mi(sual).com

Khawvel hi ka theih ang tawk chuan ka hmang ve in ka hria, mahse nunhlimna tak tak chu ISUA KRISTA ah chauh lo chuan a awmlo. A tawrhna te tawmpui ve min phal sak avang hian beidawng lovin ka tuar ve ṭauh ṭauh tawh zawk a ni.

Ka pian chhuah hian ka nu leh pate hian an fa hmuh hmasak ber ka nih avang hian an lawm hle a, duat pawh min duat reng a ni. Keimah lo fadang an neih loh avang te pawh aniang e ka duh apiang min tihsak a, min hmangaih em em bawk. Mahse thil awmzia ka hriat ve tan Middle school kal rual ka nih aṭangin sualrawng ka bawl ṭan daih tawh a, min duat si, a lang a pauva sual lan ka hreh si, ruihtheih thil kha a rim nam chi chu ka ti duh lo a, zirna lamah chuan a rual pawltawk chu ka ni reng tho thin.

Chhungkaw khawsa thei tak kan ni em em bik lo nen, rui duh ve chuan pawisa neih reng kha a har ve a, thilruk kan han ching nghal bawk a, buhfai te kan hralh ru a, kanu pawisa mamawh tawk tawk ruksak reng a ngai a, neihin a tlin loh chang lah a tam, thian kha pasarih vel lai kan ni a, mamawh a tam duh khawp mai. Ganja ka zu nitin a, damdawi a ruih theih ang ang kan la khawm bawk a, khawlu tlangah kan khawvel zimte chu kan chen ve hle thin.

Insual kan ching em em bawk a, a huho a insula chang a tam a, khawtlang kan ti buai thei khawp mai, engemaw tih nikhua kha chuan buaina kan cho em em a, khawtlang nu leh pa te huat pawh kan hlawh na rawh e. Kan pawisa neilo khan kan piangthar der a biak Inah inkhawmin mi ṭha awm khan kan awam a, enge kan tum kha an hre der silo, nu leh pa te khan min fak der ve liam liam a, mahse then khatin thawahlawm dahkhawm kha an lo va ru a, in khawm ban chuan kan mamawh chu kan nei ve leh mai thin, ka ngaihtuah let chang hian setana khan mal min lo sawm hle ni hian ka hre thin.

Ka nu leh pa te chu an fa neih chhun hian ka chawimawi lova, an tan phurrit tak chu ka ni chiang hle mai, mahse ka nu hian ka tan hian vawi engzat nge chaw nghei a ṭawngtai ang tih hi ka chhut thiam lo, engtianga zakin nge khawtlangah ka siam tih lam kha ka ngaihtuah pha lo hrim hrim. Mi nen kan insula a ka thiam emaw thiam lo emaw mi hmuhah vawi khat pawh ka thlavang an hauh ngailo kha mak kati ṭhin.

Kan fapa hi a suala a thiam lo ani ngaidam rawh u an ti zawk ṭhin, a thiam zawk ka nih tum phei chuan ka rilru hi a na thei khawp mai. Thu ṭha mi hrilh kha an ṭhulh duh lova, kut erawh min thlak ngailo thung. Ka pa hi mi zaidam ngang hi a nive a,a thinrim chuan thingfak ami vuak kha ani mai, vawi hnih khat bak min vaw lo, an thu tha min hrilh leh ka tana an ṭawngṭaina hian awmzia a neih hi ka ring pha ngailo hrim hrim.

Zan khat chu khawtlang hruaitu pakhat hian kan kawt lai leng misual ho min ti a, kan tha kha a na khawp mai, kan thian ho thin rim chu kan puak keh lo chauh a ni mai, kan sawisak rawn ta, ṭanpui tu tur a au velah khawtlang pa ho an lo chhuak a min phek vuak ta chiam mai, kan sil them thum, ka pa alo kal vata min hruai haw a, in lamah min vaw hrep a, misual dam reng tlak pawh ini lo min ti a, a insum zo dawn lo, ka nu mangang in ka patea a ko a, anin a rawn ṭhelh thei hram a, a tuk chuan ka taksa kham ṭhem ṭhum a, khawi lai lai emaw chu a dûk chur mai bawk a, a zawng chhang chi loh khawp mai.

Ka pa thinrim chu alo la reh awzawng lo mai, a tuk kha tho chu engmah sawi lovin hmawlh fiak ṭha zet zawt tak hian min lo hlap leh pawp mai a, ka rilru kalsual bawk nen ka la na khawp mai, min vuak zen zen loh avang in ka tuar thei thlawt lo a ni. Tlangval ka ni ve tawh a, tiang reng ka peih lo ka tia ka chhuak tau a, khawlu tlang lamah ka han in ngaihtuah a, engmahsawi lovin, chhun motor remchangah ka in leh lo, ka thian te chu eng thu mah chah lovin ka tlan bosan a, khawpui lamah engmah nei neiloin ka kal risk ve tawp a, ka nu pawisa ₹8000 ka ru a, engtiangin nge ka awmzel dawn pawh ngaihtuah lem lovin ka kal bo ta a ni.

Darkar ruk zet motor a kan chuan hnu chuan khawpui chhung chu kan thleng ta, hotel kawtah kan chawl a, kal na lam tur pawh ka hre chuanglo, hmel hriat te ka hmuh tak mialin ka tia kawngpui lunlaiah chuan ka kal ve tawp a, km1 vel ka kal hnu chuan waiting shed ka hmu a, tah chuan ka thu hahchawl a, tlailam pang alo nih meuh chuan khawnge ka riah anga, enge ka ei ang tih ka ngaih tuah ṭan, ril lah chu a ṭam tawh nasa mai si a, mipui vak vel chu an tam mahse hmeihrit hmuh tur an vang khawp mai, hotel chaw eina tur zawng tura ka in buatsaih lai chuan kan thianpa cousin kan khua ami ngei mai ka hmu thut mai a, ka rilru a lawm kher mai. Ani hi motor khalhin alo awm reng chu niin, kan han in bia a, ‘keimahin alawm in ka luah lo awm ve phawt mai rawh min ti a’ ka lawm khawp mai.

Khua alo var a, in hlawhna te min zawn saka, ṭhenawm hnaiah insa an awm a tah chuan thawk ve mai rawh min ti a, ka taksa sil ṭhem ṭhum nen ka chak lo khawp mai, mahse mi bula awm ka nih miau tawh avangin peih lo sawi theih ani talo, nitin mai chu ka in hlawh ta ṭak ṭak mai a ni. Ka mamawh ber mai damdawi ruih tur chu ka hmu reng thei thova, kan khawlama ka tih thin aia changkang leh thawk chak zawk pawh ka nei reng thei tho a, mahse ka awmna pa hi a fel si a, a ruk ka tih reng tho a ngai a ni.

Khua a rei a, ka tlangnel tawh khawp mai ka ṭhian kawp tur ang chi pawh ka chhar ta nual mai. Ka awmna pa hi mi piangthar tha tak mai a ni a, a zahawm ṭhin khawp mai, a rei a rei a, ka ruihtheih thil tih chu a lang chhuak tan ka inthup seng lo a ni ber mai, zankhat ka ṭhian te nen rui chungin kan hawng a, an deuhsawh vel a kan inti buai leh ta. A dawh theihna in a tlin lo a ni ber mai min hnawt chhuak leh a, ka baihvai leh ta. Hetih hunlai a ka thian kawp te hi mi duk dak lo tak tak hlir an ni a, awmna mumal pawh an neilo. Bazar leh hmun remchang lai apiangah an riak ṭhin. Chu chu keipawhin ka chan chu a ni ve ta mai a ni.

Kan in ka chhuah san aṭangin kum 12 zet a liam ta, ka taksa pawh a chhe tawh khawp mai, ka injection na ka ke leh ban te chu a ser neng nung a, ka puam ṭulh tawh, hemi kum chhung hian Jail bang vawi tam ka zut a, rûkru case te, Zu case adt. avangin ka nun hi a beidawng ngawih ngawih tawh a, beisei ka nei tlem tawh khawp mai. Chhungkhat laina hnai hmuh tur ka nei lova ka tlansan tlat avangin.

Tianga hun kan hman lai hian kan ṭhian ṭhen khat chu OD vang te, accident vang te leh beidawnga in awk hlum tawk nen kan in ṭhen hlawm a, Jail kan tanna hmun aṭanga in hmu leh tawh miah lo te kan ni hlawm a. Ṭhenkhat te chu piangthar ṭha tak rawngbawla chhuak te pawh an awm a, kei erawh ka sual ngai ngai in ka la sual chhun zawm reng a, ka in hlawh ve tho ṭhin avangin ka in hlawhna te Inah ka cheng tam ber a, a nih loh leh mi verandah leh ka chat thlakna hmun hmunah ka riak mai thin. Rei tak chhung chu nuthlawi zu zuar inah ka cheng bawk a, innei angreng in kan awm a ni.

Zu zuar in a ka awm lai hian zankhat chu damdawi lei tuma ka kal na lamah ka che suala luhai in ka tlu tawp a, zing ka harh chuan damdawiin ah kalo mu reng maia, ka bulah nupa hmel fel tak hi an lo thu a, ka harh deuh hnu chuan damdawiin a ka awm chhan te min hrilh a, anni hian min lo buai pui vek alo ni a, Missionary a thawk ṭhin an ni a, an kawt a ka tlu reng chu min lo buaipui a, min lo enkawl hi alo ni a, engmah ID leh tu nge ka nih hriatna tur ka kawl loh avangin anmahni thu in damdawiin ah min lo dah alo ni.

Ka taksa a chak loh em avangin ka che thei har khawp mai a, ka ngaihtuahna a fim thei lo bawk nen, damdawiin aṭang an in lamah enkawl turin min la a, tlema ka ṭhat deuh hnu chuan ka chan chin chu a kip a kawiin ka hrilh ta vek a, ka nun beidawn dan te ka hrilh a, anni hi fa neilo an ni bawk nen kan hnenah awm ang che. Kan enkawl che anga, i dam ṭhat velah i Nu leh Pa te hnenah kan hruai dawn che nia, an ngai tawh dawn lutuk che min tia, ka lu chungah kut nghatin min ṭawngṭai a, ka dam sawng sawng in ka hria.

A thla tel an hnena ka awm chuan ka taksa pawh a zia awm tawh khawp a, zan khat chu ka Mut na ah hian eng danglam taka lo lang a, vatirhkoh a ni ngei ang, i sual te sim la, ‘I LALPA rawngbawl tawh rawh, a ni chuan a HMANGAIH reng che a ni, engmah chhuan lam siam lo ang che” min rawn ti tlat mai, mak ka ti tawp theilo a ni. He mi zan hian ka mu lo chiang kher mai.

Zing a nih chuan ka awmna te nupa hnenah chuan ka sawi a, e a thusawi chu i zawm ngei a ngai a nih chu min ti a, Gospel Camping awm hmasa berah i lut anga i nun bul chu i tan ṭha leh dawn nia min ti a, ka chunga an ṭhatna ka hmuh hnem zia ka ngaihtuah hian ka zak ngawih ngawih a, a ruk in ka lawm em em bawk a ni.

Camp-ah chuan ka lut ta a, ka piangthar veta, a kum a kum tel biak in chhung lut tawh lo leh ṭawngṭai ngai lo ka nih avangin thu chham tur ka haihchham a, ka awmdan ka hre thiam lo a, thlemna ka tawk nasa bawk. Mahse ka awmna te ṭhaṭna, ka nu min ṭawngṭaina te leh kapa thu ṭha min hrilh zawng zawngte chu nimin lawka min hrilh ang mai hian ka bengah a ri nawn tluk tluk mai a, ka nun chu keimah ngeiin ka control a ngai ani, mahni duhzawng chauh tih hian eng nawmna mah min pelo, nun beidawnga awm reng tur ka ni bik hlei nem tiin ka in fuih ve mawlh mawlh thin.

Rem chang ka hmu a, Speaker zuiin ka rawngbawlna chu ka ṭan ve a, Pathian thu te chu ka hre lo em em a, mahni a tumna ka neih ve tlat avang chuan hma pawh ka sawn khawp mai, Pathian thu te ka zir khawtlai ve leh a, ka chhungte chu hmu chak tawh viau mah ila an bula thleng tur chuan kala in peih lo a ni.

Rawngbawla kum li vel zet ka chhuah hnu chuan Deputy Speaker hial ka ni ve ta, mahni in in ka luah a, ruihhlo avanga harsatna tawk ten min rawn pan ve ta fo mai. Ka nun tawh dante ka chhut let chang hian ṭhian tam tak te khawvel eng hmu tawhlo turin kan in vui liam tawh a, an ni ang tho a sual kha ti nge pathian hian min lo zuah bik le? Engvang a sual thil ti te ṭanpui hialin a min rawn pan tak le tiin mak tiin ka in zawt fo ṭhin.

Kum tam tak ka hmuh tawh loh, ka lungngaih ni a ka hriat chhuah ṭhin, ka mangan ni a ka ngai ngawih ngawih ṭhin, an bula awm duh lova ka tlan bosan min hmangaihtu, ka tana hrehawm tin reng tuar huam, ka lei PATHIAN, ka nunna leh ka damchhan ber te, ka pian tirh a lawman leh hlimna sawi sen loh ka neih tir, ka seilen hnu a beidawnna leh hrehawm tin reng ka phurh tir, KA NU LEH PA ngei mai hmu tur chuan ka in siam fel a, ka chak em em a, ka chak zat tluk zetin ka hreh bawk a ni.

An la dam nge an thi tawh tih pawh ka hre lo, engtiangin nge min ngaih ang tih pawh ka hre lo, mahse min hmangaih a, min hmangaih reng pawh ka ring a, ka nu in min ṭawngṭai sak na zawng zawng kha chhan let ani tawh tih ka rilruin ka in hrilh mawlh mawlh bawk a, lungngaihna nge hlimna in min hmuak tih pawh ka ngaihtuah ngam lo, kum 20 dawn a liam tawh si a.

Ka vun te chu mi hrisel ṭha pangai vun ani lo tawp a, mifel taksa ang a ni lo, mahse ka rilru erawh a danglam tawh, thil tam tak ka ngaih tuah a, rilru ṭawngṭaina nen ka hun kal tawh zawng zawng ka ngaihtuah a, ka chhungte chungah eng pawh lo thleng se ka vui lovang tiin ka inti pachang lui hram hram a, ngaihtuahna a kal ding hle mai, rin loh Karin kan khua kan lo thleng der mai.

Kan kawt zawn ah ka chhuk a, thil alo danglam tawh zia chu hrilh kher ka ngai lo, ka mukhual hru mai, ka zauthau lek lek in ka hria, kan in chu alo in kalh ṭhap mai, enge maw an tih angle? Kan ṭhenawm lawkah ka patea te an awm a, an in lamah chuan kalut ta zawk a.

Minlo hre tawh lo a, ka in sawi a, ‘khaw nge ka nu leh pa te an awm a?’…. khatiang a patling ṭap hawmhawm kha kavawi khat hmuhna a ni awm e, kapatea chu a in sum zo thlawt lo, “Malsawm…. A sawi zawm hlei thei lo a in sut hlup hlup a, an nu chuan an thi tawh i nu leh pa chu, ngati nge engmah i rawn sawi loh a kha chen chen i thang bo a, nangmah ngaiin an tap nitin thin asin.

I hmel hmuh an chak em em a, hmuh tur i awm silo, nangmah bak fa an neilo che tih i ngaihtuah ve ngai lo mi? Ṭah mai loh chu sawi tur avang khawp mai,

Engkimah ka thiam loh ani tih ka hai lova, mahse pakhat tal hmel ka hmu lo ringawt hi chu tuar har ka ti, ka vui lek lek ṭhin mahse ka nundan a chhiat em avangin hrem ka phu ngawih ngawih tih ka hai lo, lungai tak chung leh khawhar tak chungin ka nun bul chu ka ṭan ṭhaṭ a ngai ta a ni. Engkimah PATHIAN rawn tlat in, amah ah chauh rinna ka nghat a, lawmna thlamuanna a khatin min pawl reng a ni. Ṭhenna awmtawh lohna hmunah min lo nghak reng dawn tih ka hriat avangin ka thla a muang a ni.

Similar Posts:

• Ka va inchhir tak em aw!
• I ngaihtuah ngai em?
• I Bike a bo ve tawh em?
• ZU nge ZAWLAIDI
• Ka Nu tak kha chu aw….

Recent Posts:

• misualdotcommer lehkhabu release: The Mizo Uprising
• A hlet
• Misual lo thleng
• A hun leh a hmun (When in Rome)
• Lo chhiar ve ru

This entry was posted on Thursday, August 2nd, 2012 at 6:30 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.