mi(sual).com

Central Minister-in Sum Hman That A Nih Leh Nih Loh Hriat Nan RTI Hmangtangkai Turin Mipui Duh
Aizawl, Sept. 02 : Nimin khan sorkar hmalakna mipui hnena puanzar chungchang beihpui thlakna kharna hun I&PR Auditorium ah neih a ni a. Kharna hunah hian Pu Jairam Ramesh, Central Minister for Commerce chu khuallian a ni.
Khuallian Pu Jairam Ramesh chuan North East State tan a sorkar laipuiin sum tam tak a senral chu a hmanna tur diktak a hman anih leh nih loh bakah hman that a ni em tih hriat nana Right to Information hmang tangkai tura mipui a duh thu a sawi a. Mizoram tihhmasawn nan Anthurium, Sapthei, Sawhthing, Serthlum leh mau te nasa zawka thawkchhuak tura sorkarin tanlak tul a tih thu a sawi.
Mizoram tihhmasawn nan sorkar laipui hmalak tum dan hrang hrang sawiin Pu Ramesh chuan Aizawl Airport leh hmasawnna dang atan te, thenawm ram Bangladesh leh Myanmar insumdawn tawnna atan Chhimtuipui (Kolodyne) siamtha a, Bay of Bengal lawngchawlhna siamin, India ram khawpui dangte nen sumdawnna siam turin hmalak a ni ang a. India leh Myanmar insumdawn tawnna atan Moreh (Manipur) chauh hi a tawk lova, Mizoram hian S.E. Asia leh India ram insumdawnna a thlunzawm tur a ni a ti bawk.
Mizoramin Medical College leh Engineering College kan nei lo tih a hriata a phut zawk thu Pu Ramesh chuan sawiin, State puitling nih kum 20-na, 2007 ah hetiang College lungphum phum tura tan lak anih dawn thu a sawi bawk a. ‘Mizoramah helpawl inkhuar phal lo ula, HIV/AIDS lakah fimkhur hle rawh u’ a ti.
Pu Lalduhawma, ZNP President pawhin thusawiin sum tam aiin a hmanna dik, hna puitling tura tan lak tul a tih thu a sawi ve bawk a. Kawng laih zawh tawh a sawi tam tak hi puitlin loh a ni a ti a. Mizoram electrict hnianghnar pekna tur sum ‘Peace bonus’ pe turin Central Minister hi a ngen nghal a. Prof. Lianzela pawhin Aizawlah Municipality mumal kan neih loh chuan kan hlawhtling mumal lovang a ti bawk.

Mipui leh Pathian Hnenah Hawla’n Ngaihdam A Dil
Tun laia sawi hlawh tak mai zin si lova MLA-ten zin man an lo bill chungchangah Pu Lal Thanhawla chuan MLA-ten dik zik tluak loa Leave Travel Concession (LTC) an bill nia sawiah a party MLA-ten free travel an bill danah thil dik zik tluak lo a awm a nih phawt chuan mipui hnena thiamthu sawi an tum loh thu sawiin MPCC President a nihnain Mizo mipuite leh Pathian nung hnenah tihtakzetin ngaihdam a dil. Nimina Congress Bhavan-a political session an neihah thu sawiin Pu Hawla chuan tun hnuah hetianga inpuhmawhna hi a awm tawh loh nan an party MLA-te chu an fimkhur tawh dawn tih a tiam. Right to Information Act chu mipuiin an hmang tangkai dawn nia hriain lawmawm a tih thu Pu Hawla chuan a sawi a, amaherawhchu, mimal inhuat theih zawng leh inelrel zawnga hmang lo a, dikna leh rinawmna a lo awm theihna tur leh hnam anga insiam that nana hman theihna ture zawnga hmang tangkai turin mipui a ngen.
Zoram Nationalist Party pawhin dik loa LTC an MLA-ten an lo la ve chu tha an ti lo a, thangkhat lian zet he dan sawiselna awm loa lo hman tawh hi mipuiten hriatthiam harsa an ti nia a lan avangin he dan hi siam that a nih loh pawhin an MLA-te chuan he Free Travel Facility hi lak ve tawh loh an inhuam a ni tiin zahawm an ti a, an pawmpui thu an sawi. Nimina ZNP National Executive inkhawm chuan MLA-te Free Travel Facility hi anngaihtuah a, “The Mizoram Salaries, Allowances and Pension of Member of the Legislative Assembly Act” chuan MLA ten a hranpaa T.A. an lak thin chu tihtawpsakin kum 1991 atang khan he Free Travel Facility hi a lo pe ta a ni an ti a. (section 7 and 8).
ZNP National Executive chuan Minister leh an rank-pui MLA ten T.A. leh Free Travel Facility an la kawp thei tha an tih loh thu sawiin MLA-te ang bawkin a eng zawk zawk emaw chauh la thei tura dan siam that ni se an ti.
ZNP chuan an policy-ah pawh Right to Information Act hi Mizoram mipui tan a pawimawhzia an lo tarlan tawh thu sawiin an MLA te pawhin Assembly-ahte bill pulutin an lo auchhuahpui tawh a ni an ti a. Ruling party-in an duhpui loh avanga tlang zo lo chu sawrkar laipuiin India ram puma hman tura a lo siam ta chu lawmawm an ti a, he dan hi Mizoram chhungah rorelna dik, tha leh fel fai tak a awm theih nan leh Zoram miuiten tangkai taka an hman zel an duh thu an sawi.

FLAM-in Pu Duhoma Thusawi A Hriatsual Palh A Ni An Ti
Former Legislators Association of Mizoram (FLAM) chuan tual chhung chanchinbua Pu Lalduhawma, MLA thusawi lo lang “He Free Travel Facility hi kum 1990-a siam kha a ni a, tun hnaia chanchinbua lo langte chauh kha a latu kan ni lo a, 1990 hnui lama MLA zawng zawngin kumtinin ang khatin kan la vek a…”a tih chu a hriatsual palha an ngaih thu sawiin he dan hi kum 1991-a siam chauh a nih avangin 1991 hma lamah chuan MLA ten Free Travel Facility hi an nei ve lova, lak ngaihna pawh a awm lo an ti. FLAM Office Bearers chuan hemi chungchang hi nimin piah khan ngun takin an ngaihtuah a, he dan hi hman a nih hnuah pawh MLA zawng zawngin Free Travel Facility hi an la vek lova, a late zinga tamtakte chuan danin a phut angin bill an siam a, a thente phei chuan Assembly Secretariat atanga advance T.A. an lak an zinnaah an hman zawh loh avangin an hman bang an pekir leh a ni an ti. Hei hi Assembly Secretariat-ah enfiah theih a ni an ti bawk.
FLAM chuan mi thahnemngaiten Right to Information hmanga ram hruaitute sum hmun dan leh hman dante an rawn chhui chhuak chu ram politics siamthatna kawnga rahbi pawimawh takah an ngai a, lawmawm an ti. Huaisen taka thil dik lo hai chhuak a, siamthatna hna thawk chhunzawl zel turin FLAM chuan mipui an ngen.

Buhfai Phur Truck Driver An Nuar
Buhfai phurh hnathawktu truck driverte an nawrh avangin nimin khan Bairabi leh Vairengteah bungraw phur chi eng motor mah a lut lo a, Food, Civil Supplies & Consumer Affairs Secretary Pu K.Lalnghinglova chuan he nawrhna hi Kolasib Carrying Contractors leh Truck driverte inkar thu a ni tiin an inkara chinfel tur a ni a, mahse, mipui harsatna siam zawnga an kal zel chuan a tul anga action lak a ni ang a ti. Hetianga kawng dah chah a nih avang hian disel peh petrol tam tham sem chhuah chun control nghal a ni a, carrying contractor leh driverte chu vawiinah inhmukhawm tura koh an ni a, Mizoram chhungah an awm duh loh leh Cachar police lam an inrawlh duh bawk si loh avangin driverte hi biakpawh theih an ni lo a ni a ti. Tun dinhmunah petrol leh diesel dinhmun chu chi-aina tur a awm lo niin Pu K.Lalnghinglova chuan a sawi bawk.

MCF leh MPCC Hotute An Inkawm
Mizoram Consultative Forum (MCF) chuan nimin piah chhunah khan MPCC hotute nen an President Pu Lal Thanhawla ina inkawmhona neiin ram hmasawnna atana an ngaihdan leh duhdante an sawiho. Pu Hawla chuan an party hruaitute hmelhriattirna neiin mimala a vei zawngte leh an party dinhmunte a sawi a. MCF President Pu V.L.Bela chuan an pawl kalphung leh vei zawngte sawiin Mizoram political party hrang hrang an kawm chhante a sawi. “Ram mipuite mar dek chunga ram hruaitute leh hotute hnena mipuite vei zawngte leh harsatnate thlen” te chu ram hmangaih leh vei taka an pawl thil tih theih dan tawk a ni a ti.
MCF General Secretary Pu C.Thanmawia chuan an pawl lehkhabu buatsaih “Mizoram Consultattive Forum General Conference Thurel 2006 Bawhzuina” chu Pu Hawla hnenah a hlan a, he lehkhabu hi April ni 17, 2006 khan Chief Minister leh MNF President Pu Zoramthanga hnenah an lo hlan tawh a ni. MCF branch hrang hrang atanga ram mipui vei zawng leh hmasawnna atana sawrkar ‘tih makmawh’ nia an hriat chi hrang hrang khawnkhawm a ni.
He inkawmhonaah hian Pu Lal Thanhawla chuan ram hmasawnna atana tih makmawh leh hmachhawp pawimawh tak takte chu an party-in a bul; an lo tan leh kut thlak tawhnate an ni vek a ni a ti.

YHAI National Executive
Youth Hostel Association of India (YHAI) National Executive Committee inkhawm chu YHAI Mizoram State chuan Sept. ni 4 leh ni 4-ah a thleng dawn a, thawhtanni dar 10:00 a.m.-ah a hawnna inkhawm Tourist Lodge, Chaltlangah Pu K.Sangthuama, Food Minister khual lian a ni ang. YHAI National Executive inkhawm kaihhnawih hian vawiin atanga Sept. ni 6 thlengin Aizawl leh a chhehvelah programme an siam.

Mit Chungchang Zawh Theih
Vawiin dar 1:05 leh dar 2:00 p.m. inkara All India Radio Aizawl ‘live phone’-in hunah Eye Donation Fortnight August ni 25 atanga neih pualin eye donation chungchang leh mit lam harsatna neite tan zawhna zawh theih a ni a, Dr. C.Zarzoliana, Deputy Director, National Programme for Control of Blindness leh Aizawl Civil Hospital-a Senior Eye Specialist Dr.K.Lalremsanga ten zawhnate an chhang ang. Phone 2322515 leh 2323148-ah zawhna zawh theih a ni.

MZP Campaign Zel
MZP Gen.Hqrs.-in Mizoram pum huapa HIV/AIDS & Career Awareness Campaign a kalpui mek chu nimin khan Saitualah neih a ni a, MZP Gen.Hqrs. atangin Gen.Secretary Pu V.L.Krosshnehzova leh Asstt.Gen.Secy. Pu Ricky Lalbiakmawia-ten an ho.

LSA Hruaitute Thlanna
Lai Students Association (LSA) chuan kum 2006-07 chhunga hruaitute thlanna vawiin dar 11:00 a.m.-ah Lai House, Bungkawnah an nei dawn a, memberte kim taka kal turin an ngen.

Truck-ah Tla Hlum
Nizan hmasa dar 11:00 vel khan Serhmuna thing zaia inhlawhfa nia hriat chu Sairang Sihhmuiah 40-7 truck atangin a tla hlum a, amah hi feet 5 leh inches 8 vela sang, ngo lam deuh a ni. A thawmhnaw zinga cassette atanga a lan danin Darhmingthang, Tiddim, Myanmar niin a lang. A ruang hi Sairang Police Station-ah an kawl a, a chhungte emaw amah hria leh ngaihventu an la awm lo. (AIR Aizawl).

Lunglei-ah HIV + 55
Lunglei a thisen test mi 1870 zingah HIV Posititve 55 an awm a. Mipa 37 leh hmeichhia 18 an ni a. AIDS natna hi Mizoramah a mikhual ta lo hle a; Aids vanga thi hi Mizoram pumah mi 103 zet an awm tawh ni a record a ni.

Apex Bank hruaituah zaithiam
Nimin khan Lungleiah Apex Bank Board hruaitu thlan tur chungchangah Lunglei atanga Board hruaitu atana aiawh tur thlanna neih a ni a. Zaithiam Lianthangpuia chu Vice President chuh tur hian thlan a ni.

MNF Sub.Hqrs in ngaidam
V/C inthlan hnuhnung ber a an party candidate te dinthuahtu an party mi leh sa kum 2 chhung atana an hnawhchhuahte chu MNF Sub.Hqrs. chuan an ngaidam leh vek a. Hei hi tunhnaia Sub.Hqrs. hruaitute tana camping an neih rahchhuah kalzel a ni.

Chawngte Principal September 7 thleng hun pekbelh
Mizo Zirlai Pawl (MZP) Sub.Hqrs in Chawngte College Principal, KP Nath-a, August thla chhunga Mizoram chhuahsan tura an tih chu Chawngte khua a NGO leh sorkar mipawimawh hrang hrangten an ngen sakna angin MZP Sub.Hqrs, Lunglei chuan Mizoram chhuahsan tura an tih hun chu pawhsei sakin September 7 ral hma ngeia Mizoram chhuahsan tur leh September 7 a MZP Sub.Hqrs office a inreport ngei ngei turin an ti.

Sawrkar Driving School Hawng
Transport Minister Pu Lalrinchhana chuan nimin khan Transport department hnuaia motor khalh zirna (Driving School) hmasa ber South Hlimen-ah a hawng. Minister chuan private driving school atanga zir chhuakten duhthu an sam loh avangin driver quality tha zir chhuak tura he school hi din a ni a ti. Sairang thlenga rel a kal theih nan tan lak mek a nih thu a sawi bawk. He driving school-ah hian motor lian khalh zir tur 20 leh motor te khalh zir tur 24 an zir thei dawn a, department bus chuan an hawng leh kal lam a thlawnin a phur thin ang a, thla hnih chhung zirin fee Rs.3,500 an chawi ang..

Similar Posts:

• Return to innocence
• NLUP thla thar October-ah pek fel tum a ni Khaw inpeih tawhte pek an ni tawh – CM
• Rorelna langtlang awm tur a ni
• MNF leh PC inchhunfin chungchang hi.
• Serchhipah Ex-Minister Pu Tlanghmingthanga hovin Remna Ni hman a ni

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Saturday, September 2nd, 2006 at 1:09 pm and is filed under News, Whatever. You can follow any responses to this entry through the RSS 2.0 feed. You can leave a response, or trackback from your own site.