mi(sual).com

(Part 1 ka post tawh a, mahse a la chhiarlo tan link dah aiah ka dah kawp a. A a hmasa chhiar tawh tan chuan part 2 chin atangin chhiar mai ru)

Part 1

Train station platform number 7 ah chuan kan thu dun a, sawitur reng kan hrelo. A suitcase leh bungraw dang kan remkhawm intiang ur mai bulah chuan thuin ani chu ka hma ah, a airbag chungah thuin a kun ngal a, a sam a khawih niap niap a, mi rawn melh zauh pah chuan a nui ver ver in a hmel ah erawh hlim hmel a pu hauh lo.Kan chhehvel ka han hawi kual a, vai tam tak an phu mur mur a, a then an mu, an then chak deuh deuhin an vei a, a then lahin min melh ang vauh vauhin, a tam zawk te erawhin keini 2 ang thoin tumah an awm ve tih hrelo in mahni chauh an inngaihtuah a.

Ticket en chunga hawi vual vual te, thu muthlu lawp lawp te, sipai rual thir thingrem intiang ur bula tawng vak vak te leh zirlai rual bungraw tam deuh bula thu kual te, puri, omlette zuar te leh thil mak pui pui sex chewing gum, sex powder, pendrive 200 GB zuara khai kual te nen, in daihzai tak anni.

Chung ho zawng zawng zingah chuan keini 2 pawh chu kan thu ve in, a khat tawka kan inbe zeuh zeuh tihloh chu sawitur reng kan hre lo.Inbe tam lova thu dun nimahila, kan rilru erawhin kan ngaihtuahna a hriatpuia, tawngka ni lovin mitmeng leh kan hmel ah thu tam tak kan sawi si. Kalsan min hreh tih ka hriatchian em em chu hreh taka ka thlah a ngaih hun alo thleng ani e. He hun, tun hun ah ngei hian hun kha lehchen min tihlim tu, puih ka ngaih huna min pui thintu, ka rilru a hah changa min thlamuana, ka lawm huna min lawmpui thintu nula ngei chu ka thlahliam alo hun ta.

A bungrua vel kan remfel hnu chuan train pawnah kan han ding duna, Mizo tih dan pangngai in “Tluang deuhin i kal dawn nia” tiin ka’n chibai ve a. Rilru erawhin chu ai a tam sawi duh mahse a thei silo in a rem silo. Chutah train a rawn kiu a, a kal a hun ta, thei leh thei lovin, zah pawh dawn lovin a beng hunah ka han kun hniam a, ka koh thin fo dan ngei a koin,
“MILADY, KUMTLUANG ATAN MANGTHA AW” tiin ka thlahliam ta.
Aw!! , Kumtluang, kumtluang atan ka mangtha ta si.

Kum khat lai alo liam ta, ka zirna tur hmun ngeiah chuan huphurh takin ka kal ve ta a. Ka tan chuan vahkuak loh thlawhhma an sawi ang maiin, ka hriat ngailoh leh ka hmelhriat awm miah lohna hmun, keimah ngei ina ka tawn kuak chawp tur hmuna kal ka nih avangin ka huphurh hle a. Chutih rualin ka rahbi ka siamna hmun tur anih avang erawh chuan peihlo tak chungin ka phur a, huphurh tak chungin ka pheilai a zâng viau lawi si. Hun a liam a, thian thar leh hmelhriat thar te ka nei chho a, kan Mizo senior awm ten min ngaihsak bawk nen.Kar loah ka tlangnelin nuam ka ti nghal thuai a, ka Mizo batchmate te bakah kan senior te pawh kawm chhoin, a bik takin tun hnu thleng hian kei aia kum li a senior Lalrinnungi nen kan inkawm ngeih ta bikin, thian thatna mai bak thinlungah alo intuh hman a. Chu rilru, a rem dawn chuanglo tih hre reng chung si a kan inkara rawn awm, kan tihreh phal siloh chuan tumah hriat lohin kan rilru leh thinlung a hliam a, kan hun hman dan leh kan inkar te inchhir phal silo in min inchhir tir si.

Ka awmna ah hian Mizo kan awm nualin kan college bik ngei ah pawh Mizo 24 lai kan awm a, eng vanga ka batchmate pawh nilo, ani ber kher ka kawm ngeih a, ka rilru a awm ta bik nge ka hrelo. Ka hmuh hmasak ber tum te kha, kan senior pakhatin kan college vel min hmuh kualin girls hostel lamah Mizo hmeichhe awm ve te min hmelhriat tira, an fel hlawmin min be ang luam hlawm a.Chutih lai chuan hmeichhe pakhat te fel rin ren, ngo lampang hi a rawn luta “Hei hi emni kan junior chu. Zu te in lo la, tha deuhin i zir dawn nia, lehkhazir tura rawn kal i nih kha” tih pah chuan min chibai a, a bak sawi lemlo chuan a kal leh nghal a, midang chuan minlo nuih tat tat rêng a. Kan haw pah chuan kan u hnenah chuan, “Tunge min chibai tu, kal lehnghal daih kha” ka han tih chuan, “Marini anih kha, a fel lutuk, mahse tumah pawh a kawm vaklo, amah hian a awm tawp a, painting leh lehkhazir bak a ngaihtuahlo.An batch topper anih kha, a chhe vaklo, Chut viau lo se chuan ka ngaizawng ang” tiin nui sun sun pah chuan min chhang a.. A hnu ah pawh class lama kan buai thin avangin amah mai nilo, midang ho nen pawh chuan kan inbe vaklo in inhmuh na hun pawh a awm thinlo.

Ka la hre reng, October ni 2 aniin holiday ani a. Ka bazar haw lam chu kan college thlen hma deuh a field ah painting exhibition a awm a, a la hma deuh avang leh lemziak hi thiam eihlo mahila a mawi ka tih ve avang hian ka lut kawi a. Kil khata abstract painting mawi tak kalo thlir dauh dauh lai chuan “Painting i ngaina ve elo” tia min betu lam chu ka han hawi a, kan senior Marini chu inkhai bawr deuh chung hian alo ding a, a thil chu khai sakin painting dang chu kan en kual ta.Kan haw lamah pawh a bawr em avang chuan an hostel thleng a thlahin kan titi pah nasain rin aiin kawm a lo nuam phian a. A tuk tlaiah pawh a laptop siamtir lampui tura min sawmna pawh chu hnial lovin a tukah pawh kan inzui chhuak ta a. Hun alo kalin midang ina an kawm thiamloh kan senior U Marini nen chuan kan inkawm nelin kan inzui ngun ta hle a. U Marini han ti ila, kum lamah erawh kan lo inrual a, ani kum naupang deuha school lut anih avang leh kei kum khat ka fail avang chuan kei aiin a pawlsang mai chauh alo ni.

Tichuan kan inzui ngun tial tial a, kan inhre chiang chho in kan lo inmil phian a. A hma a ka lo rin dan ang a lo ni lo in a lo nelawm bakah a rilru a tha a. Kan tui zawng leh duhzawng a lo inang nen kan inkarah inngainatna a lo piang chho a, hunawl kan neih a chhuah kan ngaih hi chuan kan inzui chawtin kan thiante pawhin min fiam vat reng a.Mahse, a tu ve ve pawhin chutiang rilru pu lo mah ila thianghlim taka inngaina in kan inthlah thei si lo. A tira kan inkawm a kan inzuichhoh khan bialpa a neihthu leh kan inkawm tan hma lawk atanga inngaizawng annih thu min hrilh avang leh duh vak lo mahse a mipa a fel em avang leh officer te a niha, amah a duh em avang leh a thiante leh a chhungten an duhpui avang chuan a hnial vakloh thu mi hrilh a, amah erawh chuan a duh vak loh thute sawiin, kei pawhin tihbuai ka tum lova, tn ama lakah hrim hrim pawh rilru ka put ka ring lo.
Mahse mipa leh hmeichia a inkawm theihloh an lo tih fo thin hi ka lakah chuan a dik si..

Marini pawh chu ka hrechiang tial tial a, ka ngaina tial tial si. A taimakna chu ka tan zirlai ani a, chapo ru tak chunga a inngaihtlawmna chu ka hmuh leh ka hriat ngailoh thil thar aniin, a tumruhna chu min tichaktu ani a, thu duh tak chunga ka thu a zahthiamna leh rilru lian tak chunga ka laka a no ruk riau na te chu amah ti duhawmtu leh min tilawmtu anisi thin.Ka chakna leh a chakna ain ang lova, kan tui zawng a inmil phian lawi si, Nu enin ka ena anin U enin min en lawi thung a, ka rin ngam avang leh chhungrila naupang chhe ru viau chunga a pawnlam leh a rilru puitling ka tih a ka zah em avanga Milady tia ko ka niin koh hlen nan ka hmang ta hial reng a. Ka luh hlima kum khat chiah la bak anih avang chuan kar lovah a zirlai a zawh a lo hun dawn a, in lamah a bialpa chuan a chhungte nen inremin a haw hnu lawka innei turin anlo inrem ani awm e.

Khami thu min hrilh ni khan a ni kan inkara awm kan hriat chhuah a, lungngai a kan rum a, a ruka kan tah tak fo ni. Ani takah a chhungten an duh tlangval fel Officer, KTP hruaitu chu kei ka zirlai pass tawk tawk, meizial pawh nghei theilo, pianpui finna aia pianpui harhna ngah zawk, thluak chhe tak chunga tumruhna avanga tun inzir thleng tawk nen chuan khaikhin chi ani silo.Mahse, a tan lah a tlai a, ka tan lah a tlai tawh bawk in engmah a tih theih tawh siloh. “Lame, mipa lakah hian rilru ka nei ngailo a, chuvanga ani pawh hi aw ve mai ka ni asin. Mahse nang hi ilo dang si. Engahnge a hma a kanlo intawn loh, tunah zawng a tlai ta si”
ti a zawi sap, lungchhe taka a haw hma zanah min hrilh te kha kala hrereng si. Hei thla hnih a liamin naktuk hi a pasal neih ni tur ani a, engtin tak awm ve ang maw tiin ka dawn fo thin.

Ka hmangaih che kan inti lo, mahse kan rilru erawh zawng kan inhriatpuiin kan pahniha kan awm thin dan bak hmangaihna lan chhuahtir dan awmin ka hre lo. Kan 2 kha chuan kan hlimin tu dang kan ngailo a, kan inzah a, a hunah kan intawiawmin ho te ah kan nuia, harsatna lian tak lakah erawh kan khauh si thin. Mahse, ka hmangaihna leh min hmangaih tih ka hriatna te chu a thlawn mai an chan a ngai tasi. A na a ni e,
AN INNEIH ZAN TAL CHUAN MIN HRERENG VE TAK MAW?

MILADY PART 2

“Aw khawiah tuan che maw, rawllai ka di te kha “
tih reng ka bang theilo. Kum 3 chuang a liam ta, ka di ti a vuah ngam tur khawpin inngaizawng chiahlo mahila kum khat chuang anita ka thinlung luahtu “Milady” ti a ka koh ina min liamsan na kha. Pasal min neihsan zana ka awmdan leh ka rilru na te kha nghilh zai ka rel lova, thinlaiah a thar reng fo si thin.Hun hi rilru na hnemtu thaber anlo ti a, ka nunah pawh a dik viau bawk. A tir ang em em kha chuan ka nunkhua nguaiin ka rilru te chu na tawhlo mahse nikhat pawh amah ngaihtuah lova hun ka hman liam a awm lova , ka ngaihtuahna atang hian kum tam liam mahse a bo hauh silo. Min zilhna, min fuih thinna te khan min liamsan lova, ka nun siam thatnan ka hmang fo thin. Hei tunah pawh min kalsana 2nd year zir tan tur kha final year lai nitawhn thla tlemte hnua ka zirlai zo tur ka ni a, amah nen inbe tawh lo mahila min fuihna thinte zawm tumin eizawnna lam ngaihtuah nghal aiin zir zawm hram hram turin rilru ka pu ta anih hi.

Thla hnih liamta vel khan nikhat chu thil pawimawh avanga Mizoram house a ka kal chu kan welfare hruaitu pakhat nen kan inhmu a, tun lawkah khan hmanhmawhthlak taka thisen pek ngai an awm thute min hrilhin a rang lama ka pek theih loh pawhin zirlai dang lo zawng turin min hrilh a. Nia, kan awmna hi mizo damlo tamtak damna beisei tena an pan khawmna hmun anih avangin damlo pawh an tam a, thisen pek ngai pawh a khat tawka awm rengin a mahmawhte tana thisen pek chu zirlai awm te pawhin kan tihtur a ngaiin kan in phone kual a, a rem remin kan pe mai thin. Hmanni lawka ka pek avangin kei pawh chuan kan naute hote zingah a rem an awm leh awmloh te be kualin mi hrang hrang ka zawt a. Mi 2 ka zawnhmuh hnu chuan damlo te thlenna hospital lamah chuan kan welfare hruaitu nen chuan kan phei ta a. Gate vengtu chuan a tirah luh phallo mahse kan kal chhante kan hrilh hnu chuan luh min phalsakin damlo te room lam chu kan pan ta a.

Chutia, room kan han lut chu ka phu chiangin second reilo te chhung chuan ka khawvel a danglam dawn tih leh ka nun kalsan tak chuan ka nunah ro a rawn rel leh dawn tih reng ka hai silo. Engdang anilo, damlo bulah chuan patling pakhat leh nu la naupang lam hi lo dingin a hmeichhe lo ding zawk chu tu dang ni loin kum tam kal ta a ka hmangaih leh tun thlenga ka hmangaih Lalrinnungi, “Milady’ ti a ka koh duat thin ngei kha anisi.Chanchin te chu kan hruaitu chuan a han hrilh a, anlo lawm thiamin lawmthu te pawh an sawi nasa hle a. Chutia kan thuta kan titi khawm lai pawh chuan keini pahnih tan zawng chu room chhung chu a boruak a danglam avangin tawng zai kan rel lova, a hmel ka en atang erawh chuan ka ngaihtuah ang a ngaihtuah tih chu zawlnei ni lemlo mahila ka hresi. Chutia, ka kalpuipa leh a mipa lo awmzawk patling kum 50 chuang tur an tawng bawrh bawrh lai chuan, a mipa lo awm chuan.

“rinbawih, tlangval nen hian thingpui leh chhang zu lei ru. Nimin tlaia kan lei cookies ang kha a tui kha” a han ti chu, a ruka kan beisei ve ve leh kan hreh ruk tih ka hriat a fala kan pahniha awmna hun tha kan nei dawn ta. Rilru in a chak a, rilru vek eawhin a huphurh tih erawh ka hre si, chuvang aniang inhnuai lama kan inzui thlak hnu pawh chuan rei tak kan tawng lo.Rei fe inbe lova kan awm hnu chuan , kan thinlungin sawi tur tamtak a nei tih ka hria a, mahse sawicchuak turin chakna kan nei mawlh silo. Chutah, a mipa zawk ka ni alawm ti rilru chung chuan kan chhang lei an pack lai chuan,
“kha kha ami in pa chu’
Ka lawm em em thin a nui hmel chu a la dang lo tih min hriattir tum awm tak hian nui sak pahin,
“Ni love, neih senior tir minlo va tum ve”

A ni pasal nen a ni damlo a rawn kalpui alo ani a. He khawpuia lo awm hrep tawh anih avang leh tawng alo thiam sa avanga an beisei luih thute sawiin kan inbe luam a. mahse kan thinlungin sawi a duh tak erawh kan sawilo tih kan hmel atangin min entu awmse an hre thei awm e. Thingpuite kan inzawh hnu leh kan nau thisen pe turte an rawn thlen hnu chuan ka hawsan ta a.

Ka room ka thleng chu awmdan tur reng ka hrelo.. Ka study table chhawng sang bera ka tar ka birthday a min pek Chelsea coffee mug leh a parker pen min pek, exam nan chiaha ka hman phal leh exam loh laia a bawma daha kum 3 chuang ka tarmawi chu ka en vawng vawng a, lung a leng ani e, ka hmangaihna ala dai mawlh silo. Kan inhmuh hnu kar khatna ah chuan heta a number hman atang chuan SMS ka dawng nawlh mai a.
“Ka ni pasal nimin khan a haw a. Damdawi pakhat hospitala an neihloh lei a ngai a, khawngahin minlo lei sak teh a. Midang tihbuai tur ka hre lova”

A SMS chu ka en vang vang a, short cut pakhat mah a hmanglo tih leh a tawngkam formal tak te chuan a type laia a rilru tur awm min ngaihtuah tira, hreh tak chunga min tibuai chu a inthlahrun dantur ngaihtuahin ka khawngaih hle a. Mahse, a hmel hnuh chu chak mahila ka hreh ani. Zep lohah chuan kum tam liam tawh mahse ani aia ka thinlung luahtu an awm lova, hmangaih dang ka la nei thei lova, chu vang ani kum tam ngaihzawng pawh nei lova kala awmni. Hmangiah ringawt kha sual anilo, mahse a hmel ka hmuha a bula ka awm chuan ka tilang lo thei dawnlo tih ka hria a, chu erawh chu kawppui nei anih miau avangin thil sual anisi.

Rilru in a thalo a tih chu rilru vekin a chak a, chu ka rilru zawk chuan ka chhia leh tha hriatna chu hnehin damdawi ka leisakni atang khan a bulah hun ka hmang tam tan ta. Mitmei ventur awmber lah damlo khuma mu mai anih avang leh final year tih takah zirlai ka tul tawhlo nen hunawl kan ngah a, a tira kan rilru upbettu pawh chu hnawt boin hmana kan pahnih kha alo kir leh ta. Thu ho te te kan nuihpui ang kha kan nuihpui a, nikhat chu a rei lova, kan thingpui in dan te, kan chaw ei hmel mai mai te chu kan tan zawng nuihpui tham a tling a, tu dang kan ngai biklo.

Kan limna chuan rei a daih dawnlo tih kan hria a, mahse chulam cu kan ngaihtuah phal silo.
Zan boruak thiang taka, hospital garden a zawi taka,
“lame, kum tam liam mahse ka theihnghilh ngailo che. Ka pa khian thiamlohna a neilo, mahse tun thleng hian ka hmangaih thei lova, ka hmangaih tak tak chu nang nisi” a han ti te khan ka thinlung vel mahse lawmna a thlen si.
“Miady, in inneihzan te khan rilru nain mutmu pawh ka chhing theilo asin” ka han ti a
“Kei tak asin, inthiamlohna nei mahila nangmah bak ka ngaihtuah theilo” ti a min chhang te kha tu mipa tan pawh hnukulh lohna chi ziazang anilo.

Ka phei loh chang te pawn kan inbiain kan in message awllo a. A chang leh a rilru a insual ani tih hriat takin, pawmlai nei kani tiin, a inthiamlo fo thin.

“Anih ka be tawhlo ang che. Tiang a awm reng ka theilo, ka tuar zel mai tange” han ti ila. Reilo te hnuah “thian angin in en ang, min kalsan suh” a rawn tiin vawi tam inkalsan kan tum a, theih erawh kan thei silo. A pasal chu then rawh ka ti duh biklo, bakah fanu 1 anlo neih hman avang chuan kei nupa karloa seilian hian fahrah ka siam duh lova, ti mahila a duh dawnlo tih ka hria , ka “Milady” hi chutiang mi anisilo.

Kan inzui reilo, chupawh kanla inngaizawnglo zui. Kum khat kan nzui chhung erawh kha chuan thil engkim kanti dun a, sawi chhuaklo mahila kan inhmangaihna kan hai lova, kan inthendan lah kha khati anisi. Kum tam kalo ngaihtuah phakloh leh duhthu ah pawh ka sam phakloh ti hlawhtlinga a hmui sen nalh taka ka hmangaih ber ka fawh hmasak ber zan te kha ava nuam em, hmangaih te fawh tluka thil nuam a tam silova. A hmuia fawh nuam ka tihna erawh ka room ka thlen hnuah inthiamlohna ah a chang leh dawn tih ka hria a, mahse chu ringawt chuan min thunun hneh zo lo ani e.

Kan lawmna leh hlimna chuan tawpni a nei dawn tih kan hria a,chu hun erawh kan dawn phal lova, kan dawn phalloh ngawt avang chuan a thlen loh phah dawn hauh thung silo. Thla khat a liam hnu chuan a ni pasal leh a fapa chu amah thlak tura an rawn thlen thlak nite kha.. Kan pahnih rilru tuma hriatthiam phakloh chu tahna leh lungngaihna ah a chang a, kum 3 liamta a kan tawrhna te khan a tharin bul a tan leh dawn tih kan hai silo. Zep lohah chuan kan awmdan hi thil tha anilo th kan hria, mahse kan inhmangaihna hi thil sual ani bik em ni? Tihtawp chu kan tum ve ve, mahse kum tam a liam hnu pawhin kan theilo a, chuvang erawh chuan dermtur kanni bik emni.. Kan dinhmun kan hria a, kan pahniha awmdun chu nuam kanti, vawi khat erawh a pasal then turin a tu amahin thu kan sawi lova, kan duh dawn bawk heklo.

Tichuan, a hma ang bawk chuan kei ngei chuan train station ah va thlahin ka hmangaih ber chu “MILADY, KUMTLUANG ATAN MANGTHA AW” tih bawk chuan ka thlah ta a.. tunah zawng, kan inthlahna tur tak tak anih tawh ngei phallo mah ila kan beisei si..
Mahse hringnun hian kan nunah eng tak rawn her chhuahpui ang maw..

Similar Posts:

• What can I do for my dad?
• Milady..
• Lehkhathawn 2-na
• Untitled
• Mihausa chu!

Recent Posts:

• misualdotcommer lehkhabu release: The Mizo Uprising
• A hlet
• Misual lo thleng
• A hun leh a hmun (When in Rome)
• Lo chhiar ve ru

This entry was posted on Wednesday, August 22nd, 2012 at 7:00 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.