mi(sual).com

A thupui in han hmuh ringawt hian englam nge tih in hre nghal chat lo mai thei a ni. Mizo tawng hi Linguist hovin “Tonal language ani e” anlo tih angin, word pakhat hian a rik dan a zirin awmze hrang hrang a nei thei tlat mai a. Entirnan:- Lei= buy, earth, soil,tongue, unlevel, bridge, bought. Heta rawn sawi ka tum chu mihring taksa peng pakhat Lei(tongue) hi a ni.

Lei hi a mak ngawt mai, mihring taksa peng pakhat taksa chhunglama awm deuh reuh si, mahse, pawn lama tihchhuah theih, tihrawl hlawm, a pianphung duh dan dana awlsam taka tih danglam theih, chumi hmang chuan tawngri chi hrang hrang lo insiam thin hi ani a. Hmui chip chuan pawnlam atanga hmuh theih hauh loh hi ani reuh a. He lei avang chauh hian thil tui leh tuilo te, thlum leh al te, thak leh thur te, dai leh sa te kan lo hre thei a. Tin, chaw kan thial kha kan hapui thial chip tura lo sem darh zung zung thintu a ni bawk a ni.

He lei ngei mai hi a lo pawimawh thlu ngang aniang Kan bible ziaktu pakhat Jakoba hian a lehkhathawn bung 3 ah hian a Sermon chiam mai a, chang 1 na atanga chang 12 na thleng a awh a ni.
Chang 1-2 ah hian Mihringte hi thil tisual rem rum thin leh sawi sual rem rum thin kannih avangin, midangte zirtirtu nih lo tum ve phet pawi theih zia leh hlauhawm theih dan min hrilh a, Midangte kawng dikloa hruaikawi thintu chuan Rorelna nasa lehzual kan tawk dawn ani tih min hrilh a ni. Hrechiang manglova Lal Isua Krista sawisela amah atanga pengbo tura midangte zirtir thintute chung chu ava pik nasa dawn em!! mi tawng sual ngai manglo chu ‘Mipuitling’ kan tih ang chi hi anni a, an taksa pum pawh an venghim thei thin tih thu min hrilh a. Politician leh Kohhran hruaitute tan hian tawngsual loh hi a pawimawh lehzualin ka hria. An vawikhat tawngkam chhehsual zauh pawh hi miin an sawi punlun nasa bik a, an career tichhe thei leh an Party/sawrkar pawh Term leha tlak tir theitu anni hial thei thin. Mi a apiang an tawngsual tam mai a, amaherawhchu, mi fing vaklo pawh Pathian Thlarau hruaia awmte erawhchu, an lei hi Pathian Thlarauvin a ven sak thei a ni.(Matthaia 10:19-20)

Chang 3-5 ah hian, Lei hi Sakawr thirbarh nen a tehkhin a, Sakawr chu a kaa thirbarh barh anih tawh hnuah chuan, Ramsa chak pui kha mihringten an duh duhna lamah an lo kaiher thei tawh thin. Lawng leh Motor lian tak takte pawh hi, a khalhna(Steering) tetakte hmangin mihringten an duhna lam lamah an kaltir mai thin a ni.

Chang 6 ah hian chutianga thirbarh leh steering wheel ten Sakawr, Lawng leh Motor lian tak takte an duhna lam lamah an kaihera an kaltir thin ang chiah chuan, He Mihring taksa ropui tak hi, he Lei te takte ka chhunga awm hian a effect thei thin a, nasa takin a uang thin tih min hrilh a. Jakoba hian a uar khawp mai; Lei hi KHAWLOHNA HLAWM a ti tawp mai a, taksa pum tibawlhhlawha tikang theitu Hremhmun mei tihkan ani a ti hial a ni.

Chang 7-8 ah hian, Pathianin mihringte asiam khan Ramsa leh thilsiam dang zawng zawngte chunga thunei tura a duan vang kha ani ngei ang, mihringte hian Ramsa leh thilsiam dang khawingam theihloh tak tak kan neihloh thu min hrilh a. Sai lian tak takte pawh Thingtum an hnuh tir hruih hruih mai a, Lawi chal tak tak te chu Leilet tuah kan hmang a, Sakawr chak tak takte chungah chuangin kan duhna lam lamah kan tlantir thin zawng anih hi. Amaherawhchu, he Lei tereuhte hi KHAWINGAM thei reng kan awmlo tih min hrilh ta tlat mai anih hi. THIHNA HLOVA KHAT, SUAL AWM HLE HLE THEILO a ti tawp mai.

Chang 9-12 ah hian mihring mize mumal loh zia leh principle neih loh thin zia a rawn sawi a, a rawn dem a, chutiang chu ni velo turin min duh a ni.
He lei hmang hian Pa Pathian chu kan fak thin a, a fakhla te mawi tak takin kan sa thin a, mahse chu lei vek hmang chuan, Pathian anpuia sian kanmihringpui te leh thiante kan rel kan rel leh si a, anchhia te kan lawh bawrh bawrh leh si thin.

He Lei hian ngaihdam kan dil a, thupha kan chawi a, midangte kan fak a; chu lei vek chuan hnung lamah kan rel zui leh si thin. Lui hnar pakhatah tui tui leh tuilo, tui sa leh salo a chhuah kawp ngailoh laiin, mihring ka atang erawh chuan kachhunga lei hmang hian Pathian fakna leh kan mihringpuite anchhelawhna te, fakna leh an hnunglama rel zuina te a chhuak kawp leh tlat thin si.
Chang 13 atanga a tawp thleng kan en chuan, He lei thununa thu thalo sawi kan pumpelh theihna tur chu, Thlarau hruaia awma chunglam atanga lochhuak FINNA kan neih chu a ni tih min hrilh a. diklohna dodala dikna tan tlat turin min fuih a ni. He thinlunga ITSIKNA LEH INELRELNA lo awm avanga DAWT thu hmanga inpuhchhiatna te hi chunglam atanga lochhuak nilovin RAMHUAI hnen atanga lochhuak ani tih min hrilh a ni. INITSIKNA LEH INELRELNA awmnaah chuan BUAINA leh THILTIHSUALNA tinreng a awm thin tih chiang takin min hrilh a ni.

Chunglam atanga Finna lo chhuak chu engtinnge kan hriat theih tak ang le?

Chung lam atanga finna lo chhuak erawh chu atirin a THIANGHLIM phawt a, chumi hnuah chuan INREM a duh a, a NUNNEM a, a TIHNUAM(Luhlul lo) a, KHAWNGAIHNA leh RAH THAin a khat a, THLEIBIK a neilo va, a VERVEK lo a, Felna rah chu Remna siamtute tan Remnain tuh a nih thu min hrilh a ni
Keimahni theuh inchhut let ila, thianzaho karah emaw, Thawkho karah emaw, Unau leh Nupa karah emaw inremlohna leh innghirngho nate hi Chunglam atanga lochhuak nilovin, Ramhuai hnen atanga lochhuak ani tih hriain buma awm reng lovin, I dodal tlat ila, inremin ilo awm theuh zawk ang u.

Have a blessed Sunday.

Similar Posts:

• Mihringin thlarau a neilo !!
• Mizoram, lo fimkhur ang che!
• Kumtharah Nunthar (Sunday leh Kumthar pual)
• LALRAMA MIHRINGTE PATHIAN KAN NIHNA
• Nunna thing vs a chhia leh a tha hriatna thing

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Sunday, June 24th, 2012 at 1:00 pm and is filed under Mizo Society & Culture, Religion. You can follow any responses to this entry through the RSS 2.0 feed. You can leave a response, or trackback from your own site.