«
»

Mangalore-ah Beer Kan Zawng… (Sunday Pual)

July 15th, 2012 7:00 am by Dr Mahminga Sailo

(Zu ka sel lova, zu in mi ka sawisel hek lo. ‘A thui em a, ka chhiar chhuak peih lo’ i ti a nih paw’n, a tlangkawmna tal hi chu i chhiar hram ka beisei.. ;-) )

A khuhhawnna
Primary leh middle school kal chhung zawngin, Football khelh aia khelh loh thlang zawk thin ka ni a. Football khel thiama hriat ka ni ngai hek lo, tun thlengin ;-) Ama’rawhchu awmna hmun a zirin thil kan tih ngai loh leh kan thiam em em loh pawh tih a ngaiin thiam anga kan awm a ngaihna hun te pawh hi a awm ve zel a. Nikum hmasa, October thla khan kan College Football Team-ah ka tel ve vangin Mangalore kalna hun tha deuh ka neih phah a. Football thiam vang ni loin khel thiam an tlem vang zawkin chu hun chu ka pumpelh duh bik hek lo :-)

Duhthusamin a lum…
Kan thu mai mai pawh hi kan thlan nghal dep dep mai nia! Tuifinriat kam tih takah a boruak a uap churh mai a. Zokhaw tlangval tawnah, lung min len tur reng a awm lo.
Beach kan tlawh ve chhun lah, nula tawih deuh hmuh chu hnai lo; tuifinriat kama vai puithiam pali te’n an sakhaw serh leh sang khawihin an thu bial laih a, a laiah mei an chhem khu let let. A piah lawkah Isua zirtir Peter-a te hnathawh ang thawk sanghamantu kan hmu tih mai loh chu, a hmun a nuam a tih a ni mai. Thil danga awm hlawl lo. A awm lo tak zet.

A letling a vuttui thlawr bel!
Tin heti hi a ni a. Kan thiam loh vang nge, kan vanduai vang? Kan zin chhan ber Football kan khelh lah semi final penalty shoot-out ah kan chaklo bawk si. A hminga a senior ni ve ta chuan, thiam ang tawkin nau te ka’n hnem ve sasawi a. An rilru na thawidamna tur kan nei lo a ni ber. Mahse tlai lama kan in hmukhawm leh chu an thil ngen a dang ta. Beisei miah loh, kan naute ho rui deuh tawh si, zu la kham si lo chuan zu lei turin min tir ta tlat mai le! :-)

‘Kan senior in ni a, in zahawm khawp mai, mahse keini kan rui vek tawh si, khawngaih takin zu (Beer) min lei sak r’u, in kalna tur leh thildang chu kan tum sak vek ang che u’ an ti ta mai. Ka thianpa Arif-a hi Islam fel chi, zu in duh lo bur mai, ragging lai paw’n senior-te lo hnial fithla pap pap mi a ni a. Kei erawh Mangalore kan thlen tirhin Bar-ah naute’n min hruai lut ve a. He Bar-ah hian Beer um te chu naute zarah ka chul nel ve hman a, ka thianpa ai chuan ka tawng sang deuh hlek. In lem lo mah ila thla te chu ka lak pui ve nasa. :-P

Tin ka thian pakhat (Arun) Army Officer fapa, zu in ngai lo a ni. Bar-ah a thian te’n ‘Beer pawh in ngam hlei lo ’ an ti ngawt a. Nangni’n beer in in thei a, kei paw’n Tomato sauce te chu ka in ve thei tho tiin Tomato Sauce a dawt nghek :-P Chutiang mi pathum chu zu dawr zawngin kan kal chhuak ta. Upa tawngin, lungthu zawng kan kim ve ngei mai.

Khawnge Bar…?
Kan thlenna hi Mangalore khawpui pawn a nih vangin Bar a vang phian. Bar awmna kan hriat dan ‘Petrol bunk bulah’ tih kha a ni mai a. Auto rickshaw-a thuin kawngpui veilam ka thlek a, Arun-a’n dinglam a thlek thung. Minute 10 vel kan tlan hnu ah Arun-a a rang fahranin Auto driver dar a ben leh ‘Yes Petrol Bunk is here’ tiin a chhuk nghal. A rang a rang in Petrol Bunk duty-te hnenah Beer leina hmun a zawt chiah chu, an ngaihdan a ni lo reuh asin. ‘Petrol leina hmun ah zu te in zawn, Zu in duh a nih te chuan Bar-ah zawt ta che u’ an lo ti let erh asin. :-D

Yes, Bar…
Beidawn lek lek hnuah Bar chu kawngsir ah kan hmu ta. ‘Yes, Bar’ kan ti rual thawt a, Auto-a ding chiah, kan chhuak ta mai lo. Harsatna a intan ta… ‘Tunge Beer chu lei ta ang? Kum a naupang ber Arun-a ‘va lei rawh’ ka ti; ani’n ka la kal ngai bik teuh lo, mahni chauh chuan ka kal duh lo a ti bur mai si. Arif-a lah va kal rawh tih hma hmain ragging lai a senior te’n in tur a an tih pawh a a hnial dan ringawt a sawi bawk. Kan nau te lah chuan min lo phone sek bawk nen. A tawp a tawpah kan pathum a kal kan rawt ta…

Kan mengphawk!!!
Beer um eng zat nge kan lei ang le? Kan pawisa ken zat kan hria mahse, um engzat nge kan lei theih ang tih a ni zawk. Chhanna kan dawn chu, ‘Um kua tal’. Englekhawle a lian vak lovang a, a rit lovang chu ti rilru chungin pawisa kan han pe fel te te a. A hnu lawkah chuan, ‘hei le’ tih leh polythene bag lian tawk a Beer um fun chu min pe ta hnawk mai. A keng tu tur kan buai leh, tu mahin Beer khai kha kan phur lo vek si. A ngai tein tumah awl bik lovin um 3 theuhin kan khai ta. Vairengte kal tlang tur ni lo tihin hre reng mah ila, awm a nuam miah lo.

Tirhkoh Paula’n engtingnge a tih..?
‘Thil engkim tih ka tan a thiang a, mahse thil engkim tih ka tan a tha kher lo, thil engkim ka tan tih a thiang a, nimahsela eng bawihah mah ka in phal lo’ a ti. Tu tan mah ‘I ti tur a ni lo’ ka ti thei lo, tin thu ka nei hek lo. Mahse engkim kan tih hian, chhia leh tha hriatna thiang kan hman a tul in; hei hi ti ta ila, enge ka nunah a thlen ang? rah tha a chhuah ang nge, ka nun tichhetu a ni ang? tih kan kan ngaihtuah nawn fo hi a tul hle.

Mi thenkhat zu laka an sihhnip em em laiin thenkhat tan erawh meizial sim a har em em thung. Engpawh chu lo ni sela, a pawimawh ber chu Pathianin a chhia leh a tha hriatna thiang min pek hi hmang thiam fo ila. Tirhkoh Paula thusawi hian kan nitin nunah awmzia lo nei thar mawlh rawh se.

Similar Posts:

Recent Posts:

This entry was posted on Sunday, July 15th, 2012 at 7:00 am and is filed under Advice, Lifestyle. You can follow any responses to this entry through the RSS 2.0 feed. You can leave a response, or trackback from your own site.

34 Responses to “Mangalore-ah Beer Kan Zawng… (Sunday Pual)”

  1. 1
    Awmtea Khiangte Says:
    July 15th, 2012 at 7:13 am

    Eng pawh chu ni se post tha tak zawng a ni e (Y)

    Ngaihdah erawh a inang vek thei chuang law

    Report this comment

  2. 2
    Dr John Says:
    July 15th, 2012 at 7:50 am

    Thuziak i thiam khawp mai. a ngaihnawm ka ti. Sunday Pual inti tut lo deuh se a zia zawk ang em aw? Tukin chu ka tifuh a ka Cellphone atanga ka’n luh ve theih mial chu… :-)O:-)

    Sunday Hman nuam vek ule….

    Report this comment

  3. 3
    bucko Says:
    July 15th, 2012 at 8:17 am

    Nih ngei hi

    Report this comment

  4. 4
    saint sammoo Says:
    July 15th, 2012 at 8:25 am

    a thu chu thu hran..a sei/ tawi dan hi ka chek mil tawk vel a nie.
    inrinni zan vela chhuak ni se.. Zu leh Zu-lo zawngin kai lek i la.. kan han ti leh chiam dawn a maw ni le… haha.. :-D

    Report this comment

  5. 5
    aduhi Says:
    July 15th, 2012 at 9:11 am

    Tinge wine shop pangngai a awm lo mi bar ah deuh kher in lei? Ngei keinin wine shop kan tih hi bar an lo ti zawk? Zu lei ngailo tan chuan nervous ve theih khawp ang.

    Chuan.. “Islam fel chi” ti lo khian Muslim fel chi ti la a dik zawk ang. Islam is the religion, Muslims are the followers. Muslim ho hian an sakhua hi an la thutak tlangpui a, Hindu ho erawh da ve tak tak an tam.

    Report this comment

  6. 6
    H.Vangchhia Says:
    July 15th, 2012 at 9:41 am

    A ngaihnawm thawkhat e hairehai :-) (Y)

    “Petrol Bunk duty” hi enge a?

    Report this comment

  7. 7
    mik3s Chongthu Says:
    July 15th, 2012 at 10:00 am

    A sei lem loh hi… Thuziak thiam ziah hi chu a sei pawhin a ninawm ka ti lo(I inthlahrung mah mah).
    @Dr Mahminga: Lunglei Sacred Heart School ah i kal toh em? I hming ang pu, Rahsiveng tho ka classmate thin kha ini angem o? Hehe

    Report this comment

  8. 8
    Dr Mahminga Sailo Says:
    July 15th, 2012 at 10:01 am

    Comment a tlem nen, thurawn a va tha hlawm em!… (Y)

    @ Dr. John & Saint… Nia, zet-u-zu avanga inhnialna a tam tawh em avangin, zu ringawt sawi turah min ngai ang a, a ninawm ti tawk an awm palh ang tih ka hlau deuhva. Thuhawnna ang khian; a tlangkawmna khi ka ngaipawimawh ber a. Tlangkawmna ringawt ziak ila a tawi phian dawn si nen. A dang khi chu ‘starter‘ a ni awm e… :-D

    @ aduhi… Ka lawm e. Muslim tiin ka ziak hmasa te te a, a dik lo zawka ka rin leh thut avangin (confi lo ve thei si a.. :-) ) Islam tiin ka’n thlak leh a nih kha… Bar-ami zu han lei ngei khi, a tak that deuh kan ring em maw ni? :-P

    @ Pu Hv-a.. Petrol pump-a duty, petrol lo petute tihna. India ramah chuan uniform bal khak ve tak tak an ha thin… :-D

    Rinthu sawilan mai mai: (ngaihdan zau zawk a lan theih nan..)
    An sawi fiamthu ang deuhin, zu in thiamlo hnam hi kan awm bik em maw ni le?! Beer kan zawnsak tlai hian, kan junior pakhat (Ladakhi) Mongolian thlah tho kha, a rui sual pek a. Kan naute zu in zo khan min rawn pan sap sap a. I thianpa hi veng deuh teh, a rui tawh si, inbelh talh a tum bawk si a, a mualpho palh ang an ti a. A ngaitein, ka’n buaipui leh kha. Zu in ve dang, vaiho zingah rui sual an awm miah si lo… Enge in ngaihdan?

    Report this comment

  9. 9
    Dr Mahminga Sailo Says:
    July 15th, 2012 at 10:08 am

    mik3s Chongthu… Ka lawm e.

    Rahsi-venga ka hmingpui chu, LH Lalhmingmuana zawk kha a ni em aw? Music thiam tak a ni e… (Y) San lamah erawh kan inchen tawk viau mai thei… :-D

    Report this comment

  10. 10
    mik3s Chongthu Says:
    July 15th, 2012 at 10:15 am

    Zu hi chu hmang rei tawh apiangin an hmang thiam ni maiin ka hria. Mizoram pawh hi bar te kha la awm reng se kan hmang thiam tawh viauin ka ring. Rui sual erawh khawi ram ah pawh (mihring kan ni miau sia) an awm lo thei lo, hnam changkang erawh chuan inthiarfihlim nachang an hriat laiin keini mizo erawh ruih pawh leh mahni a awm kan thiam lo niin ka hria.

    Report this comment

  11. 11
    mik3s Chongthu Says:
    July 15th, 2012 at 10:22 am

    @Dr Mahmiga: anih dawn chu T.T pawh a thiam viau, tarmit vuah. Ka lawm e, ini emaw ka tia.

    Report this comment

  12. 12
    mik3s Chongthu Says:
    July 15th, 2012 at 10:24 am

    ruih poh leh*

    Report this comment

  13. 13
    Dr Mahminga Sailo Says:
    July 15th, 2012 at 10:35 am

    # 10… Ka ngaihdan chiah a ni… (Y)

    An sawi fo tawh angin, tunlai Mizoram dinhmunah khi chuan, Zu khi a in leh in lovin an buaipui vek a. A senchi (eng zu ber hi ni ang maw? ;-) ) um 2/1 kawl thei tan chuan a hlu em a ni. Tin, zu in rau rauvah, in phal loh ngei han kawl te khi intihtheihna chi khat te pawh a ang. Hostel awm laia, kuhva ei sen ham kan hmuh paw’n kan tlawn nasat theihzia kha… :-)

    Vodka um (nula zu an ti emaw ni? ;-) ) fim tliang hlarh hi chu a nalh ka ti ve ngawt mai. Tui pai nan, a um-ruak hi la lei tur a ni… :-P

    Report this comment

  14. 14
    drake Says:
    July 15th, 2012 at 10:43 am

    beer chu phuihnam nen a chhum in a tui ve tho ang em Dr.labrador Mahming hehehe :-P
    #8 a i sawi saw, asian ho hian alcohol intolerance gene kan nei tih biochemistry ah kan zir thin tlat, author kan theihnghilh chu a!!!

    Report this comment

  15. 15
    VaiVa Says:
    July 15th, 2012 at 10:51 am

    “Mangalore ah chuan a tam mai… Dance Bar ho ah khan a to deuh a” a ti Sandman an :P

    Report this comment

  16. 16
    chhingdailova Says:
    July 15th, 2012 at 11:15 am

    A ngaihnawm viau mai a, i ziak thiam e

    Report this comment

  17. 17
    The Biz Says:
    July 15th, 2012 at 11:56 am

    Thuziak chhiar nuam tak a ni. Mahni tawnhriat atanga thu ziah hi a ngaihnawm duh phian zel asin. :-)

    Report this comment

  18. 18
    century child Says:
    July 15th, 2012 at 3:09 pm

    Ngaihnawm hle mai. (Y)
    Chennai train station-ah rela in tura kan tih, kan roh em2 ka’n thlauh keh chuai mai anih kha, chetchhiat ve theih khawp mai.
    Kan va la tha leh tho :-P (H)

    Report this comment

  19. 19
    Jacka Pi Says:
    July 15th, 2012 at 7:56 pm

    A ngaihnawm leh pek e. Beer hi kai tawh laklawh chuan a senchi kan tih ai hian ruih a na zawk an ti.

    Report this comment

  20. 20
    houdini Says:
    July 16th, 2012 at 2:09 am

    Mmm, tha leh viau ve. (Y) (Y) (Y)

    Report this comment

  21. 21
    ruatruatapa Says:
    July 16th, 2012 at 7:50 am

    Zu in nachang i hre lova, i vannei e

    Report this comment

  22. 22
    hnarliana Says:
    July 16th, 2012 at 8:13 am

    M-Bangalore.

    Report this comment

  23. 23
    Dr Mahminga Sailo Says:
    July 16th, 2012 at 9:06 am

    Good morning vek u… Kan khuaah vawkhniakzawn thla a thleng ve a. Nunphnung a buangbar vek mai..

    @ drake… Vodka far nga leh fanta no 1 pawlh min intir tawh a, a tui lo phian :-O Phuihnam (a hur lai phei chu.. :-) ) leh beer chu a kha-thlum hiar fek mai thei a ni.
    I referance chu chiang deuhin lo hriat tum teh, khawngaihin.. (Y)

    @ VaiVa … A dik hmel tlat. Brahmin tleitiri post-ah khan a sawilang tawhin ka hria… :-D

    @ chhingdailova & The Biz… Ka lawm e. Zu rui bula awm si hian, a rui lo ber hi ka nui nasa ber zel.. :-D Ka thianpa pakhat phei chu a titau fo.. :-P

    @ century child… Ka thianpa pawh, a pehteh ah, a tlukpui a, a jacket-ah a baw ta si. A rui deuh tawh si, zu bua ui lutuk khan, a jacket a sawr vel.. :-P

    @ Jacka Pi… Ka la hre chiang lova. A dik hmel ka ti, ka thianpa rui reng a, buai em mai.

    @ ruatruatapa… Ka lawm e. Nia, Pathian malsawmna a ni. In chakna emaw ka la nei miah lo.

    Sawilan chi a ni em ka hre law… BVSc ka zirlaia, ka pa’n ‘Mampui, zu i in ve tawh lo maw?‘ tia min zawh kha ka hre nawn fova. Ka pa min beiseina hi hlawhchham tir ka tum lo ve tawp.

    Tuk chhuah nuam vek u… (D) (D) Cheeeeeeeeeersss.. :-D

    Report this comment

  24. 24
    Chemtatrawta Says:
    July 16th, 2012 at 9:30 am

    I tetlai atang tawh khan i heti hrim hrim.. ;-)

    Report this comment

  25. 25
    Dr Mahminga Sailo Says:
    July 16th, 2012 at 10:07 am

    @ Chemtatrawta… I va’n reh ve le.. I dam maw? I awm loh hlanin kan lo rel hman tep che a nia…

    Report this comment

  26. 26
    sheldon Says:
    July 16th, 2012 at 10:45 am

    Ngatinge Beer te chu i lo zawn reng reng a? Nang hi i lo ti thei fe aniang a :-D

    Report this comment

  27. 27
    Dr Mahminga Sailo Says:
    July 16th, 2012 at 11:20 am

    @ sheldon… Beer in chaknain min thin tak tak chuan, kan phi ruai mai maw le… :-D

    Tunkar tawp hian, mi(sual) tu emaw ni te te, kan khuaah a rawn zin dawn aaa(h). Beer lo zawnpui ve te’ng… :-P

    Report this comment

  28. 28
    Chemtatrawta Says:
    July 16th, 2012 at 12:46 pm

    Sheldon.. Mahminga hi a sual zek ania aw…a hmel leh tawngkam ang hi a ni lo…aia nau velh te a hrat ania.

    Report this comment

  29. 29
    Dr Mahminga Sailo Says:
    July 16th, 2012 at 12:56 pm

    # 28… :-D :-P

    Report this comment

  30. 30
    Chemtatrawta Says:
    July 16th, 2012 at 12:59 pm

    Delhi a rawn kal pawn nula inah chiah a thleng duh a, min rawn tlawh ve duh lo.. :-D

    Report this comment

  31. 31
    Dr Mahminga Sailo Says:
    July 16th, 2012 at 1:36 pm

    Hetss… ngawi hmak te’nggg… :-D

    Report this comment

  32. 32
    badboy Says:
    July 16th, 2012 at 1:42 pm

    Beer te chu a hiar hiar nen :-D Phungchawngah khuan kohhran secretary in ah zu zawt in kan lut tawh :-P a nuam vak lo :-D

    Report this comment

  33. 33
    ltachhakchhuak Says:
    July 16th, 2012 at 8:34 pm

    Phai khawlum hnuaiah beer vawt hik tha tak, a tlang tuihu bawl tiam mai lem zeuh zeuh pahin zoram thlifim han ngaihtuah vel ila, O… A va han nuam dangdai bik thin em :-P

    Report this comment

  34. 34
    TarmitBuna Says:
    July 17th, 2012 at 7:36 am

    Beer thatna: khawlumah min tidai, khawvawtah min ti lum :-D

    Hmanah beer no 1 (B) in kan rui, chhun nisat laiin…

    College kan kal lai chuan Toddy/tari um khat cheng sawm in kan lei thin, a ruihtheih loh a, kohhran upa buhhum zu ang vel a ni.

    ka upa ta deuh ani ang, (D) hian lung a kuai ta lem lo (H)

    Report this comment

Leave a Reply

You must be logged in to post a comment.