mi(sual).com

Dec. 21 zana ZONET Nite-a a thusawi a ni.

Video mi lak a ni a, Lengzem leh Vanglaini a mite nen chuan a inang chiah chiah lo ang. A chhan chu a ziak ang chiah chiaha sawi loh a nei nual a.

Kum 40 kal ta ah khan zalenna kan sual a. Kan nu leh pate chu toboh leh dolung karah, thlabar leh kohamin an awm a. Kan harsatna tawhte kha i ngaihtuah let leh teh ang. India Sorkar-in ama khua leh tui Jet Fighter hmanga a kah awmchhun kan ni. Khawvela curfew rei record hmanga chhung khung kan ni. Khawvel ngaiha thil rapthlak Khaw Khawm hmangin, kan bul bal phawng hlawkin lailung dawt hmanga kar chhuah kan ni. Buai vanglai, kum 1972 ah khan hla phuah thiam V. Thangzama mangang chuan hla in heti hian kan dinhmun a sawi a, “Hmanah khan in maw, thinlai zing riai e. Min chimtu chu darfeng rual. Chengrang rawla au kan muanpui si lo. Zan mu chhin a har ngei e” a lo ti a ni.

Zanin ah hian a taka chu thil hmachhawntu te leh an thlahte kan inhmachhawn a ni. Min sawptu te chuan kan kaihza tha an chhat te te a, ‘Artui hlawh hlawh, ding le le’ tiin Sate leh sum tawktarhin UT min pe a nih kha. UT ah chuan pawisa note hmangin kan hliam min tuamsak a nih kha. Thlabara khawpuia bawkvak lut te kha Ist Class contractor te kan ni ta. Rahsi fa khan Bawrhsap nih a lo tul ta a. Zaduha’n Singkhuma a hring a, kum khat tla buh zem bula thu lungawi thinte khan vawilehkhatah kum 10 daih sum fai kan tai vawn ta thut mai a ni.

Than zawng kan thang a, thu chunga kan thang ta tlat kha a pawi a ni. Tichuan, thawh chhuah aia dil chhuah hahdam thlakzia te, hlawh chhuah aia tlawn chhuah awlsam zawkzia te kan zir fel chiah tihah thu chung bawkin State ah kan lut leh ta a ni. State ah chuan hreipui khuai tu thei min pe a, mahse tha a ngai ta si.

Thiamna aia pass zir chhuak te khan kan arkhawthimdai ta a. Dinhmun a sang a, tih theih a hniam si. Sum kan dawng tam, a dawngtu thinlung a thawleng si. Nawrh chu nunphung a lo ni a, zahawmna retheihpui ai chuan kutdawha mualpho kan thlang mek a ni. KS leh AIDS kui tiahna tawk lekin kan changkang thung a. Nimina MLA fapa khan vawiin ah BPL member nih a zak ta lo.

Pa tam zawk hian kan than a thu a ni tih kan hmu thiam tawh lo a, tho a din tum chu mi an lohna-ah kan ngai lek lek tawh a. Din tum lo-in thlamuang takin kan thu a, kal tum apiang ‘I kal sual ang e’ kan ti tlat a. Siam that aiin khap kan thlang a. Pa-ho thu sual hian thalaite kan tizak a, zahzelah puarpawleng hmuamtelel kan hmuam mek a ni.

Tichuan, chhungkua a keh a, Sorkar a rawih a. Sakhua a dal a, hnamzia leh nunphung a nghing ta a nih hi. Enge kan tih theih le?? Mahni chhungkua-ah inen ta i la. Laiking fa neiha neih, zilh loh fa kan va tam ta em!! Nu leh pa Hero hi a dik ta lo. Hero nei lo chhungkua kan va tam ta em!! Fate aia sum duh zawk patling, sum shock kulcho vanga fa zik bul kan va tam ta em. Fate hnenah petu leh puitu nih aiin dawngtu leh dangtu nih kan zirtir ta tlat a ni. YMA a chhe ta a ni lo, chhuan bengtlalo in kan chelh ta a ni zawk.

Septic Tank uiha ur a, Krismas card nalh tak thenawmte hnena thawn kan awm em? Heng thilte hi kan thawhsan thei tawh lawm ni tiin kan inau a ni. Kohhran te pawh zanin ah hian Zoramin kan au e. Lal Isua kha lo kal leh ta se, ‘I khuang la la lam rawh’ min tih kan ring lo. ‘Tho la, i awngphah la la, i ke in kal rawh’ min tih kan ring a ni. Kohhran hian midang khuang vuak ringa lam min zirtir a, kan thiam ta khawp mai. Mahni ke ringa din min zirtir tawh rawh se. Kan din phawt chuan Pathian zarah kan kal em em ang.

Pawl chungchang sawi leh teh ang. Vai sum ringa pawl dina ram siam that tum hi thut sualna a ni. Hawh u, i thawh san ang u. Tar rilru hmanga thalai pawl hruai hi a thing, thawh san a hun. Sorkar pawh kan au duh bawk. Pa tam takin State sorkar hi UT sorkar emaw kan la ti tlat a, Sorkar hnathawk kan ngah zawh poh leh thahrui aiah thau kan ngah ang. Chu chu i hria ang u. Mimal ngaihdan dik lo thawh san a ngai. Mimal chakna, hlutna, zahawmna leh zalenna kai tho lo a Kohhran leh pawl kaihthawh tum hi piansualna a ni. Chak leh zahawmna atan Kohhran leh Pawl kan hmang tur a ni lo. Kan chakna leh zahawmna hi pawlin a chhawr zawk tur a ni. Enge kan mamawh he ram hian?

He ram hian sawi thiam ni lo in, thawk thiam a mamawh ta e. Sum sawi chhuak thei aiin hmuh chhun hmang dik thei a mamawh e. Sual ngaidamtu ni lo in, sual hrem ngamtu hruaitu a mamawh e. Mizoram hian miracle a mamawh lo. A mamawh chu THU TAK a ni. Mi hausa te pawh kan au duh a che u. Kalkawng siam that lama thahnemngai si lo a, Mercedez car neih leh BPL ni chunga cellphone neih hi a zahthlak lam a inang chiah. In leh lo benbel ringawt hi patling dam chhan a tling lo.

Kan suangtuahna chu level pui hriatna lamah a thangharh a, thlam-ah a tawp!! Kan mihausa ten sangha dil thianghlimna min tihchingpen sak a, mi eizawnna chu nawmsip bawlna ang lekah an chantir a. Thlam thianghlimna min tihchingpen sak leh mek a ni. Nawmsip thinlungin ram a chawm ngai lo. hei hian thingtlang loneitu te mit note a khawih a ni tih hi Zoramin lo hre rawh se. Kan rama Kohhran leh khawtlang hruaitute vir buaina tam tak hi hmeichhe lawm tawk thil a ni.

Chuvangin infrastructure aiah incheina kan ngaihven tawh zawk a nih hi. Mizo mipa ah hian tute nge thang le? A taka hna thawk a, mahni thawh chhuah chiah ringa nung, sum chang thlai hmanga bum fin tawh kuthnathawk, zokhaw pa-ho an thangharh hmasa a ni. Heti ringawt chuan kan ral dawn a ni tih hria-in an inhlawm khawm mek. Lehkha thiam kan tihte aiin an thangharh hmasa dawn. A dawt leha thangharh hmasa chu Taxi driver an ni. Hnathawh hun chhung tirei tura a huho-a Sorkar nawr hmasa ber chu Taxi Driver an ni. Ni kar dana thawh hi tlem an ti tawh a, nitin a thawh duhin nawrh an duh hial a ni. Chu chu khawvel than awmdan tur a lo ni zawk. Taxi driver mah an thawh theih chuan Mizopa ho hian zaithiam zunleng thawhsanin Hydel Power zunzam pawh kan chhaih ve thei tawh lawm ni?

Tho tur chuan harh a ngai. A zir tlem zawk Burma tha ringa tawh theih a ni lo. Ding tur chuan tha a ngai. A ngal ria zawk Vai ngal ringa din tum chi a ni lo. Tho leh tur hian tha kan nei ta lo em ni? He Zoram hian thahruai a nei ta lo em ni? Keini ho hian chu tribal chawn sek power chu kan kaitho leh dawn lawm ni? Thalaite u, in nu leh pa te thu sual hi demna hun in nei ta lo e. Zoram buai leh a hnu-a variety shock te kha min tukzaltu ni lo in, min tichak a, mahni ke-a min kal tirtu-ah i hmang tawh ang u hmiang.

Lenrualte u, khua a var dawn ta. Hmangaih ram, mawi takin a lo lang dawn asin. Thim thil tihte eng thuam a ngai ta. Leng dang mi chu lal lai par tlanin, min ngai lo ten hlimin an leng asin. Chuvangin aw Zoram, chhung lam leh pawn lama fai i tlin i. I dinna hi hmun thianghlim a ni. ‘Tho La, Ding Ta Che’, I hliam a dam e. I tha thumte a kiang e. Hnutiang hawi lo-in ram tuan rel ta che, Khuavel i la chhing ngei ang’ tiin kan Hmangaih Zoram hi duhsakin kan au a ni.

Similar Posts:

• Bureaucratic Corruption a tam zawk em Political Corruption aiin Mizoramah?
• MIPUI TANGRUAL PAWL Press Release
• Kohhran chu kohhran…
• Mizoram Famine Emergency Committee-a tel hi a zahthlak
• UPC pawl pahnih an inkhawmho

Recent Posts:

• Pathian, Hun leh Chatuan
• Computer enkawl dan
• Mizoram – Was it on India?
• UNIVERSE PIAHAH ENGE AWM?
• ZOFOOTY.COM Awards sem a ni leh dawn

This entry was posted on Tuesday, January 16th, 2007 at 3:52 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.