mi(sual).com

Zan khat chu tui deuhva ka mut laiin chhan leh vang pawh awm hauh lovin ka harh zawk mai a. Ka room banga sana in tarah chuan a ban tawi zawk chuan pathum(3) lo kawk tawh in, a ban sei zawk  pawh chuan pariat hi alo kawk tawh a. Nidang ang lo takin hnathawk tura min kaitho thin arpa te ai pawhin ka harh hma zawk daih mai a, a inthlahrunawm mah mah zawk in ka hria.

KA MUMANG CHU A NI SI LO……
Mut leh nghal mai tumin ka blangket leng thlak chu phun bul bul chung chuan kan phih chho sawk a. Chuta ka hawichhuak leh chiah chu ka bul lawkah chuan kawr dum vek a inthuam, tiang sei tak keng pitar pakhat hi alo ding chhur mai a. An sawi thin Dawithiam pitar ngei mai chu a ni tih chu hrilh kher ka ngai awm lo ve. Ka lei chuan thu reng reng a sawichhuak thei hauh lova, a mit sen duk rum mai te leh a bahsam ngaihnobei lo zet mai te chuan ka ti ril hi a fan nghal zawr zawr mai a.

Sekhen khat lek chhung chuan ka pindan chhunga boruak tha ka neih ve chhun zawng zawngte chu a rawn hip ral vek ta vek emaw tih mai turin boruak tha hip tum ni awm tak chuan ka thaw hrawp hrawp mai a. Ka mitah chuan duh nei niawm tak mai hian min rawn en kul mai a.

Vengthlang tlangval luhlul ho zingah pawh a kuttum inti nei ber mai pawh  chu a hmaah chuan ka zam chhe chiang kher mai.

A vun chu a chuar nge a tial zawk tih pawh hriat hran hleih theih tawhloh khawpin amah chu a tarchhe ve hle mai a, mahse a mit mengah chuan pitar mitmeng awm pawh chu a pu bawk silo. Thuilohkawrfual an tih ang deuh chi (‘tlem-lai-thui kawr’  te pawh chu a ni mahna, thui loh tawp chu ni hek lo) kha a ha hnup mai a, a nghawngah chuan thi thahnem tak a awrh chhuai bawk a. A banrekah te chuan hruihrual dum hlui tawh zet te chu awmze nei lo tak hian a in vial nuai mai a. Han en ringawt chuan thahrui chu a ngah lem loh hmel khop mai. Mahse, a kuta a ken, tiang seipui mai hmawr a lungmantam niawm tak, kuttum tiah vel a lian, lung hring mawi tak eng phut bawk si chu engdang nilovin a thiltihtheihna thahrui chu a ni tih chu kei mimawl ber tan pawh hian hai rual a ni awm lo ve.

PHEICHHAM KA MAN EM NI???
Chutia eng thawm mah chhuah lova hun rei tak kan in hmatawn reng hnu chuan, ani chuan zawi te hian, “I duh ber sawi la ka tihsak ang che,” a rawn ti chhuak hlawl mai a. “Pheichham ka man a nih dawn hi,” ka ti rilru a. Mahse, man ka ni bawk silova, “Pheichham ka hmu,” ti dawn ila, Pheichham a ni chiah bawk si lo. Engpawh chu nise ka mumang pawh chu nise, mang lo pawh chu nise chutia duhber in zawt ta na na chu dang a rawn hnawm tha kher mai.

Hmel leh pianphunga rual pawl lo ve tak lo nih takah chuan, ‘hmelthat’ han tih mai chu thil awl tak a ni. Mahse, kan han sawi dawn nak chuan a aia hlep tha zawk, hmeltha a min siam thei tur bawk ‘sum ngah’ tih zawk a rawn lang leh ta tlat mai a. Mahse, sawi kan han tum nak chuan a aia duhzawk ka lo la nei leh cheu mai! ‘Hmingthanna’ chu a hlep ala tha mah zawkin ka hre leh ta a. Mahse, chu pawh chuan ka duhthu ala sam zan loh avangin thil dang a aia hlep tha zawk tur chu ka ngaihtuah leh ta vang vang a…Ka mitthlaah chuan kan veng pa hausa Pu.Mana fanu neih chhun, ‘Julie-i’ a ziak leh a tawngka zawng te, a eksawn nen lam pawha ka lo bem ve tawh, ka sum neihloh vang liau liauva min duhlo tu hmel ngei mai kha a rawn lang uar uar mai a. Chu mai ala ni lo, “ ’Writer’s Club’ ah ka lo tel ve ange,” ka tih lawm lawm tum pawha za tak maia min lo nuihsawhtu Pu.Vela inchhirlai hmel te chu ka hmu uar uar bawk a.

Chutia ka duhber leh ka dil ber tur thil pakhat lek mai pawh chu sawi mai thei lova ka inngaihtuah lai chuan arpa hi alo khuanga a, ni zung chuan ka room darthlalang chu a rawn chhun tlang phat mai a. Dawithiam pitar chu boruakah chuan a tham ral ta daih mai a!!

(Note: Vawi leh khata hausak thut tum tu chuan thil hriat hmaih a nei a ni. Chu chu, ‘thawhrimna hi kan thil neih ti hlu tu chu a ni,’ tih hi a ni. Kan duham luat avangin tlang leh lampanga hlawhtlinna kan tan a inchhawp chu vawi lehkhat a lak nghal mai tumin kan zuang dawrh a, kan in chhuih sual a kan tlu sual fo thin a ni. Khawvelah hian I duh zawng zawng I nei vek seng lo a ni tih hi hria la, lungdam takin pawm la, I neih chhunah khan lungawi tum zawk thin ang che. Chu chu hausakna diktak leh hausakna tluantling chu a ni.)

“Neihtamna hi hausakna a nih ngai chuan Lal Isua Krista neitu te hi ‘mirethei’ ti a koh an ni ngai lo vang.”

©Dustin Lalkulhpuia
——————————-THE END———————————–

Similar Posts:

• Che hlek a MI ti reng mai…
• Broadband chhe lutuk hi…
• Keini Ve Zawng
• Hun awl atan hmun awl
• Dawrkai Phakar

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Saturday, January 5th, 2013 at 10:35 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.