mi(sual).com

Engvangin nge Iran-in nuclear bomb a neih ve a ṭulna chhan tawite-in kan sawi dawn chhin ang e!

Hun engemaw chen chu US leh Israel te kaihhruaina zar-an (!), Iran-in nuclear plant a siam chungchangah inhnialna a tam ta hle mai. United States lah chuan “dan bawhchhia” tiin alo hreng a, European Union lah chuan an tuialhthei lam tawlhchhuahna chu lo tihtawp sak/lei sak loh an titlu ta bawk. US leh EU te nen Iran chu dawhkan kil hovin, thute sawi mahse, thil ala fello nasa tih kan hai lo tlang awm e.

Hetiang a rampum hrem a ni chung hian thil thleng tawh (history) chuan a sawngsawhlawt tak tak loh zia a tilang chiang hle awm e. North Korea hi entirnan hmang ta ila, UN Security Council in hremna (sanctions) vawi engemaw zat nei tawhin, ram rethei tak nimahse, an tum chuan nuclear bomb chu an nei thei ta tho mai. Chuvangin, hetia Iran hi US leh ramdang ten an hren a, an vau reng chuan, inven ṭulna a nei niin emaw a inhre tulh tulh ang a, a ram venhim nan nuclear hi a mamawh a ni tihna a nei lian zual sauh thei ang tih pawh hlauhawm tak a ni zawk. Chu lovah, Iran hi bomb siam miah si lovin, Japan ang a sophisticated nuclear program nei ani thei dawn a nih hmel reng reng e (Why Iran should get a bomb – Kenneth N.Waltz). Han sawi ta ila, Japan hian mipui vantlang tan nuclear infrastructure a ngah em em a. Chu’ngte chu a mamawh hunah rang takin bomb siam nan a hmang thei tih hi mithiamte hriat a ni.

Israel-in Middle East a amah lawng nuclear bomb neih a duhna chhan hi chhut tham tam tak a awm a. Tin, khawvelah hian check sak miah loh nuclear bomb nei awm chhun a ni bawk. Enge ramdangin a neih lohna bik tur chhuanlam fahrah te te bak a awm thei lova, a thuhrimah balance of power chu a awm tur a lawm (Power after all, begs to be balanced), tichuan a fair zawk hmel.

Israel hian amah chauh, saw lamah nuclear ralthuam nei nih a duh tih chu tuma’n kan haiin ka ring lo. Kum 1981 khan Israel chuan Irag alo bomb phah tawh a, Chutiang bawkin Syria pawh kum 2007 khan alo bomb tawh bawk a. Tunah pawh Iran chungah hian a hriam a len leh lovang tih sawi a har hle. Hetia Israel-in a hmelmate awlsam tak a a bei thut thei reng mai lak a invennan hian engemaw neih ve chakna a pein, an za zek zek a ni ti ila kan sawi sual em em lovang. Chutiang chuan Iran hian nuclear bomb nei ve ta sela chuan, Middle East a Israel inluling reng mai hi rehin, balance of military power chu a awm thei tawh ngeiin a rinawm.

Kum 1991 khan India leh Pakistan chuan thutlukna ( treaty) siamin, an nuclear hmunte inbeih sak lo turin lehkha an ziak anih kha. Chumi hnu chuan han inep engang mahse, engmah tak tak (full scale war) a chhuak ta lo reng reng a nih hi. Chutiang chiah chu nuclear power nei ramte chet dan niin a lang. Iran hi nuclear bomb neiin awm ta se, Israel hian a ram ṭhenawmte leh a duh duh a vau ngawt ngam tawh bik lo ang a, a duh angin lal pawh a hrawt ngawt thei tawh bik lo vang. Dik tak chuan nuclear ralthuam nei ve ve te hi an indo tak tak ngam miah lo a nih zawk hi.

China han sawi kai zauh ila, kum 1964 a Maoist China in nuclear bomb an neih aṭang khan a zuai ta hnawk a nih ber… a hma angin a bellicose tawh lo kan ti thei ang chu!

Hetia sanction an siam vak vak hian, Iran mipuite an hrem mai ani a, an tum chu an chawlh phah hauh bawk lo vang. North Korea aṭang pawhin hriatthiam theih dan a awm thei ngei ang! Iran hian nuclear bomb a neih ve hi a ṭulna chen a awm ve tlat a ni.

Similar Posts:

• Iran indo zir!
• Ngaihtuah zui peihte tan
• Tunlai khawvel
• Israel in Iran a run hnai em ni le ?
• Iran nuclear scientist in a ram a phatsan!

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Tuesday, September 18th, 2012 at 10:00 pm and is filed under Information, Opinion. You can follow any responses to this entry through the RSS 2.0 feed. You can leave a response, or trackback from your own site.