Inkiltawih ang reng takin… 
Ka sawi lang zauh tawh thin. Pawl sawmpahnih thleng bak tawng: thu leh hla (Mizo leh English) zirna hranpa ka neih tak loh avangin, tawng chungchangah hian duap ka kai viau a. Chutih rualin theih ang tawka tawng hman fimkhur erawh ka duh lawi si. A thiam ber ang fahranin, thuthmunah mi(sual) thenkhat thuziak ka sawisel khauh khauh changa a awm fo reng a ni. 
Zing Eksarsais lak laia ka ngaihtuah
Tukin eksarsais laa, pitar-putar, nutling leh patling, nula leh tlangval tlemte zinga ka kal ve lauh lauh laiin; Mizo tawnga kan neih sipisial ve tak ‘Double adverb’ thu-nawn/sawinawn chungchang hi a ni teh tlat! Chutichuan, mi chi hrang hrang, thahnemngai tak maia taksa hrisel nana zing taka tho va, hmun hring nuam taka kal dial dial ho kal dan chu ka en kual a. Mizo-in double adverb kan neih tangkaizia ka hre thar.
Mi hrang hrang eksarsais la zingah chuan,…
Nula pahnih chhe vek lem lo hi tui taka titiin an kal awt awt a,
An hnunga nu pakhat erawh a kal luih luih thung
Ka hma chiaha pa valai tak chu a kal hmawk hmawk a;
Ka hnung a pa lian ang reng tak erawh a kal thloh thloh nia!
A hnung lawka putarin a rawn zui dem dem bawk.
Ngai teh, kei erawh chu, uih zawn an sawi iangin ka kal sawk sawk a
Sir leh lama tlangval pakhat kal tuang tuang chu
A thianpa ni awm tak chuan a rawn zui det det a
Putar lu tuak var vo erawh sir khatah a kal sawih sawih thung.
Chutichuan, ka zingkar ngaihtuahna chu, tawnmangmawl ianga thamral maia’n ka phal awzawng lo mai a. Nimin thlenga ka buai pherh erh avanga mi(sual) run ka lum theih bawk si loh avangin; zahzel pawh ni em em lovin, thu lawilo ka rawn thehthang ve ngawt a nih hi.. Ka thu hman leh double adverbs ka hman pawh khi a inmil vek lo mai thei. A duhin sawisel r’u, dik taka in sawisel phawt chuan lawmthu ka lo hrilh zel ang che u..
Thu zirtir
Zing thawh hma hi a peihawm ngailo va, tho hma erawh an inchhir ngailo…
Similar Posts:
- June Fiamthu
- Saptawng aiah Mizotawng
- Native American/Red Indian Lal Tawngtaina sawi dan!
- Goodbye Bafana (Mangtha le, Taite)
- A ngaihna hria in awm em?
October 10th, 2012 at 8:28 pm
uih zawn ang maia kal sawk sawk lovin …kal vut vut an ti thin. eg.kha in va hmanhmawh ve uih zawn ang vut vut mai lah ni.
ka’n belh ve ang e…ka zu riak vang vang teh ang ti ila..
1. a riahna tur Lo chu hmun hniam lam deuh.
2. rei tak riah a tum.
3. zau lun lo tak a nih hmel.
adverb ringawt pawh hian a sawi thui…a khawng fawk ang che..ti ila..
1. a khawnna lai chu ruh awmna.
2. sound a awm ngei tur a ni.
3. na lutuk si lo…pawi lo tur tawk vela nain
4. a khawnna pawh thil sakhat thing ..tiang..emaw thir lam.
5. a khawnna chu hmanraw lian a ni thei lo.
6. a khawn zawngin zak a kau hawk lovang a..kiu chin vela tha pek a nih hmel.
7. action precedence a awm tawh ang a..chumi hremna lam a kawk.
8. a khawngtu thuneih zawkna leh chungnun zawkna a lang.
9. a khawn tak tak hmel.
Report this comment
October 10th, 2012 at 8:46 pm
Vakul comment khi ka va LIKE chak e
Report this comment
October 10th, 2012 at 9:14 pm
vakul…i va peih mai mai e.. ka nui vur vur mai..i komen khi tunhnaiah chuan thin lung taka min ti nui vur vur tu awm chhun i ni mai ang a..(apology to post tupa..haha..)
Report this comment
October 10th, 2012 at 9:45 pm
ka chhiar beuh beuh a, ka like vawt vawt.
Report this comment
October 10th, 2012 at 10:06 pm
@ Vakul.. Tha lutuk..,
I comment ang tak khi ka post chhan. Comment hmasa ber atangin ka hlawk tan der. Ka bat ka rul nghal ang che.. Ka lawm e..
Report this comment
October 10th, 2012 at 10:09 pm
Double Adverbs ah na na na hi chuan, Mizo tawng hi a hausa tiar tiar mang e. Khawvela double adverb nei tha leh changtlung ber kan nih ngei hi ka ring rum rum.
Report this comment
October 10th, 2012 at 10:27 pm
double adverb sawi na na naa ..khawng fawk fawk..ti zawk ang.
10. vawi hnih aia tlem lo khawn a tum.
Report this comment
October 10th, 2012 at 10:27 pm
a zirtir pawh khi a tha khawp mai
peu peu
Report this comment
October 10th, 2012 at 10:28 pm
Tha leh angreng hle mai si.
vakul comment khi ka like em em bawk. A tichiang lehzual ka ti ve.
Thawhhma kher erawh khi chu midang tihah la dah rih teh ang. Nakum atangin loh theih lohin ka la tho hma ve ang.
Report this comment
October 10th, 2012 at 11:03 pm
Va hmang thiam tak ve, hman phet hi ka tum thin a hman tur erawh ka hre tlem ang reng khawp. Sap tawng ai pawn thu uar nan pawh a uar zual bik riau a ka hriat tlat pek chu tun a i sawi a hi
Report this comment
October 10th, 2012 at 11:13 pm
Ka nuihzat ve deuh mai maina pakhat chu, “double adverb” kan tih hi mizo ṭawnga phuah chawpa sawi ve mai awm, sâp ṭawng kherin kan han sawi a (“double adverb” tiin), sâp ṭawngah a awm ve mang pawh ni hlei si lo hian…
Kan ṭawng kalphung zirna bu siamtu ṭhenkhatte inlâk-sâp-̣ṭawng-thiam tum kher ṭhin hian min tisuak zo a ni ber e. Buaithlâk deuh a ni (Pu Buanga phuahchawp a ni deuh bawk).
Nakinah phei chuan “Mizo” tih thumal pawh hi sâp ṭawngin kan la phuah leh kher lo vang tih pawh a sawi theih loh a ni e.
Ziaktupa Dr Mahminga Sailo ka rawn demna lam a ni lo ve…
K.L.E.!
Report this comment
October 11th, 2012 at 12:14 am
Report this comment
October 11th, 2012 at 12:20 am
Dr Mahminga Sailo, semi-colon hmanna hi zir chiang leh deuh teh a. I hman thinna hi (he post-ah chauh lo pawh hian) a lai deuh hu thin a nia.
Unsolicited advice ka lo pe ve ngawt che a, i hrethiam lo lem lo’ng chu maw!
Report this comment
October 11th, 2012 at 6:19 am
@ houdini.. A dik chiah. Mizo tawnga dah dan tur ka’n ngaihtuah ve ngial a, ka thiamin a tlin si lo, mithiam te chona ni teh se…
@ hlatekhua.. Ka lo inzir ang, thu ka ziah hian inringtawk vak lovin ka hmang fo tak a sin. Ka lawm tak zet e..
Report this comment
October 11th, 2012 at 9:59 am
A tha viau zel e
Report this comment
October 11th, 2012 at 10:11 am
#8 na a double adverb peu peu khi eng tihna nge ni a, enga hman chi nge????
Report this comment
October 11th, 2012 at 10:25 am
Mizo Tawng Grammer, Pu K.Zawla siam kha lei i tum dawn nia.
“Nula pahnih chhe vek lem lo hi tui taka titiin an kal awt awt a,
An hnunga nu pakhat erawh a kal luih luih thung
Ka hma chiaha pa valai tak chu a kal hmawk hmawk a;
Ka hnung a pa lian ang reng tak erawh a kal thloh thloh nia!
A hnung lawka putarin a rawn zui dem dem bawk.
Ngai teh, kei erawh chu, uih zawn an sawi iangin ka kal sawk sawk a
Sir leh lama tlangval pakhat kal tuang tuang chu
A thianpa ni awm tak chuan a rawn zui det det a
Putar lu tuak var vo erawh sir khatah a kal sawih sawih thung.”
kan thawh belh ve ang e! Excer la kher lo pawhin…!
# Naupang a kal chhet chhet.
# Perek a rap a, a bai auh auh.
# Saii kal hne hne teh suh.
# Sipai a kal auh auh. (Pakistan ramri gate khar lai )
# Mipui an in zui dum dum.
# Sailova nulain an zui dul dul.
# Ign-a a kal khang khang. ( A huai hmel :))
Han chhunzawm ve teh u.
Report this comment
October 11th, 2012 at 10:41 am
in sawi te khi ka lo save nghauh nghauh..
Report this comment
October 11th, 2012 at 10:59 am
@ lushai_er… Pu K. Zawla lehkhabu ziah chu, haw vel leh zawn vat tur a nih chu..
I thawhbelh tawpna ber, Ign-a khi la hmu miah lo mah ila, a huai/pa hmel tak tak…
Kan u pakhatin kannadiga-ho tawng dan a zir thiam a sin. Chumi chu khawiah nge? han ti ila. Kan awmna atanga a hlat vak loh chuan, Streitaa, then take 1st right an ti mai a. A hlat deuh viau chuan, Streeeeeeeeiiita, take 1st right an ti thin a ti…
Report this comment
October 11th, 2012 at 11:28 am
Hahahahaha Chapo ve laklawh tawhing mahse lo ngaihsang vak loh ing an la na ing. Mi tih mualpho na tur an zawng vak2ing, mizo hnam hmusit ang te’n min chhuah ta vel ing ti ta ila…………a sentencing formation hi dik tak maw
Report this comment
October 11th, 2012 at 11:32 am
E khai a va ngaihnawm ve!
Double Adverb kan nei a chutih lai mek chuan ADJECTIVAL ADVERB pawh kan nei bawk. Ngaih pawlh loh hram ang u… tin, tawngpawng phuahchawp vak vak hi a tha ber lutuk lo mai thei. Thusawina leh ti ti honaah chuan a zia tak pawh a awm a. Thuziakah erawh fimkhur a tha awm mang e…ka ti mai mai.
Report this comment
October 11th, 2012 at 11:59 am
@ Ignatia… A ni tak e . Adjectival adverb phei chu ka lo mangnghilh titih der a sin. Ka ba ka’n rul nghal ang che, Ka lawm e..
Ka sawilan ang khian, kawng engemaw tala ka hlawkpui theih nana mithiam zawkte cho chhuah ka duh vang deuh a ni a. Comment thenkhat hi ka hlawkpui khawp mai..
Report this comment
October 11th, 2012 at 1:16 pm
Tunlai chu nula ka ngaih veng veng lai ania, rilruah thildang a leng thei mawlh lo; mahriaktein, a sakhmelmawi karah a nui sen sen leh a nungchang mawi mitla tak mai nu hnep hnep tak bak thinlaiah thildang a cham thei lo.
Report this comment
October 11th, 2012 at 4:47 pm
Dabawl edvarb hi ṭha deuh ania. Hairehai
Report this comment
October 13th, 2012 at 2:19 pm
Report this comment