mi(sual).com

Gospel Centenary lawm turin hla kan zir a. Kohhranten project ah neiin KHB a mi hla sak ngai loh deuh deuh kan zir bawk a. “Galilee ah Lalpa Isua zirtir pahin a leng bawk thin” tih te kha a thu a ulh euh oh nen kan sa ve tham tham thin kha a nia. Centenary zaipawlin hla kan han zir a. Kan conductor chalkawlh khan “Lalpa ropuina” tih kha min han zirtir a. A slur a sak dan kha a sipai khawp a.”A lo la la-a-a-ang ang’ tih lai phei chu a sa sawt awk awk mai a. Mahse khatia sa ve mai tur kha kan ni lawi si. Kan hotupa min zirtir dan a ni tlat alawm. Mahse tuan tul vangin vawi tam zir thei ka ni ta lova. Centenary zaipawl member ni ve tepin ka awm a. Ka ni ta lo a ni. Ka vui love. Vanneia siamin Usher ah min la telh ve hram a. Dr.HLa hnuaiah trening kan nei a. A hneh sawh teh e. Centenary programme chu Sipai lammual ah hmangin kan hmanhlel ve khawp a. Sap khual ho lah kha an ngal rek kha a chum buang mai a. Broiler ar ngal ang mai a ni. Chutiang khatiang khan Gospel centenary lawmna a ka tih tur chu ka zo a. Khing thil hnu ah khian a ni ka zinkawng chu ka zawh ni.

Engtizia teh reng nge ni 1994 kum khan sawrkarin sikul tan hma tur a ti mauh mai a. Centenary lawmna hnu khawi pawh tel hman loin kan khaw lam pana chhuah zui mai a ngai si a. “Tuan tul vanga ka liam ni khan maw…..chawhnu zin lamtluang a thui ngei e”

Ka thuam tlem a zawng nen Jail hlui lam panin ka in ak chhuak ve ta a. Kum a la tir bawk nen kan khaw bus chu a lo la service lo tawp mai a. Hmangaih berte lenna tia Pu Zorocka’n a koh Kolasib lam service bus remchangah chuan ka inthiat ve ta a. A chuang tur ang ang kan kim ta tih ah Zawlkhawpui chu kan chhuahsan ta a.

Kolasib lam tlangdung a zin dawn reng reng chuan Driver hnung zawn seat hi thlan chat zel tur a ni. Eng vangin maw ? E le….ni sa in bek a hem lo. Aizawl pan kan nih pawhin chuti tho. Aizawl pana kan zing chhuah chuan vei lam pang hi ni in a em a, Aizawl atanga kan chhukin vei lam bawk niin a em a. Chuvangin Driver hnung zawn seat a chuan hi a tha em em a ni.

Bawngkawn kan pel a. Durtlang pelin Selesih Sihphir kan pel zel a. Lungdai gate an siamna thinte thleng zelin kan lawng chuan a tum ram a pan zel a. Kan lawng hi mahse Bus a nia. Pu F. Laltuaia pawhin Thlalertuivalawng a hmuh ve tho kha maw. Thlalertuivalawng hi va mak sak tak a nih ka ring. A lem leh chanchin hi tun thlengin ka la hmu lo nia !

Tlan reng takah chuan kan thleng thui ta hle a. Kolasib kan thlen meuh chuan a lo thlasik khua deuh bawk nen a lo tlai fe tawh a. Mahse khua a la thim lo. Diakkawn diak si lo ah chuan min unload ta a. Eldorado kawt thlang lamah chuan kan khaw lam kal tur motor chang chuan ka Pawi khual din ve he haw a. Silchar lam pan tur Punjab cab leh cab lo pawh hmuh tur a vang hle mai a. Bairabi kal tur passenger duh hi an awm a. An au lauh lauh a. Mahse ka kalna lam tur a ni si lova. Ka tan chuan darbenthek ri mai mai ang vel a ni. Thahnemngai taka a au hnu pawh chuan passenger han inthiat luk lak tur an hmu chuang lo. A au rei fe hnu chuan Pu Kaisera fapa ni awm tak te pawh chu Bairabi lam pan tur chuan an chhuak ve ta a. Mahse kei chu chhingkhualah ar ang ka la vai motor changin.

‘Tlai khua i var za ang Kolasib Diakkawnah hian’ min ti tumah ka tawng lo a nih chu mawle ! Tichuan tlai ngai lo Pathian chuan ka chuanna atana a ruat ngei mai Tractor tê chi chu a rawn chhawp ta heu mai le. ‘Lirthei zawng zawngah a mawi ber awm e’ han tih tur phei chu a ni law. Mahse a aia hlu erawh ka hmu si lo. Chu tractor chuan hnunghnuh trailer a nei a. YMA thutthleng ang pahnih a chhawm bawk a. Passenger pawh tlem a chhawm bawk. “Ka lo inthiat ve luk lak ang chu Bilkhawthlir ka kal dawn a. In khaw zirtir ka nia” ka han ti a. Driver chuan a lo Amen thum dap a. Tichuan kan khaw lam pan tur chuan kan lawng chu a kiu ta ruai ruai a. Kan lawng hi mahse Tractor a nia. Pu F. Laltuaia pawhin Thlalertuivalawng a hmuh ve tho kha maw. Thlalertuivalawng hi va mak sak tak a nih ka ring. A lem leh chanchin hi tun thlengin ka la hmu lo nia !

Kan lawng hi kiu ruai ruai angin ka sawi naa a hawk dut dut zawk a ni awm e. A tang thawm lah a na, a tha thlah thawm lah na bawk. Kan ri thla rum rum mai a. Keini a back seat a thu ho phei chu a sawh gear a tam khawp a. Mounting rubber that loh vang emaw shock absorber that loh vang lam a ni lo. Tractor hnung hnuh a ni tlat. Pu Lathu-a pawh khan a khalh sawt dawt dawt thin tho ang a hmelin puak ti lo mahse.

Hma lam zawng chauh a kal ta chu a rei a rei ah chuan kan thleng hla ta fu mai a. “Kan hnenah awm ta che khua pawh a thim dawn hi” ti tur reng reng an awm lo. Kual lut zawng te kual chhuak zawng te chuan kan kawi kan kawi a. Kan chuanna lawng thawm chu mitdelte hriat khawp a ni. Chutin kal zelin Keichâm kan thleng a. ‘Tin Pisidia rama Antiokei ah chuan’ an tih ni lo Bilkhawthlir khaw tawn tirh Bawngbuk kawn pawh chu kan thleng a. Laltin chhi lo tan chuan a thim fu tawh tih ah chuan Eldorado ka ti dawn nge Xanadu ka ti dawn ….kan khua….kan veng…..Bilkhawthlir Kualmawi chu ka thleng ta a. Kan zin kawng hi a thui si…aaa…a tawi bawk si.

Sikul tan hma chuan ka thleng ve chiang alawm.

Similar Posts:

• Han Khawmawi
• E’Lungdar Centenary Ropui
• VANGPUI KUT (Khuangleng khua kum 125 na lawm turin a inbuatsaih mek)
• Zin kawng rei,thui silo
• Contractor that loh vangin kawng siam tur km 6.2 nuai bo

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Tuesday, December 1st, 2015 at 11:41 pm and is filed under Adventure, Travel, Whatever. You can follow any responses to this entry through the RSS 2.0 feed. You can leave a response, or trackback from your own site.