mi(sual).com

1st. Saturday: World AIDS Day a ni a, he ni hi Aizawla Vanapa Hall-ah leh hmun dang thenkhatah hman a ni. A hmanna pui ber Aizawla Vanapa Hall-a hmanaah, Health Minister, Lalrinliana Sailo chuan, HIV/AIDS chu khawvela natna inven awl ber a nih thu leh, MSACS din tan atanga tun thlengin AIDS do nan cheng vbc. 103/- vel a hman tawh thu leh “Tuna khawvelin a do mek, HIV/AIDS hi khawvela natna do awl ber a ni a, do hneh theih a ni,” tihte a sawi. World AIDS Day Aizawl¬a hmanna inkhawm hi Health Secretary, Esther Lal Ruatkimi’n a kaihruai. Kumina World AIDS Day thupui chu ‘Getting to Zero’ (AIDS vanga thihna tihbo) tih a ni. Vanapa Hall-a a hmannaah hian MSACS Project Director, Dr Eric Zomawia’n HIV/AIDS chungchanga Mizoram dinhmun a tarlang a; HIV/AIDS vei leh a enkawlna lama thawkte’n an tawnhriatte an sawi bawk. National AIDS Control Organisation (NACO) Annual Report 2011-12 tarlan danin, India ramah HIV hrik pai mi nuai 239 an awm a, puitling zawng zawng zinga 0.31% in HIV hrik an pâi ang a ni. HIV hrik pai hmuhchhuah thar hi kum 2000-ah mi 2,70,000 an awm laiin, kum 2009-ah chuan mi nuai 1,20,000 chauh an awm tawh a ni. UNAIDS report hnuhnung bera a lan dan thung chuan, khawvelah HIV hrik pai mi nuai 342 an awm. Kum 2011 chhung khan HIV kai thar mi nuai 25 awmin, AIDS thihpui mi nuai 17 an awm a; kum 2010-ah HIV hrik pai mi nuai 335 awmin, HIV kái thar nuai 26 an awm a, AIDS thihpui mi nuai 18 an awm bawk.

2nd. Sunday: Vaitin khuaa pawl hrang hrang kalkhawmte chuan an khuaa Primary School Headmaster khawsak dan an duhloh avangin tiamchin awm lova Vaitin P/S khar an rel. Vaitin khawtlang hruaituten an headmaster heti taka an duhloh nachhan chu naupang chaw chhun tih chingpen chungchang, naupangte na taka kutthlak chin thuah leh attendance chungchangah diklo takin a record thin nia an hriat vangte a ni a; hemi chungchang hi sorkar hotute hnenah pawh vawi engemawzat lo thlen tawhin sorkar lam atanga hmalakna hmuh tur a awm theih loh avanga hetianga thu ti tlu ta mai hi anni.

3rd. Monday: Lalduhzuali (43) w/o Zoramliana, Armed Veng chu 1st MAP khelmual (Armed Veng field) chung kawngpui sirah thia chhar a ni. A awm ruhte a tliah nual avangin motor-in a su nia rin a ni. Lalduhzuali te chhungkua hian Chite kamah bawng an vulh a, an bawng vulhna hmun atanga a haw lam a chesual ta niin a lang.

4th. Tuesday: Mizoram Florist Association leh Hor¬ticulture department tangkawp chuan December 7 thleng awh tur flower show cum florist fair Assembly Secretariat Annexe hnuai¬ah an buatsaih a, Parliamentary Secretary (Horticulture), KS Thanga’n a hawng.

5th. Wednesday: NLUP Conference Hall-ah North East Farmers’ Federation din a ni a, he dinna inkhawm hi Pu H.Liansailova, Agriculture Minister in a hmanpui a, Arunachal Pradesh, Nagaland leh Tripura atangin palai an lo kal a. Inkhawm hi Dr. H. Vanlalhluna, Vice President, AMFU in a kaihruai a ni. He pawl hian an harsatna hrang hrangte sutkian dan tur sawiho in an tawnhriatte an intawm thei tawh dawn a ni. Inkhawm ah hian Pu Zion Lalremruata, Gen Secy AMFU in he pawl thil tum te sawina hun a hmang a, Pu Lanukaba, President, CONFU, Nagaland in lawmthusawina a nei a ni.

6th. Thursday: SCERT chuan kum tina tih a thin angin, Vanapa Hall-ah zirlai, science leh mathematics subject-a ti thate hnenah lawmman pawisa semna inkhawm a buatsaih a, MBSE Chairman, Rev.Dr Lalchungnunga’n a hmanpui. Science leh mathematics-a ti tha zualte lawmman pek hi 1978-a tih tan a ni a; HSLC, HSSLC exam leh Class IX leh XI promotion exam-a science leh mathematics subject-a ti tha zualte pek thin a ni. Kum 1978 atanga 2011 thlengin mi 5,581 pek tawh niin, Rs. 40,24,100 sem ral tawh a ni. Kumina science leh mathematics-a ti thate lawmman pekah hian, HSSLC-ah mi 20, HSLC-ah mi 58, Class XI-ah mi 13 leh Class IX-ah mi 34 an ni.

7th. Friday: Kumtina hman thin Armed Forces Flag Day, 2012 chu ramchhung hmundangte rualin Mizoramah pawh hman a ni a. Sipai bang leh an hun leh tha zawng zawng ram tana hlana an boral san tak nupui fanaute chhawmdawlna atana Flag zawrh thinte chu mi tlawmngai leh sorkar hotulu hrang hrangte hnenah zawrh an ni. Kumin Armed Forces Flag Day puala Mizoram Governor in thuchah a sawi pawh tualchhung TV leh AIR atanga puanchhuah a ni bawk. Indopui pakhatna 1914 atanga 1918 khan khawvel pumpui a nghawr nghing in sawrkar leh mipui an chi ai nasa hle a ni. Kha indopui rapthlak tak mai kha 11th Nov. 1981 khan a lo tawp ta a, hemi ni Indopui tawpna thu thang zet hi chuan sipai te a ti hlim in an thawm a tha hle mai a, an trench khur leh bunker atang tein hlim leh lawm takin an zuang chhuak hlawm a, a ram vel a pangpar awm chhun, ‘POPPY PAR’ an tih mai chu an lukhum leh an kawrah te thiatin an in chibai kual a. He ni 11th November 1918, Indopui pakhatna ni hi British ho chuan “Armistice Day (Inremna ni) emaw “Remembrance Day” an ti a ni. Tichuan kumtin in 11th Nov. hian chu Poppy par lem chu lehkha a siam in thawhlawm khawn nan an hmang thin a. He thawhlawm tlingkhawm hi Indona a thi leh hliam tuar avanga ram tui lei lo a awm te leh an thihsan, an nupui fanaute chhawmdawl nan an hmang thin a ni. Hun a lo kal zel a, India ram a independence hnu-ah Defence Minister ho a Committee chuan kum 1949 atang chuan 11th November ni tawh lovin ‘7th. December apianga he thawhlawm hi khawn ni tawhse’ an ti a. Chuta tang chuan he ni hi “Armed Forces Flag Day” tih hming a lo pu hlen ta a ni.

8th. Saturday: Mizote kutchhuak zinga Chrismass ulbum tha ber tura ngaih Scavenger management Chrismass collection chu Millenneum Center roof top-ah tlangzarh a ni. Tin, hetih rual hian Scavenger management website pawh launch nghal a ni a; an site hming chu www.scavengermanagement.com tih a ni. Hetianga hun hman a nih hnu hian live concert neih chhunzawm nghal a ni.

9th. Sunday: 6th. Thursday a tan tak Mizoram UPC Inkhawmpui lian ber General Assembly vawi 18-na, Bethlehem Vengthlang Field-a neih zawh takah chuan Pastor bial thum – Rengdil bial, North Tripura bial leh Saikot bialte an hawng thar. Mizoram UPC Khawmpui neih zawh takah hian mi 16 hnenah Ministerial Licence pek thar an ni a, Pastor 4 te Ordained an nih bakah Bial enkawltu tur Pastor 5 lak thar an ni a, Pastor lak thar leh term tawp mi 20 zet an awmna hmun tur siamrema siksawi an ni bawk. General Assembly hian kum 2013 Budget atan cheng nuai 718, sing 2 leh 700 (Rs.718,20,700) an pass a ni. Kum 2013-14 chhunga Executive Chairman atan Upa Lalthlamuana Hnamte thlan a ni.

10th. Monday: International Anti-Corruption Day chu Mizoram hmun hrang hrangah hman a ni a; a hmanna pui ber Aizawla Assembly Annexe Conference Hall-ah Governor, Vakkom Purushothaman leh Chief Minister, Lal Thanhawla te hoin hman a ni. Aizawla International Anti Corruption Day hmanna inkhawm hi Special Secretary (Vigilance), Kunal-a’n a kaihruai a; Minister, Dy Speaker, Parliamentary Secretary, MLA leh senior officer-te an tel.

11th. Tuesday: Mizoram Assembly thlasik thutkhawm, ni khat awh chu Assembly House-ah neih a ni. Session-ah hian session hmasa leh tun session inkara mi pawimawh thi pathum sûnna hun hman a ni a; paper pali leh report panga House-ah pharh niin, dan dinglai siamthatna tur bill pakhat pass a ni bawk. Session hi tlai dar 2.30-ah tihtawp a ni.

12th. Wednesday: Labour & Employment Minister, Lalrinliana Sailo chuan Mizoram Building and Other Construction Workers Welfare Board-in hna thawktu tanpuina a pek tur mi 307 hnenah tanpuina pawisa a sem. Tanpuina pawisa semna hun hi DRDA, Aizawl District office-ah hman a ni a; Workers Welfare Board-in nimina tanpuina a pek turte hi Aizawl khawpuia mi 307 niin, chungte tan chuan Rs. 7,29,300/- sem ral a ni. Mizoram Building & Other Construction Workers Welfare Board hi kum 1998-ah Parliament-ah pass niin, Mizoram sorkar pawhin Workers Welfare Board a din tawh a, July 2012 atangin a tak taka hna thawh tantir a ni. Board-ah hian Labour & Employment Minister, Lalrinliana Sailo chu Chairman a ni a, L&E Secretary, Rotluanga chu Secretary a ni. Workers Welfare Board hian hnathawktute (labour) tanpuina turin cheng nuai 850/- vel a nei a, Labour Registration-ah mi 2,035 inziak lut tawhin, chu’ng mite chu tanpuina pek tur an ni. Registration ti tawh tam zawk chuan Labour Welfare Scheme hmangin an fate zirna senso tur an dil a, fate pahnih tan dilsak theih niin, pakhat tan Rs. 1,500/- pek theih a ni. Mizoram Building & Other Construction Workers Welfare Board-ah hian scheme eng emaw zat a awm a; chung zingah chuan registered labour chu kum 60 a tlin hmaa a thih chuan Rs. 15,000/- pek theih te, damloha senso Rs. 10,000/- thleng pek theih te, kum 60 tlin hnuah thla tin pension Rs. 200/- pek theih te, loan 2%-a punga lâk theihte a tel. Hnathawktute tanpuina hi hna neitu (constructor)-te’n an hnaa senso tur (estimate amount) atanga cess 1-2% Workers Welfare Board-a an chhûn luh atanga pek a ni a; Supreme Court chuan cess 1-12% hi pek ngei ngei turin thutlukna a lo siam tawh a ni. Hetih lai hian, Mizoramah chuan constructor-te’n cess an la chhung lut tha tawk lo hle niin Welfare Board chuan a tarlang.

13th. Thursday: Mizoram sorkara Sports & Youth Services department hnuaia pêng pakhat, 1st. Mizo Air Squadron NCC leh Mizo Air Squadron NCC hnuaia thlawhtheihna khalh zirna din thar, First Flying Training Sortie chu Lengpui Airport hangar-ah Chief Minister, Lal Thanhawla’n a hawng. Mizo Air Squadron NCC hawn a nih hnuah thlawhtheihna khalhna zirna tur, Microlight aircraft an tih, ZENAIR STOL CH 701 hmangin thlawh chhintir a ni a; Wg.Cmdr. Rajendra Punia kaihhruaina hnuaiah Synod Higher Secondary School NCC cadet, Joseph Lalhruaitluanga (Class XI zirlai) s/o Laltinkhuma, Kawrthah-in thlawhtheihna a khalh chhin a ni.
1st Mizo Air Squadron NCC hawnnaah hian Silchar-a awm mek, Col. PS Dhillon, Group Commander pawh a tel a; Minister H Rohluna leh Nihar Kanti Chakma, Dy. Speaker John Rotluangliana, Parliamentary Secretary S Laldingliana leh H Zothangliana, MLA-te leh sipai hotute an tel bawk.

14th. Friday: Pickup chesual ah driver C.Lalzarzova (35) mi chuan nunna a chan. C.Lalzarzova Edenthar veng Motor khalh hi Pickup hi MZ-01 C 98637 ani a,a chetsualna lai hmun hi Chanmari leh Chanmari West thlanmual panna kawng ah ani a, motor ah hian a khalh tu C.Lalzarzova chiah hi a chuan a vangin a chetsual dan leh a chetsualna chhan hi hriat chian theih a ni lova, ralkhat a tanga motor tlan lai lo hmu te chuan motor hi a chho zawngin a tlan a, a zawh loh vangin hnunglam ah tawlh in kawngthlang lamah hian a tawlh liam ta ni in an sawi. Motor hi kawng a tang a Ft.214 vel a thuiah tang in motor hian C.Lalzarzova hi delh bet in a hmun ah ka pawh chhawn lovin a thi nghal a ni.

15th. Saturday: Thenzawl Field veng mi Tlangval Lalhmingthanga (15) chu an chenna inah (Salvation Quarter) in awkhluma hmuh a ni a, a nu Pi Lalparliani leh an te ber hmeichhe naupang Aizawl lama kut dawh tura kal te chu biakpawh ngaihna an awm loh avangin Lalhmingthanga thih thu hi an hre lawk lo. Pi Lalparliani hian fa 6 a nei a, a pasal hian hun rei tawh tak atang khan a tlanbo sana; a thi nge ala dam tih pawh an hre lo. Mitdel chungin Pi Lalparliani hian a fa te chu a enkawl ta a ni. Pi Lalparliani hi a fa te ber hmeichhe naupang kum 8 mi chuan mi khawngaih dila kut a dawhnaah a kai thin a ni.

16th. Sunday: Samuel Lalremruata (21), Falkawn khua, 1st Battalion Assam Regiment tang lai chu Siachen Glacier, Jahmu & Kashmir-ah a duty laiin vurin a chhilh a; a hmunah a duty pui dang mi panga zette nen an thi. Samuel-a hian Indian Army hi 2010 khan a zawm a; kumin August thla atang khan tuna a thihna hmun Siachen-ah hian a awm ve tan chiah a ni. Himalaya tlang panga awm Siachen Glacier hi India leh Pakistan-ten 1984 atang khan rambuaia ngaiin an inchuh tan tawh a a ni. Heti hi ni mahse, he hmuna sipai nunna chan tam zawkte chu vur tawlin a chhilhte an la ni fan a ni.

17th. Monday: Mizo Academy of Letters (MAL) in kum 2011 atana Book of the Year-a an thlan ‘Zodinpuii’ [Tv. Lalchhantluanga m/o Ruatfela nu ziah] behchhana film siam ‘Zodinpuii’ tih chu Pu Lal Thanzara, Parliamentary Secretary to Chief Minister chuan Vanapa Hall-ah a thlangzarh. Film tlangzarhna inkhawm hi Pi Louis Hauhnar, he film Co-Producer chuan kaihruaiin Film Report chu film producer Pu C. Hmingthangvunga’n a pe a ni. He film hi Mizoram hmun hrang hrangah leh phai lamah te shooting neih niin a siam nan hian thla li (4) chuang hret hman a ni.

18th. Tuesday: Vijay Diwas pualin inkhawm War Memorial, Treasury Square ah neih a ni. He hunah hian ram tana nunhlan sipai hrang hrangte zahna pangpar hlan a ni. Governor Vakkom Purushothaman, Chief Minister Pu Lal Thanhawla; Speaker Pu R. Romawia, Lt Col.(Rtd) Z.S. Zuala, MLA; Capt(Rtd) Hmingdailova Khiangte, MLA; Chief Secretary Pi L.Tochhong, Home Secretary Pu K Riachho, IAS; DGP Pu Alok Kumar Verma, IPS; Brig Ved Prakash, Commandant Assam Regimental Centre; Brig SP Rawat, SM, DIG Mizoram Range; Assam Rifles leh mi pawimawh engemawzat dangin zahna pangpar an dah. Vijay Diwas hi 1971 a India leh Pakistan indo tum a India in chakna an chan ni hriatrengna ni a ni.

19th. Wednesday: Thla khat chhung neih a nih hnuah LPS Youth Icon tum lina chu neih zawh a ni ta. A pumpuiah Lalrempuia (19) Chhiahtlang chu pakhatna niin 2009 Icon Lalhmangaiha’n lallukhum a hlan. Hei bakah hian lawman tangka fai Rs 100,000/-, trophy leh mimal leh pawl ho hnen atangin lawmpuina tangka fai leh thilpek chi hrang hrang a dawng. Pahnihna chu Durtlang tleirawl Lalduhsaki niin pathumna chu Melody Lalsawithangi, Thuampui Vengte anni. Hemi tum hian tun tum Youth Icon thlan naa musician tha berah Home Free Music Production neitu Kima Chhangte hnenah Best Music Arrangement hlan a niin hei hian tangka fai Rs 10,000/- a keng tel.

20th. Thursday: Mizoram Group ‘A’ Co-ordination Committee chuan I&PR Conference Hall-ah Krismas pualin thipek an sem a, home hrang hrang leh ram tana thawktu pawl 13 hnenah pawisa, Rs. 3,10,000/- an sem a ni.Group ‘A’ Co-ordination Committee-in tanpuina an pekte chu – Tawngtaina Bethel Camping Center-ah Rs. 1,00,000; TNT Zuangtui leh Hermon Children’s Home, Durtlangah Rs. 50,000 ve ve; Central Anti Drug Squad-ah Rs. 20,000; Genesaret Gospel Home Champhai, Bethel Centre (Lunglei), Davida Team (Kolasib) Mission for Social Reforms (Tuikual), Bethesda Grace Home (Sihphir), Sinners’ Friend (Sihphir), Center for Peace & Development, Moria Blind School (Luangmual) leh, Mission for Christ (Durtlang) hnenah Rs. 10,000 theuh a ni.

21st. Friday: Durtlang kawng Leitan bul khamah Lalthazuala (30) S/o., Zamana Durtlang Leitan chu kawng sira a thu tur a tla palh a; a thlang lengkir sang takah tla thlain ka chhawn lohin a thi.

22nd. Saturday: Krismass laia Mizorama haw duh phai lam Zofate an thathnem deuh avangin Rajya Sabha MP Lalhmingliana ngenna angin Civil Aviation Minister Ajit Singh chuan Kolkata to Aizawl Additional flight a tir.

23rd. Sunday: Sihphir Venglai Kristian Thalai Pawl Facebook Group-a member member-te chuan kumin chhunga an Kohhran huam chhuanga (Presbyterian ni kher lo pawh) mi harsate hnenah Krismass sa man tur chhungkaw engemawzat hnenah an sem. Hetiang hi an vawikhat tihna a ni a; zawngchhang thlak an ti hle. An duh anga thilpek thawhkhawm a tam tawk loh avangin nakum atang chuan Krismass dawn hnaia inkhawn chauh lovin kum tir atanga inkhawl dante thlengin an ngaihtuah. Pawl dangte pawhin entawn se a duhawm hle mai.

24th. Monday: Kolasib Venglai, Silchar rd. Sihneh muala MGNREGS kawnglaiha awm Pu Lalringhetate in chu bungraw engmah chuh hman lohin a kang ral. In kan lai hian nu ber leh pa berte chu an mu tawh a; inlengte an neih avangin naupang hoin inlengte chu kawmin an meng rei deuh a; an mut fel fe hnuah he kang mei rapthlak tak hi a chhuak ta a ni. Naupangte an men lai hian plastic chair-ah bati an chhia; hei hi ti mit lovin an mut san a; hetatang hian kangmei hi a chhuak ta nia rin a ni. In chhunga mei alh nasa tak a hmuhin Pu Lalrinngeheta fanu Lalhmingmawii (9) mi lek chu harhin a chhungte chu kaithovin an hak lai nena tlanchhuakin a bak zawng chu kangmei hian an neih hlu zawng zawng a lem zo ta.

25th. Tuesday: Khawvel puma Kristiante kut pui Chhandamtu Isua Krista pian champha vawi 2016 na a ni a; he hun hi Zorama Kristiante chuan hlim takin an hmang. He hun hi Kristian ni ve lemlo Zorama cheng Mizo leh Mizo lote pawhin engemaw zawng tal chuan an nghakhlel thin hle. He hunah hian ringtute in fuih na hun tha taka hman thin a ni. A hmanna pui bera ngaih Kawrchhuahpui (Tlabung bul) ah chuan Budhhist mi 38 zette chuan baptisma an chang a, a lawmawm hle.

26th. Wednesday: Champhai Tuipui bul, Aizawl atanga Tuipui thlen chhoh hmaah Alto car a chesuala; he car khalhtu leh a neitu ni bawk C.Lalthangluaia (47) Lawngtlai bazaar vang chu a hmunah a boral. Midang pathumin hliam na vaklo an tuar bawk. Car-ah hian mi pali, unau vek an chuang a; Champhaia an chhungte thi ruang nan hman tuma kal anni. Driver hi a hah rimtawng em avanga chesual niin a lang. Motor hi kawng thlangah feet 130 vela thui a lum a ni.

27th. Thursday: Liverpool FC fan club member Aizawl a awm te chuan Civil Hospital Aizawlah a mamawh apiangte hman atan thisen unit 17 an pe a; an zingah hian hmeichhe pakhat a tel ve. Civil Hospital Aizawl tan hian kumin chhungin blood donation camp vawi 170 lai a awm a; a lawawm khwp mai.

28th. Friday: Kohhran Thianghlim chuan kumtina an neih thin dan angin Jerusalem Inkhawmpui Kidron Valley a 25th. Tuesday a an tan tak chu an tiak ta. He inkhawmpuiah hian palai pawh an kal tha hle a , kum dang zawng aia kal tha in palai in report ringawt pawh 3400 chuang lai awmin chhimtu pangngai (in report chiahlo) pawh engemawzat an awm bawk. He inkhawmpui ah hian F.Siamzika, Lalhunliana, H.Lalvuana leh RL Hmachhuana Executive Member-ten inkhawm hi an kaihruai thin a; mi hrang hrang hnen atangin testimony ropui tak ngaihthlak thin a ni bawk. Tin, he inkhawmpuiah hian ‘Mo neitu au aw’ tih Dr.LB Sailo ziah vawi nga lai chhut nawn tawh chu tlangzarh nghal a nih bawk bakah upa kum 75 chung lamte hnenah thilpek hlu tak hlan an ni bawk.

29th. Saturday: NLUP hnuaia hnathawk tha, chawimawina dawngtu tur thlangtu tur, State Level NLUP Selection Committee chuan an Chairman, Pu Rualzakhuma hovin Lunglei District-a titha ber khua, Sekhum leh mimal titha ber awmna, Phaileng South an tlawh. District-a khaw hrang hrang zinga titha bera ngaih, Sekhum khuaah hian vantlang inkhawm an nei nghal a, hetah hian NLUP thil tum te, tihlawhtling tura tan lak dan tur chungchang an sawi a, an hna thawh dan chungchangah thil inhrilhifah ngai leh zawh fiah ngaite inzawh fiah a ni bawk. Hemi hnu hian NLUP Section Committee hian an hnathawhna hmun hrang hrang an en a, motor kal theih lohnaah pawh ke-in an kal a ni. Lunglei District Selection Committee-in mimal zinga titha bera a thlan, Sericulture hnuaia Pangang khawi thlangtu, Pi Lawmsiami, Phaileng South-a mi hnathawhna hmun pawh heng mite hian an enpui bawk. Lunglei District-a khaw thenkhata tithate an tlawhnaah hian Nodal Officer, Pu Zathangliana leh Line Department hotute an tel a ni.

30th. Sunday: Saiha Dist. a Phalhrang khuaa Pu Thanchhuma in chu bungrua engmah chuh hman lohin a kang ral. Kangmei chhuah lai hian in neitute hi an awm lova; Kohhran zaikhawmna lama an kal hlan a ni. Pu Thanchhumate nupa hian fa pakhat, kum li mi an nei a; an in hi veng hmawr lamah , fal taka awm a niin di in a ni nghe nghe.

31st. Monday: Khawvel hmun hrang hrangah kumhlui thlah na atan concert leh in tihhlimna chi hrang hrang buatsaih a ni. Mizoramah pawh sorkar leh CYMA bul tumin Aizawlah hmun 6, Lungleiah hmun hnih leh district khawpui tinah concert buatsaih a ni a; zaithiamin mipui zaiin an awi a; hmun hrang hrangah hian mipui an thahnem hle.

Similar Posts:

• Mizo hnam zingah Gangte telh an ni ve ta
• Cheng Nuai 67 senga sak E.Lungdar Hall Hawn a ni
• Health Minister bang rawh se
• Orissa ringtute tawrhpuina kawngzawh
• Mizo Police Commando kan nei ve ta!

Recent Posts:

• Aw Lalpa, Television-ah min siam ang che!
• August 2013, Mizo(ram) Diary
• ARSI THEM LEH KAN KHAWVEL
• Phaia chhungte dinhmun hre turin chah
• Health minister bàn turin CM ngen

This entry was posted on Thursday, January 3rd, 2013 at 4:36 pm and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.