mi(sual).com

“Tlangtin, mualtin chuan ila,
A lanna tlang awm ang maw?
Awm se thlir ka nuam e,
Ngaihlai kan sikul tlang ngei kha.”

Kan sikul tiin ka sawi ve ngat thin nachungin ka pa ta a ni lo a, ka nu ta lah a ni hek lo. Ka hriat theih chhinah ka chhungte lam hnai awm reng reng an thawh ka hre ngai hau lo a, ka laichhin dang te, chu sikula kai ve pawh chu ka hre hek lo mah se kan sikul a ni ve miau a lawm, a chhan chu Pawli ka kal ve tlat, ka rilrua ka naupanlaia kan sikul ti a ka ngaihtuah a piang khan chu sikul tlawm tak, nuam tak si, hlimawm em em mai kha a lo lang ziah thin.

Pawlli ka nih lai mawlh kha ka sikul kai ve tawhah chuan a nuam ber leh chhinchiah tlak ber pawl a ni awm e. Primary School III, Khasi sikul, Pu Chala sikul tih kha ka hmangaih leh duat taka ka koh thin kan sikul ka tih ve mai kohna hming vek a ni. Kan sikul kha zirna lamah leh thil dangah pawh a hnufual fal deuh a ni tih kha khang hunlai khan kan pawm ngai bik lo, hmuhsitna tawngka vawi duai lo dawng mah ila, lungawi tak leh hlim takin sikul tlangah khan tual kan chaia, a hunlai mai ni lovin ka chhuahsan thleng pawhin ‘ka ngai mange tawnmang changhnu’ tiin ka rilru hian a la ngai fo thin a nih zawk hi maw!

Khawvel mithmuah ropui lo mahse thian ka chhara, pianpui loh unau ka neih phahna sikul a ni miau a, ka tan chuan Oxford University te aia a nepna chuang a awm lo hial awm e. Khan panlai hunte khan mumang thawhsan ang chauhin min liamsan tawh mahse ka tan chuan hriat rengna hlimawm leh mahni chauh pawha min la khik tir vur vur rengtu a la ni zel a nih hi maw!

Kan sikulah kha chuan Thangmawia(a hming thup loh, a haw em lo ang chu maw) a huai bera, kawng engkimah, zirna tih chauh lohah kha chuan tlukloh ena kan en a ni. Zirtirtu pakhat( rei lo te chu a dang pahnih an lo thawk ve) chauh kan nei thin a, chumi kan zittirtupa tih lohah chuan a thu bera, thil pawh a hre ber thin, USA ropui zia pawh min lo hrilh ve diam kha. A duh duh a insual tir thei a, kan ngam chhiah loh pawh a tih tlat chuan insual pui a ngai tho thin. Eng dan pawh siam se kan sawisel thiang lo a, kan sawisel ngam bawk hek lo, kan tan chuan Persia dan aia khauh zawk zawk ni ve tlat a!

Thangmawia kha chu han ter pha kha kan awm lo bawka, kan intlawn siak sup sup thin a nih kha. Thil eng pawh pai ila kan paikep ngei a ngai tlat a chhan chu ‘I la hre viau ang’ a tih chuan a tlawnna zawn char char a ngai, chhantu kan mamawh changa kan vuina tur a ni tlat a lawm. Sakhua kha chu nei lo ngat ila kan be lovang tih sawi ngam a har khawp. Chawlhlawk lai leh sikul tan hma khan inkungfu leh infiamna dangah khan pawl pawl awmin kan hanin siam ve thin taknaa Thawngmawia lama tan fuh loh vaih kha chuan chan a chau thin teh e.

Kan sikulah kha chuan tlemtein pheikhawk kan bun ve thin a, rubber pheikhawk ngei mai kha a bun tlemte zingah ka tel ve thin. Ni a sat viaua metal roada kalpui chuan a fana a rawn sa tlang vung vung thin, khawroin a hanga bun mai mah ni ila tam tak kha chuan min awtin, football pet nikhua te hian bun hawh ve lawk diltu ka ngah ve thin kher a sin. Kamis var leh uk kara mi kha kan ha ve thin bawka, a kilhna awm erawh a vang thin hle. Eng emaw nikhua chuan lain kan chilh ve thap thin. Tumkhat zuninah ek a lo awm kha chu kan phek buai chiang teh e!

Zonal sport neih nikhua mawlh khan kan sikul form kha a zahpuiawm ve lek lek thin, sportah kan han tel ve ngei a, sikul naupang dangin “Pu chala Sikul bang nei lo” ti khan min han au khum ta thin a, khatihlai tak kha chuan sikul dang nih daih kha a chakawm rum rum thin. Sport kan han tana kan chhuanvawr ber tluk thei ngai loh nia kan hriat kha sikul dang lakah kha chuan engvak a lo ni lo a ni ang, tlan muang ber, deng tawi ber, zuang hniam ber kan ni reng mai. Mipa lam kan nil, kan hmeiche lian pui pui pasal a um tep anga tih rual vel khan min han awinunga an point hmuhsa nen a tawpna ber kan ni thei hram a nih kha.

“Bang a nei lo” an tih teh chawka a pawnlam bang chu nei ve vek e, a chhunglam pindanna bang kha a nia, awm lo zawk chu, awm mahse a hnawk thlawn mai zawk tur a ni, achan chu kan zirtirtupa khan Pawlli room a tangin hmu kim thei dawn hek lo, kan hotupa kha chu a hah ve thin ngawt ang le. Zirna lamah kha chuan Sap tawng ngat phei kha chu thiam theih turah kan ngai lo hrim hrim emaw tih mai a awl khawp mai. Naupang lam pawh kan tam vak lo a ni ang, ka pawlah khan panga kan awma, kum tawp examah pahnih(ka hriat rengna a la dik chuan) kan pass ve thei hram.

Khang panlai hun duhawm rilru thianghlim(thianghlim chiah emaw) tak, vei em em nei lo a hun kan hmanlai kha chuan mual liam mahse, zirna sang zawk zira, phaiah te thangkhat lian dawn kan awm ve hnuah pawh hian ka thinglungah chuan ka la hrechhuak fo thin , ka exam lai leh sap tawnga thil ka ziah dawna ka duhthu a sam loh hian ka hre chhuak a, “Pu Chala sikul chhuak ka nia” tih hi a lang leh fo thin. Ngaihzawng ka la ngai thin a nih ang.

Similar Posts:

• HSLC Exam tih tawp ?
• Engmah ka lo thiam tak tak hleinem ???
• Kan lehkhazir dan hi
• Sikul tha tehna kan mamawh
• Kan Sikul kha..

Recent Posts:

• Father of Mizo Sunday School Union Pu Zalawra chanchin
• Hremhmun An Lai Chhuak Elo?
• Garbage capital of India-No prize for guessing
• Comedian Search 2012-ah Lalnunsanga a thiam ta ber e!
• Misual

This entry was posted on Thursday, October 18th, 2012 at 6:00 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.