Ka’n tui hnih lawk. Tichuan, mas chu kan hmang ta ngei mai a. Kan veng a tualzawl zau tha laiah ruai hi an siam mai thin a. A pui a nawiin kan kan inzui diah diah mai thin a. Ruai thehna a ken khawm turin chhungtinin chaw mahni ina an chhum chu an keng khawm a. Tuizem remchang chhungah changel hnah phahin chutah chuan chaw chu an bun khawm a. Chaw rawn kenna atana an bel/bucket rawn ken chu chhungte dam lo leh tar ruai theh thei lo sa hawnna atan an hmang nghal a, a remchang khawp mai. Zan lama kan that leh tura sa lo hawn ru pawl pawh kan awm thin a. Sarang tha deuh hlek erawh pai ruk lawk a ngai a. LT jacket lam pang chi puar sa deuh hak phei chuan sa hawn ruk pawh lang miah lovin a pai ruk theih a. Thiante in khawi laiah emaw kan han kang ve dar dar a. Hnianghnara sa ei ngai ta lo chu zan lama sa hawn ruk han ei leh bawk chuan pum lam a lo chiang kuang lo duh khawp mai a. Thiante zingah pum nuam lo deuh tung a awm a ngaih phah a. A zia lo thei hle bawk.
Ruai theh zawh tawh lamah zan lam programme dang a awm tawh loh chuan Aizawl tlang dung lun lai, Pisa tlang leh Zarkawt inkar hi chhuahvah nan kan hmang thin a. Tunlai anga chei te hi kan la uar vak lova. Mahse nuam kan ti tho. Veng khat atanga vak chhuak inthurual, mi tihbuai tum tlat pawl lah an awm bawk a. Kei ang dawihzep deuh hi chuan kimki chawih chawih hian thiante ka zui ve hnu hnu thin a. AR Cinema hall leh Zodin Cinema Hall chhehvel ah phei chuan a hmei a pa hian kan vak dul dul a. Thlasik khawvawt hnuaiah kan tei rawlai nasa mai thin kha a ni a. Tumkhat phei chu rual u deuh hi kan zui a. Zing khaw var dawn hnaiah Tuikhuahtlang a PHE tuizem bul velah min len pui a, a vawt duh ngei mai !!
Tum khat chu Mas lenkhawmna bul velah kan thian ho hian kan ninhlei hle a. Zai khawm ho zing a mi nula pakhat hmaiah chuan belmang ka va tat ru. Pawn lamah ka tlan chhuak leh. Tukverh atangin kan thian ho chuan kan enthla thap mai a. A lo harh deuh hnu chuan mi dang chuan an nuih ru tet tet ta mai a. A ngaih tha lo chuan a hmai chu an nuai a. A kut an en nak chuan a dum ta nuan mai si. Chhei le! A thinrimin kan veng tlangval senior khuangpu chu a puh ta. Zai a tui lo tan bawk. Chu nula chuan khuangpu khuang kuah lai chu a chhuh lawk a, chhuatah a dah tau ta bur mai. A va han zia lo teh lul!
Maggi lo chhuah hlim lam khan tumkhat chuan mas bawr vel tho hian kan thian hoin kan kang ve e kan ti a. Kan lo kang thiam aw zawng lo mai a. Tel a kan kan hnu chuan tui kan leih a. Hmin tha tak mai hian kan chhum ta a lawm le. A tih hanna zawng zawng kan telh vek bawk si. Kan han ei chu le a hang lutuk bawk si, a hmin lutuk bawk si. A va han zia lo tak em. Mahse keini ai chuan kan rual u thenkhatten an tifuh lo zawk a. Papawr hi an kang thin tih hriain tui nen an kang vei rawk a. A kawi tha awm teh asin. Ar kante chu awm bawk mahse tunlai angin broiler ar a la awm ve lova. Pawisa lah kan nei ten tawn hek lo. Chuvang chuan Chow kan kha a lar fu thin.
Zan khat chu Mas vuak vet lai tho hian kan thianhoin Panasonic 3-Band Tape Recorder nen thlanmualah kan inhawt buk ve a. Boney M hla “Brown girl in the ring” tih kan kan play ve dap dap mai a. Nuam kan ti ve nasa. Mahse a battery lam khan a daih rei lo em mai a, duh ang takin a hot rei theih lova a pawi khawp mai.
Tin, Urlawk zan hian lengkhawm ho tan sawhchiar an siam a. Naupang tlaivar tum, meng hlei thei lo kha min kai harh chawt chawt a. Min kil tir ve tawp mai thin a. Thlangra chunga changel hnah phahah suakin an rawn chawi lut a. Kan pir ta liam liam hlawm a. Keia mut chhuak tawh chuan sawhchiar chu kan pir ve bawk na-a, ka ka a thleng lo zauh zauh mai a. Zia lo khawp mai. Tlema inti zei deuh chuan kut zungchal leh zunglai ti kak te taw hian, “Sawrchiar zinga a sa lak nalh duh chuan heti hian tih tur, a sa hawlh fuh ve leh cheh chat mai tur” te kha an ti a. A remchang phian ta awm e.
Ka la hriat reng, mitthla pawh a ka la hmuh chu a chek bel kha a ni. Thlawhna bela chhum hi a tui duh bikin a hmin tha duh an ti deuh kher thin a. A chek var leh var lo chu hnanga tawn khawmin an han chhum nghawr hluk hluk mai a. Fatu senior deuhin “A chiu a hun tawh kha , chiu teh u” an han ti a, Mau tul zum ver vawr chuan an han chiu a. A chik zuai zuai mai a. Tum hnih tum thum an chiu chuan an duh tawk mai ni awm a ni. Bel tlang han en ila, bawng ek nge a chaw thial sawm tawh la pai tawih tur tih pawh hrit hran loh kha a so luk zel mai a. Tunlai tawng takin ‘RAW’ tiah tiah tak a ni. A phul bal duh ang tawk a an huih liam hnu chuan bahkhawr etc te an thlak bawk a. Tui ti tak chuan an hawp kuang kuang thin chu a ni a. Khatiang ang tak a chek bel kha tunlai hian han hmu leh ta ila, a chek tui kan hawp duh ang em aw!
Similar Posts:
- Lungphunna Ruai kil in…
- A lo nuam ber mai e
- Sazu sa siam dan(recipes) :-P
- Krismas Ruaitheh (Pic album)
- Mam mam ei puk puk
November 13th, 2011 at 10:48 am
Hmm..
Report this comment
November 13th, 2011 at 10:57 am
Va ngaihthlak nawm ve, naupanlai mas hmandan mi ti hrechhuak uai uai mai. Tyre hak te kha kan ching a, hnapkhir a ung duh hle
Report this comment
November 13th, 2011 at 10:58 am
*hak = hal
Report this comment
November 13th, 2011 at 11:06 am
Report this comment
November 13th, 2011 at 11:17 am
Khi tiang ngei mai a siam sachek khi a lawm ka la ei chak chu.
Tunlai a eng kha kha emaw ka thlak kha kan tih ang hi tui ka ti ve hauh lo ka zo hrawk hian. 
I post lunglenthlak ngei mai.
tren tren.
Report this comment
November 13th, 2011 at 11:18 am
thianzaho a ‘mas hla sa a zai ho dial dial ava chakawm ve le.
Report this comment
November 13th, 2011 at 11:25 am
Kei chu Mas ruai te hi a tui ka ti ta lo. Bawng leh vawk, mosola tih vel tello a an han chhum te kha a hang tui ka ti. A tui te kha a ‘tuipui’ ti ngat in kan sawi thin.
Report this comment
November 13th, 2011 at 11:33 am
@Sheldon 170
dik chiah, hmanlai ka ngai. 
tren tren.
Report this comment
November 13th, 2011 at 11:42 am
@chhuaklinga, keipawh. Nimin pawh lungphunna a kan chawhmeh kha a spicy lutuk a, vawin thlengin ka pum a la dik theilo.
Kan naupan lai chuan changel hnahah ruai kan theh thin. A nuam thei eee
Report this comment
November 13th, 2011 at 11:45 am
Krismas hi chu a Krisimasss bik ruih a ni e
Report this comment
November 13th, 2011 at 11:48 am
Krismas thing kan phur a, Krismas tui kan chawi bawk a, Krismas hnah kan la bawk a !
Tunlai hian chuan an peih loh lam ai mahin hun an nei tawh lovang. Heng hi tih leh ngai se, peih lo kan tam tawh awm!
Ziak thiam khawp mai lung a leng………!
Pu Zolawra khan Salem Veng kha a fiam thin a, an haw teh mai a sin. ( Krismas/Kum thar ruai theh zawh hian chuan an kawlthei zik a kawlh fua zel a ti
)
Report this comment
November 13th, 2011 at 12:04 pm
Pu lushai_er chu i va reh em em ka ti rilru reng a, i lo lang ta hlawl mai, a lawmawm e.
tren tren.
Report this comment
November 13th, 2011 at 12:26 pm
Ngaihnawm ve aw, siam sual nasa hlawm hle mai a..!!
Vawkhat chu chini hi kan kang sual tawh alawm, ka thianpa nen tel nen ka thirbel thar ver vawrah kan kang a lawm le, thirbel leh kan chawhna fian hman leh ngaihna awm tawh lo khawpin a khir phah…tih chi loh ve khawp mai
Report this comment
November 13th, 2011 at 12:31 pm
A thenah ka nui a.
A thenah ka hlim a.
A thenah ka lung a leng em em mai a.
Thuziak thiam tak zawng i ni phawt mai.
Ngaihnawm ka ti em mai.
Mitthlaah a lo lang nghal uai uai thei a.
Chuvangin kan hman dante pawh a lo inang viau zel a.
Lunglenna hruikhat vuana han titi-a han zaidun tlak tlak a va châkawm em!
Report this comment
November 13th, 2011 at 12:45 pm
#12 : Ka khawl hi a chhia a, ka siam tha lawk duh lo va, naupangin games an khel nasa lutuk a………Mahse hei nizan windows ka load tha a, ka rawn lang zuai anih hi. Post tur pawh ka nei nual a, mahse ka vil hman lova, hman ve leh tep ang.
Tun hma deuh kha chuan Krismas ruai atan Sial an kai thin a (Khaw dang atangin)! An kal thui deuh chuan an cher hman thin, naupan lai chuan lui kamah phul tamna hmunah kan thlah thin. Sial a van tak hnu hian Bawng hi an kai leh chauh zawk a ni. Sial kan Pate’n an kaih dan ka la rawn bel ang e.
Report this comment
November 13th, 2011 at 1:20 pm
Keini pawh kan naupan lai chuan masi bawng kan veng ve thin, a chung chuan ngam a nih hlauh phei kha chuan a nuam thei rasss..
@15, masi hma ngeiin aw.
tren tren.
Report this comment
November 13th, 2011 at 2:38 pm
Kristmas ka ngahhlelhna chu no-vehicle day a khawlai vah nuaih nuaih lai kha ani.
Report this comment
November 13th, 2011 at 3:04 pm
I masi sa chek sawi chu ka va hawp chak em .a tui dan a dang riau ..a ruhkawl lianpui pui nen a tuipui nen slrrrp
Pathian zar ah masi kan thleng ve leh em ang a .mahse ruaitheh kha hmanlai ang khan a nuam tawh lo. Hnah a han kil laih laih kha a lo nuam ber mai . mauthei in a tuipui kan han inchhawp a . kan han hai chim hem hem kha chu nuam ve tak ani , ti daih ila , In ei ve tawh emaw , Khawruhlian ah khian Bawng thithun ka ei tawh a , a rum el awl khawp mai .
Report this comment
November 13th, 2011 at 3:08 pm
I sawi thiam hle mai, ril a tram ruih thei mai a lawm, masi ruaithreh a va chakawm ve
Report this comment
November 13th, 2011 at 3:28 pm
Post ngaihnawm hle mai
Tlem te chuan ka ngai ve deuh kan naupan lai kristmas kha. Sathau hlauh loh lai kha a nuam ber mai
Report this comment
November 13th, 2011 at 3:52 pm
lunglen hlak mah mah
Report this comment
November 13th, 2011 at 4:05 pm
Report this comment
November 13th, 2011 at 4:12 pm
Krismas ruaitheh
Naupang ho khan bawng phing kan pet luih2 zel. 
Ka pa uang hian kan dawhthlak thleng ah hian chawhmeh hi alo dah teuh zel… 
a ngaihawm ta hle mai.
Report this comment
November 13th, 2011 at 6:44 pm
Chutiang chek ah chuan abing…changel hnaha fun an han thlak tel ngei a, duhsak zawngte hluiah an theh zeuh zeuh zel alawm…….achek kha akha tuibik ngawt mai…ngaihnawm viau e
Report this comment
November 14th, 2011 at 12:19 am
Krismass hla ngaihthlak pahin ka chhiara; a lunglen thlak duh ngei mai.
Report this comment
November 14th, 2011 at 10:22 am
Nimin lamah ka chhiar hman lo va, a ngaihnawm ngei mai. Ka chanchin chhiar ang mai ka ni. Ruaitheh zawh tlaia lèn dul dul kha a nuam ve riau. Tin, chow chhum hmin lutuk hi ‘a ui thluak’ kan ti thin. A bum duh khawp mai. Ka lunglèn i kaitho tlat mai, a hrehawm deuh nuam deuh veng veng bawk si. Ka mitthlaah an lang uar uar mai.
Report this comment