mi(sual).com

Mite angin Thu Tuihnang tak phuhchhuak pha mah suh ila, kum khat tep Post ka nei tawh lova, Lung te pawh a leng a lawm . Pute’n an phal chuan, min lo publish sak ve em ang chu maw.

Kum 2004 khan, Kohhran Hmeichhe Secretary ka ni a, Presbyterian Kohhran Din cham kum 100 na Ram pumin kan lawm hut hut kum ber kher ah, kei tehlul hi Kohhran Pakhat a khatiang dinhmun ka chelh ve kha, ka ngaihlu em em mai a..Kawvel ah hian Pathian in Thil ropuite a thlang chuang lova, thil engmah nilo leh, awmlo nen lam a thlangtu hi ka Pathian a ni miau si ..

Department pakhat a IAS, Vaipa chu a pension dawn a, a chan Dept. chuan thlahna chawhlui an kilpui dawn a, min rawn sawm ve a,. Tlaiah chuan min rawn lam a..chutih hunlai chuan, Bawnkawn a awm, Red Rose an tih mai thin ah khan, Drugs addict, chenna tur nei mumal lo an vei suau suau thin a. Thenkhat chu kawngpui hnuai Culvert ah te an riak a, an hmuh chhun ang angin an inhnawh puar ve thin kha a ni a. Chulai hmun kan tlan thlenlai tak chuan, Excise Motor hi a rawn ding thut a, Addict ho, kawngkam a thu ther far chu an til hak mai a, Traffic a jam deuh avangin kan ding a, ka thlir reng a. Baih deuh saih saih, tlan ve theilo chu a thiante hnungah a theih ve ang a chakin a kal ve a..Ka thlir reng lai chuan, ka thinlungah ring tak mai hian, ” Ka riltam in chaw min pe si lo”, Lal Isuan a tih kha a lo lang zawk mai a, chung addict, sual avanga hliam tuar, Daipawn a chanhai tak mai a kan nek chhuah ho chu, an riltam in engmah ka lo pe ve ngailo a, ka zakin hrehawm ka ti tak meuh meuh a, ka inrinloh laiin ka mittui te chu a lo tla a. Mi bula Dinner tur a kal kan ni si, ka inhru hul a, ka hlim thei ta hauhlo mai a.

Chumi kar tawp chu, Kan kum tawp Committee hun a ni a, kan Chair Person nen Agenda kan study duh lai chuan, kan pawisa hman bang chu Red Rose a addict ho eitur siamsak nan a hman kha kan Agenda ah dah tel ka rawt a. Tichuan, kan rel ho ta a. Mak tak maiin, Committee chuan lungrual takin kan pass ta mai a. Vawksa 10 kgs kan lei a, hnatlangin kan sawhchiar ta vak mai a. Red Rose ah chuan kan keng ta a. Adiict ho chu kan han ko khawm a, kan han eitir mai chuh, hnuk hi a ulh to mai a, an cher chhe si, an bal si, an pan ang lei luai a. An eitheih dan kha mak tak a ni. Tichuan, an ei bang chu min dil a, kawnghnuai puk chhung ah Damlo, kal thei lo, HIV+ vei te an lo awm a.Chung ho ei atan chuan kan pack sak a. “Pathian thu sawi in ngaithla peih em.?” kan ti a..” Salvation ho hian eitur chu min lo pe zeuh zeuh a, mahse Pathianthu sawi chu an la awm lova, kan ngaithla duh,” an ti a. In pakhat ah kan thukhawm ta a. Pakhat chuan, ” Ka Pi ring deuh hlekin sawi ula, kan uih a, kan rimchhe si a, pawn atangin a thenin kan lo ngaithla mai ang chu,” an ti a.

An tlawm ngawih ngawih mai a. Thu chu kan insawi chhawk ta a, an ngaithla tui in, pawisawilo hmel ngawih ngawih, chhantu ngai a thinlung chung a rum thin an ni tih hi ka hmu ta tlat mai a. An Uih leh rimchhia kha kan hrechang tawh bik lo a. Lal Isua bul a an khenbeh kha tawi te in ka sawi ve a, ka thusawi lai chuan Mipakhat, cher lutuk, maimichhing theilo khawp a ruhkawl hi puk atang chuan an rawn zawn chho a. ” Lal Isua an khenbeh rual a, sual avang a che thei lova kross kilhbeh khan, ‘ kei chu hremzia reng ka ni, Isu, i Lalna ram a i lokal hunah min hrereng ang che. ( Jesus, Remember me when you come into your Kingdom) ” ti a, a sual    a, hremphu a ni tih a in admit chiah khan, kan Nun nan a Nun hlan tu Lal Isua khan a ngaidam chiang khawp mai a, nangni pawh, in thatlai hun zawng zawng Setana’n Drugs hmangin a ti hrehawm che u a, in OD dawn a in inhriat  leh in Thi dawn a in inhriat hun ah, Pathian ko ula, Hmusitna te, riltamna te, Drugs addict na te awm tawhlohna, Chatuan hmun a hruai che u hi Lalpa’n a duh tih hria ula. Kan Pathian hi Fahrah te, Rethei te Lal. Pa leh Pathian a ni a, Lungngaih mangan in tuar hi a awm tawh dawn lo a,” tih thu hi ka sawi a, Hmangaih a duhsakna tawngkam chuan an hnuk te pawh a ti-ulh ve hial a.

Tichuan, kan Upa nupui chuan, HIV+ vei, thi tep tawh chu thinhrikna tel miah lova tawngtaiin, a taksa a zut chhuak vek a, kan tawngtai zawh chuan, thei leh theilo hian,” Amen, Hallelui-ah” tih hi zawi te in, a ka atang chuan a rawn ri chhuak a. Hawsan an hrehawm ngei mai. Ka phone no. chu ka pe a,” puih in duh chuan, min lo phone ula, kan lokal zel ang,” kan ti a. A tuk ah chuan, phone call chu ka dawng ta mai a, kha HIV+ pa kha a thi a, min lo hrilh a, Riangvaite Thlanmual ah an zalh ve ta a. Ka thinlungah hian, Na tak mai a hriatchhuah chang hi ka nei fo a, Vanram ah , Lalpa ang chhung a hlim tak a a awm ve tawh tur ang a ka ngaihtuah changte hian, ka mittui a la titla fo mai. Tichuan, NGO hovin chulai hmun atang chuan an umchhuak a, Lehkha khawng leh Saiip vel, mut nan a an hman ve te chu an hal darh ta vek a. Chutia an hal dawn ni chuan, Faktea (Evan) te In ah ka kal a, Faktea chuan, ” Enteh saw, addict ho awmna chu an hal khu ta luai laui mai, Pathian hian eng ang takin ngai ang maw” a ti a, kan thlir dun lai chuan, a hnuk a ulh teuh mai bawk a.

Ti hian ka ngaihtuah chhunzawm thin a. Kan Ram hi tunge tichhe tu ni ang. Sual nih inhria leh, an sual vanga an Laina nih pawh kan duhloh, Daipawn a thlabar a kan umchhuah, Ruihhlo ruihtur chauh ngaihtuah an hun leh rilru zawng zawng seng ho hian, Ramhnuk hi an khawih phalo a hriat na ka nei thin. Fim kerkawr a Pulpit chum pha, Biakin ah pawh Upa tlar a thu pha, Thufing pui pui chhakchhuak, thinlung chhung a hleprukna te, ham thatna a hmuh phah dawn chuan miten tuar mahse pawisa lo, a ruk a Nula leh Zu pawh pawisa lo, Office a an staff te tan pawh a, Pa deh nuam ni lo ho hian kan Ram, kan khawtlang, chhungkua a kan fate Nun hi an eihek nasa zawk niin ka ngai fo thin a. Tha anga kan lan theihnan kohhran kan bel a, Pathian tan a In kan serhhran ah hian, mi in an awih theihnan leh, fihlim ang a an lan theihnan, tim miah lovin thu an sawi a, heng ho hian ka Pathian Biakin hi an suasam ni te hian ka hre thin. An fate’n intithei tawkin Lirthei tha chitin nen an leng kual a, khatiang nei phalo, Nu leh Pa thawhchhuahin a tlin loh, rual awh luat avanga beidawng te hi an ni, kan Drugs addict tam tak hi..

KAN RAM DAM LEH NAN HIAN….KRISTA HMINGPU TUTE CHUAN, INNGAITLAWM A, KAN TAWNGTAI A, LALPA KAN ZAWN CHUAN, VAN ATANGIN MIN LO NGAITHLA ANG A. KAN SUALTE NGAIDAMIN, KAN RAM A TIDAM LEH DAWN A NI.

Similar Posts:

• Ngawlvei te leh Vanram
• Family Album…
• Lo Ngaihtuah Chhunzawm Ve Teh!
• DRUGS ADDICT PAWIZIA CHU – Afaka
• February Fiamthu

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Monday, September 10th, 2012 at 5:00 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.