Mizo te tan Krismas hi, kan ni hlimawm ber, leh ropui ber a ni a tih loh theih loh. Tunhmaa kan lo hman thin dan te phei kha chu, December ni 20 vel atangin, khawtlangin thing kan han phur khawm tan a. December ni 23/24 ah hnah la turin nula tlangval an han thawkchhuak leh, ruai buatsaihna tur hi a vum thur tawh mai a.
December ni 24 zan tlaivar pawh, tlaivar lo pawh zingah mahni neih an gang hriamhrei rawn hum chhuakin, Vawk, Bawng talhna hmunah an rawn fuankhawm a, nula ho lahin, hmarcha rawt tur, purun, hmarcha, sawhthing, tomato, bahkhawr etc. an lo kheh a an rawt mur mur bawk a. Krismas ni zing lo chuak no sut, vawt raih karah, kan phe mur mur a, kar lo-ah, Bawng 2, Vawk 4, Ar 10, Sangha kg 20 – sa te kha chu, kut a rual tha bawk a, kan chan zo zung zung thin a nih kha. Naupang ho lahin, saphing an lo ham puar a, anlo pet bawk.
Tlailam ruai the halo hun a, khelmual neih zauh ber, a khuk lutuk lohnan, fatu ten tui an han theh huh thet thet a, chutah chang-el hnah an han phah kawkalh nak nak mai a. Fatu ten, chaw an han bun a, sa rawn chhun leh na tur, kut-in, a lai an han hai awl nawk nawk a, chaw an dah kual chhung ah chuan sa leh sihneh buhchiar, mawm eng hlui mai an han bun a, Vawksa, a kawchhung nena chhum pawlh, antam kuang phek satui a chhum zawr hnup an rawn bun khat hnur mai a. Bawngsa chhum anla rawn bun zui leh nghal a. Bawngsa chhum tuihang no-vin an rawm sem zui bawk.
Mi za tam tan a nula tlangval in, hmarcha, purun, sawhthing, tomato, bahkhawr an rawtpawlh chu, an rawn bun thliah thliah bawk a, Khawtlang zawng zawng, a lian a te, a pui a pang in, mahni inlum atangin, an lo thawk chhuak tuam tuam a, a then-in mahni herhsawp, thuthleng hniam neih ang ang, an rawm hum chhuak a. A then, in-tuituah duh deuh ten, an ei khawp zawngtah or Bekang an rawn pai ru tat bawk a. Officer ‘a tui deuh in pha chin’ ho lah a hranpa deuhvin an han kil a.
Chhungkaw lianpui kan ni ber e. Thiantha te nen, chhung chhung bik ti lovin, ruai kan han kil ho a, a tlai theih ngei e. Tunah zawng tihdan thianghlim leh changkang zawk zawngin, kan ti danglam zo ta…kan hrisel phah tak tak ngut nge maw ni?
Khuarei an chang zo ta….Kan la ngai dawn ma nge khuarei an….
Similar Posts:
- Bahkhawr
- Sai-ar(Turkey) sa hi a tui em?
- Krismas Ruaitheh (Pic album)
- Eiin siam dan awlsam leh siam dan thenkhat
- Ruai thehna hmun atangin…
December 26th, 2011 at 10:14 pm
Bawng, vawk, ar leh sanghate tan chuan nuam lo ve thung nia aw :lol:
Report this comment
December 26th, 2011 at 10:17 pm
Bawngsa tui hang, bel lianpui a chhum…ka chil a put.
Report this comment
December 26th, 2011 at 10:22 pm
hnah la hlui te kha kil a va nuam ve thin tak em. Changel hnah chung ngei a ruai kil kha a nuam.
Report this comment
December 26th, 2011 at 10:25 pm
A hlui toh viau naa, vawikhat na reng reng chu tawn leh a chakawm kher mai. Lung i ti leng. Hnah phahtu, chaw khawrhtu, sa semtu adt. Ka tang ve toh.
Report this comment
December 26th, 2011 at 10:30 pm
A ngaihnawm ka ti. Mahse, i space bar hi i hmang fimkhur tawk lo a ang.
Report this comment
December 26th, 2011 at 10:40 pm
Vawiin tlai pawh khan buffet duhlo hluiah kan theh ngei kha
Report this comment
December 26th, 2011 at 10:43 pm
A ngaihnawm e hairehai
Report this comment
December 26th, 2011 at 10:47 pm
ril i ti tam dawn alawm le
Report this comment
December 26th, 2011 at 10:49 pm
ziak linglenthlak thiam hle mAI
Report this comment
December 26th, 2011 at 10:54 pm
Khuarei an chang zo ta….Kan la ngai dawn mang e khuarei an…….!?
Lung a leng e mai…..!
Report this comment
December 26th, 2011 at 11:10 pm
A lunglen thlak khawp mai, No atan Tlangval ho in hnah lak pah in mau kan pu a, Mauthei kan siam a, mauthei hmang ngei mai in bawngsa tui hang kan han in thin kha a nia, a va han lunglen thlak mai2 tak em, khua rei zawng an chang der chu a ni mai sia khang hun te kha.
Report this comment
December 26th, 2011 at 11:13 pm
Lungleng tak chunga i ziak a ang ka ti..
Tunlaia thlenga kan dawh den2 hi chu a nuam lo thlawt a ni. Inneih/lungphun vel nen a in ang reng a MAS RUAI nihna a bo e te ka ti mai2.
Report this comment
December 26th, 2011 at 11:33 pm
krismas ruai hmeh tur hian ran talh phal lo se, alu kan, samtawk rawt leh dal hmeh tur ti se, ruai theh peih hi kan awm lo ang a :lol: sa duh lutuk hlawm mai hahaha :lol:
Report this comment
December 26th, 2011 at 11:59 pm
Drawk-e sa
Report this comment
December 27th, 2011 at 12:44 am
#14 century child na nih tawp mai chu(h)! Zion-a fapa i ni hial lo maw
Report this comment
December 27th, 2011 at 6:14 am
“Par ang an chul, kan nun khuarei an chang zo ta. Tapin au mah ila, kir zai reng an rel tawh si lo”.
Report this comment
December 27th, 2011 at 10:29 pm
Vegetarian tan chuan Krismas ruai leh a chhehvel boruak hi a nawmna em em a awm hran lo a nia.
Report this comment