mi(sual).com

Uisa boruak a reh a, ka han tlip dawn ang e.

Uisa duh laileng kha chuan uitang vun kha tui an ti tak tak a ni awm e, hmanlai deuh kha chuan. Sa râwp nat vang ve hrim hrim nge ni… Chûvang te pawh chu a ni mahna, hë hla hi a lo piang ta a ni:

Ui rawt party-ah tel i duh chuan,
Duli thawh la vawi thum lam la,
Ui sa ui sa tia au chung zelin,
Vengtin kil tin fang zel ang che,

Ui sa ui sa, lenghmaser taivawn,
Sa zawng laiah i tui chuang e,
I khu ngawt pawh chhungkaw tinreng tan,
Puar leh fanna a tling awm e.

Ui sa rau rauvah duhthu säm ila,
Kum thum tang tawh a vun chhah lai,
Chawnpuar nei lo awm hmun pawh sawn thei lo,
Dangfir lem tel palh (a) awl ngei e.

Heti chin zawng hi ka hriat theih chin a ni a, ka sak ṭhin dànin ka rawn chhawpchhuak a ni e. Hriat belh in awm chuan rawn thawh belh ve ula maw le… Kan hriat dàn te pawh a dang leh hlek hlek hlawm mahna…  A thlûk chu H. Lalchawimawii hla sak Ka rawn fang leh hmana kan ṭuanna tlang tih nèn khan a inang. Khami kaihlek hlä kha a ni bawk. Kan sa thiam tlang awm e; i sa ṭheuh bawk ang u .   Hre pha ve lo nau deuh in awm paw’n hre thar ve tâ ula… A thlûk thiam lo tan ka zawmchhuahnaah khian hmeh tur; ngaihthlâk theihin a awm e (H. Lalchawimawii hlä zâwk. A thlûk a inang ka tih tawh kha).

Thubelh:  A ṭhen chuan Dangfir lem tel palh (a) awl ngei e ti lovin Aw lei lem tel a awl ngei e tiin an sa.

Zapanmiho khian hnam upa tih takah hla chi hrang hrang an ngah angreng a an tia; leilunga hmuh theih thil chawina hlä chu an nei kim deuhthaw hial awm e (thu ka uar hret  ). Theite hlä an nei a, Sangha hlä an nei a, Lungalhthei laih hlä an nei a, … chutiang zëlin.

Mizote pawh hi hla chu ngah ve tak kan niin ka hria a. Green Mizoram hlä kan nei a, Hnam dang ngaihzawn hla (Kanchhi zun) kan nei a, Mizo nula ngei duh zâwkna hla (Zohnahthlâk lanu) kan nei a, Mizo tlangval ngei thlanna hlä (Kei zawng ka thlang Mizo val ngei) kan nei a, Chhura chanchin-hril hlä pahnih-khat kan nei bawk a.   Zawlnuam pa tàn hlä te, khawhar hlä te, piancham lawm hlä te, inneih lawmpuina hla te, Zu ṭhat lohzia-hril hlä te (Sual tinreng bul), Zu nghei duh loh-hril hlä te (Sawi sawi mah sela ka nghei dawn chuang lo), Lalnu Ropuiliani hlä te, Khawnglun rùn hlä te, Khawchhak bial màwina-hril hlä te (Ka ngaisang che chhaktiang zopui Fiara tui thiang luanna ram… tih hla kha), Aizawl-a mi ngei thlanna hlä te (Aizawla mi ngei, nupui min zawn r’u…), … a va tam tehlul êm… (Sawi zawh ka tum ni lovin ka rilrua ṭha ve mai mai riau emaw dangdai bîk riauva langho ka han sawi mai mai a ni e).

Tichuan hla pakhat, tlar khat lek ka hriat hi a awm a, a hre zawm tán sawi zawm ngei chi… Chu hlä chu hei hi a ni:

A lu, a lu, a thlaki-ruh a ngùm…

(Arsa tuizia sèprawtuina hlä a ni e! Hre chhunzawm in awm ngei ka beisei)

Ka läwm e

Similar Posts:

• Mizo leh Mizo tawng
• MI @ Mizo Hlakungpui Mual, Khawbung.
• Hriat ve atan..
• Mizo identity
• Mi duham hnam nih ka zak

Recent Posts:

• Double Adverbs
• News tawi-II
• misualdotcommer lehkhabu release: The Mizo Uprising
• A hlet
• Misual lo thleng

This entry was posted on Sunday, August 12th, 2012 at 1:00 am and is filed under Luangliam, Mizo Society & Culture, Poetry. You can follow any responses to this entry through the RSS 2.0 feed. You can leave a response, or trackback from your own site.