BABEL INSANG LEH TAWNG HRAN CHHAN

February 11th, 2013 12:31 pm by Hnam sakhua

Source
Babel in sang leh tawng hran chhan Genesis 11-a a sawi hi thu lar tak a ni a. Mi tam tak chuan, khawvela tawng hrang hrang lo awmna chhan niin an ngai nghe nghe a ni. Bung 11:1-9-ah chuan, Tin, leia mi zawng zawng chu tawng hmun khat leh thu sawi dan hmun khat an ni vek a, tih leh, chang 7-ah “Hawhu i zuk kalang u khai, tawng an inhriat tawn theih loh nan khutah khuan an tawng i zuk tihhran sak ang u,” a ti a. Chutichuan, LALPAN an ni ho chu chuta tang chuan lei zawng zawngah chuan a tidarh a. tih kan hmu a.

Bung 10:1-32-ah chuan, Semate Hamate Japhethate thlahah chuan, anmahni ram ramah leh anmahni tawng ang leh anmahni chi ang zelin, an darh vek tawh thu a sawi tawh a.

Bung 11:4-ah ”Hawh u, khawpui siam ila, in sâng a chhîpina vân tawng tûrin sa bawk ila, kan hming i tithang ang u; chutilochuan lei chung zawng zawngah hian tihdarhin kan awm dah ang e,” an ti a. tih kan hmu leh chauhva.

Heng Genesis 10 leh 11 thute ngun taka han chhiar hian, thil a nih dan tak ziakna aiin, thawnthu kan tih ang chi hi a pawl zawk mahin a hriat. A thu hi han bih chiang zual i la.

10:5- “ Chung ho atang chuan a ni, Jentailte thliarkarahte chuan anmahni ram rama an darh tak ni,” tihte,

10:8- “Tin Kusa chuan fapa Nimroda chu a nei a, a ni chu leia mi chak tak a lo ni tan ta a. Lalpa hmaahchuan Sapel mi chak tak a ni a,” tihte,

11:4- “Tin, hawhu, khawpui siam i la, in sang a chhipina van tawng turin sa bawk i la; kan

hming i tithang ang u; chutilochuan lei chung zawng zawngah hian tihdarhin kan awm dah ange,” tihte,

11:5- “Tin, Lalpa chu mihring faten khawpui leh insang an siam vel chu en turin a zuk chhuk a,” tihte,

11:7- “Hawhu, i zuk kal ang u khai, tawng an inhriat tawn theih loh nan, khutah khuan an tawng i zuk tihhran sak ang u,” tihte kan hmu a.

Heng thute ngun taka han ngaihtuah hian, bung 10 lamah in sang sak tum vang pawh ni lovin, Nova thlahte ho chu an darh vek thu leh an tawng pawh a hran tawh thu kan hmu a.

Bung 11-ah hian, Insang sak an tum chu Pathianin a remtihloh avanga an tawng a tihhran sak avanga tawng lo hrang ta angin a sawi leh si hi, hriatthiam a har hle.

Zir miten an sawi ang hian, heng thute hi, thu lakna hnar hran vanga J leh P thu ziak an lak kawp vang nia an sawi hi a dik zawk em ni ang? Lo dik ta se, tawng hran chhan chu, insang sak tum vang emaw , in sang sak tum vang a ni lo, tih emaw han pawm fel nalh tur a awm chuang lo tihna a ni ang.

Tin, Jentailte thliarkarah anmahni ram rama an darh tak ni,” tih hi, enge a awmzia ni ang? Nova fate ni lo hi, tui let hnu hian mi dang (Jentail) hi an lo awm ve em ni? tiin zawhna a awm thei bawk.

Ngaihtuah zui atan:
1. “Lalpa chuan, mihring faten khawpui leh in sang an siam vel chu en turin a zuk chhuk a,” tih hi, Thil nihna dik tak sawi nge a nih, a hun laia Pathian zia nia an rin danin an ziak mai ni ang?

2. Bung 10 leh 11-a tawng hran chhan a sawi hi, kan tawng hran chhan dik tak a ni ang em?

3. 11:4- Hawhu, khawpui siam i la, in sang a chhipina van tawng turin sa bawk i la, kan hming i tithang ang u,” tih hi, chik taka han ngaihtuah hian, Nova tu leh fate an ni a, an tawng pawh la hrang lo, hmunkhat vek an la ni a. chuti chunga hming tihthan duh anga sawi hi, tute lo hriat atan nge ni ang? An ni ho nilo midang kha chu tui let khan a chim hlum vek si a. Nakin an thlah lo awm zel turte lakah hming tihthan an duh hle tihna em ni ang?

13 Responses to “BABEL INSANG LEH TAWNG HRAN CHHAN”

1
saint sammoo Says:
February 11th, 2013 at 1:17 pm
CHHIAR DAWN ANG HMIANG………..
Report this comment
2
bucko Says:
February 11th, 2013 at 2:40 pm
Mahni in rin ve miah loh, midang rindan sawi dal tum tlatna hri hian a man che a ni ngei ang, post tupa…
Report this comment
3
lr hlonchhing Says:
February 11th, 2013 at 5:10 pm
Ka hre hauh lo mai
Report this comment
4
dtea Says:
February 11th, 2013 at 11:07 pm
Khawnge kan mithiam te, hnialhrat ho te leh boruak in-charge te ho kha. Han vaw hawt leh teh u ha3
Report this comment
5
PimPom Says:
February 12th, 2013 at 9:08 am
Kha tih lai hunah khan tawng hrang hrang chu a lo awm tawh ngei a ni thei a. Mahse kha hnam khat tawng khat hmang Babel In sang sak tumtute kha an tawng a tih hran sak ta a ni thei tho mai.

Bible in an tawng a tihrang ta a ti a, kei chu ka awih mai.
Report this comment
6
donald Says:
February 12th, 2013 at 1:39 pm
Bible hi i bih uluk thin awm hle mai.. i fakawm e

Genesis Bung 10 leh 11 hi historical narration indawt thlap anga chhiar chuan i rawn sawi ang harsatna hi a awm thei reng a ni. A nihna tak chu bung 11 zawk hi thil thleng hmasa zawk a ni a, mahse Genesis ziaktu hian a sawi hnuhnung tlat zawk a ni – Bung 11 hian bung 10-a mihringte lei chunga an darh thu leh hnam hrang hrang lo chhuah thu a sawi hi, an darhna chhan chiang takin a rawn sawifiah a ni. Hetiang hi thuziak kalphung a ni ve reng tih chu ziakmi te chuan an hre fur awm e – inverted/hour glass structure an ti. Sudden-a bu i chhiar ngai em..? Bung khatnaah buaina a lo awm nghal ringawt a, bung hnihnaah buaina lo chhuah dan a rawn sawi chiang chauh ang vel kha a ni awm e

Tin, Jentailte thliarkar tih hi Hebrai tawngkauchheh a ni a, tuipuiin a tlawhpawh theih ram sawina’n an hmang thin. Chuvangin English Bible chhuak thar hoah chuan maritime peoples an ti mai a, hriatthiam a awl deuh. KJV khan ‘isles of the Gentiles’ a ti a, Mizo Bible pawh hian Jentailte thliarkar tiin a dah ve ta mai a, mahse lehlin thar lamah chuan ‘tuipui kam leh thliarkara awm hnamte’ tih a ni ve tawh. Gen 10:5 hi chuan Asia peninsula leh Europe ram vel a sawina a nih hmel.
Report this comment
7
PKfanai Says:
February 12th, 2013 at 6:44 pm
Donald Genesis bung khatna leh bung hnihna inluhthelh anga a lan dan te pawh posttu hian i rawn sawi law law lo ani. Bung khatnaah ni 6 chhunga Pathian thilsiam a ni indawtin a rawn sawi thuak a, bung hnihnaah mihring a siam dan bik kha chipchiar deuhin a rawn sawi leh ani mai. Chutiang chiah bawkin bung 10 naah mihring ten tawng hrang kan lo neih chhoh dan a han sawi thuak a, a bul leh a chhan ril zawk bung 11 ah hian chiang kuang deuh zawkin a rawn sawi leh ani mai.
Report this comment
8
Sihtea Says:
February 13th, 2013 at 8:21 pm
E! khai, Hnam Sakhua i la dam
a ni maw?
Report this comment
9
Hnam sakhua Says:
February 14th, 2013 at 7:22 am
Computer atangin luh ka tuma, ka la thei tlat mai. Phone atang chuan buaithlak riau a. A thu hmasa lam khi chu computer atanga a tih theih hunah kan la inchhang anga, ngaihtuah zui atana zawhna pathumna khi, tute hriata an hming kha tithang duh nge ni ang le?
Report this comment
10
donald Says:
February 14th, 2013 at 10:43 am
I buaina hi chu a ho thin angreng khawp mai. Bible hi i ring deuh roh a, i ring tluantling leh tak tak si lo hian harsatna a siam che a ni e. A then lai i han ring ve deuh uk a, thil nia i hriat ve dan leh Bible sawi a inrem thin si lova i buai i buai mai a nih kha. Lal Isua ring lo tu tan Bible hi hriatthiam chi a ni lo tih hi pawm tawp mai teh… chuan Bible hi i ring tluantling ngam lo a nih chuan ring duh lo law law la i buai lo mai ang

Ngaihtuah zui atana zawhna pathumna khi chu e, a ho lutuk.. “kan hming i tithang ang u” tih hi tawngbul lama a awmzia chu ‘hming i chher ang u’ tihna mai a ni a, khatih hunlaia midang tute emaw hriata va intih lar lam a kawk lo. Jeremia 32:20 kha lo en rawh.. “Aigupta rama thilmak leh chhinchhiahnate tia … tun thlengin i hming i chher a ni.” Khati ang kha a ni mai.

A mawl zawngin: Shah Jahana’n Taj Mahal a sa a, tun thlenga a hming a chher ang hi a ni mai e.
Report this comment
11
Awmtea Leo Khiangte Says:
February 14th, 2013 at 9:22 pm
Genesis chu han bih ve ila…
Report this comment
12
dtea Says:
February 16th, 2013 at 12:06 am
Hnam sakhua chu va reh rei deuh ve! Ka count mek ania 1, 2..kan la ngaichang mek tho che ania.. Tren tren
Report this comment
13
Dr John Says:
February 23rd, 2013 at 3:25 pm
Phak tawk leh Thiam tawk-te in ka lo sawi ve teh ang:-

1. Gen. 11:5, “Lalpa chuan, mihring faten khawpui leh in sang an siam vel chu en turin a zuk chhuk a,” tih thu hian, Pathian chu Van atanga ke-a lo chhuk-thla a nih thu sawi a tum lova. A Tawngbul lamin sawi a tum zawk chu, “to magistrates, to examine every evidence before they decree judgment and execute justice” tih lam a ni zawk. Uluk taka chhui leh belhchian lam a kawk. Hetah pawh hian Pathian chuan engkim a hre si a, engah nge a chhui chian kher a ngaih? tih zawhna a awm thei a. Pathian hian thilthleng hi a hriat-chian loh avanga chhui emaw, enchian tum emaw ni lovin, mihringte an sim theihna tur te, an in-ngaihtuah harh theihna tur hun (investigating grace period) a hawn sak a, a pe zawk a ni.

2. Bible bu an ziak hian, “THIL THLENG TAWH, LEH THLENG MEK, LEH LA THLENG TURTE” an ziak tlangpui a. A tam ber hi chu ‘thil a thlen vek hnu-a a thlen dan awmze nei taka Pathian Thlarauvin a kaihhruai dan ang zela an ziak (record)’ a ni. Pu PK-a leh Donald-a sawi ang khian, a Tlangpui zawr zawrin Thil awmdan Bung 10-ah a sawi thuak a, Bung 11-ah chuan chip-chiar deuh hlekin a sawi ta a ni (Hei hi Gen. 2 leh 3 thu kalpui dan nen pawh a inzul). Chuvangin, Gen. 11:7-a Pathianin Mihringte Tawng a tih-hran sak hi rinhlelh tur a awm lo ve.

3. Gen. 11:4, “KAN HMING I TITHANG ANG U,” tih hi Tawngbul lama a awmzia chu ‘hming i chher ang u’ (let’s make us a name/monument) tihna a ni mai. Sakhuana (idolatry) lam a khawih tel bawk. Mi an tam lutuk hunlaia hmingthanna lam ai mahin, Donald-a sawi ang khian, “Hming chher” (hun lo la kal zel tura miten an hriat a, pathian biak-a an biak hial theihna tura anmahni hming ngeia thil ropui tih an tum) kha a sawitum zawk chu a ni. He rilru (motive/attitude) hi Pathianin a haw em em a ni.

4. Gen. 10:5, “CHUNGHO ATANG CHUAN A NI, Jentailte thliarkarah te chuan anmahni ram rama an darh tak ni…” tih hi, hriat harsa lo bera ka ngaih a ni a. Post-tupa hian A PAWIMAWH CHIN ZAWNG I CHHIAR HMAIH avangin a fiah lo a ni ber mai. Genesis Ziaktu Mosia hian, Pathianin ziak tura a tih lai hian Hnam hrang hrang leh Tawng hrang hrangah an lo inthen vek tawh a, chuvangin he Tawngkam “CHUNGHO ATANG CHUAN A NI” (thil kal tawh sawina) tih hi a hmang a ni. Jentail-te lo chhuahna bul kha atlangpuiin a sawi nawn hlek a ni.

5. Ka belh ve duh mai mai chu… Gen. 10 & 11-ah hian Khawvela Tawng hrang hrang leh hnam hrang hranga kan lo chhuah tak dan tarlan a ni a. Babel insang sak ringawt kha sual a ni lova, Pathianin a haw bawk lo. Babel Insang an sak tumnaah khan “Pathian laka helna leh Pathian aia Mahni In-pathian an tumna rilru a tel a” kha tak mai kha Pathianin a huat ber leh, Tawng hial a tih-hran sakna chhan ber a ni zawk. A thui lutuk dawn a, kan hriat tawh hnu a ni tho bawk a, a historical background lam chu sawi tel lo mai ila.
Report this comment