mi(sual).com

Kan thil tawn mek, rapthlak tak takte hi ngaihtuah loh tum ngial pawhin thluakah hian min luh ngut ngut ṭhin. Keini ang mawlah pawh mawl chin tawk hre lo tan chuan eng hi nge veia vei loh tur tih pawh kan thliar thiam mang lo.

Kan tunlai boruak tawn mek hi kan hre ṭheuh ang a; pawngsual, inthah, mahni intihlum, khuangcher bo, eirukna leh thatchhiatna hian kan ram hi a suar tluan titih der tawh nia! Heng lo inṭanna tam zawk hi chu naupan/tleirawl laia nun uluk loh vang leh boruak tawnin a zir loh vang a ni chawk.

Ram tam tak hlawhtlinna chhan hi naupangte an enkawl uluk vang ti ila a sual tam lo ngei ang. Ṭum khat seminar kan neihnaah chuan tunlai tleirawl/ṭhalai tam takte hian sex hman hi an hreh lo va (tlangval zingah 80% vel leh nula zingah 30% velin nupui pasal neih hmain sex hman an hreh loh thu college naupang zinga research aṭangin a lang), chutih laiin hahdam leh nuam taka awm an duh leh lawi si tih tleirawl ho ngaihdan aṭang ngeiin kan hmuchhuak a. Nalh an duh a, chumi avang chuan damdawi an ei nasa a, midang ngaihsak ai chuan anmahni ngaihsak nih an duh em em a, ngaihsak ni lova an inhriat chuan an nunah harsatna nasa tak a thleng ṭhin. Tin, thil ngai hi an ning zung zung a, chuvang chuan thil thar – dress, hairstyle, handset, etc. – neih an duh ṭhin.

Hengte hian nawmsakna a hring a, thil mawi leh ṭha hriain an duh changkang em em a ni. A awmzia takah chuan tunlai ṭhalaite hi nu leh paten kan chawm hneh avang hian an ‘materialist’ lutuk tawh tihna a ni. Chhungril (mental) lam kan ngaihthah a, pawnlamah mawina kan ngai pawimawh fo. Tunlai ṭhalai tam takte pawh hi pawnlama lang mawi fu, mahse nun hlimna thuruk tak tak nei si lo, a ruka rilru hahna nei tam tak an awm ngeiin a rinawm.

Hna thawh kan inzirtir nep tial tial a, hei hian awlsam taka sum hmuh duhna rilru a chawk tho a, eirukna leh rinawm lohna a hring bawk ṭhin. Rim taka thawka mahni intodelh tumna rilru kan put hma loh chuan midangteah kan innghat (depend) reng ang a, chu chuan kan ram economy a tiṭhuanawm ang a, kan hmalam hun chu a thim viau maithei bawk.

Tuna puitlingte hi chu nakin lawkah kan la liam ang a, kan ram nghahfak tia kan sawi ṭhin – naupang/tleirawlte hian ram an rawn hruai ve hunah kan ram hian hmasawnna duhawm tak a neih theih nan tun aṭang hian an thinlungah chi kan tuh a ngai a ni. Heng mite hruai khawm a, mi dik, mi ṭha leh mi rinawm ni tura siam turin chhungkua, kohhran, khawtlang leh sawrkar thleng hian tihtur pawimawh tak kan nei.

Tin, mi mangang, mi beidawng leh harsatna tawk kan ṭhalaite hian râwn tur ṭha leh rin ngam tak tak NGO emaw Kohhran emaw pawh an nei lo tih thu ka hriat hian mak ka ti hle. Heti ang lampang rawngkai NGO te pawh kan nei ve fer fur-in ka lo hria a, mahse kan ṭhalai tam takte hian an ring ngam tak tak lo niawm tak a ni. Pathian avangin unau, nu leh pa leh pi leh pu kan inti ṭheuh va, mahse dik tak chuan tunlai kohhranah hian kan ṭhalai tam tak, harsatna tawkten rinna an nghat ngam tlat lo. Harsatna zawng zawng thlen ngamna leh nun zawng zawng bun ruah ngamna kohhran hi tunlai Zoram-a kan mamawh ber pakhat chu a tling a ni. He thu hian Kohhran mawng pawh thui tak a hlim ve hialin ka ring.

Khawtlangah te pawh Village Council/Local Council huam chhungah heng ṭhalai nun harsatna tawk mekte chhanchhuak tur hian trainer duhawm tak, mite rinngam tur kan train chhuah te pawh a hun tawh hle. Chuti ang mi tur chu veng tin hian kan neih ngei a rinawm a, a bik taka train tir a, khawtlang sum lai paia an lawmman tur siamsak hial pawh thil ṭha tak a ni ngei ang. Sawrkar chuan a theih tawkah a tihtur ang chu ti ve bawk mah se, heng pawl lian tham leh zau lutuk, mi chi hrang hrang luh chhuahna hmunah hi chuan mi tam takten rinna an nghat har ṭhin. Chuvangin chhungkua, kohhran (ṭhalai huang) leh khawtlangah te hian nasa taka ṭan kan lak a ngai a ni.

Tunlai naupang/tleirawlte khawvel changkannain a ei ral mek, thil ṭha hre em em leh neih zel duh mi, mahni tana ṭha tur hre leh si lo. Ṭhing nih hlau reng renga hun hmang, materialist lutuk tawhte hi nun kawng dika hruai leh turin mi tinte hian mawhphurhna kan nei. Kan ram nghahfak tia kan lo chhal ṭhinte hian lehkha thiamin zir sang fu mah se, anmahni chauh an inngaihtuah ṭhin chuan tuna kan phun kan phun ang hian kan tu leh fate pawh an hruaitute lakah an rawn la phun ve zel ang. An la rawn inphun tlei ve mai mai ang tih a hlauhawm hle. Kan ram hmasawnna kawnga hruai tur chuan tuna naupang/tleirawlte aṭanga bul kan ṭan a ngai a ni.

Similar Posts:

• Thalai ramveitute intawkkhawm dawn
• Pasal neih vanga kohhran thlak…?
• Duhber chu mutpui hmiah mai tur! (RV pawh nise.. Norway pawh nise..)
• Thalai kumthar Project atan enge?
• In run thu leh Piracy Chungchang

Recent Posts:

• Thlipui vawt!
• TIHDAMNA MAK
• 2013 Mizoram
• Kristian-te Tiduhdahtu Rome Emperor-Te {Sunday Pual}
• Zawi Te-in Ka Kal Dem Dem Tawh Ang

This entry was posted on Tuesday, April 23rd, 2013 at 3:56 pm and is filed under Lifestyle, Mizo Society & Culture, Mizoram, Opinion. You can follow any responses to this entry through the RSS 2.0 feed. You can leave a response, or trackback from your own site.