Thuhmahruai
Kan tûnlai Mizoram boruak thlîr hian ‘a mak’ tih loh rual a ni lo. Thihna maksak tak tak leh natna maksak tak takin min tlâkbuak mêk chu a ni si a. Hêng ‘tûnlai hri’ maksak tak tak hian ‘chhan leh vang’ a nei ngei ang tih chu rinhlelh rual a ni lo. ‘Over Dose’ tih thâwm te pawh kan hre châmchi a; mahse, eng vangin nge OD hi tleirawl zîngah an awm reng si? Mu hlum leh inâwkhlum tih thâwm te hian ni tin deuh thaw kan hriatna beng a fah a; lirthei leh in hâl thâwm te pawh chanchin thar tichanchin thartu a ni ta zêl mai si.
Hêng buaina leh manganna te hian ‘bul thûm’ a nei ngei ang tih hai rual a ni lo. Nu leh pate’n kan fate thiltih ṭha lo tak tak te hi hre reng mah ila, kan dang zo tawh si lo. A tâwpah mangang chal dawma kun ngawih ngawihin “Lalpa, Lalpa…” kan ti a, chhânna erawh “I tuh rah i seng a nih kha” min tih hi ka ring ṭhin asin. A bilhah kan tho fu tawh lo va, engkim mai hi a inkahpup chaw chho zut ta mai a nih hi.
Mizoramah hnam dang mistiri sîng chuang an awm tawh a; mahse, an zîngah mu hlum leh OD tih te hi zuk awm ve miah lo va! Tin, chakma zîngah mu hlum te hi an awm ve miah lo an tih chu! Eng vangin nge a ram mi ‘Mizote’ hian heti ang êm êma kan tawrh bîk le? Zawhna chhân tûr a va tam tak êm!
Rilru tuihâlna
Nu leh pa tam takin kan fate hrisêlna kan ngai pawimawhin ei leh in tûr ṭha ber ber kan pe a. An hrisêlna a ṭha-in naupang thau tak tak pawh kan vulh tâk duah hi! Zirna kan ngai pawimawh a, foreign thleng thlengin kan thawn a, a thiam thu-ah zawng an thiam ngei e. Mahse, an rilru tuihâlna erawh kan ngaihthah hlauh thung si. An tuihâlna kan phuhrûk zawh loh avangin pâwn lamah hlimna an zawng a, ruihtheihthil leh hmeichhiat-mipatna lamah nasa takin an tlân phah ta a ni. Ṭhalaite hian rilru ruak hnawh khattu an mamawh hle. Zîng thawh hma kan zirtîr tûr a ni a, lehkha zir hun kan siamsak tûr a ni a, hna thawh tûr kan pe-in keimahni ngeiin kan thawhpui ṭhin tûr a ni.
Damdawi zuartute
Veng tina damdawi zuartute’n kan damdawi zawrh ṭheuh kan hrechiang tûr a ni. Damdawi hrang hranga ruihna bâwlhlo a awm leh awm loh te, eng zât dose ei/in-in nge a ruih theih tih thleng te pawhin kan hrechiang tûr a ni. Nunna atâna a hlauhawm dân zawng zawngte pawh kan hre kilh kelh tûr a ni.
Chhûngkuaa seilian
Hnam dang tam takte hi chu chhûngkuaa seilian an ni a, Mizote erawh khawtlânga seilian kan ni thung. Hei hian ṭhatna tam tak a neih rualin naupangin pâwnlam nun an thlâkhlelh phah a, chhûngkaw inkûngkaihna a sawi nghing ṭhin. Chhûngkuaah seilian ila, kan chhûngkua ṭheuh hi ṭhian inkawm ngeih tak nih i tum ang u.
Retheihna
Manipur hel te khian independence an khêl lo. Ṭhalai hna thawh tûr nei lo, rilṭâm tam tak an awm a, ei tûr an neih theih nân an hel mai a ni. Tûnlai Mizoram boruak thlîr hian retheihna hi a zual zêl a, a hausaa te erawh an hausa tulh tulh a, lirthei te lah an kuhva lei mai mai tawh si. Mi rethei, ei tûr pawh nei mang lo, rilru nâ leh thinrim inkawp chuan îtsîkna a hring a; mi hausate lirthei leh in leh lo an lo hâlsak pawh ni ta se, an demawm lutuk dâwn em ni? Sual lian tak ti chu an ni ngei e; mahse, a ti ve loa te pawh hian thiam thu sawi tûr kan tlachham ve tho lo’ng maw?
Awmpui
Chhûngkaw tam zâwkin awmpui kan nei tawh a. Kan awmpuite an fel viau phei chuan vannei kan inti hle ṭhin. Mahse, hei hian rah duhawm lo a chhuah ve châwk. Nu-in a pasal lo hâwng chu an awmpui kutah a dah a, chuti angin pa-in an nu lo hâwng chu an awmpui kutah a dah bawk ṭhin. Nupui/pasal-ten an ngaihsak lova awmpui ten an ngaihsak êm êm si chuan eng tikah emaw an awmpuite nên inngainat hun an lo nei ang a. Chu chuan nupa kâr a tikhi a, inṭhenna a thlen châng te pawh a awm bawk ṭhin. Nupa na nâ nâ hi chu inngaihsak ila, kan tâ bilah i inngai tlat ang u. Awmpuite hi felin ṭha viau mah se, kan duh leh tum ni hauh lovin kan kârah an tla zep thei tlat. Chu chu anmahni duh vâng rêng pawh a ni lo thei a, keimahni zir lohna chen pawh tam tak a awm ngei ang.
Tlângkawmna
Zoram mipuite hian tih fuh loh deuh eng emaw chu kan nei a ni. ‘Ka mawh a ni’ ti ngam nu leh pa kan mamawh ta! Sualin a duh tâwka hêm a thlâkna kan ṭhalaite nun chhanchhuak a, kan fate tlu sawp tungding leh tûrin kan thiamna leh finna mai bâkah hmangaihna tak tak nên bul i ṭan ṭha leh ang u. Khawngaihna mai chu a tâwk lo. Khawngaihna chuan an nat a phal lo va, an ṭhatna tûr ngei ngeiah pawh a khawngaih tlat avangin an nun siam ṭhat a hnehin a hruai sual ṭhin. Hmangaihna erawh chuan an ṭhatna tûr a nih phawt chuan an tawrh a phal a, an sim phahna a nih dâwn phawt chuan vuak a hnial ngai hek lo. Tûnlai thil awmzia hi kan hriat chian a hun tawh hle, engkim mai hi a inkahpup chaw chho vek tawh si a. American-ho insiamṭhatna thupui – ‘Back to the FAMILY’ kan tih a hun ve tawh hle a ni.
February 9th, 2013 at 7:27 am
Chhiar i1a.
tren tren
Report this comment
February 9th, 2013 at 7:29 am
ka first khat nen, first tumin ka lut ve a
Report this comment
February 9th, 2013 at 7:33 am
Thuziak tha keh rotling tak a nih hi.. Zah zawka chhiartu awm se ka ti mang e…
Report this comment
February 9th, 2013 at 8:20 am
Zozam Times leh Aizawl Post-ah chuan ka thianten a chhuak an tia…
Report this comment
February 9th, 2013 at 8:21 am
A lo chhuak ve ta e…
Report this comment
February 9th, 2013 at 8:50 am
Tukchhuah nuam vek u le
Report this comment
February 9th, 2013 at 9:23 am
A va han tha em!!! Vanglaini chanchinbu phekli na, keu phawk a
vei lam phek ah ngei hian han awm se la, chhiar tu pawh a ngah deuh ang.
Awmte-a, ram leh khawtlang tan a
ngaih tuah na i seng thin hi, a thlawn lovang. Han ti tang tang zel teh khai.
Report this comment
February 9th, 2013 at 10:22 am
Korean film hi kan va thihpui ta malh malh em!
Report this comment
February 9th, 2013 at 10:56 am
Chhiar dawn ang hmiang.
Report this comment
February 9th, 2013 at 1:34 pm
Kah Puk an ti amaw ka tia
Report this comment
February 9th, 2013 at 1:45 pm
Pu TuaiSialA, Korian flim a chang tu ten, ruihtheih damdawi ei tur in
kan tha lai te hi an zir tir i tih na em ni? Chu vang a ni ang a, kan tun lai rawlthar te hi an TUAI deuh tak
zaw zaw le. Hmeichhe tleirawl ho phei hi chu, an korian tawh hle.
Sheldoni e rawh a korian ve lo tur ah
ka ngai deuh a.
Report this comment
February 9th, 2013 at 3:27 pm
Ziak thiamin a thra hle mai, Ziaktu thiam.
Report this comment
February 9th, 2013 at 3:53 pm
kahpuk chaw kan ti thin.
Report this comment
February 9th, 2013 at 3:56 pm
Chhungkua, khawtlang leh sikulah zirtirna leh enkawlna tha kan tlachham ta a ni ang e. Materialism ah kan tlan nasa lutuk a, kan neihin a tlin bawk si lo, kawng dik lo kan zawh phah nasa ta a nih hi. Kristian te hi he ti fakau hian mimal leh khawtlang nuna kan tlachhe mai hi a lungchhiatthlak hle a ni.
Report this comment
February 9th, 2013 at 4:47 pm
Kohhran leh khawtlang a sei lian
te hian, mahni in chhung khur a seilian
VAI milembia pawh kan tluklo a nih e.
An ni chu, school an banin an leng huaihuai vak lemlova, KTP-PYD-TKP-SAY thil ah leh YMA thil tih na ah,
an in hambuai lo. Mah se kei ni ai-in
an nun e rawh, a nghet hle lawi si a.
Kan kristian na hian, kan nunhi a siamtha zolo a ni thei ang em?
Kristian na kankal pui dan lahhi,
thianghlimna leh rinawmna lam hlam
chhiahin, Sual ngaidam theitu a nih
na lai chuahhi, kan la vawng em em
ri ngawt a. Sual ngaihdam na ri ngawt
hian, kan nunhi siam thathei sela chuan, Kristian inti te hi, kan nun hian belhchian a dawl ngawt ang maw le. Nangni in thianghlim tur a ni.
Kei ka thianghilm si a. He thu hi i tui pui viau chuan, Kristian inti te hian,
Farisai an ti ang che. Mi, a mah ah
Pathian thlarau a awm taktak a nih
chuan, a mah a awm Pathian thlarau thianghlim chuan, thianghlim na kawng ah leh, rin awmna leh,
in sum theihna kawngah a hruai
zawk tur a ni dawn lo em ni?
Mi thianghlim Puala khan, ruih nan leh in tih nalhnan, Damdawi a ei tuamtuam chu ka ringlo. Zu rui in, khaw tlangah buaina a siam phei chu, ka ringlo leh zual. Ringtu nun ah hian, chak loh chang chu a awm ngei a lawm, mah se thlem na kando zawh loh tur khawp a na sa chu kan tawk a nih pawh in, setana ai a
thil ti thei zawk Pathian in, min hneh sak thotho ang.
Report this comment
February 9th, 2013 at 8:51 pm
U Awmtea, i ziak thiam, i ziak pawimawh. Ngun takin ka chhiara, sawiselna chauh ni lo, a siamthatna tur kawng i tarlang tel khi a tha ka ti.
Chuan ‘back to the family’ khi a pawimawh takzet. Family hi Pathianin kan tobul, mihring pangai ni thei tura kan inzirna tura ‘institution’ min pek a ni a, a aia bulthut institution dang a awmlo. Mahni chhungkua thlahlel, chhungkuaa hun hmang tam reng reng chu an nunkawng a inher sual khat khawp mai.
Mizo thalaiten kan tlakchham ber nia lang chu ‘principle’ hi a ni. Changkanna ringawt um zuia ‘principle’ tha kan neih siloh chuan kan bo telh telh dawn. Kan vaiin life principle tha, kan nundan zawng zawng min kaihruai theitu tur neih theuh i tum ang u. Chumi tur chuan kan ngaihhlut zawng (values) te hi bihchiang theuh ila, a eng lai hi nge thlauhthlak ngaia, a englai hi nge uar zual sauh ngai? tihte chhut ila, Kan environment hian min tidanglam dawn nge kan environment tidanglamtu zawk kan ni dawn? inngaihtuah ang u.
Report this comment
February 9th, 2013 at 10:48 pm
#7 Sihtea, Kahpup tih leh Kahpuk tih hi awmna hmun a zirin a sawidan a dang a ni maithei. Tin, JF Dictionary-ah pawh ‘Kahpup’ a intih avangin ka rawn hmang mai a ni. Tin, Vanglaini-ah chuan ka thawn a, AN CHHUAH DUH LO. The Aizawl Post leh The Zozam Times chuan an chhuah ve ve.
#16 Amah Charice_mizo, a lawmawm e. Chhungkaw pawimawhzia hi kan inzirtir lehzual a tul tawh hle.
Report this comment
February 10th, 2013 at 6:48 am
Tha kher mai. Kei chu Kahpup ka ti thin.
Engatinge Vanglaini chuan a chhuah duh loh aw. Hei aia thu ziak sep sel te te a chhuah fo sia.
Report this comment
February 10th, 2013 at 6:50 am
Tha kher mai. Kei chu Kahpup ka ti thin.
Engatinge Vanglaini chuan a chhuah duh loh aw. Hei aia thu ziak sep sel te te a chhuah fo si a !
Report this comment
February 10th, 2013 at 4:44 pm
#18 Hotunu_pasal, kan thu lo em a ni…
Report this comment