India Sawrkar Nena Inremna Ziaktu MNF Sawrkarin High Court Hrang Neih A Ngaihthah
Aizawl, Dec 01 : Mizoram Bar Association chuan India leh MNF inremna ziaktu MNF sawrkar chuan he an inremnaa chuang ngei ‘Mizoramin a duh chuan High Court a hrangin a nei thei ang’ tih chu an ngaihthahah a ni tiin mak an tih thu an sawi. Nimin piaha Aizawl Press Club-a chanchinmite an kawmnaah Mizoram Bar Association (MBA) hruaitute chuan party dang sawrkarte chuan lo ngaihthah deuh pawh ni se an hriatthiam awm a, mahse, inremna ziaktu MNF tum hnih ngawt an sawrkar tawh hnuah tun thlenga Mizoramin High Court hrang a neihna tura hma an lakna hriat tur awm lo hian inremna an ziak ngei pawh barah an khawn ta lo tih tilang a ni an ti. MBA hruaitute chuan India Constitution article 214-ah “State tinah High Court a awm tur a ni” tih a nih tho laiin Mizoram hi state dangte nena khaikhin chuan mihring kan tlem a, court-a thubuai pawh a tam lo tih chu phat rual a ni lo a. Amaherawhchu India Constitution sawi piah lamah India leh MNF inremna (Memorandum of Settlement) 12 (iii)-ah chuan Mizoram chuan a duh chuan amahin High Court hrang a nei thei ang tih a chuang a, hei hi tan chhan atan Mizoram sawrkar chuan a hmang thei a ni an ti. Mizoramin High Court hrang a neihna tur hian tum hnih MNF sawrkar tawh chuan sawrkar laipuiah vawi eng zatnge thu an lo thlen tawh, engtia kalpui zel nge an tum tih an hriat chak thu an sawi.
MBA hruaitute chuan kum 1990 June thla atanga Mizorama Guwahati High Court permanent Bench chu judge 2 awmna tur ni mah se, pahnih chu sawi loh pakhat a lo kal zauh zauh chauh a ni an ti a. Judge lo kal chang chauh hian court thu ngaihtuahna (session) neih thin a ni an ti. Judge pakhat hi single bench a ni a, single bench thutluknaa lungawi lote an kal lehna tur chu Division Bench (judge pahnih chin awmna) a ni a, hei hi Mizoramah a awm ngai loh avangin single bench thutluknaa lungawi lote chu Guwahati-ah an kal zel a ngai a, sum leh pai leh tha leh hun tamtak sen a ngai thin a ni an ti. High Court hrang neih a nih hma pawha Single Bench leh Division Bench neih hlan nghahhlelhawm an tih thu an sawi.
MBA chuan tuna High Court Permanent Bench awmna Govt. Complex hmawr chu Aizawl laili atanga kilometre 8 vel laia hla a nih avangin mipui tan a remchang lo em em a, chuvangin Aizawl hmun laili zawka High Court dah a nih theih nana a lo beih tawh thin a ni MBA hruaitute chuan an ti a. New Capital Complex, Khatlaah High Court building awm ve ngsei se tiin an nawr a, chuti chung chuan Mizoram sawrkar chuan High Court hmun tur reng reng a lo ruahman tel lo a ni an ti.
Chutih laiin Mizoram sawrkar chuan a ngaih pawimawh office leh quarters leh Raj Bhavan sawnna turte nen lam a ruahman fel diam si a, chuvang chuan High Court hmun atan hian Mizoram sawrkar chuan hmun ualau leh mipui tana pan awlsam taka pan theih tur hmun Aizawl khawpui laili laiah ram a pe tur a ni tiin High Court hnenah PIL an thehlut ta ringawt mai a ni an ti.
MBA hruaitute chuan Mizoram sawrkar chuan Judiciary a ngai pawimawh tawk lo hle nia sawiin state dangte chuan High Court chu an tram khawpui laili takah District Court-te nen inhlat lo tein an dahkhawm a, Mizoramah chuan High Court Bench lo awm ve pawh hi sawrkar chuan hnawksak a ti ngawih ngawih mai nia an hriat thu an sawi bawk.
Hetia PIL an thehluh avang hian Mizoram sawrkar chuan New Capital Complex hnuai kawr kamah nakin zela High Court neih hun pawha awm zui zelna tlak tur pawh ni loah High Court chu dah turin rawtna a siam ve ta a ni an ti a. Hei hian judiciary chungchanga Mizoram sawrkar rilru a tichiang a ni an ti.
MBA hruaitute chuan tuna Raj Bhavan hi New Capital Complex-a sawn turin building sak meka ni a, chutia Raj Bhavan sawn chhuah a nih chuan tuna Raj Bhavan awmna hi District Court-te nen pawh inhnai leh mipui tana pan awlsam zawk a ni tiin High Court dah nana hmang turin Mizoram sawrkar an nawr mek tih an sawi bawk.
Ruihhlo Leh HIV/AIDS Dona Kawngah YMA Leh V/C-ten Chak Zawkin Tan La Dawn
Central YMA leh Aizawl khawpui chhunga V/C-te chuan ruihhlo dona leh HIV/AIDS darh tur ven nan chak zawka tan lakho an remti. Nimin khan Central YMA hruaitute leh Aizawl khawpuia V/C hrang hrang aiawhte chuan Vana Pa Hall-ah hemi chungchang hi sawihoin, lungrual taka hma lakhona tur an ruahman zingah Dec. ni 10 hma ngeia veng hrang hranga duty tur insiama tha taka duty nghal te, Aizawl khawpui kil tina ruihhlo dap chhuaktu SRS tihchak te, naupang kum tling lo puitling hruai loha zan lama vak chhuak thinte enfiah a, vah chhuahtir tawh loh dante a tel.
He inrawnkhawmnaa thusawitu Central YMA President Pu J.H. Zoremthanga chuanHIV/AIDS darhzau zel tur venna kawngah tun thlenga YMA hma lakna chu siam that ngai nia a hriat thu leh huam zau zawka hma lak ni se thaa a rin thu a sawi a. Sawrkar leh World Health Organisation (WHO) ten HIV?AIDS darh zau tur ven kawnga condom sem te, damdawia inchiu chingten hriau an inhmanpawlh lohna tura hma lak a tul thu te, ruihhlo ngaite tlukluhna tur Drop In Centre veng hrang hranga din ngai a tih thu te a sawi a, Hengte hi sakhaw thil nena inhmeh lo anga ngaihna paihthla a, kan nihna leh dinhmun dik tak pawm a, HIV/AIDS dolet tura hma lak a ngai ta a ni a ti.
He inrawnkhawmnaah hian Central YMA hruaitu dangte pawhin thu an sawi a, sawihona neih a ni a. YMA Branch hruaitu tha, ruihhlo leh ruih theih thil danga fihlim neih tul an tih thu te an sawi a, he inrawnkhawmnaa thil sawihona zul zui hian Central YMA Kum Puan Committee chuan ruihhlo do kawnga inkaihhruaina thu a la chhuah dawn a ni.
ADCC-in Hmachhawn Dawn
Aizawl District Congress Committeee (ADCC) chuan ‘thangthat lak tum luat vanga Tuikuk hel in-surrender lem cheleka mahni leh mahni inbum thin’ an tih Home Minister Pu Tawnluia chuan MNF party kalkhawm hmasah Mizo hnam hmusit leh chaldelh takin khabe a sep leh thin a ni tiin hriatthiam harsa an tih thu an sawi. Nimin khan press release chhuahin Pu Tawnluia chu ram hmasawnna aia mahni pumpui hmakhua chauh lungkham vanga Greater Aizawl Water Supply Scheme Phase II tih hlamzuih thak pawisa lo, Zoram tundin aia kum 2008-a tlin chu MNF party tum bulpui ber a nih puang chhuaktu a ni tiin eiruk chintawk nei lo leh kum 2008 inthlanah hlemhletna leh hel chakna bawk hma chhuan chunga tlin leh hi an tum ber a nih ngai chuan ADCC chuan dikna leh Pathian chakna hma chhuanin Zoram hmasawnna tithuanawptu ram hmelma chu an hmachhawn zel dawn tih an sawi.
Ram Dang Mi India Tlawhtu Kuminah Mataduai 4 Tlin Beisei
Sawrkar chuan kum kal mek chhung hian ram dang atangin khualzin maktaduai li dawn laiin India ram an tlawh beisei a ni a ti. Lok Sabhaa zawhna chhangin Union Minister for Tourism & Culture Ambika Soni chuan kum kal taa ram dang khualzin lo lut zat atangin kuminah hian khualzin lo lut hi 14%-in a pung mai thei a ni a ti a, sawrkar chuan hotel room tlem phuphuk nana budget hotels sa turin kawng hrang hrangin tan a la a ni a ti. Hetiang hotel sak nan hian Railways chuan hmun 20-ah ram a pe a, heng hotel sak hi kum 2010-ah chuan zawh a ni ang a ti. Pi Ambika Soni chuan Indian Tourism Development Corporation-in a enkawl hotel zawng zawng chu tihchangkan leh zauh (upgrade) a ni a ti a, chuvangin ITDC-in an enkawl hotel-te hi hralh tumna a awm lo a ti. Sawrkar chuan sawrkar leh mimal tangruala budget hotels sak chu a fuih bawk a ti.
Congress Pisa Khar
Mizoram Congress (MPCC) chuan Dec.ni 15 dar 11:00 a.m.-ah Congress Bhavan-ah inkhawmna neiin a tuk atangin kumin atan pisa an khar ang a, kum thar January ni 9 dar 11:00 a.m.-ah pisa an hawng leh ang. Vawiin dar 2:00 p.m.-ah MPCC Ececutive members leh Office Bearers chuan Pu V.Zahnuna, Bawngkawn tun hnauia boral chu anmahni inah an ral dawn. Kim taka kal tur a ni an ti.
Zaninah Advance Christmas
Zanin hianVana Pa Hall-ah Aizawl City Pentecostal Youth Department (UPC Thalaite) chuan ‘advance christmas’ an hmang dawn a, zaithiam hrang hrang an zai ang a, christmas drama chhuahani ang. General PYD President leh Secretary-ten thu ans awi ang a, fahrahte pualin thawhlawm khawn a ni bawk ang. PYD -te hi Nestle India Ltd.chuan coffee a lum dawn a ni.
Official leh Private Bill Pass
Nithum chhung inkhawm Lai Autonomous District Council inkhawm nimin piaha tawp taah chuan Right to Information Rules 2006 leh LADC Constitution, Conduct and Business (Amendment) Rules,2006-te chu official bill pass zingah a tel a. Private member’s resolution pass zingah LADC hi chu sawrkar laipuiin direct-a pawisa a pek theih nan chak taka hma lak ni rawh se tih a tel a, official resolution Scheduled Tribe list-a Pawi tih chu Lai tia thlak ni rawh se tih leh LADC-in town-ah Lawngtlai puang ve rawh se tih leh Mizoram Oil Palm Act chu LADC huam chhungah pawh hman ni ve rawh se tih an pass bawk.
MILLTA Hhruaitu Tharte
Mizo Literature & Language Teachers Academy (MILLTA) chuan Nov. ni 28 khan Mizoram University Mizo Department Lecture Hall lianberah khawmpui an nei a, Mizoram University leh College hrang hrang atangin Mizo subject zirtirtu 50 vel an kal a, kum 2006-08 chhunga an pawm puipa turte an thlang a, President Prof.Laltluangliana Khiangte, MZU, Vice President Pu B.Lalthangliana, Hrangbana Copllege, Secretary-Pu Lalzuithanga,Aizawl North College, Asstt.Secretary Pu Lalrammawia Ngente, Johnson College leh Treasurer Pu T.L.Thianga, Hrangbana College an ni. MILLTA hian member 100 chuang an nei a, kum thar lamah seminar leh programme pawimawh tak tak neih an tum.
MNF-in Zawhna Congress Zawt
MNF Gen.Hqrs. chuan MPCC press release chhangin Tuikuk hel BLFM uniform lei chungchang te, Rs.2,000 thawh chungchang leh a chuang cheng nuai 10 chuang BLFM leh sawrkarin an insem MPCC press release-in a tih chu tu hnen atanga an dawn nge, a hming leh thu dik tak Zoram mipui hriatah puang chhuak ngei turin MPCC an phut a, chuti a nih loh chuan Pu K.L.Liana thu ziak ang a, an puahchawp lehkhabu an chhuah ang leka belhchian dawl lo a ni ngeiah an ngai dawn a ni an ti.
MHIP Silver Jubilee
Vawiin dar 1:00 p.m. atang hian MHIP Zarkawt Branch chuan an veng Community Hall-ah an silver jubilee hlim tak leh lawm takin an lawm dawn.
Chhingchhip Champion
Lalsawmliani leh Lal Thanchunga Memorial Football Tournament nimin piaha Serchhip-a khelh zawhah chuan Chhingchhing an champion a, finalah Serchhip P&E Veng Sporting Club goal 3-1-in an hneh a, tangkafai Rs.10,000 leh trophy an dawng a, rnner-up team hian Rs.5,000 an dawng bawk. Khual lian bialtu MLA Pu Lal Thanhawla chuan Serchhip-a Sports Complex leh Thenzawl field chu an nih tur ang taka tihpuitlin nan tan lak zel a tum tih a sawi. He tournament-ah hian Serchhip district chhung atangin football team 11 an tel.
