Mizo tawng zir ang. Then 1-na

April 29th, 2011 4:10 pm by muantea

(Mahni hna bilah buai ve riauva inhriat chang a awm a, zam a zal ta riau nia inhriat chang a awm bawk. Thu ziak kawnga taimakna lamah vantlang hnuai lam nih bawk chuan mi(sual) tana ziak tur hual sa reng pawh ka up hlum zova.

A thenin za nufa lai an thawh tlin lai leh a za bi-a an chhiar tawh laiin mi(sual) tana thu thawh tur pawhin ralpui phiara phiar fe a la ngai ta zel a nih hi! mi(sual)-ah hian tawng chungchang kan sawi tam a, kan rualawt ta a ni ang e tiin Mizo tawng ziak dan chungchang ka han thawh ve ta rawih chu a ni a, kan thengah thawngah a kal lo a nih pawhin Siali khaw mawi atan tal pawh le!)

ZIRLAI : Ziak zawm leh ziak zawm loh
THLUR BING ; Thuhmabet(Prefix) leh Thuhnubet(Suffix)

Bung 1-na : Thuhmabet(Prefix)
Sawifiahna : Prefix leh suffix atana hman thumalte hi thu bet an nih rualin an mal din ve tho thin avangin zir chian leh lak hran thiam a ngai hle.

Prefix chu thumal hma lama thu bet hi a ni mai. Heng – ‘in’ leh ‘ti’ te hi an ni ber a, modified form-ah ‘ti’ chu ‘tih’ a nih avangin prefix ho chu – in, ti, inti, intih – te hi an ni ta a nih chu.
Entirna : Infak, innei, insu, inkhel, inchei, ldt..

Heng bakah hian ‘in’ hian thumal dang a siam thei a, mahse chung ho chu prefix an ni chuang lo.

Entirna : inleng, inriak, indang (fapa indang) te hi thumal hranpa an ni a, prefix an ni lo. Chutiang bawkin ‘ti’ leh ‘tih’ ah pawh heng hi thumal hran an nih avangin prefix an ni lo bawk – ‘I ti zo tawh em? / Tih theih chi a ni lo, ldt. ‘Inti’ ‘intih’ hi inhau tih nan leh inpawl (sex hmang) tih nan chauh verb-ah kan hmang.
Entirna : Engah nge in intih? Inti suh u. ldt.

Tin, thumal pakhat ‘a’ hi prefix ang takin hman theih mahse thu inkeng tel sa tlat an nih avangin then hran a buaithlak hle a ni. Prefix ang viau mahse Prefix erawh a ni lo.
Entirna : achha, achhapah, ahnekin,apiang, anazawngin, anaranin, aruangin, atalangin, asin, avangin, azarah, ldt.

Bung 2-na : Thuhnubet(Suffix)
Suffix hi thumal tawpa bet a nih avangin ‘Thuhnubet’ ka ti ve mai. Chungte chu – a, ah, awm, ho, in, na, pui, sak, san, te, thlak, tir, tu leh zia. Thuhnubet an nih avangin a behna thu nen inzawmtir ngei tur a ni. Heti hian a chiang maia ka hriat avangin an mal din hun/a hranga hman hun entirna pe zawk mai ang.

Suffix atana kan hman an mal din hun :
1. A kal ta a
2. I ipte ah chu a mawi hle mai.
Note : ‘ah’ tih hi ‘atan’ tihna thova kan hman hun a awm thin. Chung hunah chuan ziak hrang lem lovin a hmaa thu nen inzawma hman a tha ber.
Entirna : He nula hi nupuiah nei ta che

3. Heta hi ka awm e
4. Thu ho deuh deuh sawi suh
5. In in bulah zu in in elo?

Note : ‘in’ hi noun a hman a nihin ziak zawm loh tur a ni.
Entirna : Kan in, Damdawi in, Biak in, Bual in, ldt.

Tin, natna chungchangah ‘zun-in’ (suppression of urine) hi natna hming a nih avangin noun a ni a, chhiar sual palh loh nan hetia ziak hi a tha – Zun-in. Verb a nih chuan a hranga ziak tur
Entirna : Zun-in hi a hrehawm ve viau (Noun)
I zun a in elo? (verb)

6. I hliam chu a na viau em?
Note: Natna hming ni chiah lo, taksa na kan sawiin ziak zawm loh tur.
Entirna : Pum na, Kal na, Lu na, Thin na, ldt.

7. Min han pui lawk teh
8. He lung hi a sak khawp mai
9. Sang modification san te, puan fan/chhe lek leka fan duar sawina – puan san te, Sang (tall/high) modification san te, double adverb – san san te hi a hranga ziak tur a ni.
10. ‘te’ hi conjunction-a hman a nihin a hranga ziak tur a ni.

Entirna : Lala te, Liana te an lo leng.
Tin, thu tihkimna atan conjunction anga kan hmanin ziak hran tur a ni
Entirna : Intihfai te chu kan tih ngei tur alawm.

11. Heta hi ka awm, mi tir ta che
12. Tluanga’n a nupui a thlak
13. A tu ber hi nge?

Note: ‘tu’ hi Intransitive verb-ah belh loh tur. Ent. Dingtu, kaltu, zaitu, ldt. tihte hi a dik lo
negative verb-ah belh loh tur. Ent. Ring lotu, Hre lotu, ldt. tihte hi a dik lo, ‘tu’ aiah ‘te’ hman zawk tur.
Auxiliary verb ‘tawh’ nen zawm loh tur. Ent. Sawi tawhtu, Hre tawhtu, Hmu tawhtu, ldt. tihte hi a dik lo, ‘te’ emaw ‘apiang’ emaw hman mai tur.

14. Awze mite aw chu a zia (v)

(Tun atan chuan tawk phawt se, a thlarau chan leh hun atana chhunzawmah ni mai teh se)

Similar Posts:

Recent Posts:

72 Responses to “Mizo tawng zir ang. Then 1-na”

Pages: « 1 [2] Show All

  1. 51
    ultimate Says:

    Muantea te hi chu an ril lutuk a, a nupui nih pawh hautak tham a niang(fiamthu), ril ve a ngai awm em a lawm! keini kan ho sia kan bula awm chu hremhmun tlukah a ngai mai ang a! ha ha

    Report this comment

  2. 52
    muantea Says:

    ZoIITian, i ziak khi ka lo chhiar chiang lova, verb adv a nih chuan ‘na’ belhin ziak zawm vek a ngai lo. Ent. Duh luatna

    Report this comment

  3. 53
    vuaia Says:

    Ka hlawkpui lem lo nain a tha kher mai :D

    Report this comment

  4. 54
    Krista Says:

    Mizotawng hian thu ka ziak fo thin a mahse edit saktu ka neih that avangin a ziak dan dik hi ka zir duh lem lo. Mahse hei tunah chuan Vairampurah ka awm daih si a min edit saktu khan internet thiam silo a,ka che buai ngang mai. Mizo Grammar leh ziakdan bu ka birthday-a min present turin thiante ka chah ta vel mai mai a. Tunah hei post tha tak a lo awm ta hlauh a kalo save ang e. Lawmawm hle mai. A post tupa hian mizotawng hetiang em em hian a lo thiam ang tih ka ngaihtuah ngai lo saptawng bak kha chu…… (Y) (Y)

    Report this comment

  5. 55
    muantea Says:

    Ultimate, khaih! Chutiang em chu ni love, chawnghilh te, vakul te, lushai-er te an awm hi, an bulah zawng nei te ber thutin ka thu mai thin a nia.

    @Ozima, lawng, lo’ng, lovang tih chungchangah chuan ‘lo’ng’ tih chu ‘lovang’ tihna a ni mai a, ‘kan la tawng dah lawng maw’ tiha ‘lawng’ hi chu ‘lovang’ tihna a nih ka ring lo, ‘kan la tawng mial mahna’ tihna lam zawk a ni ang.

    Report this comment

  6. 56
    kilung Says:

    Tangkai hle mai, Zir atul reng ani.
    Mizotawng chuan kan tawngthei a, kan ziak dik hlei thei lo chu anih hi… like like..

    Report this comment

  7. 57
    saitawka Says:

    Nupui chu ka nei te! Thildang ka nei lian thung! (Y)
    Mak khawp mai, hmeichhia hi an len deuh leh an tum lian deuh a, an tet deuh leh an tum te deuh a! An hlauhawm dan a inang vek! :-P
    OT dal ah, ka thu ziah dan khi a dik em ang chu maw!!

    Report this comment

  8. 58
    bucko Says:

    Nia.. mizo tawng hi a har teh a nia… Ziak zawm leh zawm loh tur ah phei chuan har tak a ni..

    Report this comment

  9. 59
    megapixel Says:

    He post chu a va han tha tak êm! A chhiartuin a hriatthiam phawt chuan tia duh dan dana Mizotawng hi ziah mai mai tur a ni lo rêng a ni. Pu Muantea chu i rawn post ‘timing’ khawp mai (nge, har mah mah kan ti zawk dawn… :-) )

    Kei pawh ka zir nasat ve thin nen (Thanks to Mizo subject teacher madam @Lamka Central School: Cl-IX & X) ka tisual leh zauh thin…

    Mizo Bible leh Kristian Hla Bu te pawh hi a thu leh hla thatna piah lamah ziak zawm leh zawm loh dan zirnan a tha khawp mai.

    Report this comment

  10. 60
    Mr rualrema Says:

    ‘ziak zawm’ tih hi ‘ziah zawm’ tih tur a ni zawk lo maw? Thupui i sawi hneh a, a bengvârthlak hle mai. Hetianga post tha hi a vang ka ti. Han tang zual teh.

    Report this comment

  11. 61
    Ozima Says:

    @muantea: grammar lamah chuan ka bil tliuh tleuh khawp mai a, zawhna mawl tak pawh ni mai thei, mahse ka confuse tlat. Tin, prefix leh suffix insawi karah apostrophe ka rawn zep ve chhen, ka inthlahrung viau a, amaherawhchu (ama’rawhchu(?)) nang paw’n (nang pawh in(?)) min lo dawhthei hram a niang chu.

    ‘lawng maw’ tih leh ‘lo’vang maw’ tih chu thil hriatchian loh beiseina nei si a sawinaah ka’n dah ngawt a. A danglamna ka la man fuh meuh lo.

    Report this comment

  12. 62
    ultimate Says:

    Tak taka Muante, ka thiam loh hi i thiam tam bawk a, ka ngaisang thlawt che. Kei leh ka thian thenkhat (mi rillo ho)ngaihnawm tih zawng thin, a taka i thil tawn danglam deuh or pui deuh pa hnih khat tal lo post teh a, light deuh takin ziak la, kan chhiar chak khawp a sin.

    Report this comment

  13. 63
    muantea Says:

    @Ultimate, rilruah hi chuan hlimawm tak ziak tur chu ka thil tawn ngei ka nei khiu khiau. Mahse kei hi zawng rilrua lang ut ut nghak chi ka roh tlat!

    Ozima, #61, i han sawi chu a nih duh hmel khawp mai.

    Report this comment

  14. 64
    shailendra Says:

    Khai aw, he ‘post’ chu. Ka mamawh ber a nih hi. Thuziak inzawm tur leh inzawm lo tur hi ka buaina ber a ni. Muangchangin han chhiar teh ang… (Y)

    Report this comment

  15. 65
    Benny Says:

    Nia, ziah hi ziak modifide form ah pawm a ni a. Mizo tawng zirlaibu ah pawh hman a ni e.

    Report this comment

  16. 66
    vakul Says:

    E heu ka va tla ta ve. I post tha hle mai, Misual.com-a post tam tak hi chuan kan uluk tawk lo hi ka ti khawp mai; ka lo sawi ve chuan i next chapter-ah ka lo luh khalh palh ang che.

    Han ziak zel teh kan lo save zel ang.

    Hman zan ka mu thei lo khan he thil hi ka lo ngaihtuah ve mai mai pek a. Mizo tawng thu fun tam theih zia hi. “ka khawng fawk ang che” kan tih hian awmzia a lo va keng tam em
    1) A khawnna kha tihrawl leh thau awm lohna ruh hnaih lam a nih duh hmel.
    2) A khawn danah na lutuk chhiat phah theihna ni si lo, na lo lutuk ni si lo a nih duh hmel.
    3) A khawnna kha thir emaw thing emaw thil sakhat a ni ang.
    4) A khawnna kha a lian lutuk thei lo.

    Heti ang chi hi a lo tam khawp mai, ngaihtuah peih chuan.

    Report this comment

  17. 67
    thlengtlawrzuana Says:

    Muante i taimakna leh ihriatna hi ka fak ache,thuzawm leh zawm loh tur pawh ka hrehrang ve mang silo,mi thuziak han sawisel ve tur chuan ka insit viau na a,second para a mizo tawng i ziakzawm lo hi ka lo ziakzawm thin a,ziahzawm loh tur em ni?

    Report this comment

  18. 68
    Ozima Says:

    Hetiang post hi that teh lul nen keimahah chuan comment min ti tim dui zel…. mahse mi’n min correct hi chuan ka lawm viau.

    Report this comment

  19. 69
    Kawnga Says:

    Mizo tawng hi ka thiam ve viau thin emaw ka intih ve thin lai kha a rei ta khawp mai… :-)

    Report this comment

  20. 70
    aduhi Says:

    A va han ril in a va han tha em! Hrethiam tur ringawt pawn uluk taka chhiar a ngai.

    Report this comment

  21. 71
    lrlawma Says:

    Pu Muante Ka chhiar chhuak pap pap mai maw le! A va ril tha trhim trham ve le!

    Report this comment

  22. 72
    Bawngtlaia Says:

    Post tha tak a ni . He site-a ka luh chhan chu mizotawng ziah dan dik ka zir duh vang a ni a. Pu Muante, i ti lawmawm e, rawn ziak zel teh khai, ka theng thawngah a lut a nia. (Y)(Y)(Y)

    Report this comment

Pages: « 1 [2] Show All

Leave a Reply

You must be logged in to post a comment.