai-in mi a that lo, Mihringin mihring a that!
Kan hmelma hlauawm ber chu keimahni-ah a awm. Chumi, keimahnia awm – hmelma hlauhawm ber hneh thei apiang Zu, Drugs, Sex, Eirukna te-ah an fihlim thin.
Zu hian bàn/kut a nei lo. Ka bànin kan ban a, kan kutin a la mai thin zawk a ni. Ka kut/ke/lei/mit engkim thununtu chu tunge?? Keimah!
Report this comment
November 7th, 2011 at 9:57 am
“Keimah” hian in leh keuh zel a.
Ka piantirh ata misual ka ni a, zu pawh an thlawr tirh ata a sual sa a ni, ti leh hram ang.
Report this comment
November 7th, 2011 at 10:02 am
Ka post pel rawka, ka’n sawi chiam mai chu le. Ka post sawi tum loh lam daih a ni ta e.
Report this comment
November 7th, 2011 at 11:01 am
Ruisaa kalo pianglo chu aw.. Hairehai
Khawilai insualbuaina hi Zu kan khap chhanber a nilo. Zuin tak tak an insual peih lo. An inlohin an rui zawk.
Report this comment
November 7th, 2011 at 11:57 am
Aizawlah inrinni khan Opium kg2 an man a, Opium hi khap a ni. Ala awm reng vanga khapna hi hlih chi a ni chuang lo. Ching vak vak ila tawlh chhuak hum hum ila kan hausakpui dawn tehrengnen.
Report this comment
November 7th, 2011 at 3:17 pm
Zu in mi ka ni,a tlangpuiin kar 1 ah vawi khat.Tin,thiante nen dinner ei etc tih velah ani leh mai.Peg li vel hi rui si lo,biang chhah map tawk vel ani-ka tan.Pa tawng tam lo tak,pawimawh fet chauh sawi thin,lehkha chhiar edict ka nih avangin nupui fanau bulah ka titi tam lo hle. Zu ka in tum hi chuan nupui fanau bulah ka titi in ka nui ve thin….Zoramah mai ni lo,khawvel zau zawkah pawh lehkhathiam leh mi ropui tak tak zu in mi an awm. Drug ngawlvei erawh thlengsang tak sawi tur ka hre lo.Zu ngawlvei thin,sim ta hmak,kohran Upa leh Pastor hial ni ta sawi tur an tam;a bik takin zu hi chu pian thar san a har lo.Drug hi ani hlauhawm chu.Drugs addict tawh chuan nghei hlen har an ti.Ka fa-te hian zu in se ka ti hauh lo.Zu hi a tha lo,sum a heh, mahni inthununa lama pan ve tak tan hriselna hial a khawih chhe thei in, hun hlu tam tak min laksak etc,adt.Chutichungin,ka fa- te hian drug an tih ai chuan zu –in se ka ti zawk ang.Hemi chungchangah hian sawi tur tam tak a awm. A tlip nan: Hawh u,zu hi ram changkang zawk-ten an tih anga khuahkhirhna hnuaiah dah zalen ila;drug hi nasa lehzualin I do zawk ang u;chutiang chuan CADS lam pawh hian an hming put chhan ruihtui(zu) nilo ruihhlo( drug) ngei mai hi do uar sauh se .Zu do bur hi chu a international level lo;international levela an do chu drugs leh tobacco hi ani zawk.Zu khuahkhirh hian zu quality nasa takin a ti chhiaa,zu chhe in chu an ruihsual fo.A in duh chuan (zu chhia ) an in reng tho;chu chuan an pianthar hma-in an nuna a chhah sak hman thin.Zu hi chu upat lamah a nghei ve theih mai.Drugs erawh hi chu—
Report this comment
November 7th, 2011 at 5:07 pm
Ka type ve teuh tawh a, in comment zawng zawng kan chhiar leh hnuhnawh a, ka type sa ka delete leh vek mai….Ropui taka comment kher a tullo a ni ang e…Piang hmun lo na na na hi chuan ngaihdan hrang hi kan nei vek a nia…
Report this comment
November 7th, 2011 at 6:00 pm
‘MIHRING HMELMA LIAN BER CHU MAHNI’
Report this comment
November 7th, 2011 at 6:49 pm
Post pawh in rilru a khawih, kawmen pawh ka chhiar chhuak thla vek a, in ngaihdan te hi tha ka ti lutuk tlat. Zu hi ‘Do’ a nih chhung chuan khawlai ah rui buai an tam ang, tihloh tur hi mihring hian kan ti chak vek thin, Naupang pawh khawihloh tur, tih loh tur tih chiah hian an khawih in an ti chak nghal em2 thin, chuvang chuan khap kan ngah lutuk te hi kan ram ah sualna punlun nachhan pakhat ni ve te hian ka hre thin. kei misual hian.
Report this comment
November 7th, 2011 at 6:58 pm
A chunga ka comment hi han comment leh lawk ila. Tlar 8na khi , —`- awm pawh nise a mak lovang`ti-a chhiar tur ani e( correct word processing).Engpawhnise,ka main theme chu `Tha lo rau rauah zu aiin drug hi a hlauhawm zawka::chuvangin zu khap bur vanga drug a hluar phah anih chuan,zu khuahkhirh burna hi phelh thawl ta deuh ila; drug hi a hluar nep deuh lo maw?-ka tihna ani ber e. Pa thu chhep thiam lo keini-ang thu hi chu a chibuh leh nuai thin.Ka rawn kurpui ve ngial te khi `Ngaihdan ` ani e..-Ngaihdan.Zu khapbur chungchang chungthu-ah hi chuan research beih mêk anih kha maw(for safe side).
Report this comment