UPC Kohhran An Inep, boruak a lum hle
Nizan hmasa khan Mizorama UPC-te an inthen hmaa Tuikhuahtlang panga an hmunpuiah UPC pawl pahnih inkarah boruak a lum deuh a, buaina a nasat hmain police an inrawlh hman a, zan dar 11:30 velah UPC pawl hnih atanga pungkhawmte chu tindarhtir an ni. Hetianga an inepna hi pastor quarter Mizoram UPC pastor-in a luah leh a chung zawl Mizoram UPC-in kudam atana an luah chu thubuai awm lai mek tihfel hmaa Mizoram UPC ten an zauh UPC NEI lamin an hriatthiam loh atanga lo irh chhuak niin an sawi.
Lungleiah Biak In Suasam
Lunglei chanchinbu Ralvengtu in a tarlan danin nizan hmasa khan BCM Zion Kohhran, Ramthar veng, Lunglei Biakin chu misual thenkhat ten an suasam chiam a. Biblete pawt darhin an hal bakah Pulpit hmaa thusawina dawhkan ‘Lecturn’ chu a letling zawngin an dah a. Pangpar khawi te pawh an paih darh vek bawk a, Stabilizer an ru bo nghal bawk a ni. Heng thilsual titue hianZion kohhran Biak In bul lawka awm, Ramthar UPC Kohhran Biak In (NE) pawh an suasam tel bawk a. Bible lian leh a te an hal ral vek a. PA System an tichhe bawk. Electric Veng, Lunglei UPC Biak In nasa taka suasam anih hnu kar khat pawh a liam hma in Biak in dang 2 suasam leh a ni a. Heng mite hi an chetdan a rawva hle a, tunlai a an sawi lar tak Setana betute thil tih anih ngei an ring. Lunglei Police Station-ah FIR thehluh nghal a ni.
MPSC Thawktuten Inhlan Tharna Hun Hmang
Nimin piah khan Mizoram Public Service Commission (MPSC) a Officer leh staffte chuan MPSC Secretary Pu C. Lalchhandama hoin Pathian hnena inhlan lawmthu sawina leh inhlan tharna hun an hmang.He hunah hian Pu C. Lalchhandama chuan kumthar thuchah a sawi a. MPSC a thawktute chuan India khua leh tui an nih ang leh India danpuiin a sawi anga hmasawn tumna leh inpumkhatna vanwg nung tlat tur te, mahni mawhphurhna hlen theuh tur te, hotute thupek zawm a rinawm tak leh hleih nei lova Pathian puihna dil chunga hnathawk turin kumthar thutiam an la a ni.
Congress Hruaitute Insiamrem
Pu Sainghaka, MPCC Vice President chu nikum July thlaa boral avangin MPCC Office Bearers chu siam that a ni a, hetiang hian siam rem a ni. President Pu Lal Thanhawla, Senior Vice President pu R.Lalzirliana, Vice President Pu Hiphei, Treasurer Pu H.Liansailova.
SSA Official Website
Nimin piah khan School Education Director Pi Malsawmthangi chuan Mizoram SSA Official website a hawng a, ‘mz.ssa.nic.in’ a ni. Thu sawiin mahni tha theuhah fak leh hriat hlawh kher beisei lova taima taka thawh a tul a ni a ti a, chumi avanga SSA website pawh neih theih a ni a ti. He website hi mitin tan information pawimawh tak a nih a beisei thu a sawi. He website hi central SSA website nen inzawm tur a ni.
Trade Fair-cum-Mela
Zet ARR ESS Entertainment leh Sporting Club Tlangnuam-in an buatsaih Trade Fair-cum-Mela nimin piah atanga ni 20 chhung Tlangnuam Field, Aizawla neih turah chuan naupang intihhlimna mini-train, merry go round, Russian play, Bang – frog train, break dance, star disco, shooting, 99 dawr, Mizo handloom, magic show leh intihhlimna dang tamtak a awm a, zing lam dar 8:00 atanga hawn thin a ni. A buatsaihtute hian naupang leh thalaiten sualna kawng zawh lova intihhlimna thianghlim an neih theih nana an buatsaih a ni.
Rural Sports-na Hmun Turte
January ni 16 atanga 19 chhunga Aizawla All India Rural Sports Tournament Group II awm tur chu mipa football 3rd.Ban.MAP Ground, Mualpui leh Republic Playground-ah khelh a ni ang a, Volleyball (boys & girls) chu Venghlui/College veng playground-ah khelh a ni ang. Tug of war chu 3rd.Bn.MAP Ground, Mualpuiah a ni ang a, Weightlifting (boys & girls) chu Contact Sports Centre, SAI, Mission Vengah a ni ang.
Champhaiah Power Harsa
MJA Champhai district chuan Mizorama district hrang hranga power pek chhuah dan ennawna siam that an phut. Nimin khan thu chhuahin MJA Champhai chuan Mizoramin power a neih zat chatve aia tam mah Aizawl district-ah hman a ni an ti a, hei hi thingtlang lam ngaihthahna leh hlam chhiahna a ni tiin an ngaihthiam loh thu an sawi. Champhai district chu Aizawl dawta mihring tamnaa ni tiin power tam zawk pek an phut a, power harsatna an tawh avangin Champhai atanga chanchinbu chhuakte pawh nimin atang khan a copy chhuak thin zatve chauh an tichhuak thei a ni.
Hlawh Bak Hawn Ngai Lo
Pu H.Vanlalsawma, MCS, (kum 42) nimin piaha lungphu chawla boral chu nimin khan anmahni in Zotlangah vuina inkhawm neiin tlanmualah vui liam a ni a, mi tamtak a vuinaah hian an tel. Pu H.Vanlalsawma nupui Pi Teteii (Laltlanthangi) chuan kum 20 vel an inneih chhungin an pa chuan a hlawh bak pawisa a hawn ngai loh thu a sawi a. Thil dik loa tih duh ngai lo mi a ni a, a thih hmasa zawka a chanchin a sawi a nih pawhin zu in mi a nih chu zep lo turin a hrilh a ni a ni a ti.
Awmlai
Pu F.Vanlalthlana, 47 chu nimin dar 4:45 p.m. khan anmahni in Republic Venglaiah a boral a, vawiin chhun dar 12:00-ah anmahni inah vuina inkhawm neiin thlanmualah vui liam a ni ang. Pu F.Vanlalthlana hian a nupui Pi Laltluangpuii leh an fate hmeichhia 1 leh fapa 4 a kalsan a, a naupang ber kum 8 mi a ni. MPC Gen.Secretary pawh lo ni tawh Pu F.Vanlalthlana hian tlem lai deuh khan MNF a zawm a ni.
