mi(sual).com

Ruihhlo bawih atangte an dam thei tawh lo tih an sawi in hre ngai em? Thenkhat chuan, ‘An dam thei’ an ti a, a then chuan, ‘An dam thei tawh lo’ an ti bawk a. Ruihhlo ngawlvei hi, ‘Natna a ni’ te an ti a. Mahse, khawtlang chuan, ‘Misual’ an ti thung. Eng ber hi nge dik ang le? Vawiin thleng a inhnialna tawp thei lo a ni, chu lam chu sawi zau lovang. Ka sawi duh chu Ruihhlo i sim tak avang khan i la dam mai lo tih hi a ni, i dam mek chauh a nih kha, sual tura thlemna i la tawng dawn chauh a. Chuvang chuan hriat tur leh tih tur tam tak i la nei.

Ruihhlo i sim tak avang khan i la dam mai lo :
Mi tam tak chuan ruihhlo an sim hian an duh tawk mai thin a, fel leh tha ta viauah an inngai nghal thin a ni. Rui reng rengin i hun tam zawk i hmang a, i thil thlir dan te, i ngainat zawng te, i awm duhna hmun te, i sawi duh zawng te, i mizia leh nungchang zawng zawng te a danglam nghal vek lo tih hria la.

A nih leh chu chu eng nge a pawina, ruihhlo ka sim tawh ber chuan? i ti pawh a ni maithei, Ruihhlo i sim thei chu hma i sawn tak zet a, ruihhlo sim thei tura i beihna zawng zawng pawh khan nasa takin a tidanglam tawh reng che a ni. Ruihhlo lam ni lo thlak tur nangmahah tam tak ila bak.

Ruihhlo i sim rual khan i mizia leh nungchang, thil thlir dan, ngainat zawng, awmduhna, sawi duh zawng te chu tlemin a danglam phah ngei a, mahse, danglam kim vek erawh a ni nghal mai lo. Vawilehkhata danglam nghal vek thei pawh a ni lo reng a, zawi zawi a nangmah ngeiina i tih danglam tur a ni, a tha zawnga i ti danglam lo a nih vaih chuan zawi zawi vekin ruihhlo i ngaihna a zual leh ang.

Engtin? Ruihhlo i sim hlim chuan sual tura thlemna engpawh i do zo hle pawh a ni thei, mahse, rilru hi khua a lo rei chuan a danglam ve tial tial a, a tira invawng viau pawh kha, a lo rei deuh deuh chuan inthlahdah hun a lo thleng a, a tira an nunchang emaw aia nep deuh zawk emaw aia nasa zawk pawhin an awm leh mai thin a ni. Chuvang tak chuan alawm ruihhlo i sim khan duh tawk mai suh ka tih ni. A nih chuan mizia leh nungchang, thil thlir dan, ngainat zawng, awmduhna te chu engtia tihdanglam zel tur nge ni ang?

Thluak tibuai thei chi reng reng laka fihlim :
Nangchu i taksain ruih nawm zia a hre tawh a, a ngawl pawh i vei nek tawh a ni a, chuvang chuan midangte tana engmah ni lem lo heng Zawlaidi, kawlthei zu, Balhla zu etc.. lu ti hai ve thei chi reng reng lakah hian i fihlim tur a ni. Mipangai chuan lo rui ve ta vak pawh nise, a pawi lo an incontrol thei tlat, mahse, nang chu heng thil hian i lu a ti hai a nih chuan ruih nuam i tih thin zia kha a rawn thar leh nghal ang a, i pawisak loha i tihluih zel phei chuan thil ho mai mai i tih kha a ruih dan i duh tawk lovang. Achhanchu a aia nuam ruihhlo dang i hre tawh tlat a ni, chuvang chuan a ngaiah bawk luh leh a awlsam.

Midangte nena inlaichin tha siam :
Tun hma chuan midang vak i mamawh hran lova, mite pawi i sawi/khawih thin a, an ring lo bawk che a rintlak lah i ni lo reng a, mipangai zinga awm nuam i ti lova, an zingah chuan sawi tur pawh i hre hek lo. chuvang chuan midangte nen inlaichinna tha siam hi i tihtur a ni. Khawtlang tana hnawksak thil sual ti thin kha, khawtlang tan thil tha tih i zir dawn a ni(Nangma tana a tha bawk), Inkhawm, Khawhar In kal etc… Heng hi i tih chuan nangmahah inrintawkna a siam zel che a nga, midangte nen inlaichinna tha i siam bawk dawn a ni.

Heng hi i tih a tul em em nachhan chu nangmah i inhmuh dan kha a dik tawk lova, inthlahrunna, zahnatein i la khat a, i la inringtawk lo hle ang. Midangte i thlir dan pawh ala dik lova i ngaihruatnain i la kal nasa lutuk a ni, an lakah rilru chhe tak tak i pu a, chutin khatin minti mai ang a, chutianga mintih vaih chuan ka ti ve a ni mai, emaw ngaihtuahna dik lo nangma suangtuah chawp mai mai kha i la kawl tun a, kha kha tihreh a ngai a, i tireh lova i kawl tun reng a nih chuan i damna kawng kha a tithuanawp thei a ni.

Pawl engemaw taka inhman te hi a tha a, midangte tan eng ni lo mah se, pawimawhna eng emaw takah i neih chuan nangmahah inrintawkna i lo nei deuh deuh a nga, inthlahrunna, thil thlir dan dik lo, midangte hmuhchhiat te kha a reh ve tial tial dawn a ni. Thian thar, awm thinna thar, lenna thar i lo nei zel ang a, chu chuan i damna kawngah awmzia a nei em em a ni.

I inenkawlna khawp pawisa i thawk chhuak tur a ni : Ruihhlo ngai emaw ngai lo emaw tu te pawh mai hian sum lakluhna lama harsatna kan chingfel theuh tur a ni. Mahse, hei tak hi chu i tan chuan hmanhmawh thlak tak ala ni lem lova, i inrin tawk hunah chauh pawisa chung chang hi chu ngaihtuah ang che. Achhanchu, pawisa i hmuh chuan a ngaiah i let leh thei a, i inthunun zo lo thei a ni. Amaherawhchu, i inrin tawk hunah chuan i chinfel ngei ala ngai dawn a ni, mipangai i ni tawh a, pangai taka nun i hman dawn chuan hna i thawk ngei ngei tur a ni.

Ruihhlo ngai dam mekte hi taima tak tak pawh an awm thova, mahse, atlangpuiin an thatchhe duh a ni. Eng ang thiamna nge i neih ka hre lo, i phak ang leh thiam ang tawk tawkin nangmah i inchinfel ve a ngai a ni. Lehkhazir kawngah i lo la hnufual hle a nih pawhin lehkhazirin tlai luat a nei lo tih hria la, zir tha leh ngam rawh. Ruihhlo i sim hian i kut leh ke te alo vung ber bur tawh em? heng mite tan chuan sawrkar hna a beiseiawm lohva, lo thawk tawh sa te i nih chuan thuhran, hnarum i thawk tak tak thei tawh lo bawk a.

Mahse, beidawng mai lo la i thawh tur NGO lamin an ngaituah a nia, pan la an lo kawhhmuh thei ang che. Anni Pan kher ngai lo paw’n i lo hre sa reng thei bawk e. Ruihhlo ngai emaw ngai lo pawh nise hnathawh kan neih hian inrintawkna, hima inhriatna etc.. te kan lo nei a, chu chu tute tan pawh a tha em em a ni.

Tlangkawmna :
Pianthar loh chuan ruihhlo hi sim tak tak theih a ni lo tih hi chu a dik lova (Christian ni lo hnamdang ruihhlo bawih atang chhuak an tam lutuk), mahse, pianthar chuan ruihhlo sim chu a awl bik tih erawh hi chu a chiang hle a ni. Achhanchu, kan pianthar chiah hian kan duh zawng, rilru leh ngaihtuahna te nasa takin a danglam a, thil sual reng reng kan ti duh lova, chu chu ruihhlo ngai dam mek tan chuan a tluk a awm lo.

Inkhawm te, thil tha dang tam tak tih te, thian tha te, awmna hmun te a danglam ta a, chu chu dam mek tan chuan damdawi tha lutuk a ni bawk. An inkhawm tam avangin midangte nen inlaichinna tha an nei chak a, khawtlangah mirin an lo kai tan a, zawi zawiin mipangai nunphung leh ngaihtuahna te chu an lo tawm ve thei ta a ni.

Ruihhlo sim duh inkhung tawp hi chuan rei a daih lo thin a ni, dam chhungin inkhung reng thei hek suh. A la dam ve zel duh a nih chuan pawn a chhuah hunte pawh ala rawn thleng dawn chiang a ni, ka sawi tak ang khi an hmachhawna an chinfel ngam ve a ngai hmasa tlat a ni.

Ruihhlo sim ka sawi hi chu Drugs ti thin kha Zu a thlak tih vel mai mai lam a ni lo, eng ruihtheihthil mah tih loh/sim a ni ka sawi ni.

Similar Posts:

• Ruihhlo do… Heti zawng hian…
• Ruihhlo
• Lehkhathawn
• Engmah
• Ruihhlo zuar kan duh lo

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Sunday, April 15th, 2012 at 6:30 am and is filed under Advice. You can follow any responses to this entry through the RSS 2.0 feed. You can leave a response, or trackback from your own site.