mi(sual).com

“Ani chu tuiluang kianga thing phun, A huntea rah thin, A hnah pawh uai ngai lo ang hi a ni a” (Sam 1:3)

Lal Isua khan Tui Uaiinah chantirin thilmak a han ti tan a, Damlo tihdam theihloh reng a nei si lo. Mitthi te hial a han kaitho a, Ramhuai lah chuan an hlau em em mai si a. Mipui Sangnga Chhangper 5 leh Sangha 2 hmanga ahan hrai puar liah hnuah phei kha chuan, a zirtir (a Kid) han nih ringawt pawh kha, intihtheihna tham a ni awm e. Jerusalema Lal ropui tak anga a han luh ngat phei kha chuan, a Kid te ho khan nuam an ti veng veng ang chu.
Mahse, chutiang reng chu alo ni thei si lo. Zanriah hnuhnung an han kilho chuan a boruak adangin a thusawi dan ki a dang ta daih mai le. Chutah Gethsemani huanah kalin Chutah chuan lungngai vawrtawpin a tawngtai a, amah han men pui hram hram peih pawh an awm tawh si lo. An han man ta a, Jerusalema mi thil tithei zawng zawng leh mipui zawng zawngte chu a thisen chaka tuihal anni ta vek mai amaw tih tur khawpa boruak ahan inthlak takah phei chuan, a huaisen ber Peteran Puithiam Lal hungchhung thleng ava zui ru dek dek ngam a, Ar khuan hmain vawi thum ngawt a phat ta mai si.
An khenbehna hmun Kalvari tlangah phei chuan Isua nu Mari leh hmeichhe dang thenkhat tihloh chu Hmangaih Johana bak an rawn lang ngam talo em ni le!!

Chawfak hun pelh hret Behliang mun hunah midang khenbeh vete aia hma feah a thlarau a thlah ta mai si. Chutah chiah chuan a hun tea rah thin mihring an lo lang ta. Judate khua Arimathai ami mi tha tak leh fel tak, Sanhedrin rorel khawlah pawh tel ve pha, Pathian ram a lo thlen beisei tlattu chu a lo lang ta. Marka 15:43 a kan hmuh angin huaisen thlak takin Ramawptu Pilata hnenah va lutin Isua ruang chu lak thlak ava dil ta ngat mai a ni. A hunlai ngaihtuahin ava huaisen teh lul mai em!! An lakthlak hnuah a puanzaisin(puan tha leh man to) chuan a tuam a, Lung ker kuak hmanga siam ama thlan tura a ruahman, tumah la phumna ngai lohvah ngei chuan a phum fel ta thlap a ni.

Hetihlai hun, hun thim leh raltit awm em em mai karah hian mi huaisen dang pakhat a huntea rah chhuah dang kan hmu leh bawk . Chumi chu Josefa ang bawka Pharisai leh Sanhedrin mi tho ani a, Lal Isua zan thim hnuaia va pan chilhtu kha ani a, Lal Isuan Personnal evangelism uluk taka alo neih pui, Chatuan thu hlu chuai thei ngailo tur alo fah tak NIKODEMA kha a ni.Johana 19:39 a kan hmuh angin Isua ruang sawngbawlna tur rimtui Murra leh aloe man to tak mai a rawn paipawn ve a, Isua ruang chu an sawngbawl a ni.

Josefa leh Nikodema te hi an dinhmunin a zirloh em avangin athuai phei chu anni hauh lo, an fimkhur ve thin hle chu a ni. Johana bung 3 a kan hmuh angin Nikodema pawh hian. Lal Isua ava pan pawh khan chhun enga pan lovin, zan thim tham hnuaiah a ruk tein ava pan kha ani a. Josefa tak pawh hi, Lal Isua zirtirna ringtu leh Pathian ram lo thlen pawh beisei tlattu ani naa, Judate(a thian Sanhedrin ho) a hlauh avangin langsar takin a zui ngai bik chuang lova, Luka 23:51 a kan hmuh angin, Isua an phiarruk tum pawhin a tel ve tho a, a remti lo leh hnialkalh tang tang tu a ni.

Ropui ta em em mai chu, Lal Isuan a mamawh lai ber maiin engmah hlau thei lovin, engpawh huamin an lo penchhuak ta a, a hun takah rah an rawn chhuah ta hi a ni. Sam pakhatnaa kan hmuh “ani chu tuiluang kianga thing phun, a huntea rah thin, a hnah pawh uai ngailo” a tih hi Josefa leh Nikodema teah hian a entirna fiah tak chu kan hmu thei a ni.

Pathian rawngbawla Full time a inpe te hi mi tlawm te te anni thin a, thil ropui leh sawrkar milian dawr ngaiah te tihtheih hi an nei tamlo em em thin. Tin, an tan thil a mawilo hma bik em em a, mi pawisawi hlek pawh a mawilo hma bik em em mai. Khawvel lamah an tih theih chin a tawi a, a bei tham a ni. Mi hausa leh Sawrkar lama mi thil tithei te, Politician te leh Khawtlang hruaitute hi Pathian hrechiang leh tih tlat mi annih chuan, an va han tangkai thei thin teh reng em!

Biakin sak dawn te, Sawrkar atanga phalna lak ngaiah te, Rikrum thila formal taka thil a tih theihloh hun angah te, an tawngkam khat emaw, Telephone a sentence khat an sawi ringawt te pawh hian Pathian rawngbawltute a thlamuan a, an harsatna sutkianin a awm thin. Chungtiang thil tam tak kalo tawn tawhte chu sawi a tha vek kherlo ang. Arunachala Mizo Officer lian rawn awm, bial an fan naah Sunday inkhawm pelh ngai lo, an inkhawmna biakin a chhiat em avanga mittui tla chunga an sumbawm hawng te, Inner line pass neihloh avanga buaina chungchangah MLA/Politician ten Telephone a an sawi zeuh avanga ramri pawn lama riak tur rawn lut thei ta te, dil hran ni miah lova, an mit ngeia an hmuh avanga anmahni rilrua a thawh tlat avanga an sum bawm hawng thin tu te, an Post na hmun apianga an nuna Lal Isua hmel lantir thin Officer te hian an va thawhhlawk thin tak em.

Lal Isua zirtirte an tawmbo thiap laia huaisen taka rawn penchhuak; Khawtlang leh Kohhran hruaitu lian Josefa leh Nikodema te huaisenna leh inpekna hi a va fakawmin, an thil tih hi ava hlu tak em. Pathian thu thlendik tirtu anni si a. Pathian hmanrua nih tluka hlu hi a awm thei dawn em ni le? Pathian chibai buk hi Biakin chhungah chauh ni lovin, Pathian chibai bukna midangte tana hmuh theih leh hlawk thin zawk chu Biakin kawngkhar atanga kan penchhuah chiah atang hian a intan dawn chauh zawk a lo ni.

Similar Posts:

• Isua i pai ngam dâwn em?
• Lal Isua Leh Nikodema {Sunday Pual}
• Biakin chhungah blue-film
• Pathian A Thi Elo!? {Sunday Pual}
• Hlau suh (Sunday & Krismas pual)

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Sunday, April 15th, 2012 at 1:00 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.