Manzuala Hovin Political Party Ni Lo Politics Siam That Tum ‘Mipui Pawl’ An Din
Aizawl, Jan 15 : Mizoram Public Service Commission President hlui Pu M.Lalmanzuala hovin political party ni lo, politics siam that tum “Mipui Pawl” (MPP) January ni 9 khan an din a, President Pu M.Lalmanzuala, Vice President Pu K.Lalchhunga, IPS (retd), Treasurer Pu Laldingliana Sailo, IIS (retd), Secretary Pu Vanlalruata (President, PRISM), Member-te Pu Lalsawmliana leh Pu A.C.Zonunmawia an ni. He an pawl din chhan point 10 leh an kal tum dante sawiin inrinni khan an President ho hian Aizawl Press Club-ah chanchinmite an kawm a, Pu Lalmanzuala chuan tuna Mizorama political party hruaitute chu mahni inhaivur leh mahni party tihchak chauh mai thupui bera neih an nih avangin an laka mi mangang leh beidawngte chuan Mizoram politics siamthatna zawng turin pawl thar Mipui Pawl an din ta tawp mai a ni a ti a. He pawl thar hi political party a ni lova, party politics hmanga Mizoram tihchhiat mek siam that tum pawl an ni a ti. Pu Laldingliana Sailo chuan Mizoram tluchhe mek hmu reng siin, engvanginnge a siamthatna chu kan zawn loh ang tiin he pawl thar hi an din a ni a ti. He press conference-ah hian a dintute zinga Pu A.C.Zonunmawia tih loh chu an awm vek a ni.
MPP hotute chuan tuna political party-te kalphung hi tihdanglam deuh vek tula an hriat thu sawiin party unit system leh meiber neih taka inelna hiansawrkar siamna atan tul lova thawktu, an party-in sawrkarna a siam hnua hruaitute hnena campaign hah man atana dik lo chung pawha sum siamna contract,etc. thing ngam a siam hnem avangin tihdanglam ngai hmasaber a ni an ti a. Tuna political party-ten an tih mek ang chuan party office-te chu thlawhhma berah an neih a ni tiin tha an tih loh thu an sawi a. Party office chu mi thatchhe tlankhawmna ang mai leh pawl dang sawichhiatna leh mahni pawhina awi loh khawpa mahni pawl fak vakna office a ni an ti a. Party office chu thawk hah lova sum zawnna buk ni lovin hnathawhna hmun a ni zawk tur a ni a, hetiang ‘no work culture’ hi ‘work culture’-a thlak an duh a, chuvangin MPP chu hnathawk duh leh tumte fuankhawmna pawl a ni dawn a, mimal dinhmun sawhnghehna leh hnathawk lova eizawnna nuam zawnna a ni ve dawn lo a ni an ti.
MPP-ah hian ram thatna tur duhtu pawl tawh phawt chuan an thil tum pumhlun nen an zawm turah an ngaih thu an sawi a,MPP chu kut hnathawktu pawl hrang hrang te, corruption dotu pawl te, mipui that nana thawktu pawl zawng zawngte harsatna sutkianna tura ngaihtuahhona tur, ram veitute inpui ni turah an ngaih thu an sawi.
Mizoram thatna tura tul an tih pawimawh zualte chu bial chhung mi ngei MLA-a neih a, mahni bial chhunga chen zui te, MLA nih chhunga in sak hauh loh te, kumnga daih policy leh programme siam te, a thlawna thil sem aia mi taima leh thahnem ngaite dinchhuahna kawng ngaih pawimawh te, ei leh bara intodelh te, mipui mamawh intawm (infrastucture) pawimawh kawng, hydel project, water supply, khelmual, damdawi in leh thil pawimawh dang tha leh puitling neih te, thalaite eizawnna kawng ngaihtuah te, hnathawktute hamthatna siam te, zirna kalhmang (education system) siam that te, a hmanna tur taka pawisa hman te, mipui chanai eirukleh chheprelh thin leh tul lova hmanrua leh bungraw lei te tihbo tura thuneihna sang tak nei Quality control & Disinvestment Commission siam te, Mizorama CBI-in hna an thawh theih nana kawng hawn te, a hmuna awmten an awmna hmuna sawrkar hma lakna tur an hriatlawk theih nan khawtina notice board-a an khua leh a chhehvela sawrkar hma lakna tur tar chhuah te, khaw tina inawpna tha leh mumal neih theih nan thuneihna sem zai te, ram leilung hausakna uluk zawk, renchem leh tangkai zawka hmante a ni.
MPP hian an hma lakna tur hmasa chu corruption do leh ram thatna tur kawng ruahman a ni an ti a, A rang thei ang berin khaw tin hmun tin fangin an khua leh bial mamawh mil, an hmasawnna tur ruahmanna tha an siam ang a. Kawng dik taka ram kaihruai thei tur Minister tur mi tling zawng chhuakin MLA tur pawh bial chhunga cheng nghet ngei zing atangin mipuite an tlan chhuahtir dawn a ni.
Pu Manzuala chuan tun dinhmunah chuan thingtlang lam hmasawnna tur 80% chu khawpuiah ei zawh a ni a, 20% vel hi thingtlangah kalin VCP-ten an lo la then veleh a, thingtlang mite a thleng lo tluk a ni a ti.
Inthlan an chuh dawn em tia zawhna chu ram hruaitu tur mi tling leh tlakte an zawng chhuak ang a, an duh dante tihlawhtling tura mipuiin tul an tih chuan sawrkarna siam turin an inpeih an inringtawk tih an sawi.Tuna political party-ten sawrkarna an siam ang kalphunga kal tur chuan thlan tlin pawh ni se Minister leh MLA nih an duh lo tih an sawi bawk. Corruption chungchangah chuan Vigilance Commission din a ni ang an ti. MPP President chuan corruption chu hmuh theihin an do dawn tih a sawi.
Lungleia Biak In Suasamtu Kohhran Upa Pahnih Fate Man
Kar kal taa Lunglei khawpyuia Biak In pathum suasam-tu mi pathum police-ten an man zinga pahnih chuan an tih a ni tih an inpuang a, hengte hi Lalrinmawia, 20 s/o Upa P.Ramliana (Isua Krista Kohhran), Lunglei Venglai leh C.Biaknunga,24 s/o Upa Thantluanga (BCM) ,Electric veng an ni. Lalrinmawia hi Aizawla Bible zirzo hlum, december 2006-a Lungleia hawng a ni a, C.Biaknunga hi Pathian Thu hriltu pawl hnung zui thin, chumi hnua mahni indang a, team speaker ni tawh an ni.
Police hnena an inpuan dan chuan Pathianah an beidawng a, Setana an bia a ni. Setana an biak dan chu mi reh laiin thlanmualah an kal a, syrine-in an inchiu a, an thisen an la chhuak a, chu chu Setana hnena inthawi nan an hmang thina ni.
Kar kal taa Lungleia biak in an suasam dawn pawh hian thlanmualah setana an be hmasa a, setana duhzawng nia ringin biak in hi an suasam a ni. Kar kal ta thawhtanni zan khan Electric Veng UPC biak in an suasam a, pulpit chunga Bible lian dah pawtthlerin biak in chhungah an paih darh a, pulpir chungah syrine an hnutchhiah a, Bible an pawhthlak bangah thisen an tikai a, thuhrilhna dawhkana thu ziak nawtrehin setana chhinchhiahna rinbial chhungah arsi lem an siak a ni.
Kar kal ta bawk nilaini zanah Lunglei Ramthar veng Baptist biak in leh UPC biak in, inhnaih tak chu suasam a ni bawk a.Bible an pawhthlera hal a ni a, Public Address system tihchhiat a ni a, bungraw thenkhat chu ruk chhuah a ni bawk a ni.
Oil & Gas Renchem
Vawiin atanga January ni 31 thlengin oil leh gas renchemna (oil & gas conservation fortnight) hman a ni dawn a, vawiin dar 11:30 a.m.-ah FCS&CA Conference hawlah Minister Pu K.Sangthuama’n a hawng ang.
Press Informal Meeting
Mizoram State Chief Information Commissioner Pu Robert Hrangdawla chuan vawiin dar 1:00 p.m.-ah I&PR Conference Hall-ah chanchinmite a kawm (informal meeting) dawn.
ZNP NEC Inkhawm
Vawiin dar 11:30 a.m.-ah hian ZNP National Executive Committee chu ZNP Office-ah an inkhawm dawn a, chanchinbu hi memberten kohnaah ngaih tur a ni.
Naupang Khawih Dem
Republic Veng Branch YMA chuan tun hnaia hmeichhe naupang chunga mipat hmeichhiatna kawnga mawi lo taka che MC Lalengliana leh T.Lalfamkima te chuan Mizote a timualphoin an dem tak meuh tih an sawi a, pawi an khawihnate an tuarpuiin an lainat em em thu an sawi. Hetianga an khawtlang mualphona thlentute hi an phu tawka hrem ngei an duh a, tun hnuah hetiang thil thleng tawh lo se an ti.
In Awk Hlum
Pu Zosangliana, 35, Dinthar Veng, Aizawl (A pa a thi tawh a, a nu Pi Thanpari) chu nimin zing chaw ei dawnah ama khum chungah inawk hluma hmuh a ni a, amah hi damdawi ti thin niin an sawi. Vawiinah vui a ni ang
Pastor Bial Thar 3 Hawng
Inrinni khan Presbyterian Kohhran Pator bial thar 4 Tuikual, Lungleng I, Mualpheng leh Aibawl bial hawn a ni a, nimin khan Pastor thawk lai 16 chu an awmna tur bial tharah lakluh an ni a, pastor thar 8 nemngheh an ni bawk. Propastor atan mi 15 pawh an awmna hmun turah lakluh an ni. Aizawlah Tuikual pstor bial thar chu Synod Moderator Rev.Vanlalchhunga’n a hawnga, Tuikual bial hian Tuikual, Tuikual South leh rei lo-tea kohhran indang tur Tuikual North kohhran a huam ang. He bial thar pastor chu Rev.Lalpiangthara a ni.
