mi(sual).com

Mipat Hmeichhiat Hmansual Kawngah Mizo Mipate Rilru A Lian Bik Em Ni ? Rawlthar Tam Zawkin Minister Thusawi An Helh
Minister Pu Lalrinchhana’n Mizoram NSS Adolescent Quiz 2006 hman zawhna hun Vanapa Hall-a a thusawi chu rawlthar thenkhat chuan an helh hle a. He hunah hian Minister hian ‘Mipat hmeichhiat hmansual hi Mizo mipa rilruah a len avangin tleirawl rual hi fimkhur a tul em em a ni’ tiin a sawi a. Sawisel leh selna kan dawn nual vangin khawnge thalai mipa (rawlthar) te ngaihdan hriat nan inzawt zau deuh chhin teh ang tiin a thusawi chungchanga an ngaihdan rawlthar thenkhat zawh kual an ni a. A tam ber chuan minister thusawi chu an ei loh thu an sawi a. Thalai lam kaihhnawih anih vangin Teen Box huangah kan dah ta mai.
Mipat hmeichhiat hmansual kawngah mipate rilru a len bikna awm reng reng an hriat loh thu a tam zawk chuan sawi hlawmin ‘he thu hi Mizo mipate min tihhmingchhiat tumna nge hur sualna kawngah Mizo mipate hi kan uchuak a ni tih sawina’ tiin thenkhat chuan zawhna an siam a. Tlangval dawr nghak pakhat chuan “Nu leh pa thawhchhuah ni lo, mi hnuaia inhlawhfa chungin ka in chawm a, hetiang ang zawnga Mizo mipa thalaite chungchang diklo taka sawi hi a awm lo ka ti khawp” a ti a. “Milarte leh ram hruaitute hi chuan an thusawi tur hi an ngaihtuah chiang hmasa tur a ni a. Finfiahna awm mang lova hetianga tawng mai mai an ching thin hi a pawi khawp mai” a ti nghe nghe.
Mizo zinga AIDS natna vei tam berte chu Mipat hmeichhiat hman sualna vang ani tih chu a hrechiangtute sawi atangin kan hre fova. Hetih laia mipat hmeichhiatna hmansual kawngah Mizo mipate rilru a lian bik hle ni anga ngaih theih tur leh mipat hmeichhiat hmansualna vanga AIDS tidarhtua Mizo mipate ngaih theih tura thusawi awm erawh hi chu nguntak leh chiktak a ngaihtuah zui ngai a ni ve reng a. Mipa tam tak nun uluk leh fimkhur tak tak an tam avang hian mipat hmeichhiat hmansual kawngah Mizo mipate rilru a lian hle anga sawi mai bik chu thil dik ber a ni lo maithei bawk.
Kum lam upa deuhte erawh chuan Minister thusawi chu a dik theihna chin a awm ve thu an sawi ve hlawm bawk a. Fanu tleirawl neite tan chuan an thiankawm thin mipate laka fimkhur tura thurawn pek chu nu leh pa mawhphurhna anih thu leh Mizo zinga AIDS inkaichhawnna bul ber chu mipat hmeichhiat hman anih tlat avangin mahni fanute hemi kawnga an rualpui mipate laka fimkhur tura chah chu nu leh pate chuan an ti tur alawm an ti a; mahse mipat hmeichhiat hmansual Mizo mipate rilru-ah a lian hle niawm anga sawi erawh chu a dik chiah lo maithei niin heng kum lama upa lamte hian an sawi bawk. Tlangval pakhat naupang chhe lutuk tawh lo chuan ‘Ani pawh Mizo mipa ani ve tho va ama nihna a sawi nge, Mizo mipa zawng zawngte min sawina ? Mizo mipate zawng zawng min sawina anih chuan ka lawm lo viau ang” tiin fiamthu titakin Minister thusawi chungchangah hian a ngaihdan a sawi.

Similar Posts:

• Drama leh Film tha siam chungchangah inzirtirna nei
• Hmeichhiat mipat hman khawlohna leh Mizote
• Enge i ngaih ve dan??
• ‘KAN NU’ TIH A CHHAL TUR KA NEI VE LO
• Tu nge tha zawk?

Recent Posts:

• Health minister bàn turin CM ngen
• Daihnai lui-II
• Kan va tam em!
• 2011 a PUNE a mizo nula boral chungchang hrechiang lehzual duh tan
• KOHHRAN PAWL HRANG HRANG LEH AN DINHMUN TLANGPUI

This entry was posted on Friday, December 15th, 2006 at 3:02 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.