mi(sual).com

Mihring dang ang thovin he khawvel hmeichhiain a hring a. Amah chu ropuina leh thiltihtheihna zawng zawng neitu a ni a, a nihna ang takin he khawvelah lo kal se chuan mi pangngai mai a ni thei lova, hmuh hmaih chi a ni lul lovang. Mahse mi pangngai nih a thlang miau si.

Mihring a ni a, tisa leh thisen a nei a. Lungngai thei, hrehawm hria, hlim thei, riltam thei a ni. Mihring pangngai angin a nuin thla 9 chhung a pai a, a hring a. Nausen a ni a, naupang a ni a, tleirawl a ni a, puitling a ni a. Mihring pangngai taksain a paltlang zawng zawng chu a paltlang ve vek a ni.

Mihring dang ang bawkin mo lawmnaah a kal a, lusunna inah a kal a, ruaithehnaah pawh a kal zel a. Mi dang ang bawkin a inchei a, midang ei leh in ang a ei bawk a.

Chutiang mihring pangngai, he khawvel mite aia danglamna nei lo chu a hun laia mite pawhin an hrethiam lova. A hmaa kal Baptistu Johana chuan mihring pangngaite angin a eiin a in lova, mahse a hun laia mite chuan an hrethiam lo, “Ramhuai zawl a nih hi” an ti a. Mahse, he mihring fapa, mihring famkim leh mihring pangngai hi a lo kal ve a, mihring dangte angin a eiin a in a, an hrethiam chuang lo. “En teh u, chaw heh mi, uain heh mi, chhiahkhawntute leh mi sualte thian saw,” (Mat. 11:16-19) an ti leh tho va!

Ni, chu mihring pangngai chu Messia a ni ang tih rin ngaihna a awm lova. Chhandamtu lo piang tur hre lawktu khawchhak mi fingte pawhin mi pangngaite zinga zawn chi-ah an ruat lova, Lal leh mi ropuite zingah an zawng a, an hmu lo. (more…)

Christmas chungchang bih chiang deuh ang aw.

Tunlai khawvelah thuruk hi a awm thei tak tak ta meuh lo mai. Sap hovin ‘Transparency’ an lo tih ang hi ani ta deuh vek mai. Special Report-ah pawh Christmas(Krismas) lo pian chhuah dan chungchang Post ani a, sir khat atang ringawta thlir chuan, mi tam tak a tihnual thei dawn tlatin ka hria a, Chiang zawkin I han bihchiang dawn teh ang:-

A hun : Kan Bible a Isua Pian chungchang ziak tute hian, a piankum tak an ziak lem lo va, chuvangin rinthu mai lo chuan, ani leh kum dik tak hriat fuh a har tawh hle mai. Amaherawhchu, a pian laia Lal 2 hming langte Rome Lal Caesar Augustus (27 BC – 14 AD) leh King Herod The Great (37 BC – 4 BC) te atanga han chhutin, a pian kum dik tak hi BC 4 hnu lam ani theiin a lang lo. Heroda Ropuia hi Nausen a suat hnu lawk khan a thi ta thuai a, A fapa Herod Archelaus an a thlak a, Heroda a thi tih an hriat avangin Josefate Aigupta rama raltlan pawh kha, Judai ramah rawn kir leh an tum a, amaherawhchu, a fapa Arkelausa(Herod Archelas) a Lal tih an hriatin Galili-a Nazareth khuaah an awm ta anih kha.

Tin, a ni(date) chungchangah phei chuan, ngaihdan a saisa lehzual; The De Pascha Computers’ Document chuan March ni 28 anih an ring a, Bishop Clement-a khan November ni 18 anih a ring a, Fitzmyer phei chuan BC 3 na September ni 11 anih a ring nghe nghe a ni. Fitzmeyer rindan hi pawmpuitu an tam hman hle laiin, Heroda liana thih hun nen a inmil lo deuhva hriat ani leh ta deuh a, BC 4 na hi an ring ta deuh ber a ni. (more…)