Fu ka her satliah a ni mai lova, Lungleng ah ngat a ni aw.
Lungleng khua hi khaw hmingthang tak a ni thin a. An Lal Khamliana kha Mizo zinga ziak leh chhiar thiam hmasa ber a chhal niin, a chanchin pawh pawl riatah khan kan zir tawh. Lal an ban hnu hian Kurtai ah an hming a thang em em a, Mizoram dung leh vangah, khawvel huap pawhin ti teh ang (khawvel kan ti hluai a, Mizo bak kurtai nei kan awm lo mai thei a, lo nei pawh nise Mizo kurtai nen a in ang chuang lo ang chu maw) an hming thang hle a. Aizawl kurtai zawng zawng hi Lungleng kurtai an ni vek ta a nih hi maw…Chutiang khua fu her chu nuam dangngai ve tak a ni.
Fu her nge Seminar kal:
He kan fu her ni tak hi ka thian te National Seminar-ah paper an present tur ni a ni a. Kan thianpa pawh hian tawiawm turin min sawm ve a. Fu her hi ka chak na a rei tawh a, ka hun neih dante kan en hian seminar paper chhiar tawiawm ai chuan Mizoram kurtai tui naa an sawi Lungleng a kurtai siam chu ka duh fe zawk. He Lungleng khua hi ka u te khua (hnathawhna) a nih vanga inzawm kan ni satliah mai lova, min hringtu ka pa hi he Lungleng khaw hmingthang takah hian a lo piang a. Ka pu hi an YMA Vice President hmasa ber a ni ve ngat bawk a ni. A hnu lamah awm zui tawh lo mah ila chutianga fu han her chu seminar kal aia ka chak hi a awm lo hran lo reng a ni.
Bawng um hna:
Kan fu herna te hi ka u chhung te (a hmehriat te), an khawroreltu thin (VC) te ta a ni a. An fel khawp mai. Fu ka her ka ti tak na a, bawng ka um a ni ber zawk a. Bawng hmang in an her tir avangin keini ang thawh thiam tawk ve chu bawng um kha a ni ber. A dik tak chuan fu sah emaw put emaw kha an phal lova, a fu herna a fu lo barh lah kha ka thiam ve vak loh avang khan bawng umah khan ka ram tang ta ngawt a. Bawng lah khan a hnunga kal loh kha a hre thei zek a, sipai sual sazai an pek kal tha duh lo, a pu in a sazai pek tlan zat a tlan ve ang tih ang khan kan in zui hnuang hnuang reng mai a ni.
Mizoram tan chuan Chini siam ai hian kurtai siam hi a hlawk zawk dawn a nih hi te ka ti mai mai a. Amaherawhchu, a fu herna a han kal chuan rin aiin fu her hi a lo buaithlak in a hahthlak fe mai. A chhuanna tur thing tam tak a ngai mai bakah a chawh vel hian tha a heh fe mai. Kan haw lamah Lungleng Lal Khamliana ram lamah kan rawn haw chhova, Pawl 8 vel a kan zir thin a rubber chin te pawh kan rawn hmu haw nual mai. Mahse, a rubber hi a tha lo chi a ni awm a, duh angin an hlawk pui ta chiah lo ni awm tak a ni.
Thalfavang Kut:
Lungleng hian kumtin an lo tih dan in THALFAVANG KUT an lo hmang a. Kan fu her ni pawh hian chhun lamah an lo hmang tawh a, zan lamah an ‘Community Hall’ thar la hawn lohah an hmang leh a. Chhun lama ka chet nasat avangin ka chau viau na in kan tel ve a, a nuam viau mai. Kut meuh a kal ve ta an inchei nalh viau mai zel a. Thangchhuah kawr nen, a then phei chuan tun lai an hak chi Blazer te an ha fur mai a. Kei pawh ka kekawr leh kawrlum hak chu pangai ve viau a, khawi hmunah pawh len pui ila ka zak em em bik lovang. Mahse, pheikhawk ka lo keng si lova, ka slipper ka bun lo thei lova, a chung lam chu a nalh ve tehlul nen ka ke lam min lo en se chu nep min ti ve khawp ang.
Ka bula thu pa kha chu a mut a chhuak ve thlawt a ni. Kan thu dun tak na in a kun ngar reng mai a. A bula ka thut lai khan YMA Conference-a kan kal na a ka thiante thil sawi mi ti hre chhuak a. YMA Conference tawp zanah, dar 12 vela kan ban hnu khan an haw chu an thlen inah mi pakhat (a veng mi) hi a lo awm a, chu pa chuan an thlen in pa hnenah chuan enga ti nge hetah ka awm a ti a ni awm a. Mitin hlim leh lawma an lam mup mup lai khan a ni chu tuisik upa avang khan hun hlimawmtaka ha khan a lo muhil daih ni awm tak a ni. A harfim hnu chuan a ui khawp ang ti mai mai khan kan fiamthu hlut kha a ni a. Ka thutpui pa pawh hian thangchhuah kawr chu a ha ve tak na in kha mi zan kha chuan thanga chhuah kher lo mai thei a ni.
Lungleng return val :
Kan fu herna ten kan her ang ang in sem tur an tih tlat avangin Kurtai pawh kan hawn ve teuh mai. Kurtai bakah hian fu feh tur leh sertawk nen kan bawr haw viau mai. Kan fu hawn chu kan Scooty hnungah kan han tawn ang te taw a, bungraw dang pawh a hma lamah (ke dahna ah nen) ah nen, rucksack puar nelh nawlh nen bawr takin kan rawn haw phei a. Samtlangah ka nu (ka nu cousin) te kan tlawh haw phei a, anni hian ar an lo vulh teuh mai a, ar min pek bawk a, kan bawr haw kher mai. Ar min pek chu dahna awm tawh hek lo ka u in a khai ta ngar ngar mai a.
Khawpui kan rawn lut chiah chu rilru hi a chapo ru veng veng mai a ni. Lunglengah khan zan khat chuah ka va riak chung khan rilruah chuan zin haw riauvaa in hriatna ka nei tlat nia. Lungleng fu zuk her ve ngat ka nih vang khan Aizawl khawpui te chu rei tak zin bosan ang hial hian ka hria a. Mite hian zokhua atanga lo haw deuh hmuh hian min hmu se tihna rilru ka nei deuh tlat. A dik tak chuan han inti zin haw viau dawn ila, kan bawr dan te, kan balh dan en chuan eng thil he hu chu keimah niah chuan hmuh tur a awm hauh lo. Mahse, Lungleng a kurtai zuk siam thei ngat ka nih avang khan ka rilru erawh a chapo ru haw ve veng veng mai a ni. Fu her bawk, Thalfavang kut hmang bawk, Ar kan la khai haw zui a, Seminar a kal lo lova Lunglenga ka zin chu hlawk tak ka ni, hlawk tak.
Misual vang vek:
Enga ti nge ka fu her chanchin hetianga ka ziah duah mai le. A dik tak chuan ka thlalak te ka pholang ang chu ka ti a. Milem chuan thu tam tak a sawi thei an tih ang khan ka fu herna chanchin hi a lem nen tarlan ka tum ve a. Tin, tun lai khawvel thiamna sang hi ka hmang khawp hi chu a tul chuan ka in zir chawp mai ang ti thin ka ni a. Misualah thlalak post dan te pawh ka en ve ngial a, mahse, kei ni ang tleirawl tha za reh tawh tan chuan a tih kual vel chhung hi a niawm em a ka hmel hmu lo in ka thuziak chauh in chhiar phah leh ta a nih maw.. Video a post lah hi mahni computer atang in a tih mai thei loh avangin vai naupang nuar thlalak ka neih pawh ka la pho lang thei lova, in hmuh chak dawn dawn nen a.
Hmm…He thu hian kan htlip teh ang. Tenzing Norgay an Mt. Everest a lawm chhuah hnua a thu sawi, “Himalaya tlang a thuamphur nih a, thuam rit tak tak phur a, kawr chung ha a medal awr tlep thatna kawng chu thui tak a ni” a ti ang khan, kei pawh in “Seminar kal lova fu her a, bawng um char char hnu a, mei sa tak vil leh kawng thui tak kala ka siam kurtai (kan uar lawk “ka tlan tui bual”) ngei mai hmeha thingpui sen hang sa ver vawr han in chu tui tak a ni”.
Similar Posts:
- Bawng hriau zawk a lawm le !
- Krismass bawng ser ru
- Kan Sikul kha..
- Lungleng Lal In
- Ram leh hnam din chhuah nan zu zawrh
November 2nd, 2012 at 6:06 pm
Chhiar ang.
tren tren
Report this comment
November 2nd, 2012 at 6:27 pm
A ngaihnawm khawp mai. Mahse, bawng ka um i tih khi chu bawng ka khalh tihawm tak a ni. Tin, zokhua tih ai chuan fel taka thingtlang khua tih mai hi a tha ka ti. Khawpui deuh ho hi vaikhua ti ila a dik lo ang bawkin thingtlang khaw sawi nana zokhua kan ti hi a dik thei lo. (huat awih loh
) I thil hawn ho khian ka chil an ti put, mizo-ar ngat phei khi chu rilruah anthur leh buh tlem a lo lang nghal. 
Report this comment
November 2nd, 2012 at 6:29 pm
Hey, fimkhur rawh. I kut i her tel palh ange
Report this comment
November 2nd, 2012 at 6:34 pm
Sawi hmaih – pic. leh video chu .com lovers lamah up load a awl a sin. Rawn ti daih teh a.
Comment ve tawh ru lem.
tren tren
Report this comment
November 2nd, 2012 at 6:41 pm
Chhiar ila
Report this comment
November 2nd, 2012 at 6:50 pm
A title hi chhiar thuak chuan thil dang daihin kan chhiar chu le
Report this comment
November 2nd, 2012 at 6:57 pm
Style bik te hi i nei a, chhiar a nuam ve hranpa tlat thin.
Report this comment
November 2nd, 2012 at 6:59 pm
Ziak nawm hmel thiam hle mai
. kei pawh ka her ve tawh a, kan bawng hman kha a nungchang a tha leh lutuk a, tlangval thatzat nen a inmil lo lutuk kan ti a, bawngah kan tan tak ngawt pek kha! 
Report this comment
November 2nd, 2012 at 7:20 pm
Ka la her ve lo na a a nawm hmel e. Pu Pka sawi ang deuh hian nang hi chu style bik hi i nei a, i luhlul phian in ka ring
Report this comment
November 2nd, 2012 at 7:24 pm
A ngaihnawm phian mai, lunglengah hian vawi 1 chiah ka la kal, kal leh hun chu fu her ve tawh tur a ni!
Report this comment
November 2nd, 2012 at 7:29 pm
Sandy@6 chu le(h)
F khi Z emaw i ti a ni chiang. 
tren tren
Report this comment
November 2nd, 2012 at 7:32 pm
Chuan Ignatia nen hian naupang te si hi in chetdan a puitling ru riau bawk a
Report this comment
November 2nd, 2012 at 7:37 pm
A hmawngsawi lai, a Kurtai hma chiah hi atui ka ti…
Report this comment
November 2nd, 2012 at 7:46 pm
Sheldy, Ignatia leh Chhingdailova te ang chi hi chu Upa ten, “A puitling sa a piang” an ti thin a lawm. Phai khawlumah pawh kamiz bantlawn hain, smart shoe nen an inthun ap peih reng ang.
Report this comment
November 2nd, 2012 at 8:01 pm
thlalak ho chu ka van hmu chak e, mahse pic post ah chuan pawl khat kan ni e, kei pawh ka bei a dawng zing ta hle mai
Report this comment
November 2nd, 2012 at 8:20 pm
#PKfanai. “Puitling sa a piang” tih duah ai chuan Tarsa a piang, ti mai ial a tha em? Tirhkoh tute emaw nen pawh an inang deuh dawn asin.
Chhingdailova lah hian ‘seminar’ a tawng char char mai a. Seminar aia thawh hlawk lo: Concert en, Fottball match en, pub a kal, Nula rim… sawi tur a tam mai.
Report this comment
November 2nd, 2012 at 8:21 pm
Pic post hi ka la tum chhin lova, ka thiamlo chiang tih ka hria a, pic post dan post te pawh ka chhiar a, a taka tih phawt loh chuan ka bo. Pic ka post duh hun chu rawn tur ka hre ru kiau
Report this comment
November 2nd, 2012 at 10:06 pm
A hmasa in Admin ho hnenah lawmthu ka sawi duh a, ka ngenna min zha sak a vang hian.
Meet kan hmanga ka lo inkhawm san a, ka rawn reply lo che u a, ka Unaupa Ignatia in min lo vil sak dawn emaw ka tia, a lo vil si lova. a whole sale in kan chhang ang e aw.
@ chhuaklinga, Bawn hi ka khalh tih awm tak a ni ti raw…Zokhua tih hi a than hian an duh lova, mahse tlema sawina mawihnai zawk niin ka hria a, ka hmang ta a ni e.
@Sandman, i rin loh deuh zel ka ranw chhawp chhuak ang e.
@Pk chu i fing e, kal dan phung te hi ka nei a nia
@shledon, ka luhlul ve khawp mai hahahaha
@awmtea, fu zuk her ve rawh a nuam raps
Tin Ingnatia hi chu ka ngaisang tlat, kei ai hian a puitling niin ka hria.Ka puitling vak lo a nih ka rinna chhan chu, Ka nu hian ka pa nen hian naupang harh deuh duh panih kan kawl a min tih khum tlat mai a…
Chuan hei in thla lak in dah fir fer, ka dah ve thiam lo profile pic dah dan min lo hrilh teh u.
Report this comment
November 2nd, 2012 at 10:37 pm
I thlalak tak tak i dah awm si lo, ka hrilh lo mai ang che…
I kurtai chu thingpui hang nen min lo khilai la… ka ei chak e…
kei chu kawrtai tiin ka lam thin!!
ka ngaisang bawk a, chini hi kawrtai angin ka siam thin… 
Mahni thlahtute khua i tlawh thei chu i vannei hle mai….
mahni pate pianna khua hre lo pawh kan awm mai thei ania misual zingah hian… 
Report this comment
November 2nd, 2012 at 10:43 pm
Puii ka lan thatna ber dah ka duh a, Hahahaha. Chini leh bawnghnute hmang hian ka u hian kurtai a siam thin a sin….
Report this comment
November 2nd, 2012 at 10:52 pm
Zokhua iti pawh khi adik reng.. Hmanlaia Vaizin an tih khan Aizawl zin sawina ani. Aizawl kha vaikhua angrengah an ngai tlat a, Mizote berin awm man an chawi tlat niin ka hria. Ka hresual maithei bawk.
Report this comment
November 2nd, 2012 at 10:54 pm
Lan chhiatna i nei ngai ami?
Profile Pic dah dan chu post hluiah khan a awm kha..zawng mai teh, soi dawn chuan a sei tlat… 
Report this comment
November 3rd, 2012 at 12:34 am
In CK anih chu…..! Kei ni chuan ‘Lung’ kan her thin !!!!
I kurtai chhuanna Khawl-thleng erawh kan siam hnem khawp mai ! Patling 2 zawn ngar ngar-na tham a ni.
Report this comment
November 3rd, 2012 at 5:19 am
Kan naupan laiin fuhuan kan nei ve a,a herna ah kan kal thin, nuam kan tih theih thin zia kha aw. Kan nghahhlelh thin…a hmawngsawi te tak kha aw. Mau burah kan han thun a, intithei takin thiante kan han awh siau a. Thiante’n min han pâk laih laihte kha nuam ve deuh mai a nia.
Kei chu Zokhua tih hi ka pawm thei lo, Thingtlang ka ni e.
Report this comment
November 3rd, 2012 at 9:01 am
POst-tupa, keima’n ka’n hrilh ang che, a thiam lo ber hian.
Gravatar.com-ah tuna misual-a i email hmang khan i sign in/register ang a, I thlalak duh ber kha i up load ang a, a ni mai.
tren tren
Report this comment
November 3rd, 2012 at 10:52 am
I thuziak a tluang nalh hle mai, thuziak thang i ni tih a hriat.
,….Ser pawh a awm nual, sunhlu kha a rah duh khawp mai… 
Lungleng Lal in hmun kha a nuam viau a sin, chawlhni tlaia mahni nen chauva han len thengthawt nan ka awt
Fu her hi chu a hi chua a nuam viau, ka her fo mai, Bawng hmang lovin mihringin kan her a, lu a hai duh chhalh chhalh e… A suan hun a pawimawh khawp mai, ‘a vawk chaw so’ hnuah suan tur an ti ta in ka hria..haha
Report this comment
November 3rd, 2012 at 11:38 am
E khai a Chhingte, i thuziak a lo chhuah meuh chuan hman hun kan zawng ruai mai lawm le… Chhiar a nuam lehpek hle mai. Chhiartute’n i style turu lutuk an lo man ta hi lawmawm ka ti hle mai a… ka hming an sawi lang ve erawh nuam ka ti lo hle…Jordan lui-a baptis thintu Johana chanchin min ngaihtuahchhuah tir a lawm le, amah chu ka ang si a…
Lo kal ve ka chak hle mai… Scooty nena han LEU vel chu a nuam ngawt ang chu…
Tin, ZOKHUA tih i hmang kher hi tha ka ti hle mai..ka ti tak zet. Sosap Missionary-te pawh khan Thingtlang hi Zokhua tiin an sawi duh zawk. Thingtlang lamah programme an neihin ‘ZOKHUA lama programme nei angin an insawi mai zel’…
Report ngaihnawm tak a ni…almost daktawr diktak nge nge(panchhetuam daktawr ni lo)…
Report this comment
November 3rd, 2012 at 12:38 pm
‘Chhuaklinga’ tih leh ‘chhingdailova’ tih hi ka hriat pawlh ziah.haha
Report this comment
November 3rd, 2012 at 1:03 pm
Mizo tawng hi sosap awh.. zosapte phuah a ni lo
Kei chu thil thing deuh leh deu zawng deuh sawi na atan a ZO an hmang ve ziah te hi ka lo ngaimawh tawk thin khawp a. Eg. A va ZO tiah tiah ve!! Zokhaw nula mikhual kan nei.
Kei chu thingtlang pa ka ni e. Zokhaw pa ni lovin.
Report this comment
November 3rd, 2012 at 2:32 pm
Helai thu hi ka duh tawp, “Bawng lah khan a hnunga kal loh kha a hre thei zek a, sipai sual sazai an pek kal tha duh lo, a pu in a sazai pek tlan zat a tlan ve ang tih ang khan kan in zui hnuang hnuang reng mai a ni.” Bawng fing naran lo tak a niin ka ring
Report this comment
November 3rd, 2012 at 4:06 pm
Kum 1894 chova A AW B min ziam sak tu – kawng tinrenga ziak leh chhiar lama mizotawng tihmsawntute kha kan zosapte an ni tih hi 1980′s chho vela u-a-ma lo hmang tan ve ringawt tan chuan hriat pawh a har mai thei. Kan mi hmasate zawng zawng deuhthaw zosapte influence an nihzia pawh pawm a har deuh mai thei..helaia Khamliana ngei pawh hi! Laisuih a ni emaw Bethlehem titi a ni emaw Bible a ni emaw an zar kan zo e… Moneitu han tih ral ral te leh FA TIR han tih khauh khauh changte hian thinlaiah REFERENCE atan an lo lang leh thin, kan zosapte kha…
ZO tih hi nawi lutuk sawi nan kan lo la hmang thin ang tih ka lo hlau ve thin reng a ni…
Martin Luther Jr. khan reformation a thlak dawn tak tak khan a harsatna ber chu negro ho inla hniam (inferior) lutuk kha a ni. ‘Black’ nih kha hniam ta viau emaw changkang lo viau emaw nihna emaw an ti hial..kha kha an mu tan a ni bawk. BLACK IS BEAUTY ti-a thangtharte thluak an suk meuh chuan an kang hawk hawk mai le… Midum nih chu zah a hnekin nuam an ti letling zawk a ni awm asin…
Khawpuia cheng verther tak – office khawi emaw laia thawk – eiru tihhriat reng reng, tlawmngaihna leh thenawm khawvengte lainatna leh khawngaihna nei leklo hi ZO ka ti thei ngai tlat lo pek hi ka buaina a ni thin… Chu ai chuan mi rinawm leh mite hmakhua ngai thiam – chhungkua, kohhran leh khawtlang tana mi tangkai, rinawm em em bawk si hi ZO ka ti thin. A pawi khawp mai…
Khawpui – sum tamna, Lirthei leh boruak tha lo tamna hmun hi ZO ka ti thei ngai tlat lo pek bawk. Aizawl leh Lunglei phei chu ka hmu ZO tawh lo nasa… Thingtlang tih pawh hi engtianga lo awm nge tih pawh min chhut tir nawk nawk thin…. Mimal leh inchhungkhur – in leh lo sawngbawl dan hrim hrim hi a zo ka ti thei tawh lo…very WESTERNIZED!
Report this comment
November 3rd, 2012 at 5:57 pm
I ziak ngaihnawm hle mai. Tun hma a fu herna hmun a kal ve thin ka nih vangin leh Lungleng hi ka khua ang mai a ka en vangin, ka lung lah iti leng em em zui mai a.
Chhete ka ziak ve a, i hman chuan ilo chhiar ve dawn nia
hairehai
https://henryvangchhia.blogspot.....r-lai.html
Report this comment
November 3rd, 2012 at 8:45 pm
@Chhuakling ka lo try chhin ang e.
@evergreen a lawmawm e, thuziak hi ziak thang mah ila rin aiin a har a nia.Chhuaklinga nen a min ngaih pawlh hi Chhuaklinga hi chu lawm ngawt ang le..
@Ignatia,Zokhua tih hi mi tam tak hian an duh lo tlat, sawi mawi vel a ngai lo, thingtlang a ni mai an ti deuh tlat mawle..I trang bawk a niang a, hei Martin Luther a te lam lam i sawi chhuah le.
@Pu Vangchhia. E taka hei ka fu her na te hian an hre khawp mai che. Henry a USA an ti talh talh ren a nia. I phone khat deuh a niang an sawi an sawi a nia….
Chuan, an Thalfavangkutah hian Quiz an nei a, India ram a state lian ber an zawt a, ka awmna section khan min rin ve teh lul nen kan hre lo mai chu zak ve chem chem mai…..
Report this comment
November 4th, 2012 at 11:33 am
Kan chhiar ve chauh chu le… Kurtai chu a urh rim nam ngei a tui in ka hria..
Report this comment