mi(sual).com

A hmasain misual.com kaltlanga ka thian duh tak te, ka rilru hah lai leh khawhar laia min kawm hlim thin tu te zawng zawng Kumthar Chibai ka buk a che u. Kumthar lamah pawh he kan site ngainat em em kaltlang hian kan hlim kan lawmna leh, kan lungngaihna leh kan harsatna hrang hrangte in hrilh tawn tlangin a theih dan ang ang a, inhnem leh in tanpui tawn kan tum zel hlawm dawn nia.

Thlahtu bulten anmahni siamtu leh Hmangaihtu Pathian Thu aiin Diabola vehthlemna thu chu DIK ZAWK ah an lo ngaiin an lo zawm ta zawk si a. An thinlungah Pa Pathianin LALNA hmun a chang ta lo a, Diabola zawkin LALNA a lo chang ta si a, Pa Pathian Thlarauvin anmahni chu chhuahsanin Pathian fa ni thin kha, Diabola fa an lo ni ta a, Pathian anpui an nihna Chatuan nun an neih chu laksak an lo nih tak avangin Pathian mitah chuan MITTHI an lo ni ta.
Nimahsela, Pa Pathian Hmangaihna chuan Diabola bumna avanga a Hmangaih hringfate zawng zawng boral vek chu phal lovin ‘Chhanchhuahna ropui leh hautak’ a lo ruahman nghal a ni. Thisen chhuak lovin ngaihdamna reng a awm theih siloh avangin, Sual kai ve lo thisen a chhuah a lo ngai ta. Amaherawhchu, Pa huntiam a thlen hma erawh chuan Pathian fapa thinglera khaikana awm a, a thisen chhuak tur entirnan Ran thisen chhuah alo ngai ta thin a; chu chu a HLIMTHLA chu a ni. Thlalera Dar rul khaikan te, Aigupta ram an chhuahsan dawn a Kawngka biang pahnih leh kawngka luchunga Ran thisen tahte kha Isua Krista Krawsa khaikan a la awm tur Hlimthla vek a ni.
Kan Lalpa Isua Krista chuan Thih thlenga thuzawmin Kraws a thihna thlengin a lo tuar chhuak ta a. Vana hruaichhoha a awm dawnin Thlarau Thianghlim a lo thlen hma loh chuan, thu hrila vak chhuak rih lo turin a chah a ni (Tirhkohte1:8). Tichuan Isua vana a lawn leh ni atanga ni 50 na chiahah chuan Thlarau Thianghlim chu a lo thleng ta a, Ringtute chu a chenchilh ta a, tun thleng hian min la chenchilh ta a nih hi. Miin a thinlung zawng zawng a Isua Krista thihna hi a sualna avang ani a, a thawhlehna anpuiin a rualin kaihthawhin a awm tawh ani tih a rin a, a nun/thinlunga roreltu Lalbera a lo thlan/pawm chiah hian Chu Thlarau Thianghlim chuan rilru zawng zawnga amah sawmtu leh a thuhnuaia intukluttu thinlungah chuan a lo cheng ta thin a ni. Pathian thu chuan:-

“Pathian in in nih leh Pathian Thlarau nangmahniah a awm reng tih in hre lo vem ni? Tupawhin Pathian in chu a tihkhawloh chuan chu mi chu Pathianin a tikhawlo vang; Pathian in chu a Thianghlim si a, chu chu nangmahni in ni e.” (I Korint 3:16-17) a lo ti chiah a ni.
Thlarau Thianghlim keimahniah a lo chen tak chuan, a duh angin kan nun a lo khalh kal ta a, kan mihring hlui erawh chu lo chhuah tum chang a nei ve fo thin; chu chu keimahnia Thlarau Thianghlim awm chuan a diklo a ni tih min hriattir thin a. Chu chu a ni Johanan:-

“Tupawh Pathian hrin chuan thil a tisual lo tih kan hria e; Pathian Hrina khan amah chu a hum reng a” (I Johana 5:18) a lo tih ni. Kan thinlung Lung anga sak chu tisa anga nema thlak sakin kan lo awm ta thin a ni. (Ezekiela 11:19).

Chu chu Kan Lal Isuan Nikodema hnena “I Piangthar tur a ni” a lo tih kha a ni a. Pawnlam mihring chu a pangai reng. Mahse, chhungril lamah thil inthlakthleng a lo awm ta tlat a. Setana fa ni thin kha Kraws hmanga tihhlum alo ni a, mi thar Pathian Thlarau Thianghlim kha kan thinlung luahtu leh Roreltu a lo ni ta a ni. Mihring mita hmuh theih a ni lo. Mahse, a rah chu miin an lo hmu thin a ni. Zu nghei theilo khan tuma hrilh ngai lovin a lo in ta ngai lo va, Hmeichhiat-mipat lama tlan thin leh a zawna zawng ruai thin khan remchang tak pawh awm se, a lo duh ta tlat lo a, a rem apiang eiru thin khan a lo ngam ta tlat lo a ni. Insual hrat, mi thinchhia leh midangte ti thlabara, tina thintu khan a biang lejhlam pawh dawh a lo ngam ta zawk a, Sunday a Zu hmun lam pan thin khan Biakin lam a lo pan ta tlat a ni. Chu chu a chhunga awm Thlarau Thianghlim vang a ni. Camping chhuah hlima mite hmai zah vang ringawta Thlarau Thianghlim tel si lova tum ve ringawtte chuan an daih rei thei tak tak ngai lo a, Camping a luh nawn fo a lo ngai thin.

Zungawlvei Pakhat pawh, a thianten an fiam a, “Nang ve teh tlat hi, Isuan tui Uaiina a chantir kha I lo hre ve a, zu in tur I duh changin tui uaiinah a chantir sak dawn che I ring a mi ‘Ka Piangthar e’ te I tih ve rikngawt mai?” an ti a. Ani chuan, “ Isuan Tui uaiin a a chantir leh chantir loh ka hre lo, nimahsela ka hriat chian em em chu, Isua hian Zu hi kan inchhung bungbelah te, Furniture-ah te, ka nupui fanaute silh leh fenah te a chantir a ni” a ti ta daih mai a, mak an tiin an dang hle ani awm e.

Boxer lar tak mai John Selwyn pawh hi a piangthar a, Pastor niin Kohhran pakhat a enkawl a. Tumkhat chu, a kohhran member pa pakhat hi a zilhhauva, chu pa chu a thinur hle mai a, John Selwyn chu a hmaiah a hnek ta nghek mai a. John-a chuan duh sela chuan awlsam te a nikhaw hrelo khawpa hnek thlu mai thei tur hi ani na a, zam hmel leh thinur hmel pu hauh lo hian a biang lehlam a dawh ta zawk a. Chupa chu zak takin a kal bo ta a.

A kum lehah chuan, chupa ngei mai chuan John-a kohhranah chuan Testimony a sawi ta a, an kohhran dan chuan Kristian hming a putthar a ngai a ni. Ani chuan, “John Selwyn tiin min ko rawh u, Isua Krista hi eng ang nge a nih tih min hrilhtu a ni si a” a ti ta a ni.

Nu thinchhe em em mai pakhat pawh hi a pasalin zu a in reng thin avangin, tukzan tha hi an nei thei ngai meuh lo a, a pasal tan chuan a tawngtai thin a ni. Nikhat chu, a pasal zurui chuan an khawnvar chu dawhkan atanga titlain a tikeh palh ta hlauh mai a, a nupui in a ankhum nasat dan tur chu hriain a huphurh kher mai. Nimahsela a nupui chuan, “Duh tak, pawiti lutuk duh suh, I tihpalh liau liau anih kha” a ti dam ta dap mai le. A pasal chuan makti takin, “Eng thil nge I chungah thleng ta? I va danglam ta ve” a ti ta he haw mai a. A nupui chuan, “Isua hnenah ka thinlung tlengfaia a chhunga lo cheng a, ka thinchhiatna zawng zawngte pawh min thunun sak turin ka sawm a lawm” tiin a chhang a. A pasal chuan, “I Isua chuan hetiang taka I nun a thlak danglam theih chuan, kei pawhin ka duh ve e, I tawngtai naah min lo hre reng thin rawh aw” a ti ta a ni. Nupa hlim tak an ni zui ta.

A thui ta hle mai. Kan taksa hi Isua Krista thisena lei ani tawh a, mahni ta kanni tawh lo. I Korinth 6:19 ah te, II korith 6:16 ah te pawh kan taksa hi Pathian Thlarau Thianghlim chenna in anih zia min hrilh mawlh mawlh mai a ni. Chuvangin, he Kumtharah hian kan rilru hi a thar a awmin lo danglam tawh zawk I la, Kan taksa hi Pathian khawngaihna avang hian ‘Inthawina nung leh Thianghlim leh Pathian lawmtlak ni turin I hlan teh ang u. Chu chu kan Rawngbawl theihna leh kan tih tur dik tak a ni si a.

Kan zavai a tan Lalpan a thu malsawm rawh se. Amen.

Similar Posts:

• Isua i pai ngam dâwn em?
• Thlarau Thianghlim (Pentecost Pual)
• Pentecost pualin
• Tunlai ka mutmawh hnarmawh.
• THAWHLEHNAA TIHNUN KA LO NI TA

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, January 1st, 2012 at 6:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.