KOHHRAN PAWL HRANG HRANG LEH AN DINHMUN TLANGPUI

August 25th, 2013 1:56 pm by Chawngthu Pa

(Chhiar tur a tlem riau mai hei hi ka lo dah ve ang e.
 
 
Thuhma. Kristian sakhua hi kan Lalpa kum, kum zabi pakhatna ah khan Palestina rama Juda mi tlem te te atanga lo thangliana lo darh chho ta zel a ni a. Kristian sakhua nihna leh innghahna lairil ber chu Isua Krista leh a hnathawh, a nun leh a rawngbawlna, a thihna leh a thawhlehna ah a ni. Tichuan, lo thang chho zelin, atira mi tlem te te kha khawvela sakhaw lian ber leh zuitu ngah ber a lo ni ta a. Kristian sakhaw vuantu hi mi tluklehdingawn khat leh a chanve aia tam an lo ni ta a ni.
 
1. Roman Catholic. Roman Catholic te chu Rome Kohhran nena inzawm leh Rome Kohhran hotupa Pope thuneihna pawmtute an ni. Roman Catholic te hian an kohhran chu Isua Krista din ngei kha niin, chu kohhran chunga thuneihna chu Petera hnenah khan pek a ni a, chu thuneihna chu vawiin thleng hian Rome Kohhran hotu apiang (Pope) hnenah la inhlanchhawn zel, niin an ngai. Kohhran pawl hrang hrang zingah Roman Catholic hi a lian ber leh member ngah ber a ni a, 1990 khan member 865,500,000 a nei a. Khawvel mihring awm zawng zawng zinga 17% hi Roman Catholic an ni a, Kristian zawng zawng zingah 57% chu Roman Catholic an ni bawk. Kum 2010 vel kha chuan member 1055,458,116 vel lai an ni tawh a ni.
 
2. Anglican. Sapram (Britain) kohhrante khuan kum 1543 vel thleng kha chuan Rome Kohhran nen hian inzawmna an nei thin a. Mahse, 1543 ah khan an lalpa Henry VIII chuan chu inzawmna chu tichatin Supremacy Act of 1543 chu duangchhuakin Kohhran chu a thuhnuaiah a dah ta a. Chu chu Anglican Kohhran intanna anga ngaih a ni. 1990 khan khawvel pumpuiah Anglican member 51,600,000 an awm a. Khawvel mihring zawng zawnga zinga 1%, Kristian zawng zawng zinga 3% chu Anglican member an ni. Kum 2010 ah kha chuan member hi 58,027,167 vel lai an ni tawh a ni.
 
3. Baptist. Baptist kohhran hi Protestant pawl zingah chuan a lian ber pawl niin kum zabi 17-na hunlaia Puritan Reform hunlai khan din a ni. Baptist ho chuan Bible thuneihna an dah pawimawh a, hnimphuma baptisma chan ngei tur an ti bawk a, tin, Lalpa Zanriah leh Baptisma te chauh hi kan tih ngei tur (ordinance) chu a ni, an ti bawk. Kum 1990 ah khan khawvel pumah member 62,800,000 vel an awm a. Khawvel mihring zawng zawng zingah 1% leh Kristian zawng zawng zingah 4% chu Baptist an ni. Kum 2010 velah kha chuan Baptist member hi 80,586,315 vel lai an ni tawh a ni.
 
4. Lutheran. Lutheran Kohhran hi Martin Luthera’n October 31, 1517 a Wittenberg Biak In banga Roman Catholic Kohhran a sawiselna point 95 (Ninety-Five Theses) a tar atanga lo irhchhuak, Martin Luthera zuitu leh a hming chawia kohhran pawl anga awmzui ta zelte an ni. Martin Luthera’n Roman Catholic Kohhran a sawiselna (a diklohna a hailansak) atang hian Lutheran Kohhran mai ni lovin Protestant Siamthatna (Protestant Reformation) pawh bul a lo intan a ni. 1990 ah khan member 84,900,000 lai khawvel pum huapin an nei a. Khawvel mihring zawng zawng zinga 2% leh Kristian zawng zawng zinga 6% chu Lutheran Kohhran vuantute an ni. Kum 2010 velah kha chuan member hi 79,863,231 vel lai an ni tawh a ni.
 
5. Methodist. Wesley brothers an tih mai, Charles Wesley leh John Wesley te zirtirna leh thurin pawmtu leh zuitute hi Methodist tia hriat an ni. Methodist tih hming an put chhan chu, an thiltih leh nunphung reng rengah method strict tak mai an neih vang a ni. Chu chu miten koh elnan Methodist an ti a, an pu hlen ta a ni. 1990 ah khan member 25,000,000 lai an nei a, Kristian zawng zawng zinga 2% chu Methodist mi leh sa an ni. Kum 2010 velah kha chuan mi 27,397,164 vel lai an ni tawh a ni.
 
6. Presbyterian. Europe rama Siamthatna (Reformation) hunlai atanga lo piangchhuak, Presbyterian Kohhran hian thurinah chuan Calvina zirtirna an zui deuh ber. 1990 khan member 46,900,000 khawvel pumah an awm a, chu chu khawvel mihring zawng zawnga 1% vel, Kristian zawng zawng zinga 3% vel a ni. Kum 2010 ah kha chuan Presbyterian Kohhran member hi 51,982,323 vel lai an ni tawh a ni.
 
7. Pentecostal. Pentecostal kan tihte hian pianthar hnua Thlarau Thianghlim baptisma hi an tuipuiin an uar a, chu chu Thlarau Thianghlimin ringtu a chenchilh tanna niin an ngai. United Pentecostal Church (UPC) te hi Pentecostal an ni a, tin, Unitarian (Trinity pawm lo) an ni thung. Chutihlaiin, Pentecostal kohhran hrang hrang Trinity pawmtu (Trinitarian) tam tak an awm bawk tih kan hriat a tha awm e. Pentecostal kohhrante hi vawiinah chuan khawvela kohhran thang duang leh thang chak ber berte an ni. 1990 khan khawvel pumah member 88,600,000 an awm a, chu chu khawvela mihring zawng zawng zinga 2% niin Kristian zawng zawng zingah 6% lai a ni bawk. Kum 2010 vel kha chuan khawvel pumah member 153,589,786 vel lai an awm tawh a ni.
 
8. Orthodox. Kristianna hun hmasa lamah khan Rome lalram hnuaia khawthlang lam chan (Rome bial) leh khawchhak lam chan (Constantinople bial) te chuan culture leh politics avangtein innghirnghona eng eng emaw an lo nei tawh thin a. Chu chu lo zual chho zelin kum 1054 ah khan Pope Leo IX chuan Constantinople bial kohhran hotupa Michael Cerularius chu kohhran atangin a hnawtchhuak (excommunicate) a, Michael Cerularius chuan ama thuneihna atangin Pope Leo IX chu kohhran atangin a hnawtchhuak ve thung bawk. Chumi awmzia chu an inzawmna tichatin an inpawm lo tawn ta tihna a ni. Khawthlang lam chan kohhran chuan Roman Catholic hming puin Pope thuhnuaiah an awmzui zel a. Khawchhak lam chan hnuaiah ve thung hian British Orthodox, Serbian Orthodox, Orthodox Church of Finland, Russian Orthodox, Syrian Orthodox, Ukrainian Orthodox, Bulgarian Orthodox, Romanian Orthodox, Antiochian Orthodox, Greek Orthodox, Church of Alexandria, Church of Jerusalem leh America rama Orthodox kohhran te an awm a ni. Orthodox kohhran memberte hi an tam hle a, khawvel pumah 1990 khan member 131,900,000 lai an awm a, chu chu khawvel mihring zawng zawng zinga 2% lai niin, Kristian zawng zawng zinga 9% lai an tling phak a ni. Kum 2010 ah kha chuan member 143,475,245 aia tam mah an ni tawh ngei nia hriat a ni.
 
9. Kohhran Pawl Dangte. Kohhran pawl dang anga dah rem chiah lo emaw, han dah tur ema tam chiah si lo pawl hrang hrang kan sawi tak bakah hian thahnem tak an la awm. Chungho chu ‘Kohhran Pawl Dangte’ tiin lakhawmin dah ta mai ila. An zinga lian leh langsar zual deuhte chu – Seventh Day Adventist, Salvation Army, Coptic Kohhran (Coptic hi Aigupta sawina, chumi awmzia chu Aigupta rama Orthodox Kohhran sawina a ni), India rama Mar Thoma Kohhran te, Apostolic Kohhran, Moravian Kohhran, Church of North India, Church of South India leh Evangelical Kohhran hrang hrangte an ni (entirnan, Evangelical Church of Maraland, Evangelical Free Church of India, etc). Tin, tualto kohhran (Indigenous Churches) thahnem fe an awm bawk.

Similar Posts:

Recent Posts:

12 Responses to “KOHHRAN PAWL HRANG HRANG LEH AN DINHMUN TLANGPUI”

  1. 1
    muantea Says:

    FIRST!!!!!
    Kan inchuh thin lai kha a ngaihawm mang e!

    Report this comment

  2. 2
    chhana Says:

    A bengvarthlak e. Chhiar tur i rawn dah avangin ka lawm e. Post comment tu awmlo, chhiar tur awm bawk lo. I tang deuh teh ang u.

    Report this comment

  3. 3
    Chawngthu Pa Says:

    Misual hi a happening lo sawt riau mai. Silent reader nih ringawt pawh a nawm thin nen!

    Report this comment

  4. 4
    saint sammoo Says:

    Ka va comment khat ta em…..
    post BVT tak a ni..
    ka lawm e..

    Report this comment

  5. 5
    Nirvana Says:

    Kohhran pakhat chauh a awm. Krista mo tur kohhran. A dang zawng chu kawngka zau lam pan, nula thianghlim lamp oil keng tel lo. beram leh kel inthenhran laia lama kel lama peng.

    Report this comment

  6. 6
    Lalthoimoia Says:

    Ni e, a nihna takah chuan Kohhran chu pakhat chauh ani mai a, kohhran hi pawl sawi nan kan hmang a ni ta ber mai.Mimal theuh/nun hi a pawimawh ber chu a ni e.

    Report this comment

  7. 7
    PKfanai Says:

    Anglican ho chu an lo tam ve hle mai a! Baptist an hnaih ve deuh thuak a lawm maw le. Isua Krista ringtu zawng zawngte chu Kohhran pakhat kanni vek e. Kohhran hi a lo len a, a lo hausak lutuk a, Sum ringawt a atchilh hian, hriatloh karin an lo kalsual ve reng thei thin. Insiamthat ve deuh zeuh zeuh hi chu a thain a tul thin. Catholics ho hi chu an Sikul Policy hi a fuh cher cherin a effective cher cher em mai a, Ngialnghet leh pung chak lo thei anni lo. Cheng vaibelchhe telin khawvel khawi hmunah pawh awm se, zahpuiawmlo turin Sikul an han din a, Sikul naupang sangkhat dawn dawn te an han nei a, an duhtawkin Pathian thu an hrilh a, Biakin(Chapel) lian tak an sa nghal zel bawk a,Kohhran kha a ding ani nghal zel a, Sikul an din tawh naah chuan, Kohhran a ding nghal zel tihna a nih chu.An Sikula kalchhuak pap te chu Kristiannah an nghet chat mai thin a ni. (Y)

    Report this comment

  8. 8
    Chawngthu Pa Says:

    Ni e, a thupuiah pawh “Kohhran PAWL hrang hrang” (Kohhran hrang hrang ni lovin) ka ti deuh kher a ni. Catholic ho hi chu education ah hi chuan an special a ni. An tamna chhan a ni em, tih erawh ka chiang ngam lo. Catholic father ka kawm tawh ho hi chuan, “Nangni ho chu evangelism ah in sang em mai, kan tluk lo che u,” an ti ve fo. Mizo hnam tlem te, denomination feeling avanga kan inthendarh nasa lutuk hi chu eng anchhia ber nge ni dawn ni? Ka mut-mawh hnar-mawh a ni ve fo mai.

    Report this comment

  9. 9
    chhana hlawnchhing Says:

    Bengvarthlak khawp mai.

    Report this comment

  10. 10
    Sihtea Says:

    Beng i ti var sawng sawng mai.

    Report this comment

  11. 11
    bbney Says:

    Bengvarthlak khawp mai.

    Muslim pung chak lutuk leh Kristian ram ropuia (Europe leh US) naupiang tlem sawt lutuk hi mahni awmhmun atangin ka lo vei ve em em ringawt a. Kum 30 te han liam leh se Muslim zuitu hi an la tam zawk ang a, Europe-ah pawh an tam hneh har tawh lo ang. Tunah la tlem mahse an pun dan a inthlau lutuk tlat.

    Report this comment

  12. 12
    Dr Mahminga Sailo Says:

    A bengvarthlak hle mai.. (Y)
    Denomination vs universal church entirna chungchanga hmanni kan resource person sawi dan kha ka pawm zawng tak.. Hetiangin_
    Building sa pum turin, a sirah leilawn (scafolding) dawhin kil tin atangin tan kan la a. Chutiang bawkin Pa hnen thleng turin denomination hi scafolding ang deuh a ni a ti…

    Report this comment

Leave a Reply

You must be logged in to post a comment.