mi(sual).com

August thla ral hma a Mizoram chhuahsan turin Lunglei MZP in Chawngte College Principal hriattir

Kalamanagar College (Chawngte) a thil thleng chungchangah MZP Southern Hqrs. Lunglei hruaitute chuan thawhtanni khan press mite an kawm a. He College Principal KP Nath article ziakah, Christian te sawichhiatna leh Bible ti bawrhbang zawnga thuziak tam tak a chuan avangin MZP te hian Chawngte an pan a. Joseph Lalremngheta, Lunglei MZP President chuan College a an kalchilh thu sawiin, Magazine awm zawng zawng an la chhuak a, an halral vek tih a sawi a. A thuziakah hian engmah finfiahna a neih loh thu sawiin Joseph-a chuan 31st Aug ‘06 ral hma ngeiin Mizoram chhuahsan tura hun an pek thu a sawi.

Principal KP Nath-a hi PUC Lecturer Pension, MZU-ah pawh an chhawr fe tawh Putar, pate lam deuh a ni a. Article a ziahna hi Annual Magazine 2nd Issue, 2006 a ni a. Editorial Board members te chu Prof. KP Nath, Pankaj Roy, Satyajit Das, Jyotirmoy Chakma, Rohita Chakma niin, Mizo pakhat ZD Ramngamzauva a tel ve a, engmah a hriatpui lo a. Patron-ah Rasik Mohan Chakma CEM (CADC) a ni.

He magazine a article hrang hranga Christian chungchang a tarlanna hi (1) Principal’s report (2) The Linguistic Religious and Cultural Tradition of the Chakmas tih leh (3) Freedom of Speech & Expression tih a ni a. Freedom of Speech & Expression-ah chuan hetiang hian a tarlang, “Kohhran ho te chuan School naupang te tan hunbi neiin lehkhabu an buatsaih thin a, kan rama School tam takah hian, School naupang, Christian pawh, Christian ni lo pawhin, Kan Pa, Vana mi, i hming zahawm rawhse… tiin an chham rual dual dual a. Hla te sain, Bible thu te an chhiar chhuak thin” tih te a tarlang a. Hei bakah hian “Baptist Missionaries te khan Mizoram an luh hmain Chandragona (Rangamati bul) ah awmhmun an khuar phawt a. An thil hlauh ber chu Lord Buddha lak atangin Chakma te an la hrang thei lo anga, Christian-ah an let thei lo ang tih hi a ni. An chituh rah chu Serkawn-ah seng khawmin a awm ta a, mi tam takin chutah chuan rinna an nghat a. Kum 2500 liamta khan Lord Buddha-in enna a rawn thlen a, hei hi vawng nung reng ila khawvel hi chu muanna famkim a lo ni anga, Paradis-ah kan cheng thei dawn ani,” ti teh a ni bawk. “Bangladesh ah chuan Chakma ten Muslim avangin harsatna an tawk a. Mizoram-ah chuan Christian te avangin harsatna an tawk. Mizoram chu Christian ram an ti a, hei hian India ram sakhaw zalenna hnuaiah Christian ni ve lo te rilru a ti na a ni. Sakhuana avanga in awpbehna hian kan mihring puite-ah a thalo zawngin nghawng a nei lian zawk fo a ni,” tih te pawh he college magazine ah hian tar lan a ni.

Branch YMA chanchinbu tha lawmman sem

Aizawl, Aug 24 : Nimin khan Synod Conference Centre-ah Branch YMA chanchinbu enkawltute pualin Media Workshop an buatsaih a. Kum 2005 chhunga Branch YMA chanchinbu tha thlanchhuahte hnenah lawmman sem nghal a ni.
Media Workshop-ah hian Vanneihtluanga paper buatsaih ‘Branch YMA Chanchinbu Kalphung’ tih leh Nl. Vanlalruati paper ‘Naupang pawngsual/khuaikhem, milem bawlhhlawh leh a kaihhnawih’ tihte chu zirho a ni a. I&PR Director L.R. Sailo chuan “YMA nena thawhho chu thil zawngchhangtlak tak leh kan hlawkpui tlan theuhna a ni a. A bik takin chanchinbu enkawl dan chungchanga workshop vawi 7 kan lo neih tawh pawh kan chhawr tangkai tih Branch YMA chanchinbu hrang hrang hmelah a lang thei a ni” a ti. Mizoram-a kumtlinglo pawngsual a hluar chu vanduaithlak a tih thu sawiin, ruihhlo ang bawkin YMA hian kan vei a hun tak meuh tawh a ni, LR Sailo chuan a ti bawk.

CYMA President J.H. Zoremthanga pawhin thu sawiin, “Branch YMA chanchinbu tha thlan hi chanchinbu changkang, Veng mipuiten hmasawnna atana kan chhawr tangkai tham kan neih theuh theihna atana inelna thianghlim a ni” a ti a. Endik tura chanchinbu thehlut an tlem thin chu pawi a tih thu a sawi lang bawk. YMA Kum Puan chungchang sawiin Mizoram mipui tam zawkin an thlawp thu a sawi a, mahni Veng chanchinbu theuhah kum puan lam hawi thuziak uar a tul a ni, a ti. CYMA President chuan “Tun laia Mizoram-a kumtlinglo pawngsual chungchangah a Veng neitu Branch YMA te chuan huai taka kan dodalna kan tihlan ngam a tul a; hmun thenkhatah a tuartu miretheite aia pawikhawihtu milian leh thiltithei zawkte tana ban phar kan awm nia report a awm hi a vanduaithlak a ni” a ti bawk.

Branch YMA chanchinbu tha a thlanchhuahte
Offset Category :

1. MARYMA – Ramhlun North Branch YMA
2. BUILUKHAM – Bethlehem Vengthlang Branch YMA
3. YMA AW – Armed Veng Branch YMA
Cyslostyle Category :
1. VENGSANG – Champhai Vengsang Branch YMA
2. YMA INLENG – Vengthar Branch YMA, Kolasib
3. YMA PALAI – Selesih Branch YMA

Lunglei ah harhna a thleng mek

23.Aug.Lunglei : Nimin piah khan Ramthar Presbyterian Kohhran sikul, Lunglei a awm naupang school kal turte chu zing dar 9:00 velah harhna in a nang.

Heng school naupangte hi sikul kal thei lovin AOC Square atangin kawngpui char laiah Lunglei hmar lam panin an in bingbilet a. Naupang chang ni lovin nula leh nute, tlangvalte pawh an tel a, mipui in mak an ti hle.

AOC atang hian Venglai Thana bul thleng (km 1) zet an inbin phei a. Hetianga an awm hi an Bialtu Pastor R.Lalrosiama leh an Kohhran Upa ten ngawrh takin an vengin an tawiawm a, an Upa te hian Lal Isua tuarna kan tawmpui ve a ni, Pathian hnathawh ang zelin hei ai nasa pawh a tul chuan kan ti zel ang tiin an lo au reng bawk. PC Vanlalnghakin rawngbawlna a neih a tangin he Ramthar Kohhran-ah hian harhna a thleng a, a hmain harhna thleng vang hian chirhdiakah harhna chang ho an bingbilet nasa hle tawh bawk.

Hawla Thubuai : Inthlan Hnaih Vang

Mizoram Congress (MPCC) chuan an President Pu Lal Thanhawla thubuai tia sawi thin chu kum 1998 MLA inthlan hmaa thehluh tawh a niin inthlan dawn apianga party thenkhatten Pu Hawla leh Congress party beih nana an hman thin a ni an ti a, tunah pawh kum 2008 inthlan a lo hnaih leh tak avangin sawi thar a ni leh ta an ti. Nimin khan press release chhuahin he thubuai hi amah Pu Hawla ngei pawhin chak zawka chinfel a nih theih nan Assembly House chhungah leh pawnah vawi duai lo CBI koh luh a lo ngen tawh angin rorelna dik leh fel hriat thuai Zoram mipuiin an nghakhlel a ni a ti. MPCC Office Bearers chuan nimin piah khan an President thubuai an tih mai hi ngun takin an ngaihtuah a, a chingfel turin court an ring tawk a, court pahinrei rial lova a chak thei ang bera kalpui a, kum 2008 MLA inthlan hma ngeia thutlukna (judgement order) tichhuak ngei se an duh thu an sawi.

Kum 3 mi naupang 3- in mi in suasam

Nimin piah khan khan Edenthar veng-a Valbuanga In hnuai luah Thangkhumi In chu an awmloh hlanin naupang kum 3 mi, thian pathum chu Ventilation atanga lawn lutin bungrua an suasam.

Heng naupang pathum te hian Bible te pawtthlerin an suasam nasa hle a, an khumte chawi letin an Bank Account Book te an chep thler a, naupang zirlaibu te chu an pawt sawm chhe vek bawk. Police leh YMA hruaitute a hmunah hian an kal nghal a. Vengchhung nu leh pate chuan heng naupang kum 3 mi lek lek te’n hetiang suahsual rawng an bawl mai hi mak an tih thu an sawi.

Geographic’ chanchinbu tlangzarh

Nimin khan Geography Association of Mizoram (GAM) Chanchinbu chhuak hmasa ber ‘GEOGRAPHIC’ chu Dr R.Lalthangliana, School Education Minister-in a tlangzarh.

Dr R.Lalthangliana chuan Mizoram Sorkar hmalakna atan leh mipuite tana hriat tur pawimawh tak tak tarlanna lehkhabu GAM in a buatsaih thei chu fakawm a tih thu a sawi a. Hmasawnna tur atana hmalakna reng rengah Geography behchhana hmalak a nih thin thu sawiin an lehkhabu buatsaih leh an pawl chu Sorkar tan pawha tangkai tak ni tura a beisei thu a sawi. Dr. Thangtea chuan ziak leh chhiar thiam tamna lama Mizoram pakhatna ni tura beihpui thlak mek a nih thu sawi bawkin tun hnai maiah Mizoram Literacy Percentage pawh 90.27% a a kaisan thu a sawi a. Kumin chhung ngei hian Kerala khum tuma hma lak a nih thu leh Gam pawh in theihtawp an chhuah a beisei thu a sawi a. Mizoram-a zirtirtu zawng zawng tan Cambridge University standard-a training neih tur pawh naktip mai a tan a nih tur thu a tarlang a. Zirna kawng tinrengah thiamna tak tak paw chhuak tura theihtawp chhuah tlang turin a fuih bawk.

Rev Dr.K.Thanzauva’n Mizoram siamthat a har tawh a ring

Nimin piah khan Mizoram Baptist Kohhran Pathian thu zirna AICS Principal Rev.Dr.K.Thanzauva leh a thawhpuite chuan Lunglei DC Confe.Hall-ah Press mite kawmin AICS dinhmun leh nihphung te an sawi.

Rev. Dr.Zauva chuan, “suangtuahna khawvel-ah a tak ram min hruaithleng turin Press mite an pawimawh a ni” a ti a. AICS -ah thil tih tum an neih thu sawiin, “Theological College satliah din kan tum lo, S.E. Asia a tha ber nih kan tum” a ti. OMF nen Missionary training College din an tum thu tarlangin Ministerial training-ah Probationary Pastor ni tur te, kohran hruaitu dang te training an pek thu a sawi a. BCM hnuaia Evangelistic Team 33 atangin mi 46 chawlhkar hnih chhungin training kan pe tawh a. Kohhran Upa 100 vel an training leh ang a. Lehkhabu phek 700 a chhah kan buatsaih a ni tih sawiin, pastor hriatna pangngai ringa rei tak lo thawk tawh te intuaitharna hun buatsaih anih dan te a tarlang. “Khawvel-ah tlangram ropui tak a awm lo” tiin Mizoram-ah leilung hausakna haichhuah tur a awm tak tak thei lovang tih sawiin, “Kan resource ber tur chu mihring puitlinga chher hi a ni,” a ti a. “Sorkar-in quality Education min pe tak tak dawn lova. College kan din a tul a. Ram pawn a zirna tha um a kalchhuah ringawt hian hmasawnna min thlen lovang. Kohhran in hma a lak loh chuan ti tur an awm lo” a ti bawk.

Mizoram People Forum-ah mimal anga a tel thusawiin, “Kohhran a tel loh chuan mimal anga kal chu a remchang lo mai thei. Zoram siam hi a awlai tawh lovang. Kohran tangrual ila kan her danglam hret thei ang. Zoram ka thlir a, ka zir a, Nagaland leh Manipur kawng kan zawh ve zel a. Kawng dang zawn (diversion) a ngai tawh. A harsat dawn avanga tih loh ai chuan, kan tih avanga hlawhchham nih pawh ka thlang hial zawk” Rev Dr.K.Thanzauva chuan a ti bawk.

Similar Posts:

• Mizoram Baptist Kohhran Zaipawl intihsiak
• Mizo Aw :: News 24
• THINLUNG THIANGHLIM
• Zo-quiz & Zo Star
• Mizo Aw News Lawrkhawm :: 12 Jan

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Friday, August 25th, 2006 at 12:20 am and is filed under News. You can follow any responses to this entry through the RSS 2.0 feed. You can leave a response, or trackback from your own site.