mi(sual).com

Aizawl October 16 : Mizo hmeichhe zinga lar tak Lalsangzuali Sailo (57) chu Inrinni chawhma dar 11:20 khan Greenwood Hospital, Bawngkawn-ah ‘aneurism’ natna avangin a boral. Nimin khan Bungkawn Nursury thlanmual-ah vuiliam a ni, vuinaah hian zaithiam, thu leh hla thiam, kohhran hruaitu, MHIP leh sorkar mi pawimawh an thahnem hle. A pasal Laldinliana leh an fate pahnih a kalsan .
Lalsangzuali Sailo hi ‘Mi bik’ a ni a, hla phuah a thiam a, a zai thiam bawk a. Thusawi a thiam a, a ziak thiam bawk a; a samsei pawh hi larpui tham (a sei laiin feet 7.1) a tlin rualin a tan pawhin a larpui tho. A khabe a tawi avangin thil herhna pakhat chu driver leh motor workshop neitute chuan ‘Lalsangzuali’ tiin hming thi thei tawh lo (immortal name) an phuah sak a, vai ho pawhin an hre ve mai. MHIP general hqrs-ah hruaitu hlun a ni a, kohhran hmeichhia-ah khaipa ber a ni. A nu a boral hma avangin upa ber a nih angin a naute tan nu a ni a, Mizo hmeichhiate tan nu nih tling a ni. Vantlang tana a inhman nasat avangin India ram chawimawina sang Padma Shri award pawh India President in Delhi-ah a lo hlan tawh bawk. Sept. ni 25, 2006 khan Greenwood Hospital, Bawngkawnah admit a ni a. Heta tang hian that chhuah tak tak awm lovin Zirtawpni kalta phei kha chuan thi thanin a thang hman a. A fapa Benjamin Zaithantluanga, Mandya PES College of Engineering, Karnataka-a BE (Civil) zir zo tep chuan June thla khan a boral san a, a thih hnu lawk hian a result a chhuak a, distinction-ah a tling a, interview chauh a hmabak tawh nghe nghe a ni.

Zualbawhi hian July 7 khan a mit veilam a zim sawt tih a hria a, Aizawl a a inentir hnuah phai pan tura an rawn angin July 12,2006 khan Bangalore-a NIMHANS-ah an inentir a. A thluaka thisenzama Ngawt awm chu an zai ngam loh avangin Japan-a kal turin an lo rawn a, July 20 khan AIIMS, New Delhi an pan a. July 29 khan AIIMS chhuahsanin Aizawlah an lo haw ta a ni.A lu na thin leh a chaw ei a tui hlei thei tawh lova, insawiselna dang erawhchu a nei lo. September 26 tlai khan a lu na avangin Greenwood hospital-ah dahluh a ni a. Oct. ni 13 zing atang khan a biak theih a ni ta lova, nikhaw hre lova awm zuiin Drip leh Oxygen pek a ni chung pawhin doctor ten theihtawp chhuaha an enkawl chung pawhin a nunna hlu tak chu an chhan zo ta lo a ni. Lalsangzuali vuinaah chief minister Zoramthanga te nupa leh cabinet minister thahnem tak, Opposition leader Lal Thanhawla te nupa, MPC president Brig T Sailo leh politician thahnem tak an tel a, pangpar a dawng hnem hle. A vuina programme hi local TV te chuan a kimchangin an pechhuak a ni.
A chanchin tlangpui

Lalsangzuali Sailo hi kum 1949, May ni 15 khan Upa S.Vanchhuma leh Sapthangi Chawngthu te fa 11 zinga upa ber atan Thingsai khuaah a piang a. Kum 1978, June ni 27 ah Laldinliana nen Mission Veng Kohhran Biak Inah inneiin fa pathum, mipa pahnih leh hmeichhia pakhat an nei a, Aizawl Nursery Vengah an chhungkua in an khawsa a ni. Zirna lamah chuan St.Paul’s High School, Aizawl. St.John Bosco’s Convent, Cherrapunji leh St.Mary’s College, Shillong-ah te zirin 1972 khan B.A (Honours in Education) a pass a. 1981-ah B.Ed zovin AD 2000 khan Himachal Pradesh University atangin M.A (History) a zo leh a ni.
Hnathawhna lamah chuan kum 1973 Feb 1 khan sawrkar hnaah zitrtirtu hna thawkin a lut tan a. Govt. JL Higher School-ah rei tawk tak zirtirtu hna a thawh hnu-ah Aug. ni 21, 2002 ah Headmistress-ah a kaisang a. Kum thum a thawh chhunzawm hnu-ah Govt. Aizawl High School-ah May ni 19, 2005-ah a thawk leh a. Feb. ni 17, 2006 khan Govt. Comprehensive Model School, Model Vengah sawn leh a niin a thih ni thlengin he school-ah hian a thawk a ni.
Sawrkar hna lama a eizawnna mai bakah hian zai thiam leh hla phuah thiam, thu ziak mi a ni tel bawk a,Zai lamah All India Radio ‘A’ Grade Artiste niin hla 450 chuang a record tawh a, heng zinga 297 chu a ma phuah niin zaithiam hrang hrangin a hla 86 an sa bawk. Hla 365 phuah tawhin a hla phuah thenkhat chu Class IV atanga Class XII thlengin zirlaibu-ah telh a ni hlawm.
Audio Album hi 29 tichhuak tawhin kum 1977 khan a mimal audio album tichhuakin Mizo zinga mimal audio cassette siam hmasa ber a ni a. Zai leh hlaphuah a thiam avang hian chawimawina chi hrang hrang hriat theih chinah 12 zet a dawng tawh a. Kum 1975 khan milar thlan hmasak berah Mizo hmeichhe lar ber ‘Women of the Year 1975’ chawimawina hlan a ni a. Chawimawina a dawn dang \henkhatte chu kum 10 chhung Mizo hmeichhe thu leh hla thiam bera thlan niin, 1991, 1992, 1996-ah te hlaphuah thiam ber lawmman a dawng a. 1998 khan AIR Outstanding Award chawimawina hlan a ni a, kum 2000 khan kum 100 chhunga zaithiam ber (Greatest Singer of the Century) Award hlan a ni.
Mizo literature lamah a thawh hlawkin lehkhabu thahnem tak a ziak bawk. Lehkhabu 25 leh Thelep lehkhabu Bu 3 ziakin kum 1999 khan ‘Tlawm Ve Lo – Lalnu Ropuiliani’ tih a ziak atangin Mizo Academy of Letters (MAL) chuan Book of the Year chawimawina citation a lo pe tawh a ni. Heng bakah hian a lehkhabu ziak avangin chawimawina thahnem tak pek a ni bawk.
Khawtlang leh kohhran lamah mawhphurhna leh dinhmun pawimawh tak tak thawk tawhin sawrkar din Committee leh tlawmngai pawl hrang hrang pawl 50 zetah a tel tawh a. Chawimawina a dawn zinga hlu leh ropui ber pawl Padma Shri in Literature chu India President K.R.Narayanan chuan April ni 12, 1998 khan Rashtrapati Bhawan, New Delhi-ah a hlan a ni.

Similar Posts:

• Pi Lalsangzuali Sailo
• Vawiinah Pi Zualbawihi lehkhabu leh hlabu
• Tunge Padma Bhushan lawm lo ang?
• Book Of The Year 2007 “Zofate Zinkawngah”
• Capt. L.Z. Sailo kan chan ta

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Sunday, October 15th, 2006 at 9:04 pm and is filed under More than words, News. You can follow any responses to this entry through the RSS 2.0 feed. You can leave a response, or trackback from your own site.