mi(sual).com

Mi thahnem ngai duh thawh a va na tak em!

Thuhma

Hmanni lawk khan Mizo wikipedia chungchang kha rawn ziah a ni tawh a, rawn ziah leh pawh a inthlahrunawm lek lek a, mahse ka han sawi fiah lawk ang e.

Comment-tu pakhat chuan ‘misual.com a la luahlan thei mai ang a!’ a ti hial a. A fiamthu te pawh a ni thei e. A enga pawh chu ni se a luahlan dawn lohzia leh an tum inan lohzia ka han sawi hmasa ang e.

Pakhatnaah chuan Wikipedia chu titi luih luih theihna hmun a ni lo. Thupui mumal tak neia thil chanchin ziahna leh ziah tawh sa rawnna hmun a ni. Wikipedia hi kan hriat theuh angin khawvela website tlawh tam ber pangana (hmanni deuh lawk khan) a ni a. Tuna internet hmang tam zawkte thil hriatna hnar ber pawh a ni. Mi thahnemngaite thuziak  khawnkhawm a ni a. Survey-a a lan danin Wikipedia-a article ziaktu tam zawk hi kum 25 chho deuh vek an ni; mahni inzirna tha tak a nih vang te pawh a ni ang e. A awmzia chu, thil kan hriat em em vanga ziak tur kan ni lo va, kan thil hriat duh lam, inrawn zau paha kan ziah theihna hmun zawk a ni.

Pahnihnaah chuan misual.com angin hman a nuam ve lo. Sawi hawt hluah a theih ve loh. Tan lam leh mahni thlirdan ziah theihna hmun ni lovin miin thil dik an hriat theihna tura thu tangkai ziahna hmun a ni. A nawm vang ni lovin thahnemngaih vanga ziah hram hram tur a ni.

Khalam kha chu duh tawk mai ila, a chiang tawk thawkhatin ka hria.

A thatna

Hnam ropui tehna pakhat a ni, wikipedia neih len hi!  han ti thuai ila a dik thuak awm e. A dik dan tak chu: tawng neih that tehna pakhat a ni. Mi ramah kal ta la, eng tawng nge i hman? ‘Mizo’. ‘Ka va hre ngai lo ve!’ lo ti ta se, sawi mai theih awlsam ber chu ‘Wikipedia hi kan tawngin a awm a, article 80,000 vel a awm, nuai 2 ve a awm’ han tih mai theih chu mi hrilhdan awlsam ber a ni. (English-in article a tam ber a, maktaduai hnih chuang hret a awm. A dawtah zerman, a dawt lehan feren tawng: maktaduai khat chuang ve ve)  India rama wikipedia nei tawng thenkhatte chu Hindi (a rei tawh), punjabi (tunhnai lawk khan an nei thar), bengali tih te an ni. Hetih lai hian khasi tawngte, garo tawng te leh hnam tin mai hian wikipedia neih ve theih an dil mek a, mahsé ‘kan hnamin kan nei duh chiang e, kan tawng hi kan chhuang ve thawkhat e’  tite tan lo chuan neih mai theih a ni lo. Article ziaktu pali/nga tal awm a ngai, a tam poh leh a tha. Chumi tur chuan kan tawng dah lansarh duhna rilru put a ngai.

Kan hnam tiatpui khasi te, garo te pawhin wikipedia neih hi an dil ve mek tih chiang takin tah hian i en thei ang. Mahse i hmuh angin (an tawng zawnah klik la)  an thurual lutuk lo nge ni, article hi keini aiin an la nei tlem leh chhawng a, an hawnsak tak tak hun a hlat viau hmel.

Keini erawh chu vanneihthlâk takin interface language mizo tawnga kan neih deuh vek tawh bakah in zinga thahnem ngai pahnih-khatin thu in rawn thawh a, a hawn theih tep tawh tih thu kan dawng a ni.

Ka ngen duh che u chu, article ho-te pawh in thil hriat zawng (Sailova chanchin i hria em? Einstein-a chanchin tlem tal, english wikipedia atang i letling thiam em? laddt…) pahnih khat tal han thawh theuh ula, tluang takin kan puitlin thuai mai ang.

A tangkaina

English-in ka chhiar thiam tho va, engnge mizo tawnga neih kher ngai? i ti a ni mai thei e. Chutia kan tih zel chuan kan tawng hi tihhmasawn ahnehin kan tiphuailuai tial tial ang. A bak rengah pawh mizo internet hmang thiam zawng zawng hian english kan thiam vek kher lo. Technology hmasawnna azarah hei hi a dik tial tial ang. Chu’ng mite tan chuan, entirnan: Albert Einstein-a kha eng timi chian nge a nih? Hlo  thlo hlawhthling maw? Zawhte vulh hnem maw? Nge nula hmeltha lar (awi ka rei!)? Chu aia hre deuh hlek tan pawh eng chiah nge a hmuh chhuah? A thil hmuh chhuah chu eng thu-hla nge? tih te hi han hre duh ta se mizo hriatna zempui, a thlawna en theih chu a va tangkai dawn tehlul em!

Physics thiam i nih chuan i tuizawng/hriatzawng pakhat tal ziak rawh. Thu leh hla lama tui i nih chuan i ziakmi ngaihsanzawng chanchin pakhat tal ziak rawh. Sociology, chemistry … chutiang zelin. Kan hnam tan vek a ni. Tumah sum leh paia hlawkpui tur kan awm lo. Kan hnam tana thahnemngaih thu-hla vek a ni. Mihring chanchin chauh ni lovin ramsa chanchin te, theory chanchin te, … engkim mai chanchin a leng a ni. I pianna khaw chanchin tal pawh i hriat chin chin rawn ziak thei la a va ropui dawn em! A hre zawkten tihdanglama ziah that theih vek bawk a ni.

Tlipna

Thu ziak tùr mumal ka va hre lo ve! ti tan pawh english thiam tan english atangin, zerman thiam tan zerman atangin, spanis thiam tan spanis atangin, feren tawng thiam tan feren tawng atangin a lehlin theih vek a ni. Paragraph hnih/khat tal letling rawh. Heng tawngah te hian article a tam thawkhat tawh a, khawvel puma lar chin thil chu en tùr a awm vek tih theih a ni. Mizoram chhung bik thil erawh chu keimahni hriatna hmang emaw, lehkhabu dang rawn tein emaw ziah mai tur a ni.

Sawihona a hmun hi a zau lutuk lo va (a sawihona awm chhun pawh public forum ni lovin a article chungchang tlem sawi theihna ang chauh a ni), hrehawm kan ti a ni mai thei e. Mahsé kan ram leh hnam tan thahnem i ngai tlang theuh ang u, tih hi ka rawn ngen ngawih ngawih duh che u a ni. Thu thawhtu kan tam hun huna hawn mai theih a ni ta! Bei fat fat ang u le!

Kalna hmun: hetah hian klik la, thuziak pakhat tal thawh ve rawh le!

Similar Posts:

• The Case for Mizo Wikipedia
• Hnam hmasawnna zel…
• Wikipedia
• Kan zain i bei ang u
• Ka thupui ngai bawk

Recent Posts:

• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..

This entry was posted on Wednesday, March 14th, 2012 at 8:00 am and is filed under Education, Information, Mizo Society & Culture, Mizoram. You can follow any responses to this entry through the RSS 2.0 feed. You can leave a response, or trackback from your own site.