Third Culture Kid: Nu leh pa anmahni ram ni lo va hnathawk emaw chhan hrang hrang vanga awm kar atang seilian naupangte hi Third Culture Kid tiin vuah a, first culture chu nu leh pa hnam zia leh nun dan kha a ni a, second culture chu an chenna ram mite nun dan phung kha a ni a, Third culture erawh chu chumi inkara then velte nun dan kha a ni ber awm e. Rawngbawlna a ni emaw sawrkar hna vang leh chhan dang vangtein mahni ram/culture pawnah khawsak a lo tul a, chu chu naupang seilenna hmun anih tawh chuan an awmna culture leh nu leh pate culture kha an la tawn lo thei bawk si lo va, a chang chuan awk-ai takin an awm theih phah a ni.
Rei lote vai ram kan han awm ve chinah pawh hian pian tirh ata hmun dang reng reng sawi tur tam tak hre lo nafam chu kan fapa hian “haw” hmanna tur hi a hre lo a ni ber, “haw” hmanna turah hian “kal” a ti vek mai a, hawna tur neiin a inhre thei lo reng reng. Tuna kan awmna hi ta angin a en thei si lo va, kan inah kan haw tumin mi dang an lo khawsa bawk si a, ta ve tur hi neiin a hre lo a ni. Theihpatawpin ka hrilh ve thin a, “ka nute chenna in hi kan ta” ka tih ngial pawhin an sawi lehnaah chuan “a pi In” an ti leh thin a, ka khawngaih rilru viau thin bawk….Mahni lam ka’n sawi hmasak tak chu…
An Rilru: Mi hrang hrang leh hmun hrang hrang tawng leh dai ngang an ni a, thian siam chu an thiam viau zel, hmun hranga an lo khawsak tawhna chuan an nun phung pawh a lehlam takah chuan a chawikang viau. Tin, zirna mai piaha a chhehvel atanga hriatna an dawn chu Education tha tak a ni, tin, education chungchangah pawh a nawlpuia thlir chuan an dawng tha deuh zawka ngaih theih a ni. Hnam dang kara khawsa ngang chu hnam dang culture hrang an lo hria a, an hawiher a zau va, an boruak hap pawh a dang deuhin a hriat bawk. Tin, an rilruah zumzuk leh ti cheih cheih lam a awm ve vak lo va, a hmun leh a hun a zira insiamrem an thiam viau bawk thin. Chutih rual chuan heng mite zingah hian nun inkharkhip chi, rual pawl lo chi hliah hliah an awm a nih chuan an lainatawm hle a ni; hrehawm ti reng rengin an awm a, an nu leh pate hial hial an dem thei.
Mahnia “ka(n) ta” tih tur awm lo na na na chu ta ang leh neitu nih lamah hian an buai ru fo thin a, an nu leh pate nen an lo chhuahna rama an haw dawnin haw-ah an indah ve hlei thei lo va, an awmna rama an kal leh dawnin haw tur tak takah an indah chuang na hek lo. An nitinah hlimna tur tam tak chhar mahse anmahni chhungrilah “chuang” anga inngaih thutna an nei sam em em a, a chang phei chuan zawhna mak pui pui pawh an zawt hial thin. Thenkhat chu zirna that vak lohna hmunah an awm a tul a, an nih tur ang an ni chhuak pha lo hial thin. Mahni ram leh hnama kan tlangnel em emna chhan pakhat chu kan hnam ziarangah kan chian vang a ni a, tlangnel turin an chiang tawh lo laklawh bawk si a, an lai ru duh viau a ni. Tin, awm hmun sawn chi an lo nih phei chuan an rilru a kanglang lo thei lo va, an phawklek ru duh viau va, an rilru a nghet lo va han hnun deuh charhna tur an nei hlei thei lo a ni.
Enkawlna: A tha lam leh a tha lo lam sawi tur a tam khawp ang, engpawhnise heng mite hian enkawl an mamawh em em a, an rilru pawh mi dang ang ngawta enkawl liam ngawt chi pawh a ni lo khawp mai. Nu leh pa, mahni ram culture-a an bangbo lutuk lohna tura mawhphurtu chu nu leh pa an ni, rawngbawlna leh hna vanga hmun danga awm pawh ni ila naupangte duhthlanna avanga awm ni lovin nu leh pa vanga awm an ni a, an hriat loh hrilh tura mawhphurtu chu nu leh pa an ni. Thenkhat hi chu anmahni ram an haw changin tute thatna zar zovin an tei kual an tei kual a, iptepui banna fumfe an nei lo thin a, a tha hauh lo. Bul fuk taka thlenna leh innghahna neihpui a tha a, nu leh pa inpui kha In anga an ngaih ve theihna turin tawngka leh chetziain an ta a ni tih kan hrilh fo a tul.
Ram danga an awm chhan hi nu leh pa chuan an chiang beng bawng khawp mai, mahse hre tura an ngaih an fate hian an lo chiang lo viau thei. Ram danga an awm chhan leh a tul huna haw leh tur an nihnaah an chiang tur a ni a, phawklek lo tura an nun vawn nghehpui erawh tihmakmawh a ni thung. Dik tak chuan fate hi kan hmangaih em em vek a, a tul chuan kan zilh a, kan hau va, kan hrem hial thin a. Kan hmangaih avanga ti kan ni tih hi an lo hre lo thei hle mai a, tawngka a “ka hmangaih che a, ka hrem che a ni” tih a tul hial ang khan hmun danga nu leh pa awm chhan pawh an hrechiang ve tur a ni. Thil pawimawh em em chu mahni khaw lam nena inthlunzawm tlatna hi a ni. Mahni khaw lama haw changin naupangte chuan thiante nei ngei se a tha a, chu mite nen chuan inbe pawp thin se chinchang inhrilhin an hun tawnte inhrilhtawn se la, chu chuan haw leh chakna rilru pawh a pe thei a, chutih rual erawh chuan chumi ringawt nawr nat erawh chu a hlauhawm ve tho bawk si a. An haw chak ut ut reng reng ang a, an awm tui lo mai ang tih pawh ven tur a nih avangin an awmna ram mite nen inpawhna tha an nu leh paten an siamsak emaw siam turin an fuih emaw a tul em em. Quarters-a kan khawsa a nih pawhin in leh lo mahni pualin khawr lo mahila pate inpui chu inah an chhal ve theih nan tan lak a tul a, chu chuan chhungkaw inphuarkhawmna thlengin a nghawng tel a ni.
Third Locality Kid: Hei chu ka phuahchawp a ni a, mahse sawi a tul ve em em hian ka hre bawk a. Mahni ram chhunga awm, hna avanga pem kual ve thinte mahni khua emaw nu leh pate khua emawa khawsa thei lo naupangte hi an ni. An kal fuh loh chuan chhungkaw kehdarh atanga seilian ang maiin a pawi thei a, an rilru tum khat kehdarh tawhna khan thui tak a nghawng thei a ni. An han tleirawl a, rual kawm nuam an ti tan chiah a, an nu leh pate avangin pem a lo tul a rawngbawltu leh sawrkar hnathawk mekte zingah a thleng nasa em em a ni. Ngaihzawngte an lo nei ve tum hrang a, lungleng em emin an awm a, nu leh pa ngaihsakna an dawn loh phei chuan an nun khawk rawk khawpa an lunglenna dam leh khan palzam mai mai theihna hmunah a hruai thei a, an le-lo viau thei a ni.
English medium, a hming tak ngial pawh an la hriat loh, sawrkar school Primary atanga pawl sawn ve tawk tawk kha nu leh pa thahnemngaihna mitdel chuan an awmna thara school tha pawl English medium-ah ngei mai an han vawm lut ve rawih a, zirlaia beidawngin an awm reuh reuh thin a, thenrual lamah chuan ngaihtuahawm an ni lo va, thian an nei teuh a, mahse an hlawhtling lo viau thei. A letling chiahin an nu leh pate insawn tur chuan school tha taka an kalna chu an pem dawn si avangin an la chhuak a, an tui miah lohna leh an ngaihnep takah an dah lut thei a…a nih loh leh hostelah dah turin an inbuatsaiha naupang mahnia la tal hrang miah lo chu thlabar leh lungleng ngawih ngawihin an awm thei bawk…venpui tur hi a tam em em a, engpawhnise naupangte hi thil kal lam leh haw lam hi chiang taka hrilh a tha a, kan tihtur tho pawh ni se, anmahni rawn der hmasak a duhthlanna intawm siampui hi a tul ve hle a ni…a tawk erawh a awm vek ang chu.
A sei leh dawn ta e.
October 1st, 2012 at 11:23 pm
Chhiar ang…
Report this comment
October 1st, 2012 at 11:28 pm
ziak tha ve aw,tia ihan ziah takah chuan mahni leh mahni ka han in ena, alo ni thei dawn viau in ka hria kan in kha ka in nilo in ka u leh naute in ani deuh tlat a han ngaihna te alo awm a, heti lam a kan hnathawh ve na te lah hi kan awm tamna zawk mah nise ka ta han tih tur chiah poh chu ka nei chuang silo.
Report this comment
October 1st, 2012 at 11:38 pm
Hotupa chu, hringnun i lo bih uluk hle mai. A ngaihnawm e. Hostel-a fate, la naupang tak tak dahluh hi, fate enkawl peih loh thlak ka ti……naupang an khawngaihthlak em mai. CCE hman anih hnu phei hi chuan pawl hniam zawk zir naupangte tan hostela awm a tulna pakhat mah ka hre lo.
Report this comment
October 1st, 2012 at 11:44 pm
Nangmah pawhin i hmachhawn mek ani bawk a, i ziak fiah khawp mai. Tiang naupang rilru ah hian secure lo riau a inhriatna a awm duh a. Tin, adaptability an la nei pha em em bawk silo a, enkawl dan fimkhur a tul viau ang.
Chhiar nawn leh phawt ang. Tunlai ka mut cycle a buai a, ka meng vak zel mai a…
Report this comment
October 2nd, 2012 at 12:36 am
Report this comment
October 2nd, 2012 at 7:28 am
A sei viau na a, a thain a ngaihnawm leh hle mai. Fate rau rau pawh an in ang lo thei hle. Ka fate zinga upa ber hi a hmu apiangin a nungchang mawi zia an hrilhfak a ni ve a. Tuna kan sikulah hian a la awm ta char char a. Khawpui dang emaw sikul dang emawa kal a chak ve tawh thu a sawi leh zauh thin. Mahse tunah cl-ix ani tawh a, cl-x zo law law se ka duh si. Mahse, a tleirawl chhuak hi a lian tha ta riau a, a lian ber ta chu, an lo zuam lo ta vek a, nuam a ti ta phian. Mizorama a pi leh pu te a ngaih thu a sawi zeuh zeuh. Kan milai hi erawh chu kan hmuh phak lohva awm chi lovah kan ngai hmiah. AICS a ka awm chhung zawng(kum 1-4 anih lai vel) ka nu leh pa te bulah anuin a awmpui a, a chhang apian avangin a nuin a ngaihsak tha hman lo va, a mizia a khawihchhe hman tep a ni. A pi leh pu ten an duat bawk a, a ngaiin an bul nuam a ti hle. A naupang ber erawh chuan, Mizoram hriat mumal a nei lo va. Tuna kan awmna hi nuam a ti thlawt. Hetiang lam leh future security lam ngaihtuah hi missionary te tan a hrisel lovin ka hria. Pathianah ka innghat pumhlum hmak a, min fail pui paw’n, ama hovin kan fail ang. Mahse, ka ring tawk e.
Report this comment
October 2nd, 2012 at 8:08 am
Report this comment
October 2nd, 2012 at 8:26 am
A va hlawkthlak thin ve.
Third Locality Kid i tih phei khi chu a dik lutuk tlat, a takin ka hria. Misual nih hi a va vanneihthlak thin em, post-tupa teho zarah.
Report this comment
October 2nd, 2012 at 8:43 am
Thlir nasa hle mai
Report this comment
October 2nd, 2012 at 8:59 am
Tukchhuah nuam vek u le
Report this comment
October 2nd, 2012 at 9:09 am
sheldon, good morning at midnight
(11:38pm)
Report this comment
October 2nd, 2012 at 10:16 am
va tha mai mai em!!
Third Locality kid-khi a dik thui khawp mai,,pk-a sawi ang deuh hian mihring mihrinna hi chuan a thiam famkim thei lo.. a tawpah chuan Patian……….
Report this comment
October 2nd, 2012 at 10:25 am
pu pk fanai…i thu hmawrbawkna khi ka’n chhang fiam teh ang che. a dik em em tho na a…tunlaiah a bikin overseas missionaryhote hi an fate enkawl dan tur TCK …awareness an pe nasa hle mai a…a pawimawh viau ni tur a ni.
rawngbawltute hi miten an fate thlengin an teh lo thei lo va nu leh pa lam fimkhur a tul viau tihna pawh a ni ang chu. Pathian kuta awm ni vek mahila keimahni lam pawh tang viau tur chu kan ni ang chu..catholic Father pakhatin min hrilh thin chu God helps those who help themselves ..tih a ni a ka pawm thui viau.
security chungchangah pawh a ni tho va caring kan pek zawng zawng education te pawh hi security a ni vek mai a…kan hriata kan fimkhur phak ve chin hi kan mawhphurhna lo ni se…mal min sawmtu approve tu Pathian a ni.
pem kual thin rawngbawltute pawh hi an fate nun leh zirnain a tuar chawk thin…pem kual rau rauah fimkhur leh a ngaihna hriat avanga pumpelh theih hi a awm ka ring deuh tlat…Pathian hnena kan dilna bansan lovin.
Report this comment
October 2nd, 2012 at 10:38 am
A fiah kek kawk hle mai, a ngaihnawm tel bawk.
I sawi kids khi chu ka ni lo ve ve a, mahse kan la nei ve thei tlat, vawn reng chi a ni…
Naupan tet atanga thingtlang atang khawpuia lehkha zir ka ni a, nu leh pa bulah ka awm tlem khawp mai, han zirchhuah? hnua pawh hian ” Hei hi ka ta” han tih tur avang hle mai
Rilru bul bal neih pawh a har, Kan khaw lamah han haw ila, khum tak ngial pawh “ka khum” tih tur a lo awm tawh lova, khawpui lama chhungte inah lah ‘ka ta’ han tih tur a awm bawk si lo. Kohhran leh khawtlang thlengin mahni ta en theih a har khawp mai.
Report this comment
October 2nd, 2012 at 11:09 am
Pu Vakul, kei chu ka vannei a, ka fate hi cl-x thleng chu ka ke bulah seilian se ka duh a, a bak chu, an bo lutuk thei tawh lo turah ka ngai. Ka ro zawng zawng ka dahna bank ka enkawl uluk dan tur zia chu i hrethiam mai ang chu. Krista sipai tha tak nih ka duh a, in leh lo leh future security lam hi chu ka rilrua a lo luh deuh apiangin, ka thlarau nun lamin a tuar tlat thin a. Pathian kutah ka dah ta hmiah mai a ni.
Report this comment
October 2nd, 2012 at 11:11 am
A ngaihnawm hle mai. Fate Pathianthu-a enkawl leh thanlentir hi a dik em em a ni. Kohhran leh khawtlang tana mi tangkai ni thei tura buatsaih hi a bata kan bat ni tlatin ka hre thin.
Research basis ang zawnga ka tih chu a ni hauh lova mahse kan kohhranah rau rau pawh hian Pastor missionary-a kal ngam fate leh Mizorama bial nei pastor leh headquarter-a awm pastor fate hi an puitllin hleih bik khawp mai. Thurchhuah tur ka hre hnem khawp mai. Pu Khumchiktheia pawh hian experience tha tak sawi tur a nei ngei ang…
Chutiang zelin Missionary inpe tak fa hi an danglam leh thin bawk. Engkim neitu leh siamtu hi peka hnehban chi a nih loh zia a lantir ni berin ka hre thin. Mahse chumi avang chuan enkawlna lamah inthlahdah tur ka ti hauh lo. CHutia inthlahdah chu a Pathianthu lo hle bawk.
Fate nei lo chuan fate hmangaihna hi inhrethiam lo mai thei a. Hmanni-a Pu Sangchi-a hnena ADOPT tir ta ringawt pawh kha lehlam takah chuan a demawm khawp mai! Mahse fate hmangaihna hi hmangaihna mak tak a lo ni e! An tana tha tur leh an khawsak nawmna tur ni-a kan ngaih tlat chuan zan mut laia lukham chunga mittui far fap fapa kan ngaihtuah chung pawh hian an hreawmna tur ngaihtuah tha duh lovin kan fate hi kan tir leh mai thin. Chumi avang chuan mi tamtak an hlawhtling a hlawhtling ta lo tisual ta pawh an awm bawk a ni. Hmangaihna chuan hreawm tuar turin a beiseipui ngam a ni ber mai chu…
Tin, fate hi keimahni atanga lo chhuak chatuana kan ro tur a ni. Kan inkungkaihna hi thiante leh thawhpuite ang a ni ngai hauh lo. Nu leh pa thenkhat fa sual tak – kohhran leh khawtlang tana mi hnawksak tak tak nei tute hi an awhawm ka ti letling zawk thin. An fate khan an timualpho a, an nu leh pa hming an tihming chhia a mahse an nu leh pate khan ‘I sual em mai, ka fa i ni tawh lo. Ka inah lo khawsa tawh suh’ tiin an ti ngai miah lo hi a ni. Chu a hnehin an that theih nan thenawmte leh rawngbawlpuite hraitlohin kawng an dap ve ngar ngar zawk thin!
Kan fate hian kan hming an tihthat chauhin kan tana fa an nihna hi an ti-chiang a ni lova an sual hlei hlei hian hmangaihna mak tak chu a lo lang chhuak thin tur a ni.
Pastor leh upa te bawk hi sawi leh ta ila. An fate sual avanga an rilru hah thin dan tur hi ka ngaihtuah fo thin. Mahse Pathian hmangaihna hrechiang tute hian fate hi an MUALPHO PUI ngam thin a lo ni. Mi thate chauh hmangaiha misualte hmangaih si loh hi a diklo a ni ber mai.
Ka sawi ta teuh mai. Patling nih hi chuan vei a pui hi kan ngah a…Fa enkawl tur la nei lo kan misual teuhin ka hria a, ka experience atangin ka lo ziak a ni.
Report this comment
October 2nd, 2012 at 12:52 pm
pu pk fanai i ngaihdan chu a tha alawm..nia security han tih hian a kawk hnem bawk a ni tiraw. sum lak luh pawh hi tam lo mahse a manage lam talah ram tang ila…ka nep viau na a a theih chinah budget neiin kan khawsa a..a nuam ve mai mai..mahni leh mahni kan han inhmang puk kualte hi…chhungkaw game nuam a va ni em.
ignatia..i comment a ngaihnawm hle mai. nupa hi chu kan inthen thei a…an sual pawhin inthen theihna chance hi a awm thei mai…then tawh chuan nupui emaw pasal emaw an ni tawh lo va..a tawp hmiah. fate chu sual eng ang mahse kan then thei tawh lo…kan fate an ni reng…a va ril em kan inzawm dan hi. Lal Isua mihringa a lo chanin fapa dinhmun a rawn luah a…Pathian fapa…Pa Pathian nena mihringte ngaiha inzawmna thuk ber a rawn luah reng a ni.
Report this comment
October 2nd, 2012 at 1:33 pm
@17,vakul
i comment tawp lamte khi a va fiah si ve, ka like
Report this comment
October 2nd, 2012 at 2:05 pm
Post leh comment ka hlawkpui e
Report this comment
October 2nd, 2012 at 8:03 pm
A va ngaihnawm e!!
a philosopher thuziak hle mai a..!!(Y)
Comment sei ber Ignatia ziah chiah ka chhiar rih…
Report this comment
October 2nd, 2012 at 9:17 pm
Report this comment
October 2nd, 2012 at 11:20 pm
Mi zawng2 chhiar a tan post leh comment te hi ka va duh eeem. Va tha hlawm kher ve le. Misual ho in mifel te kan khum. Misual nihman a awm ngei e.
Report this comment