January 2013, Mizo(ram) Diary

February 16th, 2013 6:13 am by chhana

1st. Tuesday: Silchar lam atanga Aizawl pan Recovery Van, MZ01C-3869 Majakia Husain Barbuaia, Silchar ta, Serkhana hnathawk tura kal chu Rengtekawn FCI Godown pelh hnu hret Gosen vengah chesualin kawng thlangah feet 200 vel a lum a, he motor-a chuang K Lalvenmawia (28) s/o Lalhmangaihna, Chhawrtui, Kolasib leh Silchar private bus conductor leh Calvin Lalrochunga, Haflong khaw chhuak nia hriat, Kolasib-a inhlawhfa chu a hmunah an thi a, motor khalhtu handyman-te’n hliam na tak an tuarin Kolasib Hospital-ah admit an ni.

2nd. Wednesday: Minister Lalsawta chuan ECOSOC, UNDPI, UNCED, UNICEF, UNESCO hnuaia International Association of Educa¬tors for World Peace (IAEWP) atangin United Nations Affiliated Lifetime Achievement Award a dawng. Award hi Lalsawta aiawhin Delhi Mizoram House-a Resident Commissioner, Dharmendra-a’n Delhi-a 33rd World Management Congress-ah Ambassador of Rwanda, HE Williams Nkurunziza, Embassy of Peru-a Head of Chancery, Enrique Noria Freyre leh, Indira Gandhi Technological and Medical Sciences University-a Chancellor, Dr PR Trivedi te kutatangin a dawng a ni.

3rd. Thursday: Mizoram Excise & Narcotic-te chuan Rangvamual MASSA steel fabrication atangin Pseudoephedrin nia hriat tablet 52,60,800 leh a neitu nia hriat MD Ali Ahmed Choudury (26) S/o Abdul Ali Choudury of Lalpani, New Khobrabad, Cachar District, Assam an man. Heng Pseudoephedrin tablet ni a hriat te hi rawng bur Reliance tin 40 chhungah kheh sa veka dah a ni a, a tin tel loin a damdawi hlang hi tin 1 ah kg 16 a awm a, a vaiin he damdawi hi kg 640 a ni. Excise & Narcotic lam chhut danin heng damdawi an lakna man hi Rs. 57,86,880/- vel a ni a, an pek lehna tur hi Rs. 2,63,04,000/- vel a ni .

4th. Friday: Dr.C Sawmliana s/o Lalduha (L), Chhingchhip Mualpui khua, Central Institute of Mining & Fuel Research (CIM&FR) Dhanbad-a Scientist hna thawk chu Scientist E-2 ah a kaisang a, Principal Scientist tih a ni. Dr. C Sawmliana hi a hnathawh that chungchuan vangin Scintist E-1 atanga E-2 kaisang zingah ‘Super Merit’-in a kaisang bik a; year of allotment/effective date pawh promotion dan pangngaiah chuan 2010 tur a nih laiin ani chu 2009 atanga kaisantir bik a ni. A batch puite chu 2010 leh 2011 pek an ni a, a aia senior zawk engemaw zat kai khalhin, a ni anga super merit-a kai hi CIM&FR a thawk zingah tun hma pawhin pali chauh an la awm. Dr. C Sawma hi kum 1999 khan Scientist B-ah lut in, a hun takah C leh E-1 a kaisangin, tunah duhsak bik vangin, kum 2010-a kaisang anga dah tur chu 2009-ah an tih hma sak a ni. Scientist E-2 hi Pay Band-4, Grade Pay Rs. 8,700 niin Mizoram sorkar angah a tlukpui chu Jt. Secretary, Director, SE leh a dangte an ni. Kum 2014-ah chuan Scientist F-a kaisang leh tura beisei a ni. Dr. C Sawmliana hi Durtlang Leitan zauh hnathawh khan PWD a pui a, World Bank kawng, Midum kham lai pawh khan Mizoram PWD chu a pui leh a, a hnathawh that vangin Zonet Cable TV pawhin chawimawina a lo pe tawh a ni.

5th. Saturday: Road Transport and Highway Ministry-a Regional Officer, Guwahati-a awm, Mizoram-a hna thawh dan enkawltu, Sudip Chaudhury chuan National Highway 54 leh National Highway 154-a hna thawh dante chu a hmunah a enfiah. Sudip chuan Badarpur- Bairabi- Bilkhawthlir thlun zawmtu, National Highway No.154, double lane a siam mek chu a enfiah a, he kawng hi Sweety Real Estate, GP Project leh Bagia Kalita ten double lane-in an siam mek a ni.

6th. Sunday: Synod Mission Board bul tumin Bungkawn Kohhran Biak-Inah Missionary 111 tirh chhuah an ni a, heng mite hi Pastor 8 leh Contract Missionary 103 an ni a, Synod Moderator, Rev. Lalramliana Pachuau in tihrchhuahna thu leh Pathian thuchah a sawi a ni. He inkhawm, Synod Mission Board Secretary, Rev.Lalchhuanmawia kaihhruaiah hian Synod Mission Board Asst.Coordinator, Pu Lalbiakenga Fanai-in tirh chhuah turte chanchin sawiin mipuite a hmel hriattir a ni. Hei hi Mizoram Kohhranin tum khata Missionary a tirh chhuah tam ber tum a tling a ni.

7th. Monday: Theiriata ZD Lalfakkima s/o ZD Zomuana in, Assam type chu bungrua chuh hman awm loin a kâng ral a, mihring thi leh hliam an awm lo. Kangmei a chhuah tan lai hian inah tumah an awm lo a, a hmu hmasatute chuan bawlhhlawh kâng emaw an tih avangin an thelh lawk lo a, an hriat chhuah chuan thelh rual lohin a lo kâng nasa tawh a ni. Fire department an pun a, kangthelhtu pawlte’n an thelh mit a ni. In kanna hmun hi bialtu MLA, S Laldingliana, Par¬liamentary Secretary-in a tlawh nghal a, chhawm¬dawl hna thawktu khawtlangin a tul anga an hman atan Rs. 5,000/- a pe a, in sak thatna tur a tul anga bawhzuipui a tum thu a sawi. Lunglei DC aiawhin SDC, Zathangliana pawh a hmunah kalin, chhawmdawlna Rs. 35,000/- leh silpauline pathum a pe nghal a; BCM Relief & Development-in Rs. 3,000/- an pe bawk.

8th. Tuesday: Champhai district-a Lungphunlian khuaah pick-up, buhfai phur a chesual a, C Lalthlengliana (67) leh Zothanzauva (9) s/o Ramngaihzuala, Lungphunlian khua ve ve an thi. Pick-up hian Hnahlan atangin Lungphunliana dah tur buhfai a phur a, kawng chhoa a tlân laiin hnung zawngin a tawlh lêt thut a, motor chu inbinin, a hnunga chuang C Lalthlengliana leh Zothanzauva te chu buhfai leh motor-in a delh zui a ni. Motor-ah hian mi paruk an chuang a, naupang pakhatin hliam a tuar a, ngaihtuah awm lutuk erawh a ni lo.

9th. Wednesday: Aijal Club-ah ni hnih awh tur, North East Writers Meet tan a ni a, hmarchhak state hrang hranga thu ziak mi eng emaw zat an rawn kal. North East Writers Meet hi North East Writers Forum, Mi¬zoram Chapter huaihawt a ni a; Mizoram pawn atangin thu ziak mi paruk an tel a, Mizoram atangin mi eng emaw zat an tel bawk. Meet-a telte hi hnathawh dang nei loa thuziah lama inhmang tawp te, college leh university-a zirtirtute an ni. Meet-ah hian thu leh hla chungchang huam zau taka sawiho a ni a; thu leh hla, a bikin English-a thuziah tihhmasawn leh tihlâr dan turte an sawiho a ni.

10th. Thursday: Former Legislators Association of Mizoram (FLAM) meeting chuan, Mizoram tana kawlphetha lei leh sem darh hna corporation kuta hlan chu a thuphungin tha an ti a, chutih rualin, firm dang nena buk theih loha firm pakhat dilna chauh ngaihtuahsak erawh chu tha an tih loh thu an tarlang. FLAM meeting chuan thuchhuah siamin, “Power lei leh hralh chungchangah, corporation kuta thuneihna pek hi a thuphungin tha kan ti a, mahse firm dangte nena bûk theih hauh loha firm pakhat dilna chauh ngaihtuah hi chu sorkar kalphung a ni lo. Tuna an thlan, Eternity Partners hian dik taka a thawh kan beisei,” a ti.

11th. Friday: Aizawl-a kum 17 kalta chhunga khaw vawh ber tum a ni a, a vawh ber laiin celcius degree 5.6 a ni a, a lum ber laiin degree 18.2 a ni. Planning Dept hnuaia Science and Technology Wing Principal Scientific Officer Dr Vanlalzara sawi danin, Mizorama khawlum leh vawt tehna an hman tan kum 1996 atanga enin, tun hi khaw vawh ber tum a tling a ni. Champhai ah chuan vawt zualin khawlum lai berin celsius degree 12.6 a ni a, a vawh ber laiin degree 6.5 a ni a, vur tla hmuh tur pawh a awm chho reng a, Serchhip Dist ah chuan vur tlakna thin North Vanlaiphai leh Thenzawl bakah Serchhip leh Keitum inkar Dawngzawl bul Serchhip Dist. a Lungpho kawn velah te pawh vur tla hmuh tur a bawk.

12th. Saturday: Lalchhuanawma [24] s/o H.Lalzirliana Tlangnuam chu ramhnuaiah thi a chhar a ni. Lalchhuanawma ruang hi Tlangnuam field thlang Forest reserved chhungah hmuh ani a, Lalchhuanawma hi kawng tum ah thu chunga a thi chu a thlanga thingphur ten an hmuh hnu ah midang pun in an finfiah ta a ni. Lalchhuanawma hian Parvon Spas Capsules 118 a lo ah bak ah a bul ah No-4 bur ruak hmuh a nih bawk a vang te, a mah hi hetiang lama fihlim lo a nih vang leh a taksa pawn lam ah engmah pem hmuh tur a awm loh a vangin Over Dose ah ngaih a ni a ,a chhungte pawh in chu chu pawm in Posmortem tilova phum an dil a, chuvangin postmortem lohva phum a ni ang.

13th. Sunday: Zofate zinga mi talented berte zinga mi Gnat Lalrinchhana Hnamte, zaithiam, infiamna chi hrang hranga a ber nihna hauh thei deuh reng, hleitling leh hmeltha chu in chhawng atanga a tlak avangin a hliam tuar lovin damdawi inah a boral. Amah hi tlem lai deuha Tanhril V/C Pu Lalpiangliana thihna chungchanga mawhphurtute zinga mi nia ngai mi engemawzat an awm avangin hetianga an boral takah hian ‘thih dan pangngai lo deuha a thih ka ring reng a ni’ tih ang zawnga sawina a tam hle.

14th. Monday: Ramthar Venga Chhunkunga in, Assam type chu bungrua chuh hman lohin a kâng a, a kan ral hmain tlawmngai kal khawmte leh fire department kangthelh motor hmanga thelh mih a ni. He kângmei chhuakah hian mihring thi leh hliam an awm lo. Chhunkunga in hi chhawng hnih a ni a, a chhawng chung zawkah Chhunkunga te chhungkua awmin, chhawng hnuai zawkah Zamveli te chhungkua an awm a; kângmei hi in chhawng chung zawk atanga chhuak a ni.

15th. Tuesday: Kumin tawp lama Mizoram Assembly inthlanpui lo awm tura electoral roll hman tur chu tihchuah a ni a; Mizoram pumah vote nei mi 6,80,255 an awm a, electoral roll ennawn dawna roll tichhuaha voter zat atangin voter 27,836 (4.27%)-in a pung. Kumin atana electoral roll ennawn dawna draft roll tihchhuahah voter 6,52,419 an awm a; electoral roll tharah hian thun luh dil mi 60,343 awmin, chung zinga 43,613 chu pawm a ni. Chutih laiin, roll atanga paih dilna (objection) 18,291 lutin, chung zinga 15,154 chu pawm a ni a; mitthi tawh leh chhan dang vanga paih ngai 623 a awm bawk. Electoral roll thar bera voter zawng zawng 6,80,255 zinga 3,34,083 chu mipa niin, 3,45,172 chu hmeichhia an ni a, mipa aia hmeichhia an tam zawkna hi voter 12,089 a ni. Assembly constituency zingah, Tuichawng bialah voter tam berin, 26,008 an ni a, voter tlem berna, Thorang bialah chuan voter 12,232 an ni. Final electoral roll-ah hian Mamit district-a voter punna zat (percentage) a sang ber a, voter 3,707 (7.18%)-in an pung a; voter pun tlemna ber, Champhai district-ah voter 2,125 (2.36%) chauhin an pung thung. Constituency zingah, Mamit district-a Hachhek constituency-ah voter punna a sang ber a, voter 1,861 (10.11%)-in an pung. Hetih lai hian, Saiha district-a Palak constituency-ah voter punna a tlem ber a, voter 260 (1.71%)-in an pung a ni.

16th. Wednesday: Lunglei Zotlanga BSF camp bulah truck AS-11 4226 leh Karizma bike an insû a, bike hnunga chuang, RK Lalthlan¬awmi (22) d/o RK Zosanga, College Veng, Lunglei chu truck-in a chîl hlum. Karizma bike hi Pukpui lam atanga Zotlang pana kawngpui pangngaia tlân an ni a, BSF camp atanga truck lo tlân chhuak chu an sû a, bike atanga RK Lalthlanawmi per chhuak chu truck-in a chíl zui ta a ni.

17th. Thursday: Rampum huapa Ministry of Women and Child Development-in Anganwadi Worker thawkthate hnena chawimawina tangkafai a pek thin chu Mizoram chhunga thawktha mi 5 te hnenah Social Welfare Minister Pu. P.C. Lalthanliana’n a hlan. He lawmman semna pual inkhawm hi Vanapa Hall-ah neih a ni a, Social Welfare Director Pi Vanlaldini kaihhruaiah hian Minister Pu. P.C. Lalthanliana leh Social Welfare Commissioner & Secretary Pu Ranbir-ten thu an sawi. State tinah kumtin Anganwadi Worker thawk tha 5 thlan a ni thin a, Mizoram atanga he lawmman dawngtute chu 1). B.Sangthuami, Khawzawl Anganwadi Center 3, Khawzawl ICDS; 2). Lalhmunmawii, Durtlang North-I Anganwadi Center, Tlangnuam ICDS; 3). Hmingthansangi, Tualcheng Anganwadi Center Champhai ICDS; 4). Tlangchhuanmawii, Zawngin Anganwadi Center I, Phullen ICDS leh 5). Zohmingthangi, Saron Veng Anganwadi Center-II, Urban ICDS te an ni a. Chawimawina thuziak leh tangkafai cheng 5000/- theuh an dawng a, Minister-in lawmpuina thilpek Mizo handloom bag a hranpain a pe bawk a ni. Tun dinhmunah hian Anganwadi Center 1980 leh ICDS Project kalpui mek 27 a awm a, Anganwadi Center 252 chu sawrkar laipuiah dil mek a ni.

18th. Friday: Mizoram Police leh Tripura Police hotute chuan Mamit DC Conference Hall-ah DIG level meeting an nei a; state pahnihte inkara thawhhona tur hrang hrangte an sawiho.Meeting-ah hian Mizoram police atangin DIG (northern Range), C Zorammuana, Mamit SP RD Chawngthu, 4th. IR Commandant Dingluaia leh police hotu dangte an tel a; Tripura police atangin DIG Saurab Tripathi, Dharmanagar SP, BK Nath leh Kanchanpur SDPO-te an tel a ni.

19th. Saturday: Mizorama Kristian hmasaten a huhova Baptisma an channa hmasa ber, Lunglei bul, Nghasih luia Baptisma channa hmun panna tur kawng chu Parliamentary Secretary, Pu S. Laldingliana hova laih tan a ni. Sethlun Village Monument Committee ruahman anga he kawng laih tanna-ah hian Lunglei South Bialtu MLA, Pu S. Laldingliana chuan lei a chek hmasa ber a ni. Kawng laih tanna inkhawmah Pu S. Laldingliana chuan, ‘Chanchin tha vanga Zofaten chhandamna thu an hria te, kawng hrang hranga chak taka hma an sawnte chu thil chhinchhiah tlak a ni’ a ti a, he hmun pawimawh humhalh tura hma lakna hi politics zawnga lak ni lo se a duh thu sawiin, ‘he thilah hian Lal Isua chu ropui ber rawh se’ a ti a ni. Parliamentary Secretary chuan, hemi hmun panna kawng laih a nih theihna tura hma latute, hnatlanga thawkte, JCB thawhtute leh an ram phal taka petu mimal chungah lawmthu a sawi bawk. He inkhawm hi Sethlun Branch YMA Vice President, Pu F.Lalramsanga’n a kaihruai a ni. Mizorama ringtu hmasa-ten a huhova Baptisma an chan ni hi kum 1904, January ni 20 a ni a, Missionary hmasa, Pu Buanga chhinchhiah danin hemi tum hian Sethlun Kohhran Inkhawmpuia kal, mi 23-te chu Nghasih luiah hian a huhovin Baptisma a chantir a ni tih leh hei hi Mizo ringtu hmasaten a huhova Baptisma an chan hmasak ber a ni tih a ziak a ni.

20th. Sunday: Lawngtlai atanga Saiha panna kawngpui kama awm Sihtlang khuaa Remlala (33) S/o Chhawnthanga chu Sumo MZ- 07 -1814 in a hnawl a, Damdawi in panpui anih hnuin a boral. Zing dar 9:30 velah Remlala hi an in atangin a chhuak a, kawngchhuka a kal lai in an lam pana Sumo lokal chu kawng a kian a, kawng kual laiah Sumo chu kual zo lo in, a back leh a, a tlan leh tur chu chesualin mi in bang a su a, Remlala chu bangah nawr betin, inchhungah a nawr lut ta a, a mal, a ban leh a pumah sumo hian a chil ta a ni. Sumo hi Sihtlang khua Lalherliana ta ani. Remlala hian a nupui leh fa pakhat a kalsan.

21st. Monday: Ministry of Home Affairs, Director General of Civil Defence in India ram puma neih tura a ruahman angin Aizawl leh District khawpui hrang hrangahte Fire & Evacuation Drill chu Fire & Emergency Services te huaihawtin neih a nl a. He Drill in a tum ber chu kangmei leh chhiatrupna thil a lo thlen a lo hmachhawn dan inzirtirna a ni a. Fire & Evacuation Drill neihna hmunah hian Fire & Emergency Services Officer- te chu he Drill neih pui tur hian insem darh a ni a. Health Department atanga First Aid team te leh District Police-te pawhin he Drill hi tha takin an tawiawm a. He Drill hi heng School thlan bikah te hian neih a ni:-
1) Govt Central Higher Secondary School, Aizawl.
2) Govt Gandhi Memorial High School, Champhai.
3) Govt Kolasib High School, Kolasib.
4) Govt Mamit High School, Mamit.
5) Silver Mount School, Lunglei leh
6) Zasai High School, Saiha ahte hian.

22nd: Tuesday: Serkhan-Bagha kawng laih mekah Bukpui khawdaia kawng laitu, Hitachi handyman, Lalkohchhuaha [21] s/o Lalrama chu kawng ko lei chimin a chhilh a; a hmunah hian a thi nghal. Lalkohchhuaha zui Hitachi hian contractor Lalchungnunga {Laltea} a hna thawkin kawng a lai a; Lalkohchhuaha hi Hitachi chunga a thut laiin kawng ko a chim a; ko chim chuan a chhilh ta a ni.

23rd. Wednesday: Lunglei District High Powered Committee (HPC) chuan Vice Chairman, Joseph Lalhimpuia hoin CMO Conference Hall-ah kum 2008-2012 chhunga HPC Annual Plan hmanga hmasawnna hna hrang hrang thawh dan an thlirlet. Lunglei HPC annual plan thlirletnaah Chief Planning Officer, Dr Lalrinchhana’n Annual Plan 2012-13 chhunga hnathawh dante a sawifiah a; Lunglei district chhunga officer-te’n an hmachhawp leh ngaih¬dante an sawi bawk. Lunglei HPC tan hian kum 2008-12 thleng khan Annual Plan pawisa cheng nuai 2,025/- pek a ni a; kum 2012-13 ah cheng nuai 600/- ruahmansak a ni bawk. Lunglei HPC-ah hian official leh non-official member paruk an awm a, Lunglei DC chu Member-Secretary a ni.

24th. Thursday: NLUP hnuaia bawng vulh thlang tute hnena pek tur Ludhiana (Haryana) leh Karnel (Punjab) atanga bawng lakte chu Mizoram thlenpui anni. Bawngte hi 60 an nia; Thingdawla Quarantine Set (ran natna laka venhim nana dahhranna) dah anni anga; doctor thiam rualten an vil dawn a ni. Tun tuma bawng an rawn lakluhte hi doctor thiam rual mi parukin kawngah an rawn vil chhova; an awmna an chhuahsan hmain a hma anga buaina an neih loh nan FMD venna pek vek anni. Hetih mek lai hian bawng dang pawh rawn kalpui tura buatsaih mek engemawzat a awm bawk.

25th. Friday: Kristian Thalai Pawl, pastor bial hrang hrangte chuan bial cofn. an hmang tan a; he cofn. hian. tun Pathianni lo awm tur thleng a awh ang. Cofn. hi remchan loh na avanga hun danga hmang tur an awm bawk. Bial KTP Cofn. hi Central KTP hruaituten hmun hrang hrangah in semdarhin an hmanpui hlawm.

26th. Saturday: India ram Republic Day vawi 64-na Ni a ni a; India ram hmun dangte ang bawkin Mizoram-ah pawh he ni hi khawpui hrang hrangah urhsun taka hman a ni. He ni hi Aizawl-ah chuan AR Ground-ah hman a ni a; zing dar 9.00 khan Mizoram Governor Pu Vakkom Purushothaman chuan Hnam Puanzar pawt pharhin, parade contingent 27-ten Hnam Puanzar chibai an buk chu a chhanglet a ni. He inkhawmah hian Chief Minister Pu Lal Thanhawla bakah Minister te, Parliamentray Secretary te, MLA-te, official-te, zirlaite leh mipui thahnem tak an tel a ni. Hemi hnu hian Governor chuan a chenna Raj Bhavan-ah sawmbikte tan thingpui ruai a buatsaih a ni.

27th. Sunday: Mizoram buai chhah laia intihhlimna awm miahloh laia kan intihhlimna neihchhun lehkhabu chhiar tur, cowboy leh saptawng thawnthu chi hrang hrang lettu Lalsangliana [79] chu a chenna Kulikawnah a thi. Amah hi Mizo H/S a zirtirtu thin a ni. Sap thawnthu 50 chuang heng: Sudden, Count of monte cristo leh Dollar-tihte a letling a ni.

28th. Monday: Lunglei District Level Vigilance & Monitoring Committee chu an Chairman, Lok Sabha MP, CL Ruala hoin Lunglei Circuit House Conference Hall-ah an thu¬khawm a; CL Ruala chuan, kumina thál lo thleng turah, kângmei chhuak thei tha taka veng turin mipuite leh department hrang hrang hotute a chah. Lok Sabha MP chuan, sorkar laipuiin mi retheite chawikanna tura scheme hrang hrang a ruahman chu dik taka rah chhuah tura hman a tul thu a sawi a, hmasawnna tur leh mi retheite khaichhuahna tur sum hmuhte dik taka hmang turin hnathawktute chu a chah a ni. Meeting-ah hian Parliamentary Secretary, S Laldingliana, District Bawrhsap V Sapchhunga leh sorkar department hrang hrang hotute an tel a; kum 2012-13 chhunga sorkar laipuiin hmasawnna tur scheme a siam hrang hrangte Mizorama thawh dan an thlirho bawk.

29th. Tuesday: Kanhmun VCP, Sapmawia chu NREGS sum eirua puh a nih avangin Anti Corruption Bareau-in an man a; court a hruai a nih hnuah Central Jail-ah dahluh nghal a ni. Kum 2009-12 chhunga Kanhmun khaw NREGS sum eiruah Sapmawia puhin, Kanhmun Joint Action Comt. chuan ACB-ah FIR a thehlut a; Sapmawia thil tih dan an duhloh avangin an khuaah kawngte pawh an lo zawh tawh a ni. Sapmawia hian 28th. December 2012 khan anticipatiory bail a dil a; hemi chungchang hi court chuan 21st. Jan. khan a hnawl avangin ACB te chuan Sapmawia man turin Kanhmun an pan nghal a; Kanhmun an thlen hmain Aizawlah a awm tih an hriat leh si avangin Aizawlah an man ta a ni. Sapmawia hi kum 2009-12 chhunga Zawlnuam BDO atanga NREGS sum an hmuh Rs 32,52,385/- atangin wages component Rs 4,66,385/- eirua puh a ni.

30th. Wednesday: K.Lallawmkimi [20] d/o K.Lalangliana[L] leh Lalchhandami [24] K.Lalbiakliana [L] Bethlehem Vengthlang mi ve vete chuan Bethlehem Veng, Aizawla Lalrawni w/o Hrangtawna [L] in, Bethlehem Veng leh College Vengah motor pakua –te an hal a; chhan tlak awm lovin an kang chhe vek. College Veng leh Bethlehem Veng inrina bul, Bethlehem Veng chinah R Van¬hnuaithanga Chevrolet car, Bethlehem Vengah tho, R Vanhnuaithanga in chhak garage-a bike leh scooty-te pawh halin hei erawh chu a kan nasat hmain thelh mih hman a ni.

31st. Thursday: India leh Bangladesh inkara in unauna tha zawk a awm theih na tur atana hmalakna chi khat atan India sipai BSF leh Bangladesh sipai (Border Guard Bangladesh) te chuan Khawthlangtuipuiah lawngleng inkarsiak (Boat Racing Competition) an buatsaih a; Ram pahnihte zalen takin an in kalpawh. Boat Racing Competition hi Bangladesh sorkar atangin State Minister i/c Chitagong, Dipankar Talukdar leh Expantriates Welfare and Overseas Employment Minister, Khandker Mosharraf Hossain-te leh Mizoram sorkar-a Minister, Nihar Kamti Chakma-ten an telpui. India-Bangladesh Friendship Boat Race hi Khawthlangtuipui, Tlabung atanga lui mawng lam km li vela hla, Thekanduar bulah neih a nia; ram pahniha mipuite hnam ziarang pholang thei zawngin prog. duan a ni. Inelnaah hian Bangladesh pahnih atangin team pasarih leh India atangin team panga an tel a; team khatah member 25 zel an awm a; a pumpuiah Bangladesh Barkan chu pakhatna anni. He hunah hian India (Mizoram) leh Bangladesh atangin mi 6,000 vel an pungkhawm a; mipuite chu zalen taka in kalpawh tawnin an hlim tlang hle.