Mizo Aw News :: Aug 18

August 18th, 2006 11:29 am by narzhoc

Tam laka invenna tur Baffacos sumin mirethei leh thingtlang mite a thleng pha lo

Aizawl, August 18: Zoram Nationalist Party chuan nimin khan an office-ah chanchinthar lakhawmtu thenkhat kawmin Mautam lo thleng tur do letna tura buatsaih BAFFACOS sum a nih lohna tura hman a tam thu an sawi a. Sazuin buh a seh hmain thuneituin BAFFACOS sum an seh nasat thu an sawi.

ZNP party thupaungtu Pu PC Thanglawta chuan Mizoram a Mau a tam dawn vanga tam lo thleng tur atana inrin lawknan Baffacos chu a pawimawh in, ei leh barahte, hriselna lamahte harsatna te kan tawh loh nan Central sawrkar pawhin cheng Vaibelchhe Zahnih (200,00,00,000) chuang ruahmanna a siam thu leh, chuta tanga Cheng Vaibelchhe Sawmkua (90) zet chu Sorkar-in a hman ral mek thua sawi bawk.

BAFFACOS sum dawn tawh zawng zawng Department 15-ah sem darh a ni tawh thu leh MNF sorkar chuan Vaibelchhe 60 chuang zet chu a hmang ral tawh tih an sawi a. Heng sum Nuai 6000 (Vaibelchhe 60) an hman dan thlir hian ZNP chu an lungawi thei ngang lo tih Pu PC Thanglawta chuan a sawi bawk.

“Hetianga an kalpui zel chuan mi tlemte, thuneitute leh an laka tlatlum ten an hlawkpui ang a. Mautam tuar tak taktu, kut hnathawka ei zawng, an Buh Sazu ten an ei zawh sak turte hre reng reng lova hman ral a ni mai dawn a. Chuvangin, keini ‘Mizo Nationalist Party’ chuan an kalpui pangngai ang hi chu kan dodal tlat a ni,” Pu PC Thanglawta chuan a ti bawk.

BAFFACOS sum atangin Industries Department chuan Mizoram Venus Bamboo Product Limited leiba rulh nan nuai 145 hman a nih thu a sawi a, Agarbati Stick Production leh Semi machine khawl lei nan nuai 641 hman a nih thu ZNP thupuangtu chuan a sawi bawk. Hei bakah hian BAFFACOS sum atang vek hian Food & Civil Supplies Department chuan kudam (Gowdown) siam that nan nuai 300, Staff quarter cheithat nan chen nuai 178 leh Kudam siam nan cheng nuai 102 an hmang tih a sawi bawk.

Pu PC Thanglawta chuan Agriculture Department ber lah chuan, Antam chi, Bean chi hran hran leh Alu etc. leina atan Rs.. 314,00,000.00 lawih an hmang mek a. Land Revenue & Settlement – pawhin Rs.140,00,000.00 chu Survey nan an lo ti bawk. AH & Vety Department- pawh Rs.234,48,410.00 zet mihring ei tur lam ni lo, ran ei tur etc. lei na atan an vur lawih mai a ni a ti. Pu PC Thanglawta chuan “Hetiang hi anih avangin Sazu aiin kan hotu, thuneitute hi an nghal zawkin kan tam phah dawn zawk ang tih hi kan hlau tak zet a. Department sawm panga (15) te hian an department Scheme pangngai ringawta Baffacos sum hi an hman ral mai chuan kan ram mipui tam zawkte hian mi hausa bula pan bawm khah Lazara pawh kan tluk lovang,” a ti bawk.

Hetiang hi a nih avangin ZNP chuan tuna BAFFACOS pawisa la awmte hi Buhfai chhek khawl nan te, a leina tur neih nan te ruahmanna hi siam se tha an tih thu an sawi a. Hetiang ngaihtuah tur hian Board etc. District tinah te siamin, kut hnathawktu te riltama an thih lohna tur leh an din chhuah ve theih hialna tur khawp a ruahmanna siam hi an tih mak mawh ni ah an ngai tih an sawi bawk.

Party Pathumte Zorama’n a hawl

Chief Minister Pu Zoramthanga chuan MPC hruaitute chu an inthik avanga sawrkar siampuia an sawm duh lo leh tunah thu mu hnu sawi chhuah vel bak kal ngaihna hre tawh lo an ni a ti. Tun thawhtannia Tlungvel khuaa MNF zawm thar mi 209 a lawmluhna inkhawmah thu sawiin Pu Zoramthanga chuan “PC unaute nen kum 1998 inthlanah kan thawk dun a, kan hlim hle a, mahse, anmahni an inthik a,. “Naute chu a laiah i bung mai ang” titu an tam lutuk a, an buai a, inthiknain party an tichhe vek a. Tun ministry siam dawn pawhin sawrkara tel ve turin kan sawm a, an inthik tlat a, party ni si, an tum ber pawh a hriat loh a, sawrkar siam hi an tum lo a ni ang e” a ti. PC chu “Tunah thu mu hnu sawichhuah vel bak tih tur leh kal ngaihna an hre tawh lo. ZNP lah leadership-ah an buai a, an MLA-te em chu ban ngaihna a awm lova, an party hruaitu lawk ber berte an bang chur chur a, an party president tur pawh a zawnin an inzawng a, an inhnawn a ni” a ti.

MNF President chuan Congress chu Mizorama kum 10 chuang sawrkarna an chan hnu leh centrala Congress kaihhruai sawrkar a din mek laiin Mizoramah chuan nasa takin an hruaitute an chhuak taa, Congress-a an hruaitu an symbol ni thinte 90% vel an chhuak a, tuna awmte hi third line, fourth line vela mite an ni a ti a. Pu Hawla chu tawng fuh hlei thei ta loah puhin Lengpui airport siam a nih chungchangah bul lo tantu Congress sawrkar an fakawm thu a sawite chu Pu Hawla chuan kum 7 chhunga Pu Zoramthanga thu sawi dik awm chhun a ni a ti a. Remna ni chu Mizote tlawmna ni a nih avangin Remna ni lawmnaah a tel ve loh tur thu a sawi a. Mizoram sawrkar a bei emaw Pu Hawla hian a intih laiin Mizorama remna a awm theih nana nasa taka hma latu PuRajiv Gandhi leh khu lama an pute a bei a ni zawk a ni. Lal tlawm tur thinlung chu tihngawngin a awm tih ang mai a lo ni ta a ni a ti.

Chief Minister hian Mizoram hmasawnna kal mek chu \ai thar lai ang nen tehkhinin he malsawmna mana hi anni pawhin an chang ang a, keini pawhin kan chang ang, fatute phei chuan a zang ti tha leh a kawchhung \ha deuhte pawh an chang ang chu a ti. Pu Zoramthanga chuan MNF chu hnam thinlung pute kalkhawmna a ni tih sawiin MNF zawm thartute chu an pian tirh atanga hnam thinlung pu an ni a, an intawhkhawmna, hnam tana an thawhhona turin MNF party-ah an awm ta mai a ni a ti a. Pastor Chhawna inlarnain “Varparh Arsi a eng zual zel dawn” a tih chu a lo en zual zel theihna turin Pathianin an thinlungah a thawk a, vawiinah an lo awmkhawm ta a ni a ti.

MNF zawmtu mi thar lawmluhnaah hian lawmluhte aiawha thu sawitu Pu C.Vanlalnghaka, Congress Ex-VCM chuan “MNF-a lut rur hian tumahin min sawm lova, tunhma atangin ka partry nihna ka la sawn ngai lova, Pathian ka rawn a, Pathianin MNF-a ka luh a remti niin ka hria. Presbyterian kohhran leh Congress hi ka thihchilh dawn emaw ka ti a, mahse, kan ramin tunah hmasawnna ropui tak a chang ka hmuh hian inthlahrung taka ram hmasawnna lo thlir ai chuan luhchilh a, a khumpui luah ve thei tura MNF-a luh hi a finthlak ta berin ka hria a, ka lut a ni” a ti. (MNF P/R)

Set Free-in Family Meet nei

Set Free Ministries, India chuan nimin piah khan Synod Conference Centre-ah chhungkaw inhmuhkhawmna (family meet) an nei. He hunah hian Upa Dr.P.C.Biaksiama, Set Free Ministries Treasurer paper buatsaih, “Mizote Pathianin min hruai a tum dan’ tih thupui an zirho.

Chawhma inkhawmah Rev. K.Lalzuala, Set Free Ministries Director chuan report a pe a, an rawngbawlna pui ber chu Jail rawngbawlna anih thu sawiin, jail tang chhuak mi 1,500 aia tam umzuiin kohhrana Social Front Committee leh Branch hrang hranga YMA te nena tang hova hma an lak thu a sawi. Jail-ah hian kartin ni hnih an fehchhuah thin thu sawiin, he rawngbawlna avang hian mi engemawzatin nun thar an nei tawh tih a sawi a, Jail bakah Protective Home-ah kartin Inrinni apianga rawngbawlna an neih thin thu te, Jail tang tang mi 40-in Bible ralchhan ATC-te nena tanghova an neih mek thu leh, painting lama mi tui, tang mekte pualin painting zirna buatsaih an tum thu a sawi bawk. Set Free Ministries-ah hian member 330 vel Aizawlah an awm a, Society member 40 an awm mek bawk.

UPA Sawrkar hnathawh chungchanga Inhrilhhriatna Beihpui thlak dawn

Ministry of Information & Broadcasting hnuaia Department hrang hrang PIB, DFP, DAVP, S&D Division, Prasar Bharti leh Mizoram Sorkar tangkawpte chuan mipui tana United Progressive Alliance (UPA) sorkar hnathawh leh hmalakna hrang hrang inhrilh hriatna leh inzirtirna atan beihpui thlakna Public Information Campaign (PIC) a nei dawn a, August 22 & 23, 2006 ah Sihphir Twin Market, Sihphir Khua ah neih a ni ang a.

August 28 & 29, 2006 ah Reiek Community Hall, Reiek khuaah neih a ni leh ang a. A kharna hun September 1, 2006 hian I & PR Auditorium, Aizawl ah neih a ni ang.
He beihpui thlakna atana Pre-Public Information Campaign hi Directorate of Field Publicity, Govt. of India leh Song & Drama Division ten Sihphir, Reiek leh a chhehvel khua ah te ni 16 atanga 21, August, 2006 chhung hian an nei ang.

RTB chungchangah ZNP in CM a ma order chhuah ngei phatah puh

ZNP National Executive Committee chuan tunlai politics kal vel te thlira, ngun taka a ngaihtuahin; Party thenkhat ten thu muhnu te sawi chhuak a, Mizoram Politics boruakah inhnialna leh ngaihdan in an lohna tam tak a rawn tuh thar leh ta chu pawi an tih thu an sawi a. Kan ram politics boruak hi hetiang hawi zawng a kalpui lova, Ram leh Hnam hmasawn nan leh Politics boruak thianghlim taka, kal chhoh pui zel hi Political Party zawng zawngten kan mawhphurhna leh kan tihtur nia an ngaithu an sawi a.

RTB Order chungchangah erawh ram hruaitu lu ber Mizoram Chief Minister Pu Zoramthanga’n MNF Vice President a nih laia a ma Order chhuah ngei phat a, a hming sign a nih loh thu Mizoram mipui hriata a sawi ta mai chu awm lo an tih thu leh, hemi chungchangah hian “MNF leh Zoram mipuiten harsatna namen lo kan tawh lai leh India nena kan indo lai a nih aavngin, he Order hi ka chhuah ta maia ni,” tiin Mipuite hriat thiamna ngen mai zawk se. Mizoram mipui maktaduai khat dawn te hmaah thudik tan ngam khawp a huaisenna nei tur leh Zoram mipuite dawt leh thu belh chian dawllo hmanga min kaihruai tawh lo tura CM an duh thu an sawi bawk.

YMA Chanchinbu Tha Lawmman sem dawn

August ni 23, 2006 chawhma dar 11 hian I&PR leh CYMA tangkawp chuan Synod Conference Centre-ah Media Workshop leh Branch YMA Chanchinbu Tha Lawmman semna hun an buatsaih dawn a. He Workshop-ah hian Pu Vanneihtluanga, CEC, CYMA leh Nl Vanlalruati te thuziak zirho tur a ni a. Chanchinbu Tha te lawmman hi Pu T.Sangkunga, Vice President, CYMA leh Pu LR Sailo, Director, I & PR ten an sem ang.

Training buatsaih dawn

NABARD chuan August ni 17-18 leh ni 22-25 chhung hian Bank, NGO leh Self Help Group member te leh hetiang lama tui a, hma la thinte tan training – ‘Sensitisation Programmes for Bankers and NGOs’ a buatsaih a. He training hi DIPR Conference Hall, Aizawl-ah neih a ni a. Training-ah hian SHG te leh Bank te thawhhona leh a tangkaina te zirho a ni.

ZNP Senior Front thuchhuah

ZNP Senior Front Gen.Hqrs Committee chuan Dt.14/8/2006 -a Tlungvel mipui hnena kan Chief Minister Pu Zoramthanga thusawi rethei fairel bel thleng phakin hma kan la dawn a. Tumah lo lungngai suh u ti-a a thusawi hi tihlawhtling ngei se kan ti a. Amaherawh chu kum 8 dawn lai a lo lal ta a, hetianga hmalak a tum dan hi a sawi har lutuk kan ti a. Kum 3 chhungin kan intodelh ang tih leh Chakma District Council ka thiat ang tih ang lek khan rethei te fairel bel thleng phak a hmalak tumna hi thamral tawh lo hram se kan ti tiin thuchhuah an siam.

Ruihhlo do beihpui Pukpui-ah

Ruihhlo Do chungchang a YMA Sub.Hqrs. Monsoon Operation bawhzuiin, Pukpui YMA te chuan kar liamta khan Pukpui, Lunglei leh a chhehvel-ah beihpui an thlak a. Zu siamna bel set 6, thlawr chhuah sa box 35, bilh lai tin 50 zet an man. He thila kaihhnawih chhungkua 6 te an man bawk a. An man atanga kum 1 chhung YMA chuan a lo hriattir lawk tawh angin an ensan dawn a. An zinga pakhat chuan a lo intiam tawh angin Pukpui khua a chhuahsan dawn bawk.

Vawiin ah FLAM Seminar

Former Legislators Assn. of Mizoram (FLAM) chuan vawiin hian Saikuti hall, Lunglei-ah Seminar an buatsaih dawn a. Thupui, “Ram leh Hnam Damkhawchhuahna” tih a ni ang. Hetah hian Dr.Vanlalchhawna, Reader, Mizoram University chuan Decentralization & Administration tih a sawi anga, MSACS te chuan HIV/AIDS chungchang an tarlang bawk ang. Pu Bualhranga, Pre. Mizoram Customer’s Union chuan, “Corruption leh a tih rem dan tur” tih a sawi anga, Pu Lalsawta, advocate in, “Hriam lekna leh inthlanna a thil fello tihbo dan” tih a sawi bawk ang.

Shavei Emissary thar

Nimin khan Tv. Morris Ilan chuan Shavei Israel Emissary hnathawk turin Aizawl a rawn thleng a. Israel atanga rawn kal niin, a hna hi November 30 thleng a thawk ang.

Library hawng

Niminpiah khan Pu Aichhinga, RD Minister chuan Vaivakawn YMA hmalaknaa sak Children’s Recreation Centre cum Library Cheng nuai 6.9 senga sak chu a hawng a, Building zau zawng hi a dung ft 40, a vang ft 15 a ni a.

ATAL Silver Jubuilee

Nilaini khan All Teachers’ Association of Lawngtlai (ATAL) Silver Jubilee chu Govt. Region Higher Secondary School kawtah School Education Minister Dr. R. Lalthangliana’n a hawng a, hemi hnu hian ATAL Silver Jubilee lawmna Lawngtlai a Dokulha Hall ah an hmang zui.

A senchi man hnem

Thawlehni zing khan Zemabawk YMA Duty-te chuan Zosanglura(39) Ramhlun North hnen atangin sap zu(a senchi) um 138 an man.YMA duty-te hian Zemabawka B.Sanghnuna Bulding atangin sap zu case 8 an man bawk.Hengbakah hian |huampuiah sap zu thuhruk thahnem tak an man bawk.

M.Th leh BD Result chhuak

Senate of Serampore chuan August 14 khan Master of Theology (M.Th) leh Bachelor of Divinity (BD) final result (2005-2006) a tichhuak a. Aizawl Theological College atangin M.TH zirlai 2 leh BD zirlai 36 zinga 33 te chuan an pass. M.Th-ah 100%-in passed-in, BD-ah 91.6%-in an passed a ni.